Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 13 Bible Online

ወንጌል ዘማርቆስ 13 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 13

¹ ወወፂኦ እምኵራብ ይቤሎ አሐዱ እምአርዳኢሁ ሊቅ ርኢ ምንተ ይመስል ንድቁ ወእበኒሁ።

²ወአውሥአ እግዚእ ኢየሱስ ወይቤሎ ትሬኢኑ ዘንተ ኵሎ ንድቀ ዐቢየ ኢይትኀደግ ዝየ እብን ዲበ እብን ዘኢይትነሠት።

³ወእንዘ ይነብር ውስተ ደብረ ዘይት አንጻረ ምኵራብ ተስእልዎ በባሕቲቶሙ ጴጥሮስ ወያዕቆብ ወዮሐንስ ወእንድርያስ።

⁴ወይቤልዎ ንግረነ ማእዜ ይከውን ዝንቱ ወምንት ትእምርቱ አመ ይከውን ዝንቱ ኵሉ።

⁵ወአውሥአ እግዚእ ኢየሱስ ወአኀዘ ይበሎሙ ዑቁ ኢያስሕቱክሙ።

⁶እስመ ብዙኃን ይመጽኡ በስምየ እንዘ ይብሉ አነ ውእቱ ክርስቶስ ወያስሕትዎሙ ለብዙኃን።

⁷ወአመ ሰማዕክሙ አጽባእተ ወድምፀ ጸባኢት ኢትደንግፁ እስመ ሀለዎ ይኩን ዝንቱ ወባሕቱ አኮ ሶቤሃ ዘየኀልቅ።

⁸ወይትነሣእ ሕዝብ ዲበ ሕዝብ ወነገሥት ላዕለ ነገሥት ወይከውን ድልቅልቅ በበ ብሔሩ ወይመጽእ ረኃብ ወዝንቱ ቀዳሚሁ ለፃዕር።

⁹ ወአንትሙሰ ዑቁ ርእሰክሙ ወይወስዱክሙ አዕዋዳተ ወይቀሥፉክሙ በመኳርብት ወይትባጽሑክሙ ኀበ መላእክት ወነገሥት በእንቲኣየ ከመ ይኩን ስምዐ ላዕሌሆሙ።

¹⁰ ወለኵሎሙ አሕዛብ ይደሉ ይቅድሙ ወይስብክዎ ለወንጌል።

¹¹ወሶበሂ ያበጽሑክሙ ወይሜጥዉክሙ ኢትቅድሙ ተኀልዩ ዘትብሉ ወዘትነብቡ ዘአንበበክሙ ሶቤሃ ንቡ እስመ ኢኮንክሙ አንትሙ ዘትነብቡ ዘእንበለ መንፈስ ቅዱስ ።

¹²ወያገብእ እኅው እኅዋሁ ለሞት ወአብ ውሉዶ ወውሉድ ይትነሥኡ ዲበ አዝማዲሆሙ ወይቀትልዎሙ።

¹³ወትከውኑ ጽሉኣነ በኀበ ኵሉ ሰብእ በእንተ ስምየ ወዘሰ አዝለፈ ትዕግሥቶ ውእቱ ይድኅን።

¹⁴ ወሶበ ርኢክሙ ኀሳሮ ለሙስና ዘይቤ ዳንኤል ነቢይ ዘይቀውም ውስተ መካን ቅዱስ ኀበ ኢይደሉ ዘያነብብ ለይለቡወይእተ አሚረ እለ ውስተ ይሁዳ ይጐዩ ውስተ አድባር።

¹⁵ወዘኒ ውስተ ናሕስ ሀሎ ኢይረድ ውስተ ቤት ወኢይባእ ይንሣእ ዘኮነ እምቤት።

¹⁶ወዘኒ ገዳመ ሀሎ ኢይትመየጥ ድኅሬሁ ይንሣእ ልብሶ።

¹⁷ወባሕቱ አሌ ሎን ለፅኑሳት ወለእለ የሐፅና ውእተ አሚረ።

¹⁸ወጸልዩ ከመ ኢይኩን ጕያክሙ በክረምት።

¹⁹ እስመ ይከውን ውእተ አሚረ ዐቢይ ሕማም ዘእምአመ ኮነ ዓለም ኢኮነ ከማሁ ወእምአመ ፈጠረ እግዚአብሔር ዓለመ ኢኮነ ወኢይከውንሂ።

