Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 16 Bible Online

ወንጌል ዘሉቃስ 16 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 16

¹ ወይቤሎሙ እግዚእ ኢየሱስ ለአርዳኢሁ አሐዱ ብእሲ ባዕል ቦቱ መጋቢ ወአስተዋደይዎ ኀቤሁ ከመ ዘይዘሩ ሎቱ ንዋዮ።

²ወጸውዖ እግዚኡ ወይቤሎ ምንትኑዝ ዘእሰምዕ በእንቲኣከ እንከሰ አግብእ ሐሳበ ምግብናከ እስመ ኢትከውነኒ እንከ መጋቤ ሊተ።

³ወኀለየ ውእቱ መጋቢ ወይቤ ምንተ እሬሲ ናሁ ይስዕረኒ እግዚእየ እምግብናየ ሐሪሰሂ ኢይክል ወስኢለሂ አኀፍር።

⁴አአምር እንከሰ ዘእገብር እምከመ ሰዐረኒ እግዚእየ እምግብናየ ከመ ይትወከፉኒ ውስተ አብያቲሆሙ።

⁵ወጸውዖሙ ለእለ ይፈድይዎ ዕዳ ለእግዚኡ ወይቤሎ ለቀዳማዊ ሚመጠን ዕዳ ዘትፈድዮ ለእግዚእየ ወይቤሎ ምእተ በመስፈርተ ባዶስ ቅብዐ።

⁶ወይቤሎ ናሁኬ መጽሐፍከ ንበር ወጸሐፍ ፍጡነ ኀምሳ ላዕሌከ።

⁷ወይቤሎ ለካልኡሂ አንተሰ ሚመጠነ ትፈድዮ ለእግዚእየ ወይቤሎ ምእተ በመስፈርተ ቆሮስ ሥርናየ ወይቤሎ ናሁኬ መጽሐፍከ ንበር ወጸሐፍ ፍጡነ ሰማንያ ላዕሌከ።

⁸ ወንእዶ እግዚኡ ለመጋቤ ዐመፃ እስመ ከመ ጠቢብ ገብረ እስመ ውሉደ ዝ ዓለም ይጠበቡ እምውሉደ ብርሃን በዓለሞሙ።

⁹ ወአነሂ እብለክሙ ግበሩ ለክሙ አዕርክተ እምንዋየ ዓመፃ ከመ አመ የኀልቅ ንዋይክሙ ይትወከፉክሙ እሙንቱሂ ውስተ አብያቲሆሙ ዘለዓለም።

¹⁰ ወዘሰ በውኁድ ምእመን በብዙኅኒ ምእመን ውእቱ ወዘሰ በኅዳጥ ዐማፂ በብዙኅኒ ዐመፂ ውእቱ።

¹¹ወሶበ በንዋየ ዐመፃ ሃይማኖት አልብክሙ በንዋየ ጽድቅ መኑ የአምነክሙ።

¹²ወሶበ በንዋየ ባዕድ ሃይማኖት አልብክሙ ዘዚኣሁ መኑ እንከ ይሁበክሙ።

¹³ አልቦ ገብር ዘይክል ተቀንዮ ለክልኤቱ አጋእዝት ወእመአኮ አሐደ ያፈቅር ወካልኦ ይጸልእ ወእመአኮ ለአሐዱ ይትኤዘዝ ወለካልኡ የአቢ ኢትክሉኬ ለእግዚአብሔር ተቀንዮ እንዘ ንወየ ታፈቅሩ።

¹⁴ወሰሚዖሙ ዘንተ ኵሎሙ ፈሪሳውያን ተቃጸብዎ እስመ መፍቀርያነ ንዋይ እሙንቱ።

¹⁵ ወይቤሎሙ፤ አንትሙሰ ትጼደቁ ለዐይነ ሰብእ ወእግዚአብሔር የአምረክሙ ልበክሙ እስመ ዘበኀበ ሰብእ ዐቢይ በኀበ እግዚአብሔር ትሑት ወምኑን[40] ውእቱ።

