Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 7 Bible Online

ወንጌል ዘማርቆስ 7 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 7

¹ ወተጋብኡ ኀቤሁ ጸሐፍት ወፈሪሳውያን መጺኦሙ እምኢየሩሳሌም።

² ወርእይዎሙ ለአርዳኢሁ እንዘ ይበልዑ እክለ ዘእንበለ ይትኀፀቡ እደዊሆሙ።

³እስመ ፈሪሳውያንሰ ወኵሎሙ አይሁድ ለእመ በሕቁ ኢተኀፅቡ እደዊሆሙ ኢይበልዑ እክለ እስመ የዐቅቡ ሥርዐቶሙ ለረበናት።

⁴ወዘሂ ተሣየጡ እምሥያጥ ኢይበልዑ ለእመ ኢያጥመቅዎ በማይ ወባዕደኒ ብዙኀ ሕርመተ ዘይትዐቀቡ ወያጠምቁ ጽዋዓተኒ ወቈሳቍሳተኒ ወጽህርታተኒ ወዐራታተኒ።

⁵ወይቤልዎ ጸሐፍት ወፈሪሳውያን ለምንት ኢየሐውሩ አርዳኢከ በከመ ሠርዑ ረበናት ወዘእንበለ ይትኀፀቡ እደዊሆሙ ይበልዑ እክለ።

⁶ወአውሥአ እግዚእ ኢየሱስ ወይቤሎሙ ኦ መደልዋን ሠናየ ተነበየ ኢሳይያስ ላዕሌክሙ በከመ ጽሑፍ «ዝንቱ ሕዝብ በከናፍሪሆሙ ያከብሩኒ ወበልቦሙሰ ነዋኀ ይርኅቁ እምኔየ።

⁷ ወከንቶ ያመልኩኒ ወይሜህሩ ሥርዐታተ ትእዛዛተ ሰብእ።»

⁸ወየኀድጉ ትእዛዘ እግዚአብሔር ወየዐቅቡ ትእዛዛተ ዕጓለ እመሕያው ጥምቀታተ ቈሳቍሳት ወጽህርታት ወጽዋዓት ወባዕደኒ ብዙኀ ዘይመስሎ ለዝንቱ ይገብሩ።

⁹ወይቤሎሙ ርቱዕኑ ትዕልዉ ትእዛዘ እግዚአብሔር ከመ ትዕቀቡ ትእዛዘ ርእስክሙ።

¹⁰ ወሙሴ ይቤለክሙ፤ «አክብር አባከ ወእመከ ወዘአሕሠመ ቃለ ላዕለ አቡሁ ወእሙ ሞተ ለይሙት።»

¹¹ወአንትሙሰ ትብሉ ዘይቤሎ ለአቡሁ አው ለእሙ ቍርባን ዘረባኅከ እምኔየ ብሂል።

¹²ወኢታበውሕዎ ይግበር ምንተኒ ለአቡሁ ወለእሙ።

¹³ወትስዕሩ ቃለ እግዚአብሔር በእንተ ትእዛዝ ዘሠራዕክሙ ወዓዲ ብዙኀ በአምሳለ ዝንቱ ዘትገብሩ።

¹⁴ወጸውዖሙ ካዕበ ለሕዝብ ወይቤሎሙ ስምዑ ኵልክሙ ወለብዉ።

¹⁵አልቦ ዘይበውእ እምአፍኣ ውስተ አፉሁ ለሰብእ ዘይክል አርኵሶቶ ዘእንበለ ዳዕሙ ዘይወፅእ እምልቡ ለሰብእ ውእቱ ያረኵሶ ለሰብእ።

