Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 12 Bible Online

ወንጌል ዘሉቃስ 12 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 12

¹ ወተጋብኡ ኀቤሁ አእላፍ ሰብእ እስከ ይትካየዱ በበይናቲሆሙ ወአኀዘ ይበሎሙ ለአርዳኢሁ ቅድመ[30] ተዐቀቡ እምነብሑኦሙ ለፈሪሳውያን ዘውእቱ አድልዎ።

² እስመ አልቦ ክዱን ዘኢይትከሠት ወአልቦ ኅቡእ ዘኢያስተርኢ።

³ወዘተናገርክምዎ በጽልመት ይትናገርዎ በብርሃን ወይሰማዕ ወዘሂ አልኆሰስክሙ በእዝን ይሰብክዎ በአጽራሕ ወበአንሕስት።

⁴ እብለክሙ ለክሙ ለአዕርክትየ ኢትፍርህዎሙ ለእለ ይቀትሉክሙ ነፍስተክሙ ወእምዝ አልቦ ፈድፋደ ዘይክሉ ገቢረ።

⁵ወባሕቱ አርእየክሙ ዘትፈርሁ ፍርህዎሰ ለዘእምድኅረ ቀተለ ብዉሕ ሎቱ ይደይ ነፍሰኒ ወሥጋኒ ውስተ ገሃነም እወ እብለክሙ ኪያሁ ፍርሁ።

⁶አኮኑ ኀምስ አዕዋፍ ይሠየጣ በክልኤ ጸሪቀ አሶርዮን ወኢአሐቲ እምኔሆን ኢትትረሳዕ በቅድመ እግዚአብሔር ።

⁷ ወለክሙሰ ሥዕርተ ርእስክሙኒ ኵሉ ኍሉቅ ውእቱ ኢትፍርሁ እንከ እስመ እምብዙኅ አዕዋፍ ትኄይሱ አንትሙ።

⁸ እብለክሙ ኵሉ ዘየአምን ብየ በቅድመ ዕጓለ እመሕያው አአምኖ አነሂ በቅድመ መላእክተ እግዚአብሔር።

⁹ ወዘሰ ክሕደኒ በቅድመ ዕጓለ እመሕያው እክሕዶ አነሂ በቅደመ መላእክተ እግዚአብሔር።

¹⁰ ወኵሉ ዘነበበ ቃለ ፅርፈት ላዕለ ወልደ ዕጓለ እመሕያው ይትኀደግ ሎቱ ወዘሰ ነበበ ቃለ ፅርፈት ላዕለ መንፈስ ቅዱስ ኢይትኀደግ ሎቱ ኢበዝ ዓለም ወኢበዘ ይመጽእ ዓለም።

¹¹ ወሶበሂ ይወስዱክሙ አዕዋዳተ ወኀበሂ መላእክት ወነገሥት ወመኳንንት ኢተኀልዩ ዘከመ ትብሉ ወዘከመሂ ትትናገሩ።

¹²እስመ መንፈስ ቅዱስ ውእቱ ዘይነብብ በላዕሌክሙ ሶቤሃ።

¹³ወይቤሎ አሐዱ እምሕዝብ ሊቅ በሎ ለእኁየ ይክፍለኒ ርስትየ።

¹⁴ወይቤሎ እግዚእ ኢየሱስ አንተ ብእሲ መኑ ሤመኒ ከፋሌ ወመኰንነ ላዕሌክሙ።

¹⁵ ወይቤሎሙ ዑቁ ወተዐቀቡ እምነ ኵሉ ትዕግልት እስመ አኮ በአብዝኆ ንዋይ ዘየሐዩ ሰብእ።

¹⁶ወመሰለ ሎሙ ወይቤሎሙ አሐዱ ብእሲ ባዕል ዘሠምረ ሎቱ ተግባሩ ወደለዎ ብሔር።

¹⁷ወኀለየ በልቡ ወይቤ ምንተ እሬሲ ዘአልብየ ኀበ እዘግብ እክልየ ወበረከትየ።

¹⁸ ወይቤ ከመዝ እገብር እነሥት ዘትካት መዛግብትየ ወአሐንጽ ካልአ ዘየዐቢ እምኔሁ ወእዘግብ ህየ እክልየ ወበረከትየ።

¹⁹ወእብላ ለነፍስየ ኦ ነፍስየ ብኪ ብዙኅ በረከት ዘዘገብኩ ለኪ ንቡረ ዘየአክለኪ ለብዙኅ ዓመታት አዕርፊ እንከሰ ብልዒ ወስትዪ ወተፈሥሒ።