¹⁶ ኦሪትኒ ወነቢያትኒ እስከ ዮሐንስ እምትካት ሰበኩ በእንተ መንግሥተ እግዚአብሔር ወኵሉ ይትገፋዕ[41] በእንቲኣሃ።

¹⁷ ወባሕቱ ይቀልል ሰማይ ወምድር ይኅልፍ እምትደቅ አሐቲ ቃል እምኦሪት ወእምነቢያት።[42]

¹⁸ ወኵሉ ዘይድኅር ብእሲቶ ወያወስብ ካልእተ ዘመወ ወዘኒ ያወስብ ኅድግተ ዘማዊ ውእቱ ወእንተሂ ደኀራ ምታ ለእመ ቀርበት ካልአ ዘመወት።[43]

¹⁹ወሀሎ አሐዱ ብእሲ ባዕል ወይለብስ ሜላተ ወለየ ወልብሰ ቢሶስ ወቀጠንተ አልባስ ወይትፌሣሕ ወይትፌጋዕ ኵሎ አሚረ።

²⁰ወሀሎ አሐዱ ነዳይ ዘስሙ አልዓዛር ግዱፍ ውስተ ዴዴሁ ለባዕል ወይሰክብ እንዘ ይደዊ በሕማመ ቍስል።

²¹ወይፈቱ ይጽገብ እምፍርፋራት ዘይወድቅ እማእዱ ለባዕል ወከለባትሂ ይመጽኡ ወይልሕሱ ቍሰሊሁ።

²²ወእምዝ ሞተ ዝኩ ነዳይ ወወሰድዎ መላእክት ውስተ ሕፅነ አብርሃም ወሞተ ባዕልኒ ወተቀብረ።

²³ወበሲኦል አንሥአ አዕይንቲሁ እንዘ ሀሎ ውስተ ደይን ወርእዮ ለአብርሃም እምርኁቅ ወለአልዓዛር ውስተ ሕፅኑ።

²⁴ወጸውዐ ወይቤ አባ አብርሃም ተሣሀለኒ ወፈንዎ ለአልዓዛር ከመ ይጥማዕ ጽንፈ አጽባዕቱ ማየ ወያቍርረኒ ልሳንየ እስመ ሐመምኩ በዛቲ እሳት።

²⁵ ወይቤሎ አብርሃም ተዘከር ወልድየ ዘከመ ፈጋዕከ ወተፈሣሕከ በሕይወትከ ወአልዓዛርሰ ከማሁ ክመ በተጽናስ ወይእዜሰ ከማሁ ክመ ውእቱ ይትፌሣሕ በዝየ ወአንተሰ ተሐምም።

²⁶ወምስለ ዝንቱ ኵሉ ጸድፍ ዐቢይ ይከልአነ ማእከሌነ ወማእከሌክሙ ከመ እለሂ ይፈቅዱ እምለፌ ይኅልፉ ኢይክሀሉ መጺአ ኀቤክሙ ወእለሂ መንገሌክሙ ኢይዕድዉ ኀቤነ።

²⁷ወይቤሎ እስእለከ አባ አብርሃም ትፈንዎ ለአልዓዛር ቤተ አቡየ።

²⁸እስመ ሀለዉ ኀምስቱ አኀውየ ይንግሮሙ ወይስምዑ ወኢይምጽኡ እሙንቱሂ ውስተ ዛቲ ብሔረ ሕማም።

²⁹ ወይቤሎ አብርሃም ቦሙ ሙሴ ወነቢያት ኪያሆሙ ለይስምዑ።

³⁰ወይቤሎ አልቦ አባ አብርሃም አሐዱ እምነ ምዉታን ለእመ ኢሖረ ኀቤሆሙ ወለእመ ኢነገሮሙ ኢየአምኑ ወኢይኔስሑ።

³¹ ወይቤሎ አብርሃም ለእመሰኬ ሙሴሃ ወነቢያተ ኢይሰምዑ እመሂቦ ዘተንሥአ እምዉታን ኢይሰምዕዎ ወኢየአምንዎ።