Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 14 Bible Online

ወንጌል ዘማርቆስ 14 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 14

¹ ወእስከ ሰኑይ መዋዕል ፋሲካ በዓለ መጸለት ወኀሠሡ ሊቃነ ካህናት ወጸሐፍት ይትመየንዎ ወየአኀዝዎ ወይቅትልዎ።

² ወይቤሉ አኮኬ በበዓል ከመ ኢይትሀወኩ ሕዝብ።

³ ወእንዘ ሀሎ ቢታንያ በቤተ ስምዖን ዘለምጽ እንዘ ይረፍቅ መጽአት ብእሲት ወአምጽአት ዕፍረተ ዘአልባጥሮስ ዘናርዱ ቅድው ዘዕፁብ ሤጡ ወአኮሰቶ ወሶጠት ዲበ ርእሱ።

⁴ወቦ እለ ተምዑ ወይቤሉ ለምንት ዘመጠነዝ ኀጕል ዘዝ ዕፍረት።

⁵እምኢተክህለኑ ይሠየጥ ዝንቱ ዕፍረት ፈድፋደ እምሠለስቱ ምእት ዲናር ወይትወሀብ ለነዳያን ወገሠጽዋ።

⁶ወይቤሎሙ እግዚእ ኢየሱስ ኅድግዋ ለብእሲት ወኢታስርሕዋ ሠናየ ግብረ ገብረት ላዕሌየ።

⁷ ወለነዳያንሰ ዘልፈ ትረክብዎሙ በኀቤክሙ ወጊዜ ፈቀድክሙ ታሤንዩ ሎሙ ወኪያየሰ አኮ ዘልፈ ዘትረክቡኒ።

⁸ወዛቲኒ ዘባቲ ገብረት ወአቅደመት ወቀብዐተኒ ሥጋየ ለቀበርየ።

⁹አማን እብለክሙ ኀበ ሰበክዋ ለዛቲ ወንጌል ውስተ ኵሉ ዓለም ይነግሩ ዘገብረት ዛቲ ብእሲት ወይዜከርዋ።

¹⁰ ወይሁዳ አስቆሮታዊ አሐዱ እምዐሠርቱ ወክልኤቱ ሖረ ኀበ ሊቃነ ካህናት ከመ ያግብኦ ሎሙ።

¹¹ወሰሚዖሙ ተፈሥሑ ወተናገርዎ የሀብዎ ሠላሳ ብሩረ ወፈቀደ በጽሚት ያግብኦ ሎሙ።

¹² ወአመ ቀዳሚት ዕለት በዓለ መጸለት ፋሲካ አመ ይጠብሑ ፍሥሐ ይቤልዎ አርዳኢሁ በአይቴ ትፈቅድ ንሑር ናስተዳሉ ለከ ትብላዕ ፍሥሐ።

