Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 4 Bible Online

ወንጌል ዘማርቆስ 4 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 4

¹ ወአኀዘ ካዕበ ይምሀሮሙ ለአሕዛብ እንተ መንገለ ባሕር ወተጋብኡ ኀቤሁ ብዙኃን ሰብእ እስከ ሶበ የዐርግ ውስተ ሐመር ወይነብር ውስተ ባሕር ወኵሉ ሰብእ ውስተ ምድር ይቀውሙ።

²ወመሀሮሙ ወመሰለ ሎሙ ብዙኀ ወይቤሎሙ እንዘ ይሜህሮሙ።

³ስምዑ ወፈረ ዘይዘርዕ ይዝራዕ።

⁴ወእንዘ ይዘርዕ ቦ ዘወድቀ ውስተ ፍኖት ወመጽኡ አዕዋፍ ወበልዕዎ።

⁵ወቦ ዘወድቀ ውስተ ኰኵሕ ኀበ አልቦ መሬት ብዙኅ ወፍጡነ በቈለ እስመ አልቦ ዕመቅ ለመሬቱ።

⁶ወሠሪቆ ፀሓይ አውዐዮ እስመ ኢኮነ ዕሙቀ መሬቱ ወአልቦ ሥርው ወየብሰ።

⁷ወቦ ዘወድቀ ውስተ ሦክ ወኀነቆ ሦክ ወኢፈረየ።

⁸ወቦ ዘወድቀ ውስተ ምድር ሠናይት ወበቈለ ወልህቀ ወፈረየ ወወሀበ ፍሬ ቦ ዘሠላሳ ወቦ ዘስሳ ወቦ ዘምእት።

⁹ወይቤ ዘቦ ዕዝን ሰሚዐ ለይስማዕ።

¹⁰ወሶበ ተባሕተወ ተስእልዎ እሊኣሁ ምስለ ዐሠርቱ ወክልኤቱ አርዳኢሁ ምሳሌሁ።

¹¹ወይቤሎሙ ለክሙ ተውህበ ታእምሩ ምሥጢራ ለመንግሥተ እግዚአብሔር ወለእለሰ አፍኣ በምሳሌ ኵሉ ይከውኖሙ።

¹² ከመ ርእየ ይርአዩ ወኢያእምሩ ወሰሚዐ ይስምዑ ወኢይለብዉ ከመ ኢይነስሑ ወኢይሣሀሎሙ ወኢይትኀደግ ሎሙ ኀጢአቶሙ።

¹³ወይቤሎሙ ኢተአምሩኑ ዛተ ምሳሌ እፎ እንከ ተአምሩ ኵሎ አምሳለ።

¹⁴ዘይዘርዕሰ ቃለ እግዚአብሔር ይዘርዕ።

¹⁵ወእሉ እሙንቱ እለ ውስተ ፍኖት ኀበ ተዘርዐ ቃል ወእምከመ ሰምዑ ቃለ ይመጽእ ሰይጣን ሶቤሃ ወይነሥእ እምልቦሙ ቃለ ዘተዘርዐ።

¹⁶ወእሉ ካዕበ እሙንቱ ዘውስተ ኰኵሕ ተዘርዑ እለ ይሰምዑ ቃለ ወይትዌከፍዎ ሶቤሃ በፍሥሓ።

¹⁷ወአልቦሙ ሥርው ለጊዜሃ ዳእሙ እሙንቱ ወእምከመሰ ኮነ ምንዳቤ ወስደት በእንተዝ ቃል የዐልዉ ሶቤሃ።

¹⁸ወእሉ እሙንቱ እለ ውስተ ሦክ ተዘርዑ እለ ይሰምዕዎ ለቃል።

¹⁹ ወኅሊና ዝንቱ ዓለም ወፍትወተ ብዕል ወባዕድኒ ኵሉ ፍትወት ይበውኡ ወየኀንቅዎ ለቃል ወኢይፈሪ።

²⁰ወእሉ እሙንቱ እለ ውስተ ምድር ሠናይት ተዘርዑ እለ ይሰምዑ ቃለ ወይትዌከፍዎ ወይፈርዩ አሐዱ በሠላሳ ወአሐዱ በስሳ ወአሐዱ በምእት።

