Read Ge'ez NT – ሐዲስ ኪዳን በልሳነ ግእዝ ወንጌል ዘማርቆስ 9 Bible Online

ወንጌል ዘማርቆስ 9 - Ge'ez NT – ሐዲስ ኪዳን በልሳነ ግእዝ bible

ወንጌል ዘማርቆስ 9

¹ ወይቤሎሙ አማን እብለክሙ ሀለዉ እምእለ ይቀውሙ ዝየ እለ ኢይጥዕምዎ ለሞት እስከ አመ ይሬእይዋ ለመንግሥተ እግዚአብሔር እንዘ ትመጽእ በኀይል።

² ወአመ ሰዱስ ዕለት ነሥኦሙ እግዚእ ኢየሱስ ለጴጥሮስ ወለያዕቆብ ወለዮሐንስ ወአዕረጎሙ ደብረ ነዋኀ በባሕቲቶሙ ወተወለጠ ራእዩ በቅድሜሆሙ።

³ወአልባሲሁኒ በረቀ ወጻዕደወ ጥቀ ዘኢይክል መሃፒል ከማሁ አጻዕድዎቶ በዲበ ምድር።

⁴ወአስተርአይዎሙ ሙሴ ወኤልያስ እንዘ ይትናገሩ ምስለ እግዚእ ኢየሱስ።

⁵ወአውሥአ ጴጥሮስ ወይቤሎ ለእግዚእ ኢየሱስ ረቢ ይኄይሰነ ንንበር ዝየ ወንግበር ሠለስተ ማኅደረ አሐደ ለከ ወአሐደ ለሙሴ ወአሐደ ለኤልያስ።

⁶ወኢየአምር ዘይብል እስመ ድንጉፃን እሙንቱ።

⁷ ወመጽአ ደመና ብሩህ ወጸለሎሙ ወመጽአ ቃል እምደመና ዘይብል ዝንቱ ውእቱ ወልድየ ዘአፈቅር ወሎቱ ስምዕዎ።

⁸ወእምዝ ግብተ ነጺሮሙ አልቦ ዘርእዩ ዘእንበለ እግዚእ ኢየሱስ ባሕቲቱ ምስሌሆሙ።

⁹ ወእንዘ ይወርዱ እምደብር አዘዞሙ እግዚእ ኢየሱስ ኢይንግሩ ወኢለመኑሂ ዘርእዩ ዘእንበለ አመ ተንሥአ ወልደ ዕጓለ እመሕያው እምነ ምዉታን።

¹⁰ወዐቀቡ ቃሎ ወተኃሠሡ በበይናቲሆሙ እንዘ ይብሉ ምንት ውእቱ ተንሥኦ እምነ ምውታን።

¹¹ወተስእልዎ ወይቤልዎ በእፎ ይብሉ ጸሐፍት ወፈሪሳውያን ኤልያስ ይቀድም መጺአ።

¹² ወአውሥአ ወይቤሎሙ ኤልያስ ይመጽእ ቅድመ ወያስተራትዕ ኵሎ ወእፎ ጽሑፍ በእንተ ወልደ ዕጓለ እመሕያው ከመ ብዙኀ ያሐምምዎ ወይሜንንዎ።

¹³ ወባሕቱ እብለክሙ ኤልያስ ወድአ መጽአ ወገብሩ ላዕሌሁ ኵሎ ዘፈቀዱ በከመ ጽሑፍ በእንቲኣሁ።

¹⁴ ወበጽሐ ኀበ አርዳኢሁ ወረከበ ብዙኀ ሰብአ ኀቤሆሙ ወጸሐፍትኒ እንዘ ይሴአልዎሙ።

¹⁵ወሶበ ርእይዎ ኵሎሙ ሰብእ ደንገፁ ወሮጹ ሶቤሃ ወአምኅዎ፤

¹⁶ወተስእሎሙ ለጸሐፍት እንዘ ይብል ምንተኑ ትትኃሠሥዎሙ።

¹⁷ወአውሥአ አሐዱ እምውስተ ሕዝብ ወይቤሎ ሊቅ አምጻእክዎ ለወልድየ ኀቤከ እስመ ጋኔን በሃም አኀዞ።

¹⁸ወኀበ ረከቦ ይነፅኆ ወያስተራግፆ ወያሤውኖ ወያሐቅዮ ስነኒሁ ወያየብሶ ወእቤሎሙ ለአርዳኢከ ያውፅእዎ ወስእንዎ ፈውሶቶ።

¹⁹ወአውሥአ ወይቤሎሙ ኦ ትውልድ እንተ አልባቲ ሃይማኖት እስከ ማእዜኑ እሄሉ ምስሌክሙ ወእስከ ማእዜኑ እትዔገሠክሙ አምጽእዎ ዝየ ኀቤየ።

²⁰ወወሰድዎ ኀቤሁ ወሶበ ርእዮ ውእቱ ጋኔን ነጽኆ ሶቤሃ ውስተ ምድር ወአስተራገፆ ወአሥወኖ።

²¹ወተስእሎ እግዚእ ኢየሱስ ለአቡሁ ወይቤሎ እማእዜኑ ዘአኀዞ ወይቤሎ እምንእሱ።

²²ወዘልፈ ያወድቆ ኀበ ጸድፍ ወውስተ እሳት ወማይ ከመ ይቅትሎ ወባሕቱ በዘትክል ርድአኒ ወመሐረኒ።

²³ ወይቤሎ እግዚእ ኢየሱስ እስመ ትቤ እመ ትክል ርድአኒ እመሰ ተአምን ኵሉ ይትከሀል ለዘየአምን።

²⁴ ወጸርሐ አቡሁ ለውእቱ ወልድ ወይቤ አአምን እግዚኦ ባሕቱ ርድኦ ለኢአሚኖትየ።

²⁵ወርእዮ እግዚእ ኢየሱስ ከመ ይትራወጽ ሰብእ ገሠጾ ለውእቱ ጋኔን እኩይ ወይቤሎ ጋኔን በሃም ወጽሙም አነ እኤዝዘከ ትፃእ እምኔሁ ወኢትግባእ እንከ ላዕሌሁ።