¹³ወፈነወ ክልኤተ እምአርዳኢሁ ወይቤሎሙ ሑሩ ሀገረ ዘቅድሜክሙ ወትረክቡ ብእሴ ዘይጸውር ጻሕበ ማይ ወትልውዎ ኀበ ቦአ ቤት።

¹⁴ ወበልዎ ለበዓለ ቤት ይቤለከ ሊቅ አይቴኑ ጽርሕ ኀበ እበልዕ ፍሥሐ ምስለ አርዳእየ።

¹⁵ወውእቱ ያርእየክሙ ጽርሐ ዐቢየ ወንጹፈ ወርሡየ ወህየ አስተዳልዉ ለነ።

¹⁶ወሖሩ አርዳኢሁ ሀገረ ወረከቡ በከመ ይቤሎሙ ወአስተዳለዉ በህየ ፍሥሐ።

¹⁷ወመስዮ ሖረ ምስለ ዐሠርቱ ወክልኤቱ አርዳኢሁ።

¹⁸ወእንዘ ይረፍቁ ወይበልዑ ይቤሎሙ እግዚእ ኢየሱስ አማን እብለክሙ አሐዱ እምኔክሙ ዘይበልዕ ምስሌየ ያገብአኒ።

¹⁹ ወአኀዙ ይተክዙ ወይበሉ በበ አሐዱ አነኑ እንጋ ውእቱ።

²⁰ወአውሥአ ወይቤሎሙ አሐዱ እምዐሠርቱ ወክልኤቱ ዘይጸብሕ ምስሌየ ውስተ መጽብሕየ።

²¹ወወልደ ዕጓለ እመሕያውሰ የሐውር በከመ ጽሑፍ በእንቲኣሁ ወባሕቱ አሌ ሎቱ ለውእቱ ብእሲ ዘእምኔሁ ይትሜጠውዎ ለወልደ ዕጓለ እመሕያው እምኀየሶ ሶበ ኢተወልደ ለውእቱ ብእሲ።

²² ወእንዘ ይበልዑ ነሥአ እግዚእ ኢየሱስ ኅብስተ ወባረከ ወፈተተ ወወሀቦሙ ወይቤሎሙ ንሥኡ ብልዑ ዝውእቱ ሥጋየ።

²³ ወነሥአ ጽዋዐኒ ወአእኲቶ ወሀቦሙ ወይቤሎሙ ንሥኡ ወስትዩ እምኔሁ ኵልክሙ።

²⁴ወይቤሎሙ ዝውእቱ ደምየ ዘሐዲስ ሥርዐት ዘይትከዐው በእንተ ብዙኃን።

²⁵ አማን እብለክሙ ኢይሰቲ እንከ እምዝንቱ ፍሬ ወይን እስከ እንታክቲ ዕለት አመ እሰትዮ ሐዲሰ በመንግሥተ እግዚአብሔር ።

²⁶ ሰቢሖሙ ወአንቢቦሙ ወፅኡ ውስተ ደብረ ዘይት።

²⁷ ወይቤሎሙ እግዚእ ኢየሱስ ለአርዳኢሁ ኵልክሙ ትክሕዱኒ በዛቲ ሌሊት እስመ ጽሑፍ ዘይብል «እቀትሎ ለኖላዊ ወይዘረዋ አባግዒሁ።»

