Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 12 Bible Online

ወንጌል ዘማርቆስ 12 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 12

¹ ወአኀዘ ይመስል ሎሙ ወይቤሎሙ ብእሲ ተከለ ወይነ ወፀቈኖ ወአክረየ ምክያደ ወሐነጸ ማኅፈደ ውስቴቱ ወሤመ ሎቱ ገባረ ወዐቀብተ ወይን ወነገደ።

²ወፈነወ ገብሮ ኀበ ዐቀብተ ወይን በጊዜሁ ያምጽእ ሎቱ እምፍሬ ወይኑ።

³ወአኀዝዎ ወቀሠፍዎ ወፈነውዎ ዕራቆ።

⁴ወካዕበ ፈነወ ኀቤሆሙ ካልአ ገብሮ ወኪያሁኒ ወገርዎ ወኰርዕዎ ወፈነውዎ አኅሲሮሙ።

⁵ወፈነወ ሣልሳየኒ[12] ገብሮ ወኪያሁኒ ቀተልዎ ወፈነወ ባዕዳነኒ አግብርተ ብዙኃነ ቦ ዘቀሠፉ ወቦ ዘቀተሉ።

⁶ወቦቱ አሐዱ ወልድ ዘያፈቅር ወፈነዎ ኀቤሆሙ ድኅረ ኵሉ እንዘ ይብል የኀፍርዎ ለወልድየሰ።

⁷ወይቤሉ ገባር ዝንቱ ውእቱ ወራሲሁ ንዑ ንቅትሎ ወንርከብ ርስቶ።

⁸ ወአኀዝዎ ወአውፅእዎ አፍኣ እምዐጸደ ወይን ወቀተልዎ።

⁹ምንተ እንከ ይሬስዮሙ በዓለ ወይን ይመጽእ ወይቀትሎሙ ለእልክቱ ገባር ወይሁብ ወይኖ ለካልኣን።

¹⁰ ወዘኒ ኢያንበብክሙኑ ውስተ መጽሐፍ «እብን እንተ መነንዋ ነደቀት ይእቲ ኮነት ውስተ ርእሰ ማእዘንት።

¹¹እምኀበ እግዚአብሔር ኮነት ዛቲ ወነካር ይእቲ ለአዕይንቲነ።»

¹²ወፈቀዱ የአኀዝዎ ወፈርህዎሙ ለሕዝብ እስመ አእመሩ ከመ በእንቲኣሆሙ ይቤ ዘንተ አምሳለ ወኀደግዎ ወሖሩ።

¹³ ወፈነዉ ኀቤሁ ፈሪሳውያን ሰብአ ምስለ ሰብአ ሄሮድስ ከመ ያስሕትዎ በቃሉ።

¹⁴ወመጽኡ ኀቤሁ ወይቤልዎ ሊቅ ነአምር ከመ ጻድቅ አንተ ወአልቦ ዘያኀዝነከ ወኢመኑሂ፤ ወኢታደሉ ለገጸ ሰብእ ወበጽድቅ ትሜህር ፍኖተ እግዚአብሔር ይከውንሁ ነሀብ ጸባሕተ ዲናር ለቄሳር[13] አው አልቦ።

¹⁵ወአእመሮሙ እግዚእ ኢየሱስ ጕሕሉቶሙ ወይቤሎሙ ለምንት ታሜክሩኒ አምጽኡ ዲናረ ወአርእዩኒ።

¹⁶ወአምጽኡ ሎቱ ወይቤሎሙ ዘመኑ ዝንቱ መልክኡ ወመጽሐፉ ወይቤልዎ ዘቄሳር።

¹⁷ ወአውሥአ እግዚእ ኢየሱስ ወይቤሎሙ ሀቡ ዘቄሳር ለቄሳር ወዘእግዚአብሔርኒ ግበሩ ለእግዚአብሔር ወአንከርዎ።

¹⁸ ወመጽኡ ኀቤሁ ሰዱቃውያን እለ ይብሉ አልቦ ትንሣኤ ምዉታን።

¹⁹ ወተስእልዎ ወይቤልዎ ሊቅ ሙሴ ጸሐፈ ለነ ለእመቦ ዘሞተ እኁሁ ወኀደገ ብእሲቶ እንዘ አልቦ ውሉድ ያውስባ እኁሁ ለብእሲቱ ወያቅም ዘርዐ ለእኁሁ።

²⁰ሀለዉ እንከ በኀቤነ ሰብዐቱ አኀው ወአውሰበ ዘይልኅቅ ብእሲተ ወሞተ እንዘ አልቦ ውሉድ።

²¹ወአውሰባ ካልኡኒ ወሞተ እንዘ አልቦ ውሉድ ወሣልሱኒ ከማሁ።

²²ወእስከ ሰብዐቲሆሙ አውሰብዋ ወኢኀደጉ ውሉደ ወድኅረ ኵሎሙ ሞተት ይእቲ ብእሲት።

²³አመ የሐይዉ እንከ ምዉታን ለመኑ እምኔሆሙ ትከውኖ ብእሲተ እስመ ሰብዐቲሆሙ አውሰብዋ።

²⁴ወአውሥአ እግዚእ ኢየሱስ ወይቤሎሙ አኮኑ በእንተ ዝንቱ ትስሕቱ በኢያእምሮ መጻሕፍት ወኢኀይለ እግዚአብሔር ።

²⁵ወአመሰ የሐይዉ ምዉታን ኢያወስቡ ወኢይትዋሰቡ አላ ከመ መላእክተ እግዚአብሔር እሙንቱ በሰማያት።

²⁶ ወከመሰ የሐይዉ ምዉታን ኢያንበብክሙኑ በውስተ መጽሐፈ ሙሴ ዘይቤሎ እግዚአብሔር በኀበ ዕፀ ጳጦስ እንዘ ይብል «አነ ውእቱ እግዚአብሔር አምላክከ አምላከ አብርሃም ወአምላከ ይስሐቅ ወአምላከ ያዕቆብ።»

