Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 19 Bible Online

ወንጌል ዘሉቃስ 19 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 19

¹ወቦአ ኢያሪሆ እግዚእ ኢየሱስ ወእንዘ የኀልፍ[47] እምህየ።

²ናሁ ረከበ ብእሴ ዘስሙ ዘኬዎስ መልአኮሙ ለመጸብሓን ወባዕል ውእቱ።

³ ወየኀሥሥ ይርአዮ ለእግዚእ ኢየሱስ ወያእምር ከመ መኑ ውእቱ ወኢያበውሖ ብዝኀ ሰብእ እስመ ሐፂር ውእቱ በቆሙ።

⁴ወሮጸ ቅድሜሁ ወዐርገ ዲበ ሰግላ ከመ ይርአዮ እስመ እንተ ይእቲ ፍኖት ሀለዎ ይኅልፍ።

⁵ወበጺሖ እግዚእ ኢየሱስ ህየ አንሥአ አዕይንቲሁ ወነጸሮ ወይቤሎ ዘኬዎስ አፍጥን ወረድ እስመ ዮም ሀለወኒ አዐል ቤተከ።

⁶ወአፍጠነ ወሪደ ወአግኀሦ ኀበ ቤቱ እንዘ ይትፌሣሕ።

⁷ ወርእዮሙ ኵሎሙ አንጐርጐሩ ወይቤሉ ኀበ ብእሲ ኃጥእ ቦአ የዐል።

⁸ ወቆመ ዘኬዎስ ወይቤሎ ለእግዚእነ ናሁ መንፈቀ ንዋይየ እሁብ ለነዳያን ወእመሂ ቦ ዘገፋዕክዎ እፈድዮ ህየንተ አሐዱ[48] ትርብዕተ።

⁹ ወይቤሎ እግዚእ ኢየሱስ ዮምሰ ሕይወት ኮነ ለሰብአ ዝንቱ ቤት እስመ አንተሂ ወልደ አብርሃም አንተ።[49]

¹⁰ እስመ መጽአ ወልደ ዕጓለ እመሕያው ይኅሥሥ ወያድኅን ዘተኀጕለ።

¹¹ ወእንዘ ይሰምዑ ዘንተ መሰለ ሎሙ ወይቤሎሙ እስመ ቅሩብ ውእቱ ለኢየሩሳሌም ወይመስሎሙ ከመ ሶቤሃ ታስተርኢ መንግሥተ እግዚአብሔር።