²⁸ ወእምድኅረ ተንሣእኩ እቀድመክሙ ገሊላ።

²⁹ወይቤሎ ጴጥሮስ ለእመኒ ኵሎሙ ክሕዱከ አንሰ ኢይክሕደከ።

³⁰ ወይቤሎ እግዚእ ኢየሱስ አማን እብለከ አንተ ትክሕደኒ ዮም ሥልሰ በዛቲ ሌሊት ዘእንበለ ይንቁ ዶርሆ ክልኤ ጊዜ።

³¹ወአፈድፈደ ጴጥሮስ ትምክሕተ ወተሐልፎተ እንዘ ይብል እመውትሂ ምስሌከ ወኢይክሕደከ ወከማሁ ይቤሉ ኵሎሙ።

³² ወሖሩ ዐጸደ ወይን እንተ ስማ ጌቴሴማኒ ወይቤሎሙ ለአርዳኢሁ ንበሩ ዝየ እስከ አሐውር ከሃ ወእጼሊ።

³³ወነሥኦሙ ለጴጥሮስ ወለያዕቆብ ወለዮሐንስ ምስሌሁ ወአኀዘ ይተክዝ ወይኅዝን።

³⁴ ወይቤሎሙ ተከዘት ነፍስየ እስከ ለሞት ንበሩ ዝየ ወትግሁ እንከ።

³⁵ወእምዝ ተአተተ ሕቀ ወሰገደ ውስተ ምድር ወጸለየ ከመ ትኅልፍ እምኔሁ ይእቲ ሰዓት ለእመ ይትከሀል።

³⁶ ወይቤ አባ ወአቡየ ኵሉ ይትከሀለከ አኅልፋ እምኔየ ለዛቲ ጽዋዕ ወባሕቱ ፈቃደ ዚኣከ ለይኩን ወአኮ ፈቃደ ዚኣየ።

³⁷ወገቢኦ ረከቦሙ እንዘ ይነውሙ ወይቤሎ ለጴጥሮስ ስምዖን ትነውምኑ ወኢትክል ተዐግሦ አሐተ ሰዓተ።

³⁸ትግሁ ወጸልዩ ከመ ኢትባኡ ውስተ መንሱት እስመ መንፈስ ይፈቅድ ወሥጋ ይደክም።

³⁹ወሖረ ካዕበ ወጸለየ ወኪያሁ ክመ ይቤ።

⁴⁰ወገቢኦ ካዕበ ረከቦሙ እንዘ ይነውሙ እስመ ከብዳ አዕይንቲሆሙ ወኢየአምሩ ዘይነብቡ።

⁴¹ወመጽአ በሣልስ ወይቤሎሙ ኑሙ እንከሰ ወአዕርፉ ምዕረ እስመ ናሁ በጽሐ ጊዜሁ ወናሁ ያገብእዎ ለወልደ ዕጓለ እመሕያው ውስተ እደ ኃጥኣን።

⁴²ተንሥኡ ንሑር ናሁ በጽሐ ዘያገብአኒ።

⁴³ ወእንዘ ይትናገሮሙ በጽሐ ሶቤሃ ይሁዳ አስቆሮታዊ አሐዱ እምዐሠርቱ ወክልኤቱ ወምስሌሁ ብዙኃን ሰብእ ምስለ መጣብሕ ወአብትር እምኀበ ሊቃነ ካህናት ወጸሐፍት ወረበናት።

