Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 14 Bible Online

ወንጌል ዘሉቃስ 14 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 14

¹ ወእምዝ ሖረ ወቦአ ቤተ አሐዱ ብእሲ እምነ መልአኮሙ ለፈሪሳውያን በሰንበት ከመ ይብላዕ እክለ ወእሙንቱሰ ይትዐቀብዎ።

²ወሀሎ አሐዱ ብእሲ ቅብው ቅድሜሁ።

³ ወአውሥአ እግዚእ ኢየሱስ ወተስእሎሙ ለጸሐፍተ ሀገር ወለፈሪሳውያን እንዘ ይብል ይከውንሁ በሰንበት ፈውሶ ወሚመ ኢይከውንሁ።

⁴ወአርመሙ ወነሥኦ ወፈወሶ ወፈነዎ።

⁵ ወይቤሎሙ እመቦ አሐዱ እምኔክሙ ለእመ ወድቆ ላሕሙ አው አድጉ ውስተ ዐዘቅት አኮኑ በጊዜሃ ያነሥኦ በዕለተ ሰንበት።

⁶ወስእኑ አውሥኦቶ በእንተ ዝንቱ ነገር።

⁷ ወይቤሎሙ ለእለ ሀለዉ ውስተ ምሳሕ ወመሰለ ሎሙ ወመሀሮሙ ሶበ ርእዮሙ እንዘ ይትባደሩ ውስተ ርእሰ ምርፋቅ።

⁸ወይቤሎሙ እመቦ ዘጸውዐከ ውስተ ምሳሕ ወሖርከ ኢትርፍቅ ውስተ ርእሰ ምርፋቅ ክቡር እመቦ ዮጊ ይመጽእ ዘይከብረከ።

⁹እስመ መጺኦ ድኅረ ይብለከ ዝኩ ዘጸውዐከ ኅድግ ሎቱ ዘንተ ገጸ ወትገብእ ወትትኀፈር ውእተ ጊዜ ወትወርድ ውስተ ምርፋቅ ዘይቴሐት።

¹⁰ወእመሰ ቦ ዘጸውዐከ ወሖርከ ርፍቅ ውስተ ታሕታይ ምርፋቅ ከመ ሶበ መጽአ ዘጸውዐከ ይበልከ ዐርክየ ዕርግ ውስተ ዘይትሌዐል ምርፋቅ ወውእተ ጊዜ ይከውነከ ክብረ በቅድመ ኵሎሙ እለ ይረፍቁ ወይመስሑ ምስሌከ።

¹¹ እስመ ኵሉ ዘአዕበየ ርእሶ የኀሥር ወዘአትሐተ ርእሶ ይከብር።

¹²ወይቤሎ ለዘጸውዖ ሶበ ትገብር በዓለ ወምሳሐ አው ድራረ ኢትጸውዕ አዕርክቲክ ወአኀዊከ ወአዝማዲከ ወጎረከ ወቢጸከ አብዕልተ ከመ ይጸውዑከ እሙንቱሂ ወይከውነከ ፍዳ በኀቤሆሙ።

¹³ አላ ሶበ ትገብር በዓለ ወምሳሐ ጸውዕ ነዳያነ ወምስኪናነ ወዕዉራነ ወስቡራነ።

¹⁴ ወብፁዕ አንተ እስመ አልቦሙ ዘይፈድዩከ ወባሕቱ ትትዐሠይ አመ ይትነሥኡ ጻድቃን።

¹⁵ ወሰሚዖ ዘንተ አሐዱ እምእለ ይረፍቁ ይቤሎ ብፁዕ ውእቱ ዘይበልዕ እክለ በመንግሥተ እግዚአብሔር።

¹⁶ ወይቤሎሙ እግዚእ ኢየሱስ አሐዱ ብእሲ ገብረ ምሳሐ ዐቢየ ወዐሠሮሙ ለብዙኃን።

¹⁷ወሶበ በጽሐ ዐሡር ፈነወ ገብሮ ይጸውዖሙ ለእለ ዐሠሮሙ ወሶበ በጽሐ ጊዜ ምሳሕ ሖረ ገብሩ ወይቤሎሙ ለእለ ዐሠሮሙ ንዑ እስመ ወዳእነ አስተዳለውነ ምሳሐ።