²¹ ወይቤሎሙ ቦኑ ዘያኀትዉ ማኅቶተ ወያመጽእዋ ከመ ያንብርዋ ታሕተ ከፈር አው ታሕተ ዐራት አኮኑ ከመ ያንብርዋ ዲበ ተቅዋማ።

²² ወአልቦ ኅቡእ ዘይትከበት ወአልቦ ክዱን ዘኢይትከሠት።

²³ዘቦ ዕዝን ሰሚዐ ለይስማዕ።

²⁴ ወይቤሎሙ ለብዉ ዘትሰምዑ በውእቱ መስፈርት ዘሰፈርክሙ ይሰፍሩ ለክሙ ወይዌስኩክሙ።

²⁵ እስመ ለዘቦ ይሁብዎ ወይዌስክዎ ወለዘሰ አልቦ እለሂ ቦ የሀይድዎ።

²⁶ወይቤሎሙ ከመዝ ይእቲ መንግሥተ ሰማያት ከመ ብእሲ ዘዘርዐ ሠናየ ዘርዐ ውስተ ገራህቱ።

²⁷ ወነዊሞ ይትነሣእ መዓልተ ወሌሊተ ወይዋሕዮ ወዘርዑ ይፈሪ ወይልህቅ ወውእቱሰ የአምር።

²⁸ወባሕቱ ትሁብ ምድር ፍሬሃ ቀዳማዌ ሣዕረ ወእምዝ ሰብለ ወእምሰብሉ ይመልእ ፍጹመ ሰዊተ።

²⁹ወሶበ ፈጸመ ፈርዮተ ሶቤሃ ይፌኑ ማዕጸደ እስመ በጽሐ ማእረር።

³⁰ ወይቤ በምንት አስተማስላ ለመንግሥተ እግዚአብሔር ወምንተ ትመስል።

³¹ከመ ኅጠተ ሰናፔ እንተ ተዘርዐት ውስተ ምድር ወትንእስ እምኵሉ አዝርዕት ዘውስተ ምድር።

³²ወእምከመ ዘርዕዋ ትበቍል ወተዐቢ እምኵሎን አሕማላት ወትገብር አዕጹቀ ዐበይተ እስከ ይክሉ አዕዋፈ ሰማይ አጽልሎ ታሕተ አዕጹቂሃ።

³³ወበዘ ከመዝ አምሳል ተናገሮሙ ቃሎ በአምጣነ ይክሉ ሰሚዐ።

³⁴ወዘእንበለ ምሳሌሰ ኢተናገሮሙ ወበባሕቲቶሙ ይፌክር ለአርዳኢሁ ኵሎ።

³⁵ ወይእተ አሚረ መስዮ ይቤሎሙ ለአርዳኢሁ ንዕዱ ማዕዶተ።

³⁶ወኀደጎሙ ለሕዝብ ወነሥእዎ በሐመር ወቦ ካልኣትኒ አሕማር ምስሌሆሙ።

³⁷ወመጽአ ዐቢይ ነፋሰ ዐውሎ ወይሰወጥ ማይ እሞገድ ውስተ ሐመር እስከ መልአ ማይ ውስተ ሐመር።

³⁸ወውእቱሰ መንገለ ከዋላ ሐመር ተተርኢሶ ኖመ ወአንቅህዎ ወይቤልዎ ሊቅ ኢያኀዝነከኑ እንዘ ንመውት።

³⁹ወተንሥአ ወገሠጾሙ ለነፋሳት ወይቤላ ለባሕር ተፈፀሚ ወአርምሚ ወኀደገ ነፋስ ወኮነ ዛኅን ዐቢይ።

⁴⁰ወይቤሎሙ ምንትኑ ያፈርሀክሙ ኦ ድኩማን ከመ ዝኑ አልብክሙ ሃይማኖት።

⁴¹ወፈርሁ ዐቢየ ፍርሀተ ወተባሀሉ በበይናቲሆሙ መኑ እንጋ ውእቱ ዝንቱ ዘይትኤዘዙ ሎቱ ባሕርኒ ወነፋሳትኒ።