²⁰ ወይቤሎ እግዚአብሔር ኦአብድ በዛቲ ሌሊት ይነሥእዋ ለነፍስከ እምላዕሌከ ለመኑ እንከ ይከውን ዘአስተዳለውከ።

²¹ ከማሁኬ ዘይዘግብ ሎቱ መዝገበ ዘኢኮነ እምእግዚአብሔር ብዕሉ።

²² ወይቤሎሙ ለአርዳኢሁ በእንተ ዝንቱ እብለክሙ ኢተኀልዩ ለነፍስክሙ ዘትበልዑ ወዘትሰትዩ ወለሥጋክሙ ዘትለብሱ።

²³እስመ ነፍስ ተዐፅብ እምሲሲት ወሥጋ የዐፅብ እምዐራዝ።

²⁴ ርእዩ ዕጕለ ቋዓት ዘኢይዘርዑ ወኢየአርሩ ወአልቦሙ መዛግብት ወኢውሳጥያት ወእግዚአብሔር ይሴስዮሙ እፎ እንከ ፈድፋደ ትኄይሱ አንትሙ እምአዕዋፍ።

²⁵መኑ እምኔክሙ ኀልዮ ዘይክል ወስኮ አሐደ እመተ በዲበ ቆሙ።

²⁶ወሶበ ኢትክሉ ዘንተ ዘይቀልል ለምንት ትኄልዩ ዘየዐፅብ።

²⁷ ናሁ ጽጌያተ ገዳም ርእዩ ዘከመ ይልህቁ ኢይፈትሉ ወኢይጻምዉ እብለክሙ ከመ ሰሎሞን ጥቀ ኢለብሰ ከመ አሐዱ እምእሉ በኵሉ መዋዕለ ክብሩ።

²⁸ወለእመ ኮነ ሥርወ ጽጌ ዘዮም ሀሎ ወጌሠመ ውስተ እሳት ይትወደይ ከማሁኬ ይሬሲ እግዚአብሔር እፎ እንከ ፈድፋደ ለክሙ ኦ ሕጹጻነ ሃይማኖት።

²⁹አንትሙሂ ኢትኅሥሡ ዘትበልዑ ወዘትሰትዩ ወኢትትፋለሱ።[31]

³⁰እስመ ዘንተሰ ኵሎ አሕዛበ ዓለም ዘአፍኣ የኀሥሥዎ ወለክሙሰ የአምር አቡክሙ ከመ ተኀሥሥዎ ለዝንቱ ኵሉ።

³¹ወባሕቱ ኅሡ መንግሥተ እግዚአብሔር ወጽድቆ ወዝሰ ኵሉ ይትዌሰክ ለክሙ።

³² ኢትፍራህ ኦ ንኡስ መርዔት እስመ ሠምረ አቡክሙ የሀብክሙ መንግሥቶ።

³³ ሢጡ ንዋየክሙ ወሀቡ ምጽዋተ ግበሩ ለክሙ ቍናማተ ዘኢይበሊ ወመዛግብተ በሰማያት ዘኢየኀልቅ ኀበ ኢይረክቦ ሰራቂ ወኢያማስኖ ፃፄ ወቍንቍኔ።

³⁴ወኀበ ሀሎ መዝገብክሙ ህየ ይሄሉ ልብክሙ።

³⁵ ወይኩን ቅኑተ ሐቌክሙ ወኅትወ መኃትዊክሙ።

³⁶ ወአንትሙኒ ኩኑ ከመ ዕደው እለ ይጸንሑ እግዚኦሙ እስከ የአቱ እምከብካብ ከመ መጺኦ ወጐድጕዶ ያርኅውዎ ሶቤሃ።

³⁷ብፁዓን እሙንቱ አግብርት እለ ይረክቦሙ እግዚኦሙ መጺኦ እንዘ ከመዝ ይገብሩ ወይተግሁ አማን እብለክሙ ከመ ይቀንት ሐቌሁ ወያረፍቆሙ ወያንሶሱ ማእከሎሙ ወይትለአኮሙ።

³⁸ወእመኒ በካልእት ወእመኒ በሣልስት ሰዓተ ሌሊት መጽአ ወረከቦሙ ከመዝ ብፁዓን እሙንቱ እልክቱ አግብርት።

³⁹ ወዘንተ ባሕቱ አእምሩ ሶበሁ የአምር በዓለ ቤት እንተ ጊዜ ይመጽእ ሰራቂ እምተግሀ ወእምሐለወ ወእምኢያብሐ[32] ይክርዩ ቤቶ።

