Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 11 Bible Online

ወንጌል ዘማርቆስ 11 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 11

¹ ወአልጺቆሙ ኢየሩሳሌም ኀበ ቤተ ፋጌ ወቢታንያ እንተ ገቦ ደብረ ዘይት ፈነወ ክልኤተ እምአርዳኢሁ።

²ወይቤሎሙ ሑሩ ውስተ ሀገር እንተ ቅድሜክሙ ወበዊአክሙ ትረክቡ ሶቤሃ ዕዋለ አድግ እሱረ ዘኢተጽዕኖ ሰብእ ዲቤሁ ፍትሕዎ ወአምጽእዎ ሊተ።

³ወለእመቦ ዘይቤለክሙ ምንተ ትገብሩ በሉ እግዚኡ ይፈቅዶ ወሶቤሃ ይፌንወክሙ ዝየ።

⁴ወሖሩ ወረከቡ ዕዋለ እሱረ ኀበ አንቀጽ ውስተ ፍኖት ወፈትሕዎ።

⁵ወይቤልዎሙ እለ ይቀውሙ ህየ ምንተ ትገብሩ ዘትፈትሑ ዕዋለ።

⁶ወይቤልዎሙ በከመ አዘዞሙ እግዚእ ኢየሱስ ወኀደግዎሙ።

⁷ወወሰድዎ ለዕዋል ኀበ እግዚእ ኢየሱስ ወረሐኑ ላዕሌሁ አልባሲሆሙ ወአጽዐንዎ።

⁸ወብዙኃን እለ ነጸፉ ቈጽለ መቲሮሙ እምዕፀው ወቦ እለ ነጸፉ አልባሲሆሙ ውስተ ፍኖት።

⁹ እለሂ ይመርሑ ወእለሂ ይተልዉ ይኬልሑ ወይብሉ ሆሣዕና «ቡሩክ ዘይመጽእ በስመ እግዚአብሔር ።»

¹⁰ወቡርክት እንተ ትመጽእ መንግሥት በስመ እግዚአብሔር እንተ አቡነ ዳዊት ሆሣዕና በአርያም።

¹¹ ወቦአ እግዚእ ኢየሱስ ኢየሩሳሌም ኀበ ቤተ መቅደስ ወርእዮ ኵሎ ሶበ መስየ ሖረ ቢታንያ ምስለ ዐሠርቱ ወክልኤቱ።

¹² ወበሳኒታ ወፂኦ እምቢታንያ ርኅበ፤

¹³ወርእየ በለሰ እምርኁቅ ወባቲ ቈጽል ወሖረ ይርአይ እመቦ ዘይረክብ ፍሬ በውስቴታ ወበጺሖ ኀቤሃ አልቦ ዘረከበ ዘእንበለ ቈጽል ባሕቲቱ እስመ ኢኮነ ጊዜሁ ለበለስ።

¹⁴ወአውሥአ ወይቤላ አልቦ እንከ ዘይበልዕ ፍሬ እምኔኪ ለዓለም ወሰምዕዎ አርዳኢሁ።

¹⁵ ወበጽሐ ኢየሩሳሌም ወቦአ ቤተ መቅደስ ወአኀዘ ይስድድ እለ ይሠይጡ ወይሣየጡ በምኵራብ ወገፍትዐ ማእዳቲሆሙ ለመወልጣን ወመናብርቲሆሙ ለእለ ይሠይጡ ርግበ።

¹⁶ወከልአ አልቦ ዘየኀልፍ ንዋየ እንተ ምኵራብ።

¹⁷ ወመሀሮሙ ወይቤሎሙ አኮኑ ጽሑፍ ዘይብል «ቤትየሰ ቤተ ጸሎት ይከውን ለኵሉ አሕዛብ» ወአንትሙሰ ረሰይክምዎ በኣተ ፈያት ወሰረቅት።

¹⁸ወሰምዕዎ ሊቃነ ካህናት ወጸሐፍት ወኀሠሡ እንተ ኀበ ይቀትልዎ ወፈርህዎ እስመ ኵሉ ሕዝብ ያነክሩ ምህሮቶ።

¹⁹ወእምከመ መስየ ይወፅእ አፍኣ እምሀገር።

²⁰ወበግብአቶሙ በነግህ ረከብዋ ለይእቲ በለስ ይብስተ እምሥርዋ።

²¹ወተዘከረ ጴጥሮስ ወይቤሎ ሊቅ ነያ እንታክቲ በለስ እንተ ረገምካ የብሰት።

²² ወአውሥአ እግዚእ ኢየሱስ ወይቤሎሙ ሃይማኖተ እግዚአብሔር ርከቡ፤[11]

²³ አማን እብለክሙ ለእመ ትብልዎ ለዝ ደብር ተንሥእ ወተወረው ውስተ ባሕር ወኢናፈቅሙ በልብክሙ ወተአመንክሙ ከመ ዘነበብክሙ ይከውን ወትረክቡ።

²⁴ ወበእንተ ዝንቱ እብለክሙ ኵሎ ዘጸለይክሙ ወዘሰአልክሙ እንዘ ትትአመኑ ከመ ትረክቡ ወይከውነክሙ።

²⁵ ወሶበሂ ትጼልዩ ኅድጉ አበሳ ለቢጽክሙ ዘተሓየስክምዎሙ ከመ ይኅድግ ለክሙ አቡክሙ ዘበሰማያት አበሳክሙ።

²⁶ ወእመሰ አንትሙ ኢኀደግሙ አቡክሙኒ ሰማያዊ ኢየኀድግ ለክሙ አበሳክሙ።

²⁷ ወሖረ ካዕበ ኢየሩሳሌም ወእንዘ ያንሶሱ በምኵራብ መጽኡ ኀቤሁ ሊቃነ ካህናት ወጸሐፍት ወረበናት።

²⁸ወይቤልዎ በመባሕተ መኑ ትገብር ከመዝ ወመኑ አብሐከ ትግበር ዘንተ።

²⁹ወይቤሎሙ እግዚእ ኢየሱስ አነሂ እሴአለክሙ አሐተ ነገረ ወንግሩኒ ወአነሂ እነግረክሙ በመባሕተ መኑ እገብር ዘንተ።

³⁰ጥምቀቱ ለዮሐንስ እምአይቴኑ እምሰማይኑ አው እምሰብእኑ አይድዑኒ።

³¹ወተባሀሉ በበይናቲሆሙ ለእመ ንብሎ እምሰማይ ይብለነ ለምንት ኢአመንክምዎ።

³²ወለእመኒ ንብሎ እምሰብእ ንፈርሆሙ ለሕዝብ እስመ ኵሎሙ ከመ ነቢይ ይሬእይዎ ለዮሐንስ።

³³ወተሰጥውዎ ለእግዚእ ኢየሱስ ወይቤልዎ ኢነአምር። ወአውሥአ እግዚእ ኢየሱስ ወይቤሎሙ አነኒ ኢይነግረክሙ በመባሕተ መኑ እገብር ከመዝ።