¹⁸ወአበይዎ ኵሎሙ ኅቡረ በአሐዱ ቃል ወይቤሎ ቀዳማዊ ገራህተ ተሣየጥኩ ወእጽሕቅ ከመ እፃእ ወእሑር እርአያ ወበሎ ረሲ ሊተ ከመ ዘኢአበይኩ።

¹⁹ወይቤሎ ካልኡኒ ኀምስተ ፅምደ አልሕምት ተሣየጥኩ ወአሐውር እርአዮሙ ወእፍትኖሙ ወበሎ ረሲ ሊተ ከመ ዘመጻእኩ ወኢአበይኩ።

²⁰ ወሣልሱኒ ይቤሎ ብእሲተ አውሰብኩ ወበእንተዝ ኢይክል መጺአ።

²¹ወገብአ ገብሩ ወነገሮ ከመዝ ለእግዚኡ ወእምዝ ተምዐ በዓለ ቤት ይእተ ጊዜ ወይቤሎ ለገብሩ ሑር ፍጡነ ውስተ መራሕብት ወውስተ አስኳተ ሀገር ወአምጽእ ሊተ ዝየ ነዳያነ ወጽኑሳነ ወምስኪናነ ወዕዉራነ ወስቡራነ።

²²ወእምዝ ይቤሎ ገብሩ ገበርኩ እግዚኦ በከመ አዘዝከኒ ወዓዲ ቦ መካን።

²³ ወይቤሎ እግዚኡ ለገብሩ ሑር ፍጡነ ውስተ ፍናው ወውስተ ጥቅመ ሀገር ወበግብር አብእ ሰብአ ከመ ይምላእ ቤትየ።

²⁴ እብለክሙ ከመ አሐዱሂ እምእልክቱ ሰብእ እለ ጸዋዕኩ ኢይጥዕምዋ ለበዓልየ።

²⁵ ወእምዝ እንዘ የሐውሩ ምስሌሁ ብዙኃን ሰብእ ተመይጠ ወይቤሎሙ።

²⁶ ዘይመጽእ ኀቤየ ወይፈቅድ ይትልወኒ ለእመ ኢጸልአ አባሁ ወእሞ ወብእሲቶ ወቤቶ ወውሉዶ ወአኀዊኡ ወአኃቲሁ ወዓዲ ነፍሶሂ ኢይክል ከዊነ ረድእየ።

²⁷ ወዘኢይጸውር መስቀሎ ወኢይመጽእ ይትልወኒ ኢይክል ከዊነ ረድእየ።

²⁸ወእመቦ አሐዱ እምኔክሙ ዘይፈቅድ ይሕንጽ ማኅፈደ አኮኑ ይቀድም ወይነብር ወየሐስብ ፃእፃኦ እመቦ ዘየአክሎ ከመ ይሣርር መሠረቶ።

²⁹ከመ ሣሪሮ መሠረተ ለእመ ስእነ ፈጽሞ ኵሎሙ እለ ርእይዎ ይእኅዙ ይሣለቁ ላዕሌሁ።

³⁰እንዘ ይብሉ ዝንቱ ብእሲ አኀዘ ይሕንጽ ወስእነ ፈጽሞ።

³¹ወእመኒ ፈቀደ ንጉሥ ይሑር ይጽብኦ ለካልእ ንጉሥ አኮኑ ይቀድም ወይነብር ወይመክር ለእመ ይክል በእልፍ ጸቢኦቶ ለዘይመጽእ ኀቤሁ ምስለ ክልኤ እልፍ።

³²ወእመ አኮሰ እንዘ ርኁቅ ውእቱ ይፌኑ ሐዋርያተ ትንብልና ኀቤሁ ወይዜንውዎ ሰላመ።

³³ወከመዝ እንከ ኵሉ ዘእምኔክሙ ዘኢወፅአ እምኵሉ ወዘኢይትናከር ኵሎ ዘዚኣሁ ንዋየ ኢይክል ከዊነ ረድእየ።

³⁴ ሠናይ ውእቱ ጼው ወእመሰ ጼው ለስሐ በምንት እንከ ይቄስምዎ።

³⁵ አኮኑ ይገድፍዎ አፍኣ ወኢይበቍዕ ለምድር ወኢለምዕላደ ድኵዕ[38] ዘቦ እዝን ሰሚዐ ለይስማዕ።