Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 6 Bible Online

ወንጌል ዘማርቆስ 6 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 6

¹ ወወፂኦ እምህየ ቦአ ሀገሮ ወተለውዎ አርዳኢሁ።

² ወበሰንበት መሀሮሙ በምኵራብ ወብዙኃን ያጸምዕዎ ወያነክሩ እንዘ ይብሉ እምአይቴ ሎቱ ዝንቱ ኵሉ ወምንትኑ ዛቲ ጥበብ እንተ ተውህበት ሎቱ ወዝኒ ኀይል ዘይትገበር በእደዊሁ።

³አኮኑ ዝንቱ ውእቱ ወልዱ ለጸራቢ[6] ወልደ ማርያም ወአኀዊሁኒ ያዕቆብ ወዮሳ ወይሁዳ ወስምዖን ወአኮኑ አኃቲሁኒ ሀለዋ ዝየ ኀቤነ ወተዐቅፉ በእንቲኣሁ።

⁴ወይቤሎሙ እግዚእ ኢየሱስ ኢኮነ ምኑነ ነቢይ ዘእንበለ በሀገሩ ወበቤቱ ወበኀበ አዝማዲሁ።

⁵ወኢገብረ ኀይለ[7] በህየ ዘእንበለ ኅዳጣን ድዉያን እለ አንበረ እዴሁ ዲቤሆሙ ወአሕየዎሙ።

⁶ወአንከረ ኢአሚኖቶሙ ወአንሶሰወ ውስተ አህጉረ አድያም እንዘ ይሜህር።

⁷ ወጸውዖሙ ለዐሠርቱ ወክልኤቱ ሐዋርያት ወፈነዎሙ በበ ክልኤቱ ወአብሖሙ ላዕለ አጋንንት እኩያን።

⁸ወአዘዞሙ ከመ አልቦ ዘይሰንቁ ለፍኖት ወኢይንሥኡ ዘእንበለ በትር ባሕቲታ ወኢኅብስተ ወኢጽፍነተ ወኢጸሪቀ ውስተ ቅናቶሙ

⁹ዘእንበለ አሣእን ዘውስተ እገሪሆሙ ወኢይልበሱ ክልኤ ክዳናተ።

¹⁰ወይቤሎሙ ቤተ ኀበ ቦእክሙ ህየ ንበሩ እስከ አመ ትወፅኡ እምህየ።

¹¹ ወብሔረ ኀበ ኢተወክፉክሙ ወኢሰምዑክሙ ወፂአክሙ እምህየ ንግፉ ጸበለ እገሪክሙ ከመ ይኩን ስምዐ ላዕሌሆሙ አማን እብለክሙ ከመ ይረክባ ሣኅተ ሰዶም ወገሞራ አመ ዕለተ ደይን ፈድፋደ እምይእቲ ሀገር።

¹²ወወፂኦሙ ሰበኩ ከመ ኵሉ ይነስሑ።

¹³ ወብዙኃነ አጋንንተ ያወፅኡ ወይቀብዕዎሙ ቅብዐ ለብዙኃን ድዉያን ወየሐይዉ።

¹⁴ ወሰምዐ ሄሮድስ ንጉሥ እስመ ክሡተ ኮነ ስሙ ወይቤ ዮሐንስ መጥምቅ ተንሥአ እምዉታን ወበእንተዝ ይረድኦ ኀይል።

¹⁵ ወቦ እለ ይቤሉ ኤልያስ ውእቱ ወቦ እለ ይቤሉ ነቢይ ውእቱ ወቦ እለ ይቤሉ ከመ አሐዱ እምነቢያት።

¹⁶ወሰሚዖ ሄሮድስ ይቤ ዮሐንስ ውእቱ ዘአነ መተርኩ ርእሶ ውእቱ ተንሥአ እምዉታን።

¹⁷እስመ ውእቱ ሄሮድስ ፈነወ አግብርቲሁ ወአኀዞ ለዮሐንስ ወሞቅሖ በእንተ ሄሮድያዳ ብእሲተ ፊልጶስ እኁሁ እስመ ኪያሃ አውሰበ።

¹⁸ እስመ ይቤሎ ዮሐንስ ለሄሮድስ ኢይከውነከ ታውስብ ብእሲተ እኁከ።

¹⁹ወተቀየመቶ ሄሮድያዳ ወፈቀደት ታቅትሎ ወስእነት።

²⁰ወኮነ ይፈርሆ ሄሮድስ ለዮሐንስ እስመ የአምር ከመ ብእሲ ጻድቅ ወቅዱስ ውእቱ ወይትዐቀቦ ወብዙኀ ይሰምዕ በኀቤሁ[8] ወያስተሐውዝ ወይፈቅድ ይስምዖ።

