Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 8 Bible Online

ወንጌል ዘማርቆስ 8 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 8

¹ወይእተ አሚረ ካዕበ ብዙኅ ሰብእ ሀሎ ወአልቦሙ ዘይበልዑ ወጸውዖሙ ለአርዳኢሁ ወይቤሎሙ።

² ያምሕሩኒ እሉ ሰብእ ናሁ ሣልሶሙ ዮም እንዘ ይጸንሑኒ ወአልቦሙ ዘይበልዑ።

³ወእመኒ ሰዐርክዎሙ ርኁባኒሆሙ ይእትዉ አብያቲሆሙ ይደክሙ በፍኖት እስመ ቦ እምኔሆሙ እምርኁቅ ዘመጽኡ።

⁴ወይቤልዎ አርዳኢሁ መኑ ዘይክል በዝየ በገዳም አጽግቦቶሙ ኅብስተ ለዝንቱ ኵሉ ሕዝብ።

⁵ወይቤሎሙ ሚመጠን ኀባውዝ ብክሙ ወይቤልዎ ሰብዑ።

⁶ወአዘዞሙ ለሰብእ ይርፍቁ ዲበ ምድር ወነሥኦን ለሰብዑ ኅብስት ወአእኰተ ወፈተተ ወወሀቦሙ ለአርዳኢሁ ያቅርቡ ሎሙ ወአቅረቡ ለሰብእ።

⁷ወቦሙ ዓሣኒ ኅዳጥ ወባረከ ኪያሁኒ ወይቤሎሙ አቅርቡ ሎሙ ዘኒ።

⁸ወበልዑ ወጸግቡ ወዘአግኀሡ ዘተርፈ ፍተታት መልአ ሰብዐተ አስፈሬዳተ።

⁹ወእለሰ በልዕዎ የአክሉ አርብዓ ምእት ወእምዝ ፈነዎሙ ሶቤሃ ይሑሩ።

¹⁰ወእምዝ ዐርገ ሐመረ ምስለ አርዳኢሁ ወበጽሐ ውስተ ደወለ ድልማኑታ።

¹¹ ወወፅኡ ፈሪሳውያን ወአኀዙ ይትኀሠሥዎ ወይሰአልዎ ትእምርተ እምሰማይ እንዘ ያሜክርዎ።

¹²ወተከዘ በመንፈሱ ወይቤ ምንትኑ ተኀሥሥ ትእምርተ ዛቲ ትውልድ አማን እብለክሙ ከመ ኢይትወሀባ ለዛቲ ትውልድ ትእምርት።

¹³ወኀደጎሙ ወዐርገ ካዕበ ሐመረ ወሖረ ማዕዶተ።

¹⁴ወረስዑ ነሢአ ኅብስት ወአልቦሙ ዘእንበለ አሐቲ ኅብስት ምስሌሆሙ ውስተ ሐመር።

¹⁵ ወአዘዞሙ ወይቤሎሙ ዑቁ ወተዐቀቡ እምነ ብኁኦሙ ለፈሪሳውያን ወእምነ ብኁኦሙ ለሄሮድሳውያን።

¹⁶ወኀለዩ በበይናቲሆሙ ወይቤሉ እስመሁ እንጋ ኅብስተ ኢነሣእነ ይብለነ።

¹⁷ ወአእመሮሙ እግዚእ ኢየሱስ ወይቤሎሙ ምንተኑ ትኄልዩ በልብክሙ እስመሁ ኅብስት አልብክሙ ዓዲኑ ኢተአምሩ ወኢትሌብዉ ልብክሙኑ ጽሉል።

¹⁸አዕይንት ብክሙ ወኢትሬእዩ ወእዝን ብክሙ ወኢትሰምዑ ወኢትዜከሩኑ።

¹⁹ ዘአመ ኀምሰ ኅብስተ ፈተትኩ ለኀምሳ ምእት ብእሲ ሚመጠነ አግኀሥክሙ አክፋረ ዘመልአ ፍተታተ ዘተርፈ ወይቤልዎ ዐሠርተ ወክልኤተ።