⁴⁰ ወአንትሙሂ ድልዋኒክሙ ሀልዉ እስመ በጊዜ ኢተሐዘብክሙ ይመጽእ ወልደ ዕጓለ እመሕያው።

⁴¹ወይቤሎ ጴጥሮስ እግዚኦ ለነኑ ትሜስል ዘንተ ምሳሌ አው ለኵሉኑ።

⁴²ወይቤሎ እግዚእነ መኑ እንጋ ውእቱ መጋቢ ኄር ወምእመን ወጠቢብ ዘይሠይሞ እግዚኡ ላዕለ ኵሉ ሰብአ ቤቱ ከመ የሀቦሙ ሲሳዮሙ በበጊዜሁ።

⁴³ብፁዕ ውእቱ ገብር ዘመጺኦ እግዚኡ ይረክቦ እንዘ ከመዝ ይገብር።

⁴⁴አማን እብለክሙ ከመ ላዕለ ኵሉ ንዋዩ ያሜግቦ።

⁴⁵ወእመሰ ይቤ ውእቱ ገብር እኩይ በልቡ ይጐነዲ አቲወ እግዚእየ ወይእኅዝ ይዝብጥ ወያመንዝዝ ደቀ ወአዋልደ ዘቤተ እግዚኡ ወይበልዕ ወይሰቲ ምስለ ሰካርያን ወይሰክር።

⁴⁶ወይበጽሕ እግዚኡ ለውእቱ ገብር በዕለተ ኢተሐዘበ ወበጊዜ ኢያእመረ ወይመትሮ እማእከሉ ወያገብእ መክፈልቶ ምስለ እለ ኢየአምኑ።

⁴⁷ወለገብርሰ ዘየአምር ፈቃደ እግዚኡ ወኢይገብር ወኢያስተዳሉ ዘከመ ይፈቅድ ብዙኅ መቅሠፍቱ።

⁴⁸ወዘሰ ኢየአምር ለእመ ኢገብረ ውኁድ መቅሠፍቱ ወለኵሉ ዘብዙኀ ወሀብዎ ብዙኀ ይትኃሠሥዎ ወለዘኒ ውኁደ አማሕፀንዎ ውኁደ ይትኃሠሥዎ።[33]

⁴⁹ እሳተ አምጻእኩ ለብሔር ወምንተ እፈቅድ ዘእንበለ አንድዶታ።

⁵⁰ ወባሕቱ ብየ ጥምቀት ዘእጠመቅ ወጥቀ[34] እትዔገሥ እስከ እፌጽማ።

⁵¹ ወይቤሎሙ ለሕዝብ ይመስለክሙኑ ሰላመ ዘአምጻእኩ ለምድር አልቦ እብለክሙ ዘእንበለ መጥባሕት ወፍልጣን።

⁵²ወእምይዜሰ ለእመ ኀምስቱ ሀለዉ ውስተ አሐዱ ቤት ይትፈለጡ ሠለስቱ እምክልኤቱ ወይትፈለጡ ክልኤቱ እምሠለስቱ ወይትፈለጥ አሐዱ እምካልኡ።[35]

⁵³ ወይትፈለጥ አብ እምወልዱ ወወልድኒ እምአቡሁ ወትትፈለጥ እም እምወለታ ወወለትኒ እምእማ ወሐማት እመርዓታ ወመርዓትኒ እምሐማታ።

⁵⁴ ወእምዝ ይቤሎሙ ለሕዝብ ሶበ ትሬእዩ ደመና ዘይዴምን መንገለ ዓረብ ዝናም ለመጺእ ከመዝ ይከውን ትብሉ።

⁵⁵ወሶበ ይነፍኅ ነፋሰ አዜብ ሐሩር ለመጺእ ከመዝ ይከውን ትብሉ።

⁵⁶ ኦ መደልዋን ለገጸ ሰማይ ወምድር ተአምሩ አመክሮቶ ወእፎ ኢተአምሩ አመክሮቶን ለእላንቱ መዋዕል።

⁵⁷ወለምንትኑ ለሊክሙ ኢትፈትሑ ጽድቀ።

⁵⁸ ወሶበ ተሐውር ምስለ ዕድውከ ኀበ መልአክ ተዐረቅ በፍኖት ወሰልጥ ዘትፈድዮ ከመ ኢይትባጻሕከ ኀበ መኰንን ወመኰንን ይሜጥወከ ለወዓሊሁ ወወዓሊሁ ይሞቅሐከ።

⁵⁹እብለከ ከመ ኢትወፅእ እምህየ እስከ ሶበ ትሴልጥ ደኃሪተ ገመስ ዘላዕሌከ።