²¹ወኮነት ዕለት አመ ይገብር ሄሮድስ በዓለ ዘዕለተ ተወልደ ወአምስሐ መኳንንቲሁ ወመላእክቲሁ ወመሳፍንቲሁ ወመገብቶ ወዐበይተ ሀገረ ገሊላ።

²²ወቦአት ወለተ ሄሮድያዳ ወዘፈነት ሎቱ ወአሥመረቶ ለሄሮድስ ወለእለ ይረፍቁ ምስሌሁ ወይቤላ ንጉሥ ለይእቲ ወለት ሰአልኒ ዘትፈቅዲ ወእሁበኪ።

²³ ወመሐለ ላቲ ከመ የሀባ ዘሰአለቶ እስከ መንፈቀ መንግሥቱ።

²⁴ወወፅአት ወትቤላ ለእማ ምንተ እስአሎ ወትቤላ ርእሶ ለዮሐንስ መጥምቅ።

²⁵ወቦአት ሶቤሃ ኀበ ንጉሥ እንዘ ትጔጕእ ወሰአለቶ ወትቤሎ እፈቅድ ይእዜ ተሀበኒ ርእሶ ለዮሐንስ መጥምቅ በጻሕል።

²⁶ወተከዘ ንጉሥ በእንተ መሐላሁ ወበእንተሂ እለ ይረፍቁ ምስሌሁ ወኢፈቀደ ይእበያ።

²⁷ወፈነወ ንጉሥ ሶቤሃ መስተራትዓተ ሐራ ወአዘዘ ያምጽኡ ርእሶ።

²⁸ወሖሩ ወመተሩ ርእሶ ለዮሐንስ በቤተ ሞቅሕ ወአምጽኡ ርእሶ በጻሕል ወወሀብዋ ለይእቲ ወለት ወይእቲኒ ወለት ወሀበት ለእማ።

²⁹ወሰሚዖሙ አርዳኢሁ ሖሩ ወነሥኡ በድኖ ለዮሐንስ ወቀበርዎ።

³⁰ ወተጋብኡ ሐዋርያት ኀበ እግዚእ ኢየሱስ ወነገርዎ ኵሎ ዘገብሩ ወዘከመ መሀሩ።

³¹ወይቤሎሙ ንዑ ንፃእ ገዳመ ባሕቲተነ ወታዕርፉ ሕቀ እስመ ብዙኃን እለ የሐውሩ ወይመጽኡ ወኢያበውሕዎሙ ይብልዑ እክለ እስመ ኢያስተርከቡ።