²⁷ኢኮነኬ አምላከ ምዉታን አላ አምላከ ሕያዋን ውእቱ ወአንትሙሰ ብዙኀ ትጌግዩ።

²⁸ ወመጽአ አሐዱ ጸሓፊ ሰሚዖ ከመ ተኃሠሥዎ ወሶበ ርእየ ከመ ሠናየ ተሰጥዎሙ ተስእሎ፤ ወይቤሎ አይኑ ትእዛዝ ቀዳሚት እምኵሉ።

²⁹ ወአውሥአ እግዚእ ኢየሱስ ወይቤሎ ዛቲ ይእቲ ቀዳሚት እምኵሉ ትእዛዝ «ስማዕ እስራኤል እግዚአብሔር አምላክከ[14] እግዚአብሔር አሐዱ ውእቱ።

³⁰ወአፍቅሮ ለእግዚአብሔር አምላክከ በኵሉ ልብከ ወበኵሉ ነፍስከ ወበኵሉ ኅሊናከ ወበኵሉ ኀይልከ» ዛቲ ይእቲ ቀዳሚት ትእዛዝ።

³¹ ወካልእታሂ እንተ ትመስላ ዛቲ ይእቲ አፍቅር ቢጸከ ከመ ነፍስከ ወዘየዐቢ እምእላንቱ ትእዛዛት አልቦ።

³²ወይቤሎ ውእቱ ጸሓፊ ሠናየ ትቤ ሊቅ አማን አሐዱ ውእቱ እግዚአብሔር ወአልቦ ባዕድ ዘእንበሌሁ።

³³ ወከመ ታፍቅሮ በኵሉ ልብከ ወበኵሉ ነፍስከ ወበኵሉ ኅሊናከ ወበኵሉ ኀይልከ ወከመ ታፍቅር ቢጸከ ከመ ነፍስከ ወዝንቱ ይኄይስ እምኵሉ መባእ ወእምኵሉ መሥዋዕት።

³⁴ወርእዮ ከመ ጠቢብ ውእቱ ይቤሎ እግዚእ ኢየሱስ ኢኮንከ ርኁቀ እመንግሥተ እግዚአብሔር ወአልቦ እንከ ዘተኀበለ ይሰአሎ።

³⁵ ወይቤሎሙ እግዚእ ኢየሱስ እንዘ ይሜህሮሙ በምኵራብ እፎ ይብሉ ጸሐፍት ክርስቶስ ወልደ ዳዊት ውእቱ።

³⁶ ወለሊሁሰ ዳዊት ይቤ በመንፈስ ቅዱስ «ይቤሎ እግዚእ ለእግዚእየ ንበር በየማንየ እስከ አገብኦሙ ለጸላእትከ ታሕተ መከየደ እገሪከ።»

³⁷ዘለሊሁ እንከ ዳዊት እግዚእየ ይቤሎ እፎ እንከ ይከውኖ ወልደ ወኵሉ ሕዝብ ሠናየ ያጸምዕዎ።

³⁸ ወይቤሎሙ እንዘ ይሜህሮሙ ዑቁ ወተዐቀቡ እምጸሐፍት እለ ይፈቅዱ ያንሶስዉ ተላቢሶሙ ወይትአምኅዎሙ በምሥያጣት።

³⁹ወያፈቅሩ ነቢረ ፍጽም በውስተ አዕዳዋት ወርእሰ ምርፋቃት በውስተ ምሳሓት።

⁴⁰እለ ይውኅጥዎን ለአብያተ መበለታት ወይትሜየኑ በነዋኅ ጸሎቶሙ እሉ ይረክቡ ዘየዐቢ ኵነኔ።

⁴¹ ወነቢሮ እግዚእ ኢየሱስ[15] መንጸረ ሙዳየ ምጽዋት ይሬኢ ሰብአ ዘያበውኡ ጸራይቀ ወይወድዩ ውስተ ሙዳየ ምጽዋት ወብዙኃን አብዕልት እለ አብኡ ብዙኀ።

⁴²ወመጽአት አሐቲ ብእሲት ነዳዪት መበለት ወአብአት ክልኤ ጸራይቀ ዘይብልዎ ቆንደራጢስ።

⁴³ወጸውዖሙ ለአርዳኢሁ ወይቤሎሙ አማን እብለክሙ ከመ ዛቲ ነዳዪት መበለት አብዝኀት አብኦ እምኵሎሙ እለ አብኡ ውስተ ሙዳየ ምጽዋት።

⁴⁴ እስመ ኵሎሙ እለ አብኡ እምተረፎሙ አብኡ ወይእቲሰ እምተጽናሳ ኵሎ ዘባቲ አብአት ወኵሎ መንበርታ።