Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 15 Bible Online

ወንጌል ዘሉቃስ 15 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 15

¹ ወቀርቡ ኀቤሁ መጸብሓን ወኃጥኣን ይስምዕዎ።

²ወአንጐርጐሩ ጸሐፍት ወፈሪሳውያን እንዘ ይብሉ ዝንቱሰ ኃጥኣነ ይትዌከፍ ወይበልዕ ምስሌሆሙ።

³ ወመሰለ ሎሙ ከመዝ ወይቤሎሙ።

⁴ እመቦ ብእሲ እምኔክሙ ዘቦ ምእት አባግዕ ወለእመ ተገድፈቶ አሐቲ እምኔሆን አኮኑ የኀድግ ተስዓ ወተስዐተ ውስተ ገዳም ወየሐውር ኀበ እንተ ተገድፈቶ እስከ ይረክባ።

⁵ ወእምከመ ረከባ ይጸውራ ዲበ መትከፍቱ እንዘ ይትፌሣሕ።

⁶ ወአቲዎ ቤቶ ይጼውዕ አዕርክቲሁ ወጎሮ ወይብሎሙ ተፈሥሑ ሊተ እስመ ረከብኩ በግዕትየ እንተ ተገድፈተኒ።

⁷እብለክሙ ከመ ከመዝ ይከውን ትፍሥሕት በሰማያት በበይነ አሐዱ ኃጥእ ዘይኔስሕ ፈድፋደ እምነ ተስዓ ወተስዐቱ ጻድቃን እለ ኢይፈቅዱ ይነስሑ።

⁸ወእመኒ ብእሲት ዘባቲ ዐሥሩ ጠፋልሐ አግሙስ ወለእመ ተገድፈታ አሐቲ እምኔሆን አኮኑ ታኀቱ ማኅቶተ ወትፈነቅል ኵሎ ዘውስተ ቤታ ወተኀሥሥ አስተሐሚማ እስከ ትረክብ።

⁹ወእምከመ ረከበት ትጼውዕ አዕርክቲሃ ወጎራ ወትብሎን ተፈሥሓ ሊተ እስመ ረከብኩ ገመስየ እንተ ተገድፈተኒ።

¹⁰ እብለክሙ ከመ ከማሁ ይከውን ፍሥሓ በሰማያት በቅድመ መላእክተ እግዚአብሔር በእንተ አሐዱ ኃጥእ ዘይኔስሕ።

¹¹ወካዕበ ይቤ አሐዱ ብእሲ ቦቱ ክልኤቱ ደቂቅ።

¹² ወይቤሎ ዘይንእስ ለአቡሁ አባ ሀበኒ መክፈልተ ርስትየ ዘይረክበኒ እምንዋይከ ወከፈሎ ንዋዮ።

¹³ ወእምድኅረ ኅዳጥ መዋዕል አስተጋብአ ኵሎ ንዋዮ ዝኩ ወልዱ ዘይንእስ ወሖረ ወነገደ ርኁቀ ብሔረ ወበህየ ዘረወ ወአማሰነ ኵሎ ንዋዮ እንዘ የሐዩ በምርዓት።

¹⁴ወአኅሊቆ ኵሎ ንዋዮ መጽአ ረኃብ ዐቢይ ውስተ ውእቱ ብሔር ወተጸነሰ።

¹⁵ወሖረ ወተፀምደ ኀበ አሐዱ እምሰብአ ውእቱ ብሔር ወፈነዎ ውስተ አዕጻደ ወፍሩ ይርዐይ አሕርወ።

¹⁶ወፈተወ ይጽገብ እምሖመረ ጽራእ ዘይሴሰዩ አሕርው ወአልቦ ዘይሁቦ።

¹⁷ወኀለየ በልቡ[39] ወይቤ ሚመጠን አግብርቲሁ ወገባእቱ ለአቡየ እለ ያተርፍዎ ለእክል ወአንሰ እመውት በረኃብ በዝየ።

¹⁸ እትነሣእ ወአሐውር ኀበ አቡየ ወእብሎ አባ አበስኩ በሰማይኒ ወበቅድሜከኒ።

¹⁹ወኢይደልወኒ እንከ እሰመይ ወልደከ አላ ረስየኒ ከመ አሐዱ እምአግብርቲከ።

²⁰ ወተንሥአ ወሖረ ኀበ አቡሁ ወርእዮ አቡሁ እምርኁቅ ምህሮ ወሮጸ ወሐቀፎ ክሣዶ ወሰዓሞ።

²¹ወይቤሎ ወልዱ አባ አበስኩ በሰማይኒ ወበቅድሜከኒ ወኢይደልወኒ እንከ እሰመይ ወልደከ አላ ረስየኒ ከመ አሐዱ እምአግብርቲከ።

²² ወይቤሎሙ አቡሁ ለአግብርቲሁ አምጽኡ ፍጡነ አልባሰ ቅድዋተ ወአልብስዎ ወደዩ ኅልቀተ ውስተ አጻብዒሁ ወአሣእነ ውስተ እገሪሁ።

²³ወአምጽኡ ላሕመ መግዝአ ወጥብሑ ንብላዕ ወንትፈሣሕ።

²⁴ እስመ ዝንቱ ወልድየ ሞተሂ ወሐይወ ተኀጕለሂ ወተረክበ ወአኀዙ ይትፈሥሑ።

²⁵ወወልዱሰ ዘይልኅቅ ሀለወ ውስተ ሐቅል ወአቲዎ ሶበ በጽሐ ኀበ ጽንፈ ሀገር ሰምዐ እንዚራ ወማኅሌተ።

²⁶ወጸውዐ አሐደ እምአግብርተ አቡሁ ወይቤሎ ምንትኑ ዝንቱ ዘእሰምዕ።

²⁷ወይቤሎ እስመ አተወ እኁከ ወጠብሐ አቡከ ላሕመ መግዝአ እስመ ረከቦ ሕያዎ።

²⁸ወተምዐ ወአበየ በዊአ ወወፅአ አቡሁ ወአስተብቍዖ።

²⁹ወአውሥአ ወይቤሎ ለአቡሁ ናሁ መጠነዝ ዓመተ ተቀነይኩ ለከ ወግሙራ ኢኀለፍኩ እምትእዛዝከ ወሊተሰ ኢወሀብከኒ ማሕስአ ጠሊ ጥቀ በዘእትፌሣሕ ምስለ አዕርክትየ ወቢጽየ።

³⁰ወአቲዎሰ ዝንቱ ወልድከ ዘአኅለቀ ወበልዐ ኵሎ ንብረተከ ምስለ ዘማት ጠባሕከ ሎቱ ላሕመ መግዝአ።

³¹ወይቤሎ አቡሁ ወልድየ አንተሰ ዘልፈ ሀለውከ ምስሌየ ወኵሉ ዘዚኣየ ዚኣከ ውእቱ።

³²ወባሕቱ ርቱዕሰ ንትፈሣሕ ወንትሐሠይ እስመ ዝንቱ እኁከ ሞተሂ ወሐይወ ተኀጕለሂ ወተረክበ።