³² ወሖሩ ሐቅለ በሐመር ባሕቲቶሙ።

³³ወርእይዎሙ እንዘ የሐውሩ ወአእመርዎሙ ብዙኃን ወሖሩ እንተ እግር ኀቤሁ እምኵሉ አህጉር ወተቃደምዎሙ ወመጽኡ ኀቤሁ።

³⁴ ወወፂኦ እግዚእ ኢየሱስ ርእየ ብዙኃነ ሰብአ ወምሕሮሙ እስመ ከመ አባግዕ ዘአልቦ ኖላዊ እሙንቱ ወአኀዘ ይምሀሮሙ ብዙኀ።

³⁵ ወእምድኅረ ብዙኅ ሰዓት መጽኡ አርዳኢሁ ወይቤልዎ ሐቅል ውእቱ ዝ ብሔር ወሰዓቱኒ ወድአ መስየ።

³⁶ ሰዐር ሰብአ ይሑሩ ውስተ አህጉር ወአዕጻዳት ወይሣየጡ ሎሙ ሲሳየ እስመ አልቦሙ ዘይበልዑ።

³⁷ወአውሥአ ወይቤሎሙ ሀብዎሙ አንትሙ ዘይበልዑ ወይቤልዎ ንሑርኑ ንሣየጥ በክልኤ ምእት ዲናር ኅብስተ ወነሀቦሙ ይብልዑ።

³⁸ወይቤሎሙ ሑሩ ርእዩ ሚመጠን ኅብስት ብክሙ ወርእዮሙ ይቤልዎ ኀምስ ኅብስት ወክልኤቲ ዓሣት።

³⁹ወአዘዞሙ ለኵሎሙ ይርፍቁ በበ ምርፋቃቲሆሙ ዲበ ሐመልማለ ሣዕር።

⁴⁰ወረፈቁ በበ ምርፋቃቲሆሙ በበ ምእት ወበበ ኀምሳ።

⁴¹ ወነሥኦን ለኀምስ ኅብስት ወለክልኤቲ ዓሣት ወነጸረ ሰማየ ወባረከ ወፈተተ ኅብስተ ወወሀቦሙ ለአርዳኢሁ ያቅርቡ ሎሙ ወከፈሎሙ ለኵሎሙ እምክልኤቲ ዓሣትኒ።

⁴²ወበልዑ ኵሎሙ ወጸግቡ።

⁴³ወዘአግኀሡ ዘተርፈ ፍተታት መልአ ዐሠርተ ወክልኤተ መሣይምተ ወእምዓሣሁኒ።

⁴⁴ወእለሰ በልዕዎ ለውእቱ ኅብስት ዕደው ኀምሳ ምእት።

⁴⁵ ወአገበሮሙ ሶቤሃ ለአርዳኢሁ ወአዘዞሙ ይዕርጉ ሐመረ ወይቅድምዎ ማዕዶተ ቤተ ሳይዳ እስከ ሶበ ይስዕሮሙ ለሕዝብ።

⁴⁶ወፈነዎሙ ወኀለፈ እምህየ ወዐርገ ደብረ ከመ ይጸሊ።

⁴⁷ወመስዮ ብሔር ሀለወት ሐመር ማእከለ ባሕር ወውእቱሰ ባሕቲቱ ሀሎ ዲበ ምድር።

⁴⁸ወርእዮሙ እንዘ የሐውሩ ወጥቀ ይትመነደቡ ወያሐምሞሙ ነፋስ እስመ እመንገለ ገጾሙ ውእቱ ወበራብዕት ሰዓተ ሌሊት መጽአ እግዚእ ኢየሱስ ኀቤሆሙ እንዘ የሐውር ዲበ ባሕር ወፈቀደ ይትዐደዎሙ።

⁴⁹ወሶበ ርእይዎ እንዘ የሐውር ዲበ ባሕር መሰሎሙ ጋኔነ።

⁵⁰ወኵሎሙ ርእይዎ ወደንገፁ ወዐውየዉ ወነበቦሙ ሶቤሃ ወይቤሎሙ ተአመኑ ከመ አነ ውእቱ ወኢትፍርሁ።

⁵¹ ወዐርገ ኀቤሆሙ ውስተ ሐመር ወኀደገ ነፋስ ወፈድፋደ ተደሙ ወአንከርዎ።

⁵²ወአመሂ ኅብስት ኢለበውዎ እስመ ጽሉል ልቦሙ።

⁵³ወዐደዉ ወበጽሑ ምድረ ጌንሴሬጥ ወአርሰዩ ህየ ሐመሮሙ።

⁵⁴ወወፂኦሙ እምሐመር አእመርዎ ሶቤሃ ሰብአ ይእቲ ሀገር።

⁵⁵ወሮጹ ውስተ ኵሉ በሓውርት ወአምጽኡ ድዉያነ በዐራታት ወይወስዱ ኀበ ሰምዑ ከመ ሀሎ ውእቱ ህየ።

⁵⁶ ወውስተ አህጉር ወአዕጻዳት ወውስተ ምሥያጣት ኀበ ቦአ ያነብርዎሙ ለድዉያን ወያስተበቍዕዎ ከመ ይግሥሡ ጽንፈ ልብሱ ወኵሎሙ እለ ገሠሥዎ የሐይዉ።