Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 13 Bible Online

ወንጌል ዘሉቃስ 13 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 13

¹ወበውእቱ መዋዕል መጽኡ ሰብእ ኀቤሁ ወዜነውዎ በእንተ ገሊላውያን እለ ደመረ ጲላጦስ ደሞሙ ምስለ መሥዋዕቶሙ።

² ወአውሥአ እግዚእ ኢየሱስ ወይቤሎሙ ይመስለክሙኑ እሙንቱ ገሊላውያን ኃጥኣን እምኵሉ ሰብአ ገሊላ እስመ ዛቲ ሕማም ረከበቶሙ።

³ አልቦ እብለክሙ እመሰ ኢነሳሕክሙ አንትሙኒ ከማሆሙ ትትኀጐሉ ኵልክሙ።

⁴ ወሚመ ይመስለክሙኑ እሉ ዐሠርቱ ወሰመንቱ እለ ወድቀ ላዕሌሆሙ ማኅፈድ በሰሊሆሙ ወቀተሎሙ ከመ እሙንቱ ኃጥኣን እምኵሉ ሰብአ ኢየሩሳሌም።

⁵ አልቦ እብለክሙ እመሰ ኢነሳሕክሙ ከማሆሙ ትትኀጐሉ አንትሙሂ ኵልክሙ።

⁶ ወመሰለ ሎሙ ወይቤሎሙ አሐዱ ብእሲ በለስ ቦቱ ውስተ ዐጸደ ወይኑ እምርት ወሖረ ኀቤሃ ይንሣእ ፍሬሃ ወኢረከበ።

⁷ወሶበ ኢረከበ[36] ይቤሎ ለዐቃቤ ወይን ናሁ ሠለስተ ዓመተ እንዘ እመጽእ እንሣእ ፍሬሃ ለዛቲ በለስ ወኢረከብኩ ግዝማ እንከሰ ከመ ኢታጽርእ ምድረነ።

⁸ ወአውሥአ ወይቤሎ ኅድጋ እግዚኦ ኀሪፈኒ እስከ እከሪ መሬተ ወእወዲ ወእክዑ ድኵዐ ታሕቴሃ።

⁹ ለእመቦ ከመ ትፈሪ ለዓሙ ወእመ አኮሰ ንገዝማ ለእመ ሐዮነ።[37]

¹⁰ወመሀሮሙ በሰንበት በአሐዱ ምኵራብ።

¹¹ወሀለወት አሐቲ ብእሲት እንተ አድወያ ጋኔን ዐሠርተ ወሰመንተ ዓመተ ወጕሕቈት ወኢትክል ርቱዐ ቀዊመ ግሙራ።

¹²ወርእያ እግዚእ ኢየሱስ ወመሐራ ወጸውዓ ወይቤላ ኦ ብእሲቶ ተስዕርኪ እምደዌኪ።

¹³ ወአንበረ እዴሁ ላዕሌሃ ወረትዐት ሶቤሃ ወአእኰተቶ ለእግዚአብሔር።

¹⁴ወአውሥአ መጋቤ ምኵራብ እንዘ ይትመዐዕ እስመ በሰንበት ፈወሰ እግዚእ ኢየሱስ ወይቤሎሙ ለሕዝብ አኮኑ ሰዱስ መዋዕል ውእቱ በዘትገብሩ ግብረክሙ ውእተ አሚረ ንዑ ተፈወሱ ወአኮ በዕለተ ሰንበት።

¹⁵ ወአውሥአ እግዚእ ኢየሱስ ወይቤሎሙ ኦ መደልዋን አንትሙሰ ኢትፈትሑኑ አድገክሙ ወላሕመክሙ እምነ ምቅማሑ ወኢትወስድዎኑ ታስትይዎ ማየ በዕለተ ሰንበት።

¹⁶ ወዛቲ ወለተ አብርሃም ናሁ ዐሠርቱ ወሰመንቱ ዓመት እምዘአሰራ ሰይጣን አኮኑ ርቱዕ ትትፈታሕ እምነ ማእሰራ ይእቲሂ በዕለተ ሰንበት።

