Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 3 Bible Online

ወንጌል ዘማርቆስ 3 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 3

¹ ወቦአ ካዕበ ምኵራበ በሰንበት ወሀሎ ህየ ብእሲ ዘየብሰት እዴሁ።

²ወይትዐቀብዎ ለእመ ይፌውሶ በሰንበት ከመ ያስተዋድይዎ።

³ወይቤሎ ለውእቱ ብእሲ ዘፅውስት እዴሁ ተንሥእ ወቁም ማእከለ።

⁴ወይቤሎሙ ይከውንኑ በሰንበት ገቢረ ሠናይ አው ገቢረ እኩይ አሕይዎ ነፍስኑ፥ ወሚመ ቀቲል ወአርመሙ።

⁵ወነጸሮሙ እግዚእ ኢየሱስ እንዘ ይትመዐዕ ወይቴክዝ በእንተ ዑረተ ልቦሙ ወይቤሎ ለውእቱ ብእሲ ስፋሕ እዴከ ወሰፍሐ እዴሁ ወሐይወት ወኮነት ከመ ካልእታ[3] ።

⁶ ወወፂኦሙ ፈሪሳውያን ምስለ ሰብአ ሄሮድስ ተማከሩ ከመ ይቅትልዎ።

⁷ ወተግኅሠ እግዚእ ኢየሱስ ምስለ አርዳኢሁ መንገለ ባሕር ወተለውዎ ብዙኃን ጥቀ እምገሊላ ወእምይሁዳ።

⁸ወእምኢየሩሳሌም ወእምኤዶምያስ ወእማዕዶተ ዮርዳኖስ ወእምጢሮስ ወእምሲዶና ወብዙኃን ጥቀ መጽኡ ኀቤሁ ሰሚዖሙ ኵሎ ዘገብረ።

⁹ወይቤሎሙ ለአርዳኢሁ ያጽንሑ ሎቱ ሐመረ ከመ ኢይትጋፍዕዎ ሰብእ።

¹⁰እስመ ለብዙኃን አሕየዎሙ ወኮኑ ይትጋፍዕዎ እስከ ይወድቁ ዲቤሁ ወያስተበቍዕዎ ከመ ይግሥሥዎ ኵሎሙ ሕሙማን።

¹¹ ወእለሂ እኁዛነ አጋንንት ርኩሳን እምከመ ርእይዎ ይሰግዱ ሎቱ ወይጸርሑ እንዘ ይብሉ አንተ ውእቱ ወልደ እግዚአብሔር ።

¹² ወብዙኀ ይጌሥጾሙ ከመ ገሃደ ኢይረስይዎ።

¹³ ወዐርገ ደብረ ወጸውዐ እለ ፈቀደ ወሖሩ ኀቤሁ።

¹⁴ወኀረየ ዐሠርተ ወክልኤተ ወሰመዮሙ ሐዋርያተ ወረሰዮሙ ከመ የሀልዉ ምስሌሁ ወይፈንዎሙ ይስብኩ።

¹⁵ወአብሖሙ ያውፅኡ አጋንንተ ወይፈውሱ ድዉያነ።

¹⁶ወሰመዮሙ በበ አስማቲሆሙ ወሰመዮ ለስምዖን ጴጥሮስ።

¹⁷ወለያዕቆብ ወልደ ዘብዴዎስ ወለዮሐንስ እኍሁ ሰመዮሙ ቦአኔርጌስ ደቂቀ ነጐድጓድ ብሂል።

¹⁸ወእንድርያስ ወፊልጶስ ወበርተሎሜዎስ ወማቴዎስ ወቶማስ ወያዕቆብ ወልደ እልፍዮስ ወታዴዎስ ወስምዖን ቀነናዊ።

¹⁹ወይሁዳ አስቆሮታዊ ዘአግብኦ።

²⁰ወበዊኦ ቤተ መጽኡ ካዕበ አሕዛብ ብዙኃን እስከ ኢያበውሕዎ ይብላዕ እክለ።

²¹ወሰሚዖሙ አዝማዲሁ መጽኡ የአኀዝዎ እስመ ስሕወ ልቡ ይቤልዎሙ።

²² ወጸሐፍትኒ እለ ወረዱ እምኢየሩሳሌም ይቤሉ ብዔል ዜቡል አኀዞ ወበመልአኮሙ ለአጋንንት ያወፅኦሙ ለአጋንንት።

²³ወጸውዖሙ እግዚእ ኢየሱስ ወመሰለ ሎሙ ወይቤሎሙ እፎ ይክል ሰይጣን ለሰይጣን አውፅኦቶ።

²⁴ወመንግሥትኒ ዘበበይናቲሃ ትትናፈቅ ኢትቀውም ይእቲ መንግሥት።

²⁵ወእመኒ ቤት ተናፈቀት በበይናቲሃ ኢትቀውም ይእቲ ቤት።

²⁶ወሰይጣንሂ ለእመ ተንሥአ በበይናቲሁ ወተናፈቀ ኢይቀውም አላ ማኅለቅተ ይረክብ።

²⁷ወአልቦ ዘይክል በዊአ ቤተ ኀያል ወበርብሮተ ንዋዩ ለእመ ኢቀደመ አሲሮቶ ለኀያል ወእምዝ ይበረብር ቤቶ።

²⁸አማን እብለክሙ ኵሉ ኀጢአት ወፅርፈት ይትኀደግ ለዕጓለ እመሕያው።

²⁹ወዘሰ ፀረፈ ዲበ መንፈስ ቅዱስ ኢይትኀደግ ሎቱ ለዓለም ወይትኴነን በደይን ለዝሉፉ።

³⁰እስመ ይቤሉ ጋኔን ርኩስ አኀዞ።

³¹ ወመጽኡ እሙ ወአኀዊሁ ወቆሙ አፍኣ ወለአኩ ኀቤሁ ይጸውዕዎ።

³²ወይነብሩ ሰብእ ብዙኃን ምስሌሁ ወይቤልዎ ነዮሙ እምከኒ ወአኀዊከኒ አፍኣ ይቀውሙ ወየኀሥሡከ።

³³ወአውሥአ ወይቤሎሙ መኑ ይእቲ እምየ ወእለ መኑ እሙንቱ አኀውየ።

³⁴ወነጸሮሙ ለእለ ይነብሩ ዐውዶ ወይቤ ነዮሙ እምየኒ ወአኀውየኒ።

³⁵እስመ ኵሉ ዘይገብር ፈቃዶ ለእግዚአብሔር ውእቱ እኍየኒ ወእኅትየኒ ወእምየኒ።