⁴⁴ወወሀቦሙ ትእምርተ ዘያገብኦ ወይቤሎሙ ዘሰዐምክዎ ውእቱ አኀዝዎ ወአጽንዕዎ ወሰድዎ።

⁴⁵ወሶቤሃ መጽአ ኀቤሁ ወይቤሎ ረቢ ወሰዐሞ።

⁴⁶ወሰፍሑ እደዊሆሙ ላዕሌሁ ወአኀዝዎ።

⁴⁷ ወመልሐ መጥባሕቶ አሐዱ እምእለ ምስሌሁ ይቀውሙ ወዘበጦ ለገብረ ሊቀ ካህናት ወመተሮ እዝኖ።

⁴⁸ወአውሥአ እግዚእ ኢየሱስ ወይቤሎሙ ከመ ሰራቂኑ ትዴግኑኒ መጻእክሙ ምስለ መጣብሕ ወአብትር ተአኀዙኒ።

⁴⁹ ወኵሎ አሚረ ሀሎኩ ምስሌክሙ እሜህር በምኵራብ ወኢአኀዝክሙኒ ወባሕቱ ከመ ይብጻሕ[18] ዘውስተ መጻሕፍት።

⁵⁰ ወኀደግዎ ኵሎሙ አርዳኢሁ ወጐዩ።

⁵¹ወተለዎ አሐዱ ወሬዛ ዘይትዐጸፍ ሰንዱነ ዕራቆ ወአኀዝዎ ወራዙት።

⁵²ወኀደገ ሰንዱኖ ወጐየ ዕራቆ።

⁵³ ወወሰድዎ ለእግዚእ ኢየሱስ ኀበ ሊቀ ካህናት ወተጋብኡ ኀቤሁ ኵሎሙ ሊቃነ ካህናት ወጸሐፍት ወረበናት።

⁵⁴ወተለዎ ጴጥሮስ እምርኁቅ ውስተ ውሳጤ ዐጸደ ሊቀ ካህናት ወነበረ ምስለ ወዓልያኒሆሙ ይስሕን መንገለ በርህ።

⁵⁵ ወኀሠሡ ሊቃነ ካህናት ወኵሉ ዐውድ ሰማዕተ ሐሰት በዘያስተዋድይዎ ለእግዚእ ኢየሱስ ከመ ይቅትልዎ ወኀጥኡ።

⁵⁶ወብዙኃን እለ አስተዋደይዎ በሐሰት[19] ወኢኀብረ ቃሎሙ።

⁵⁷ወቦ እለ ተንሥኡ ሰማዕተ ሐሰት ወነበቡ።

⁵⁸ ወይቤሉ ንሕነ ሰማዕናሁ እንዘ ይብል አነ እነሥቶ ለዝንቱ ቤተ መቅደስ ዘእድ ገብሮ ወበሠሉስ ዕለት አሐንጽ ካልአ ዘእድ ኢገብሮ።

⁵⁹ወምስለ ዝኒ ኢኀብረ ስምዖሙ።

⁶⁰ወተንሥአ ሊቀ ካህናት በማእከለ ዐውድ ወሐተቶ ለእግዚእ ኢየሱስ ወይቤሎ አልቦኑ ዘትሰጠው እንዘ መጠነዝ ያስተዋድዩከ።

⁶¹ ወአርመመ ወኢተሰጥዎ ወኢምንተኒ ወካዕበ ሐተቶ ሊቀ ካህናት ወይቤሎ አንተኑ ውእቱ ክርስቶስ ወልዱ ለቡሩክ።

⁶²ወይቤሎ እግዚእ ኢየሱስ እወ አነ ውእቱ ወትሬእይዎ ለወልደ ዕጓለ እመሕያው እንዘ ይነብር በየማነ ኀይል ወይመጽእ በደመና ሰማይ።

⁶³ወሠጠጠ አልባሲሁ ሊቀ ካህናት ወይቤ ምንተ እንከ ትፈቅዱ ሎቱ ሰማዕተ።

⁶⁴ ናሁ ለሊክሙ ሰማዕክሙ ጽርፈቶ ምንተ እንከ ትብሉ ወአግብኡ ፍትሐ ኵሎሙ ወይቤሉ ይቅትልዎ።

⁶⁵ወአኀዙ እምውስቴቶሙ ይውርቅዎ ወይጽፍዕዎ ገጾ ወይኵርዕዎ ርእሶ ወይቤልዎ ተነበይ ለነ ክርስቶስ መኑ ጸፍዐከ ወኮኑ ወዐልት ይጸፍዕዎ በሕቁ።

⁶⁶ ወእንዘ ሀሎ ጴጥሮስ ታሕተ ውስተ ዐጸድ መጽአት አሐቲ ወለት እምአእማተ ሊቀ ካህናት።

⁶⁷ወርእየቶ ለጴጥሮስ ይስሕን ወነጸረቶ ወትቤሎ አንተሂ ምስለ ኢየሱስ ገሊላዊ ሀሎከ።

⁶⁸ወክሕደ ወይቤላ ኢየአምር ወኢይጤይቅ ዘትብሊ ወወፅአ አፍኣ ኀበ ጸናፌ ዐጸድ ወነቀወ ዶርሆ።

⁶⁹ወርእየቶ ካዕበ ካልእት ወለት ወትቤሎሙ ለእለ ይቀውሙ ህየ ዝንቱኒ እምኔሆሙ ውእቱ ወክሕደ ካዕበ።

⁷⁰ወእምድኅረ ሕቅ ካዕበ ይቤልዎ ለጴጥሮስ እለ ይቀውሙ አማን እምኔሆሙ አንተ ወገሊላዊ አንተ ወቃልከ ያዐውቀከ።

⁷¹ወአኀዘ ይትረገም ወይምሐል ከመ ኢየአምሮ ለውእቱ ብእሲ ዘትብሉ ወሶቤሃ ነቀወ ካዕበ ዶርሆ።

⁷²ወተዘከረ ጴጥሮስ ቃሎ ለእግዚእ ኢየሱስ ዘይቤሎ ሥልሰ ትክሕደኒ ዘእንበለ ይንቁ ዶርሆ ክልኤ ጊዜ ወበከየ።