¹⁶ዘቦ እዝን ሰሚዐ ለይስማዕ።

¹⁷ወበዊኦ ቤተ እምኀበ ሕዝብ ተስእልዎ አርዳኢሁ ዘንተ አምሳለ።

¹⁸ወይቤሎሙ ከመዝኑ አንትሙሂ ኢትሌብዉ ኢተአምሩኑ ከመ ኵሉ ዘእምአፍኣ ይበውእ ውስተ ሰብእ ኢይክል አርኵሶቶ።

¹⁹ እስመ ኢይበውእ ውስተ ልቡ ዘእንበለ ዳእሙ ውስተ ከርሡ ክመ ወጽመ ይትከዐው እንዘ ያነጽሕ ኵሎ መባልዕተ።

²⁰ወይቤሎሙ ዘይወፅእ እምኔሁ ለሰብእ ውእቱ ያረኵሶ ለሰብእ።

²¹እስመ እምውስጠ ልቡ ለሰብእ ይወፅእ ኵሉ ኅሊና እኩይ ዘውእቱ ዝሙት ወስርቅ ወቀቲል።

²²ወሐዊረ ብእሲተ ብእሲ ወትዕግልት ወእከይ ወጕሕሉት ወጽልሑት ወምርዓት ወፅርፈት ወትዕቢት ወሕመሜ ዐይን ወእበድ።

²³ዝንቱ ኵሉ እኩይ ዘይወፅእ እምውስጥ ወያረኵሶ ለሰብእ።

²⁴ ወተንሢኦ እምህየ ሖረ ብሔረ ጢሮስ ወሲዶና ወቦአ ቤተ ወኢፈቀደ ያእምሮ መኑሂ ወስእነ ተከብቶ።

²⁵ወእምዝ ሰምዐት ብእሲት በእንቲኣሁ እንተ ጋኔን እኩይ አኀዘ ባቲ ወለታ ወቦአት ወሰገደት ሎቱ ታሕተ እገሪሁ።

²⁶ ወአረማዊት ይእቲ ብእሲት ወሲሮፊኒቂሳዊት ወሰአለቶ ያውፅእ ጋኔነ እምወለታ።

²⁷ወይቤላ እግዚእ ኢየሱስ ኅድጊ ቅድመ ምዕረ ይጽገቡ ውሉድ እስመ ኢኮነ ሠናየ ነሢአ ኅብስተ ውሉድ ወውሂብ ለከለባት።

²⁸ወተሰጥወቶ ወትቤሎ እወ እግዚኦ ከለባትኒ ይበልዑ በታሕተ ማእድ ፍርፋራተ ዘያወድቁ ደቂቅ።

²⁹ወይቤላ በእንተዝ ቃልኪ ሑሪ ወፅአ ውእቱ ጋኔን እምወለትኪ።

³⁰ ወአተወት ቤታ ወረከበታ ለወለታ ልብስታ ወትነብር ዲበ ዐራታ ወኀደጋ ጋኔና።

³¹ ወኀሊፎ ካዕበ እምጢሮስ ሖረ እንተ ሲዶና ላዕለ ገሊላ ማእከለ ዐሠርቱ አህጉር።

³² ወአምጽኡ ኀቤሁ በሃመ ወጽሙመ ወአስተብቍዕዎ ከመ ይደይ እዴሁ ላዕሌሁ።

³³ ወአግኀሦ እምኀበ ሰብእ በባሕቲቱ ወወደየ አጻብዒሁ ውስተ እዘኒሁ ወተፍአ ወገሠሠ ልሳኖ።

³⁴ ወነጸረ ሰማየ ወአስተምሐረ ወይቤ ኤፍታሔ ኤፍታሔ ተረኀው ብሂል።

³⁵ወሶቤሃ ተከሥታ እዘኒሁ ወተፈትሐ ማእሰረ ልሳኑ ወተናገረ ርቱዐ።

³⁶ ወገሠጾሙ ኢይንግሩ ወኢለመኑሂ ወአምጣነ ይከልኦሙ ውእቱ ፈድፋደ ይነግሩ ሎቱ።

³⁷ወፈድፋደ ያነክሩ እንዘ ይብሉ ሚ ሠናይ ኵሎ ሠናየ ገብረ ለጽሙማንሂ ያሰምዖሙ ወለበሃማንሂ ያነብቦሙ።