Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 10 Bible Online

ወንጌል ዘማርቆስ 10 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 10

¹ ወተንሢኦ እምህየ ሖረ ብሔረ ይሁዳ እንተ ማዕዶተ ዮርዳኖስ ወሖሩ ካዕበ ምስሌሁ ሕዝብ ወመሀሮሙ በከመ ያለምድ።

²ወመጽኡ ፈሪሳውያን ወተስእልዎ ወይቤልዎ ይከውኖሁ ለብእሲ ኀዲገ ብእሲቱ እንዘ ያሜክርዎ።

³ወአውሥአ እግዚእ ኢየሱስ ወይቤሎሙ ምንተኑመ አዘዘክሙ ሙሴ።

⁴ ወይቤልዎ አዘዘነ ሙሴ ንጽሐፍ ላቲ መጽሐፈ ኅዳጋቲሃ ወንድኀራ።

⁵ወአውሥአ እግዚእ ኢየሱስ ወይቤሎሙ በከመ እከየ ልብክሙ ወሀበክሙ ሙሴ ዘንተ ትእዛዘ ትድኀሩ አንስቲያክሙ።

⁶ ወእምፍጥረትሰ ተባዕተ ወአንስተ ገብረ እግዚአብሔር ።

⁷ ወበእንተ ዝንቱ የኀድግ ብእሲ አባሁ ወእሞ ወይተልዋ ለብእሲቱ።

⁸ወይከውኑ ክልኤሆሙ አሐደ ሥጋ ናሁኬ ኢኮኑ ክልኤተ አላ አሐዱ ሥጋ እሙንቱ።

⁹ ዘእግዚአብሔር እንከ አስተፃመረ ሰብእ ኢይፍልጥ።

¹⁰ወበቤት ካዕበ ተስእልዎ አርዳኢሁ በእንተ ዝንቱ ነገር።

¹¹ወይቤሎሙ ዘደኀረ ብእሲቶ ወሖረ ካልእተ ዘመወ ላዕሌሃ።

¹²ወእንተሂ ደኀራ ምታ ወሖረት ካልአ ዘመወት።

¹³ ወአምጽኡ ኀቤሁ ሕፃናተ ይግሥሦሙ ወገሠጽዎሙ አርዳኢሁ ለእለ አቅረብዎሙ።

¹⁴ወርእዮ እግዚእ ኢየሱስ ተምዐ ወይቤሎሙ ኅድጉ ሕፃናተ ይምጽኡ ኀቤየ ወኢትክልእዎሙ እስመ ለዘከመ እሉ ይእቲ መንግሥተ እግዚአብሔር ።

¹⁵ አማን እብለክሙ ዘኢተቀበላ ለመንግሥተ እግዚአብሔር ከመ ሕፃን ኢይበውኣ።

¹⁶ ወአንበሮሙ ውስተ ሕፅኑ ወወደየ እዴሁ ዲቤሆሙ ወባረኮሙ።

¹⁷ወእንዘ የሐውር በፍኖት መጽአ አሐዱ ብእሲ ወሰገደ ሎቱ ወይቤሎ ሊቅ ኄር ምንተ እግበር ከመ እረስ ሕይወተ ዘለዓለም።

¹⁸ወይቤሎ እግዚእ ኢየሱስ ምንተ ትብለኒ ኄር አልቦ ኄር ዘእንበለ አሐዱ እግዚአብሔር ።

¹⁹ ተአምር ትእዛዛተ ኢትሑር ብእሲተ ብእሲ ኢትቅትል ነፍሰ ኢትስርቅ ኢትኩን ስምዐ በሐሰት ኢትሂድ ወአክብር አባከ ወእመከ።

²⁰ወአውሥአ ወይቤሎ ሊቅ ዘንተሰ ኵሎ ዐቀብኩ እምንእስየ።

²¹ ወነጸሮ እግዚእ ኢየሱስ ወአፍቀሮ ወይቤሎ እመሰ ትፈቅድ ፍጹመ ትኩን አሐቲ ተርፈተከ ሑር ሢጥ ኵሎ ዘብከ ወሀብ ለነዳያን ወትረክብ መዝግበ በሰማያት ወጹር መስቀለ ሞትከ ወነዓ ትልወኒ።

²²ወተከዘ በእንተ ዝንቱ ነገር ወሖረ ትኩዞ እስመ ብዙኅ ጥሪቱ።

²³ወነጸሮሙ እግዚእ ኢየሱስ ለአርዳኢሁ ወይቤሎሙ እፎ ዕፁብ ለዘቦ ንዋይ በዊእ ውስተ መንግሥተ ሰማያት።

²⁴ ወአንከሩ አርዳኢሁ ዘንተ ነገረ ወካዕበ ይቤሎሙ እግዚእ ኢየሱስ ለአርዳኢሁ ደቂቅየ እፎ ዕፁብ ለእለ ቦሙ ንዋይ[9] በዊእ ውስተ መንግሥተ እግዚአብሔር ።

²⁵ይቀልል ይኅልፍ ገመል እንተ ስቍረተ ሐጽ እምባዕል ይባእ ውስተ መንግሥተ እግዚአብሔር ።

²⁶ወፈድፋደ አንከሩ ወተባሀሉ በበይናቲሆሙ መኑ እንከ ይክል ድኂነ።

²⁷ወነጸሮሙ እግዚእ ኢየሱስ ወይቤሎሙ በኀበ ሰብእ ኢይትከሀል ዝ ወበኀበ እግዚአብሔርሰ ኵሉ ይትከሀል።

²⁸ወአኀዘ ጴጥሮስ ይበሎ ናሁኬ ንሕነ ኀደግነ ኵሎ ወተሎናከ።

²⁹ወአውሥአ እግዚእ ኢየሱስ ወይቤሎሙ አማን እብለክሙ አልቦ ዘየኀድግ አብያተ ወአኀወ ወአኃተ ወአበ ወእመ ወብእሲተ ወውሉደ ወገራውሀ በእንቲኣየ ወበእንተ ወንጌልየ።