²⁰ወይቤሎሙ አመሰኬ ሰብዑ ኅብስተ ለአርብዓ ምእት ብእሲ ሚመጠነ አግኀሥክሙ አስፈሬዳተ ዘመልአ ፍተታተ ዘተርፈ ወይቤልዎ ሰብዑ።

²¹ወይቤሎሙ እፎ እንከ ዘኢትሌብዉ።

²²ወበጽሑ ቤተ ሳይዳ ወአምጽኡ ኀቤሁ ዕዉረ ወአስተብቍዕዎ ይግሥሦ።

²³ ወአኀዞ በእዴሁ ለውእቱ ዕዉር ወአውፅኦ አፍኣ እምሀገር ወተፍአ ውስተ አዕይንቲሁ ወገሠሦ ወይቤሎ ምንተ ትሬኢ።

²⁴ወነጸረ ወይቤ እሬኢ ሰብአ ከመ ዕፀው ያንሶስዉ።

²⁵ወገሠሦ አዕይንቲሁ ካዕበ ወርእየ ዳኅነ ወነጸረ ኵሎ ብሩሀ።

²⁶ ወፈነዎ ቤቶ ወይቤሎ ኢትባእ ውስተ አዕጻዳት ወአልቦ ዘትነግር በውስተ ሀገርኒ።

²⁷ ወሖረ እግዚእ ኢየሱስ ወአርዳኢሁ ውስተ አህጉረ ቂሳርያ ዘፊልጶስ ወተስእሎሙ ለአርዳኢሁ በፍኖት ወይቤሎሙ መነ ይብለኒ ሰብእ።

²⁸ ወይቤልዎ ዮሐንስሃ መጥምቀ አው ኤልያስሃ አው አሐዱ እምነቢያት።

²⁹ወይቤሎሙ አንትሙኬ መነ ትብሉኒ ወተሰጥዎ ጴጥሮስ ወይቤሎ አንተ ውእቱ ክርስቶስ ።

³⁰ ወገሠጾሙ ከመ ኢይንግሩ ወኢለመኑሂ በእንቲኣሁ።

³¹ወአኀዘ ይምሀሮሙ ከመ ሀለዎ ለወልደ ዕጓለ እመሕያው ብዙኀ ያሕምምዎ ወያመክርዎ ረበናት ወሊቃነ ካህናት ወጸሐፍት ወይቀትልዎ ወይትነሣእ በሣልስት ዕለት።

³²ወገሀደ ነገሮሙ ዘንተ ነገረ ወቀርበ ጴጥሮስ ወአኀዘ ይክልኦ።

³³ወተመይጠ ወነጸረ ኀበ አርዳኢሁ ወገሠጾ ለጴጥሮስ ወይቤሎ ሑር እምድኅሬየ ሰይጣን እስመ ኢትኄሊ ዘእግዚአብሔር ዘእንበለ ዘዕጓለ እመሕያው።

³⁴ወጸውዖሙ ለሕዝብ ምስለ አርዳኢሁ ወይቤሎሙ ዘይፈቅድ ይፀመደኒ ይጽልኣ ለነፍሱ ወያጥብዕ ወይጹር መስቀለ ሞቱ ወይትልወኒ።

³⁵ ወዘይፈቅድ ያድኅና ለነፍሱ ለይግድፋ ወዘሰ ገደፋ ለነፍሱ በእንቲኣየ ወበእንተ ወንጌል ይረክባ።

³⁶ወምንተ ይበቍዖ ለሰብእ ለእመ ኵሎ ዓለመ ረብኀ ወነፍሶ ኀጕለ።

³⁷ወምንተ እምወሀበ ሰብእ ቤዛሃ ለነፍሱ።

³⁸ ወለዘኒ ኀፈረኒ ወኀፈረ ቃልየ በዛቲ ትውልድ ዘማ ወኃጥእት ወልደ ዕጓለ እመሕያውኒ የኀፍሮ አመ ይመጽእ በስብሐተ አቡሁ ምስለ መላእክቲሁ ቅዱሳን።