¹⁷ወዘንተ ብሂሎ ተኀፍሩ ኵሎሙ እለ ቆሙ ላዕሌሁ ወተፈሥሑ ኵሉ ሕዝብ በእንተ ኵሉ መንክር ዘይትገበር እምኔሁ።

¹⁸ ወይቤሎሙ ምንተ ትመስል መንግሥተ ሰማያት ወበምንት አስተማስላ።

¹⁹ትመስል ኅጠተ ሰናፔ እንተ ነሥኣ ብእሲ ወዘርዓ ውስተ ገራህቱ ወልህቀት ወኮነት ዕፀ ዐባየ ወአጽለሉ አዕዋፈ ሰማይ ውስተ አዕጹቂሃ።

²⁰ወካዕበ ይቤ በምንት አስተማስላ ለመንግሥተ እግዚአብሔር።

²¹ ትመስል ብኁአ ዘነሥአቶ ብእሲት ወደፈነቶ ውስተ ሐሪጽ ዘሠለስቱ መስፈርት ወአብኅአ ኵሎ።

²²ወየሐውር አህጉረ ወአዕጻዳተ ያንሶሱ በኢየሩሳሌም ወይሜህር።

²³ወይቤሎ አሐዱ እግዚኦ ውኁዳንኑ እንጋ እሙንቱ እለ ይድኅኑ።

²⁴ ወይቤሎሙ ተኀየሉ ትባኡ እንተ ጸባብ አንቀጽ እብለክሙ ብዙኃን እለ የኀሥሡ ይባኡ ወኢይክሉ።

²⁵ እስመ ይትነሣእ በዓለ ቤት ወየዐጹ ኆኅቶ ወይእተ ጊዜ ይእኅዙ ይቁሙ አፍኣ ወይጐድጕዱ እንዘ ይብሉ እግዚኦ እግዚኦ አርኅወነ ወያወሥእ ወይብሎሙ ኢየአምረክሙ እምአይቴ አንትሙ።

²⁶ ወእምዝ ይእኅዙ ይበልዎ በላዕነሂ ወሰተይነሂ በቅድሜከ ወመሀርከ በመራሕብቲነ።

²⁷ ወይቤሎሙ እብለክሙ ኢየአምረክሙ እምአይቴ አንትሙ ረኀቁ እምኔየ ኵልክሙ ገበርተ ዐመፃ።

²⁸ ወሑሩ ውስተ ብካይ ወሐቅየ ስነን ወአመ ርኢክምዎሙ ለአብርሃም ወለይስሐቅ ወለያዕቆብ ወለኵሎሙ ነቢያት በመንግሥተ እግዚአብሔር ወለክሙሰ ያውፅኡክሙ አፍኣ።

²⁹ ወይመጽኡ እምጽባሕ ወእምዕራብ ወእምሰሜን ወእምደቡብ ወይረፍቁ ወይትፌሥሑ በመንግሥተ እግዚአብሔር።

³⁰ ወይከውኑ ደኀርት ቀደምተ ወቀደምት ይከውኑ ደኀርተ።

³¹ ወበይእቲ ዕለት መጽኡ ፈሪሳውያን ወይቤልዎ ሑር እምዝየ እስመ ሄሮድስ ይፈቅድ ይቅትልከ።

³²ወይቤሎሙ ሑሩ በልዋ ለዛቲ ቍንጽል ናሁ አወፅእ አጋንንተ ወእሁብ ሕይወተ ዮም ወጌሠመ ወበሣልስት እፌጽም።

³³ ወባሕቱ ዮምሰ ወጌሠመ ሀለውኩ ወበሣልስት አሐውር እስመ ኢይደልዎ ለነቢይ መዊት በአፍኣ ዘእንበለ በኢየሩሳሌም።

³⁴ ኢየሩሳሌም ኢየሩሳሌም እንተ ትቀትሊዮሙ ለነቢያት ወትዌግሪዮሙ ለሐዋርያት እለ ተፈነዉ ኀቤኪ ሚመጠነ ፈቀድኩ አስተጋብኦሙ ለደቂቅኪ ከመ እንተ ታስተጋብእ ዶርሆ ዕጐሊሃ ታሕተ ክነፊሃ ወአበይክሙ።

³⁵ ናሁ ይትኀደግ ለክሙ ቤትክሙ በድወ እብለክሙ ከመ ኢትሬእዩኒ እምይእዜ እስከ ሶበ ትብሉ ቡሩክ ዘይመጽእ በስመ እግዚአብሔር።