²⁰ወሶበ አኮ ዘአኅጸሮን እግዚአብሔር ለእማንቱ መዋዕል እምኢድኅነ ኵሉ ዘሥጋ[16] ወባሕቱ በእንተ ኅሩያኒሁ እለ ኀረየ እግዚአብሔር የኀጽራ እማንቱ መዋዕል።

²¹ወይእተ አሚረ እመቦ ዘይቤለክሙ ነዋ ዝየ ሀሎ ክርስቶስ ወነዋ ከሃከ ኢትእመኑ።

²²እስመ ይመጽኡ ሐሳውያነ መሲሕ ወሐሳውያነ ነቢያት ወይገብሩ ተአምረ ወመንክረ ከመ ያስሕቱ ወሶበሰ ይትከሀሎሙ እምአስሐትዎሙ ለኅሩያንሂ።

²³ወአንትሙሰ ዑቁ ናሁ አቅደምኩ ነጊሮተክሙ ኵሎ።

²⁴ወባሕቱ ይእተ አሚረ ምስለ ዝ ኵሉ ሕማም ፀሓይኒ ይጸልም ወወርኅኒ ኢይሁብ ብርሃኖ።

²⁵ወከዋክብትኒ ይወድቁ እምሰማይ ወይትከወስ ኀይለ ሰማያት።

²⁶ወአሜሃ ይሬእይዎ ለወልደ ዕጓለ እመሕያው እንዘ ይመጽእ በደመና ምስለ ኀይል ወብዙኅ ስብሐት።

²⁷ ወይእተ አሚረ ይፌንዎሙ ለመላእክቲሁ ወያስተጋብእዎሙ ለኅሩያኒሁ እምአርባዕቱ ነፋሳት ወእምአጽናፈ ምድር እስከ አጽናፈ ሰማይ።

²⁸ ወእምበለስ አእምሩ አምሳሊሁ እምከመ ኮነ አጽቃ ድኩመ[17] ወሠረጸ ቈጽላ ይትዐወቅ ከመ አልጸቀ ማእረር።

²⁹ከማሁኬ አንትሙኒ እምከመ ርኢክሙ ዘንተ ኵሎ ከመ ኮነ አእምሩ ከመ በጽሐ ኀበ ኆኅት።

³⁰አማን እብለክሙ ከመ ኢተኀልፍ ዛቲ ትውልድ ዘእንበለ ይኩን ዝንቱ ኵሉ።

³¹ሰማይ ወምድር የኀልፍ ወቃልየሰ ኢኀልፍ።

³² ወበእንተሰ ይእቲ ዕለት ወይእቲ ሰዓት አልቦ ዘየአምራ ኢመላእክተ ሰማይ ወኢወልድ ዘእንበለ አብ ባሕቲቱ።

³³ዑቁ ትግሁ ወጸልዩ እስመ ኢተአምሩ ማእዜ መዋዕለ ጊዜሁ።

³⁴ እስመ ከመ ብእሲ ዘይነግድ ወየኀድግ ቤቶ ወይሁቦሙ ግብሮሙ ለአግብርቲሁ ለለ አሐዱ እምኔሆሙ ወይኤዝዞ ለዐጻዊኒ ከመ ይትጋህ።

³⁵ ትግሁ እንከ እስመ ኢተአምሩ ማእዜ ይመጽእ በዓለ ቤት እመሂ ሠርከ ወእመሂ መንፈቀ ሌሊት ወእመሂ ጊዜ ይነቁ ዶርሆ ወእመሂ ጸቢሖ።

³⁶ኢይምጻእክሙ ግብተ ወኢይርከብክሙ እንዘ ትነውሙ።

³⁷ወናሁ እብለክሙ ለኵልክሙ ትግሁ።