³⁰ዘኢይትዐሰይ ምእተ ምክዕቢተ በዝንቱ ዓለም አብያተ ወአኀወ ወአኃተ ወአበ ወእመ ወውሉደ ወገራውሀ በስደት ወበዓለምሰ ዘይመጽእ ሕይወተ ዘለዓለም።

³¹ወብዙኃን ቀደምት ይከውኑ ደኀርተ ወደኀርትኒ ይከውኑ ቀደምተ።

³²ወበፍኖት እንዘ የዐርጉ ኢየሩሳሌም ይቀድሞሙ እግዚእ ኢየሱስ ወደንገፁ ወእለሂ ይተልውዎ ፈርሁ ወነሥኦሙ ለዐሠርቱ ወክልኤቱ ወአኀዘ ይንግሮሙ ዘሀለዎ ይርከቦ።

³³ ወይቤሎሙ ናሁ ነዐርግ ኢየሩሳሌም ወይእኅዝዎ ለወልደ ዕጓለ እመሕያው ሊቃነ ካህናት ወጸሐፍት ወይኴንንዎ በሞት ወይሜጥውዎ ለአሕዛብ፤

³⁴ወይሣለቁ ላዕሌሁ ወይዌርቅዎ ወይቀሥፍዎ ወይቀትልዎ ወይትነሣእ በሣልስት ዕለት።

³⁵ ወእንዘ የሐውሩ ምስሌሁ ያዕቆብ ወዮሐንስ ክልኤሆሙ ደቂቀ ዘብዴዎስ ይቤልዎ ሊቅ ንፈቅድ ትግበር ለነ ዘሰአልናከ።

³⁶ወይቤሎሙ ምንተ ትፈቅዱ እግበር ለክሙ።

³⁷ወይቤልዎ ሀበነ ንንበር አሐድነ በየማንከ ወአሐድነ በጸጋምከ በውስተ ስብሐቲከ።

³⁸ ወይቤሎሙ እግዚእ ኢየሱስ ኢተአምሩ ዘትስእሉ ትክልኑ እንከ ሰትየ ጽዋዕ ዘአነ እሰቲ ወጥምቀትየኒ ዘአነ እጠመቅ ትጠመቁኑ።

³⁹ ወይቤልዎ እወ ንክል ወይቤሎሙ እግዚእ ኢየሱስ ጽዋዕየሰ ዘአነ እሰቲ ትሰትዩ ወጥምቀትየኒ ዘአነ እጠመቅ ትጠመቁ።

⁴⁰ወነቢረሰ በየማንየ ወበጸጋምየ አኮ አነ ዘእሁበክሙ አላ ለካልኣን አስተዳለወ ሎሙ አቡየ ዘበሰማያት።

⁴¹ወሰሚዖሙ ዐሠርቱ ተምዑ ዲበ ክልኤቱ አኀው ያዕቆብ ወዮሐንስ።

⁴²ወጸውዖሙ እግዚእ ኢየሱስ ወይቤሎሙ ኢተአምሩኑ ከመ መላእክቲሆሙ ለአሕዛብ ይኴንንዎሙ ወዐበይቶሙ ይቀንይዎሙ።

⁴³ወለክሙሰ አኮ ከማሁ አላ ዘይፈቅድ እምኔክሙ ይኩን ሊቀ ይኩንክሙ ገብረ።

⁴⁴ ወዘይፈቅድ እምኔክሙ ይኩን ዐቢየ ይኩንክሙ ላእከ።

⁴⁵እስመ ወልደ ዕጓለ እመሕያውኒ ኢመጽአ ከመ ይትለአክዎ ዘእንበለ ዳእሙ ከመ ይትለአክ ወከመ ይቤዝዎሙ ለብዙኃን በነፍሱ።

⁴⁶ ወቦአ ኢያሪሆ ወወፂኦ እምኢያሪሆ ወአርዳኢሁኒ ምስሌሁ ወሰብእኒ ብዙኅ ወሀሎ ጤሜዎስ ወልደ በርጤሜዎስ ዕዉር ይነብር ውስተ ፍኖት ወይስእል።

⁴⁷ወሰሚዖ ከመ ኢየሱስ ናዝራዊ ውእቱ ከልሐ ወይቤ ተሣሀለኒ ኢየሱስ ወልደ ዳዊት።

⁴⁸ወገሠጽዎ ብዙኃን ከመ ያርምም ወአፈድፈደ ከሊሐ ወይቤ ወልደ ዳዊት ተሣሀለኒ።

⁴⁹ወቆመ እግዚእ ኢየሱስ ወአዘዘ ይጸውዕዎ ለውእቱ ዕዉር ወጸውዕዎ ወይቤልዎ እመን ወተንሥእ ወይጼውዐከ ሊቅ።

⁵⁰ወተንሥአ ወገደፈ ልብሶ[10] ወመጽአ ኀበ እግዚእ ኢየሱስ።

⁵¹ወአውሥአ እግዚእ ኢየሱስ ወይቤሎ ምንተ ትፈቅድ እግበር ለከ ወይቤሎ ውእቱ ዕዉር ረቡኒ ከመ እርአይ።

⁵²ወይቤሎ እግዚእ ኢየሱስ ሑር ሃይማኖትከ አሕየወተከ ወርእየ ሶቤሃ ወተለዎ በፍኖት።