²⁶ ወአግዐሮ ብዙኀ ወአስተራገፆ ወወፅአ ወኮነ ከመ በድን እስከ ይብሉ ብዙኃን ሞተ።

²⁷ወአኀዞ እግዚእ ኢየሱስ በእዴሁ ወአንሥኦ ወተንሥአ።

²⁸ወበዊኦሙ ቤተ ይቤልዎ አርዳኢሁ በባሕቲቶሙ በእፎ ስእነ ንሕነ አውፅኦቶ።

²⁹ወይቤሎሙ ዝንቱ ዘመድ ኢይክል ይፃእ ዘእንበለ በጾም ወበጸሎት።

³⁰ ወወፂኦ እምህየ ሖረ እንተ ገሊላ ወኢቀፈደ ያእምርዎ።

³¹ ወመሀሮሙ ለአርዳኢሁ ወይቤሎሙ ሀለዎ ለወልደ ዕጓለ እመሕያው ይግባእ ውስተ እደ ሰብእ ኃጥኣን ወይቀትልዎ ወበሣልስት ዕለት ይትነሣእ።

³²ወኢያእመሩ ዘይቤሎሙ ወይፈርህዎ ተስእሎቶ።

³³ ወበጺሖ ቅፍርናሆም ወበዊኦ ቤተ ይቤሎሙ ምንተኑ ኀለይክሙ በፍኖት በበይናቲክሙ።

³⁴ወአርመሙ እስመ ተባሀሉ በበይናቲሆሙ በፍኖት መኑ እንጋ የዐቢ እምኔሆሙ።

³⁵ ወነበረ ወጸውዖሙ ለዐሠርቱ ወክልኤቱ ወይቤሎሙ ዘይፈቅድ ይኩን ሊቀ ለያትሕት ርእሶ ለኵሉ ወይኩን ላእከ ለኵሉ።

³⁶ ወነሥአ ሕፃነ ወአቀሞ ማእከሎሙ ወአንበሮ ውስተ ሕፅኑ ወይቤሎሙ፤

³⁷ ዘተወክፈ አሐደ ዘመጠነዝ ሕፃን በስምየ ኪያየ ተወክፈ ወዘኒ ኪያየ ተወክፈ አኮ ኪያየ ባሕቲቶ ዘተወክፈ ዘእንበለ ዘፈነወኒ።

³⁸ ወአውሥአ ዮሐንስ ወይቤሎ ሊቅ ቦ ዘርኢነ ዘያወፅእ አጋንንተ በስምከ ወከላእናሁ እስመ ኢተለወከ ምስሌነ።

³⁹ ወይቤሎሙ እግዚእ ኢየሱስ ኢትክልእዎ እስመ አልቦ ዘይገብር ኀይለ በስምየ ወይክል ፍጡነ አሕሥሞ ቃል ላዕሌየ።

⁴⁰ እስመ እምከመ ኢኮነ ዕድውክሙ ቢጽክሙ ውእቱ።

⁴¹ ወዘአስተየክሙ ጽዋዐ ማይ ቈሪር በስምየ እስመ እለ ክርስቶስ አንትሙ አማን እብለክሙ ኢየኀጕል ዕሴቶ።

⁴²ወዘአስሐቶ ለአሐዱ እምእሉ ንኡሳን እለ የአምኑ ብየ ይኄይሶ ይስቅሉ ማኅረጸ አድግ በክሣዱ ወያስጥምዎ ውስተ ባሕር።

⁴³ ወእመኒ እዴከ ታስሕተከ ምትራ እስመ ይኄይሰከ ምቱረ እድ ትባእ ውስተ ሕይወት፤

⁴⁴እምትባእ ምስለ ክልኤሆን እደዊከ ውስተ እሳተ ገሃነም ኀበ ዕፄሁ ኢይነውም ወእሳቱ ኢይጠፍእ።

⁴⁵ወእመኒ እግርከ ታስሕተከ ምትራ እስመ ይኄይሰከ ሐንካሰከ ትባእ ውስተ ሕይወት፤

⁴⁶እምትባእ ምስለ ክልኤሆን እገሪከ ውስተ እሳተ ገሃነም ኀበ ዕፄሁ ኢይነውም ወእሳቱ ኢይጠፍእ።

⁴⁷ ወእመኒ ዐይንከ ታስሕተከ ምልሓ እስመ ይኄይሰከ ነቋረከ ትባእ ውስተ መንግሥተ እግዚአብሔር ፤

⁴⁸እምትባእ ምስለ ክልኤሆን አዕይንቲከ ውስተ ገሃነም ዘእሳት ኀበ ዕፄሁ ኢይነውም ወእሳቱ ኢይጠፍእ።

⁴⁹ እስመ ለኵሉ በእሳት ይሜልሕዎ ወኵሉ ዘይጠባሕ ይትሜላሕ በጼው።

⁵⁰ ሠናይ ውእቱ ጼው ወእመሰ ጼው ለስሐ በምንት እንከ ይቄስምዎ። ጼወ ርከቡ በበይናቲክሙ ወተሰናአዉ።