Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 2 Bible Online

ወንጌል ዘማርቆስ 2 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 2

¹ ወቦአ ካዕበ ሀገረ ቅፍርናሆም ወጐንድዮ ሕቀ ሰምዑ ሰብእ ዜናሁ ከመ ሀሎ ውስተ ቤት።

²ወተጋብኡ ኀቤሁ ብዙኃን ሰብእ እስከ ኢያገምሮሙ መካን ወኢኀበ ኆኅት ወኮነ ይነግሮሙ ቃሎ ለእለ መጽኡ ኀቤሁ።

³ወአምጽኡ ኀቤሁ ድዉየ መፃጕዐ ወይጸውርዎ በዐራት አርባዕቱ ዕደው።

⁴ወሶበ ስእኑ አብኦቶ ኀቤሁ እስመ ጽፉቅ ሰብእ ኀበ ሀሎ እግዚእ ኢየሱስ ዐርጉ ናሕሰ ወነሠቱ ጠፈረ ወአውረድዎ ምስለ ዐራቱ ዘዲቤሁ ይሰክብ ውእቱ መፃጕዕ።

⁵ወርእዮ እግዚእ ኢየሱስ ሃይማኖቶሙ ይቤሎ ለውእቱ መፃጕዕ ወልድየ ተኀድገ ለከ ኀጢአትከ።

⁶ወሀለዉ ህየ ጸሐፍት ይነብሩ ወኀለዩ በልቦሙ።

⁷ ወይቤሉ ምንትኑ ዝ ዘከመዝ ይነብብ ፅርፈተ ወመኑ ይክል ኀዲገ ኀጢአት ዘእንበለ አሐዱ እግዚአብሔር ።

⁸ ወአእመሮሙ እግዚእ ኢየሱስ በመንፈሱ ከመ ከመዝ ይኄልዩ ወይቤሎሙ ለምንት ከመዝ ትኄልዩ በልብክሙ።

⁹ምንት ይቀልል እምብሂሎቱ ለዝ መፃጕዕ ተኀድገ ለከ ኀጢአትከ ወእምብሂሎቱ ተንሥእ ወንሣእ ዐራተከ ወሑር በእገሪከ።

¹⁰ከመ ታእምሩ ከመ ብዉሕ ሎቱ ለወልደ ዕጓለ እመሕያው ይኅድግ ኀጢአተ በዲበ ምድር።

¹¹ወካዕበ ይቤሎ ለውእቱ ድዉይ ለከ እብለከ ተንሥእ ወንሣእ ዐራተከ ወእቱ ቤተከ።

¹² ወተንሥአ ሶቤሃ ወነሥአ ዐራቶ ወወፅአ በቅድመ ኵሉ ሰብእ ወደንገፁ ኵሎሙ ወአእኰትዎ ለእግዚአብሔር ወይቤሉ ግሙራ ኢርኢነ ዘከመዝ።

¹³ወእምዝ ሖረ እግዚእ ኢየሱስ ካዕበ መንገለ ጽንፈ ባሕር ወሖሩ ኀቤሁ ኵሉ ሕዝብ ወመሀሮሙ።

¹⁴ ወኀሊፎ እምህየ ርእዮ ለሌዊ ወልደ እልፍዮስ እንዘ ይነብር ኀበ ምጽባሕ ወይቤሎ ትልወኒ ወተንሥአ ወተለዎ።

¹⁵ ወእምዝ መስሐ በቤቱ እግዚእ ኢየሱስ ወብዙኃን ኃጥኣን ወመጸብሓን ረፈቁ ምስለ እግዚእ ኢየሱስ ወአርዳኢሁ ወብዙኃን እሙንቱ እለ ተለውዎ።

¹⁶ወጸሐፍት ወፈሪሳውያን ርእዮሙ ከመ ይበልዕ ወይሰቲ ምስለ ኃጥኣን ወመጸብሓን ይቤልዎሙ ለአርዳኢሁ ለምንት ይበልዕ ወይሰቲ ሊቅክሙ ምስለ ኃጥኣን ወመጸብሓን።

¹⁷ ወሰሚዖ እግዚእ ኢየሱስ ይቤሎሙ ሕሙማን ይፈቅድዎ ለዐቃቤ ሥራይ ወአኮ ጥዑያን ኃጥኣነ እጸውዕ መጻእኩ ወአኮ ጻድቃነ።

¹⁸ወአርዳኢሁሰ ለዮሐንስ ወእለሂ ፈሪሳውያን ኮኑ ይጸውሙ ወመጽኡ ወይቤልዎ አርዳኢሁ ለዮሐንስ ወአርዳኢሆሙ ለፈሪሳውያን ይጸውሙ ወአርዳኢከሰ በእፎ ኢይጸውሙ።

¹⁹ ወይቤሎሙ እግዚእ ኢየሱስ ይክሉኑ ደቂቁ ለመርዓዊ ጸዊመ አምጣነ ሀሎ መርዓዊ ምስሌሆሙ።

²⁰ወባሕቱ ይበጽሕ መዋዕል አመ ይነሥእዎ ለመርዓዊ እምኔሆሙ ወይእተ አሚረ ይጸውሙ።

²¹ወአልቦ ዘይጠቅብ ግምደ ድርግሐ ውስተ ሥጠተ ልብስ ብሉይ ወእመአኮሰ ያነቅዖ ጥቅበቱ ሐዲስ ለብሉይ ወያዐብዮ ለሥጠቱ።

²²ወአልቦ ዘይወዲ ወይነ ሐዲሰ ውስተ ዝቅ ብሉይ እስመ ያነቅዖ ወይን ሐዲስ ለዝቅ ብሉይ ወወይኑሂ ይትከዐው ወዝቁሂ ይትኀጐል ወለወይንሰ ሐዲስ ውስተ ዝቅ ሐዲስ ይወድይዎ።

²³ ወእምዝ ካዕበ ወፈረ እግዚእ ኢየሱስ በሰንበት እንተ ገራውህ ወአርዳኢሁኒ ምስሌሁ ወአኀዙ ይምሐዉ ሰዊተ ወይጺሑ ሎቱ ፍኖተ።

²⁴ወይቤልዎ ፈሪሳውያን ርኢ ዘይገብሩ አርዳኢከ ዘኢይከውን ገቢረ በሰንበት።

²⁵ወይቤሎሙ እግዚእ ኢየሱስ ግሙራ ኢያንበብክሙኑ ዘገብረ ዳዊት አመ ርኅበ ውእቱኒ ወእለሂ ምስሌሁ።

²⁶ ዘከመ ቦአ ቤተ እግዚአብሔር እንዘ አብያታር ሊቀ ካህናት ወበልዐ ኅብስተ መሥዋዕት ዘኢይከውኖ ለበሊዕ ዘእንበለ ለካህናት ለባሕቲቶሙ ወወሀቦሙ ለእለ ምስሌሁ።

²⁷ ወይቤሎሙ ሰንበትሰ በእንተ ሰብእ ተፈጥረት ወአኮ ሰብእ በእንተ ሰንበት።

²⁸ወወልደ ዕጓለ እመሕያው ውእቱ እግዚኣ ለሰንበት።