¹²ወይቤ አሐዱ ብእሲ ክቡር ሖረ ብሔረ ርኁቀ ይንሣእ ሎቱ መንግሥተ ወይሰወጥ።

¹³ወጸውዐ አግብርቲሁ ዐሠርተ ወወሀቦሙ ዐሠርተ ምናናተ ወይቤሎሙ ተገበሩ እንከ እስከ አአቱ።

¹⁴ ወሰብአ ሀገሩሰ ይጸልእዎ ወፈነዉ ተናብልተ ድኅሬሁ እንዘ ይብሉ ኢንፈቅዶ ለዝንቱ ይንግሥ ላዕሌነ።

¹⁵ወእምዝ ሶበ አተወ ነሢኦ መንግሥተ አዘዘ ያምጽእዎሙ ለአግብርቲሁ እለ ወሀቦሙ ወርቆ ከመ ያእምር ዘከመ ተገበሩ።

¹⁶ወመጽአ ቀዳማዊ ወይቤሎ እግዚኦ ምናንከ ዐሠርቱ ወዐሠርተ ምናናተ ረባኅኩ።

¹⁷ ወይቤሎ እግዚኡ ኦ ገብር ኄር ወምእመን ዘበውኁድ ምእመነ ኮንከ ዲበ ብዙኅ እሠይመከ ተሠየም ላዕለ ዐሠርቱ አህጉር።

¹⁸ወመጽአ ካልኡሂ ወይቤሎ እግዚኦ ምናንከ ኀምስቱ ወኀምስተ ምናናተ ረባኅኩ።

¹⁹ወይቤሎ ሎቱኒ አንተኒ ተሠየም ላዕለ ኀምስቱ አህጉር።

²⁰ወመጽአ ሣልሱኒ ወይቤሎ እግዚኦ ነያ ምናንከ እንተ ኀቤየ ጠብለልክዋ ወአንበርክዋ ውስተ ሰበንየ።

²¹እስመ ፈራህኩከ እስመ አአምረከ ከመ ዕፁብ ብእሲ አንተ ወትነሥእ ዘኢያንበርከ ወተአርር ዘኢዘራዕከ ወታስተጋብእ ዘኢዘረውከ።

²² ወይቤሎ እግዚኡ በከመ ቃልከ እኴንነከ ኦ ገብር እኩይ ወሀካይ ተአምረኒኑ ከመ ብእሲ ዕፁብ አነ አነሥእ ዘኢያንበርኩ ወአአርር ዘኢዘራዕኩ ወአስተጋብእ ዘኢዘረውኩ።

²³ወለምንት ኢያግባእከ ወርቅየ ውስተ ማእድየ ወለልየ አነ አቲውየ እምአስተገበርክዎ ምስለ ረባኁ።

²⁴ወይቤሎሙ ለእለ ይቀውሙ ህየ ንሥኡ እምላዕሌሁ ዘንተ ምናነ ወሀብዎ ለዘቦቱ ዐሠርቱ ምናናት።

²⁵ወይቤልዎ እግዚኦ አኮኑ ቦቱ ዐሠርቱ ምናናት።

²⁶ ወይቤሎሙ እብለክሙ ለኵሉ ዘቦ ይሁብዎ ወይዌስክዎ ወለዘሰ አልቦ እለሂ ቦ የሀድይዎ።

²⁷ወባሕቱ ለእልክቱሰ ጸላእትየ እለ ኢይፈቅዱ እንግሥ ላዕሌሆሙ አምጽእዎሙ ዝየ ወርግዝዎሙ በቅድሜየ።

²⁸ ወዘንተ ብሂሎ አመልአ ቅድመ ወዐርገ ኢየሩሳሌም።

²⁹ ወሶበ በጽሐ ቤተ ፋጌ ወቢታንያ ኀበ ደብር ዘስሙ ኤሌዎን ፈነወ ክልኤተ እምአርዳኢሁ።

³⁰ ወይቤሎሙ ሑሩ ሀገረ ዘቅድሜክሙ ወበዊአክሙ ትረክቡ ዕዋለ እሱረ ዘኢተጽዕኖ ሰብእ ፍትሕዎ ወአምጽእዎ ሊተ።

³¹ወእመቦ ዘይቤለክሙ ለምንት ትፈትሑ በሉ እግዚኡ ይፈቅዶ።

³²ወሐዊሮሙ እለ ተፈነዉ ረከቡ በከመ ይቤሎሙ።

³³ወፈትሑ ዕዋለ ወእንዘ ይፈትሑ ዕዋለ ይቤልዎሙ አጋእዝቲሁ ለምንት ትፈትሕዎ ለዕዋል።

³⁴ወይቤሉ እግዚኡ ይፈቅዶ።

³⁵ወነሥእዎ ወወሰድዎ ኀበ እግዚእ ኢየሱስ ወረሐኑ አልባሲሆሙ ዲበ ዕዋል ወአጽዐንዎ ለእግዚእ ኢየሱስ ዲቤሁ።

³⁶ወእንዘ የሐውሩ ነጸፉ አልባሲሆሙ ውስተ ፍኖት።

³⁷ወበጺሖሙ ኀበ ሙራደ ዐቀብ ዘደብረ ዘይት አኀዙ ኵሎሙ አርዳኢሁ ይትፈሥሑ ወይሰብሕዎ ለእግዚአብሔር በዐቢይ ቃል በእንተ ኵሉ ኀይል ዘርእዩ።

³⁸ እንዘ ይብሉ ቡሩክ ዘይመጽእ በስመ እግዚአብሔር ወቡሩክ ንጉሠ እስራኤል ሰላም በምድር[50] ወስብሐት በአርያም።

³⁹ወቦ እምፈሪሳውያን እለ ይቤልዎ በማእከለ ሕዝብ ሊቅ ገሥጾሙ ለአርዳኢከ።

⁴⁰ ወአውሥኦሙ ወይቤሎሙ እብለክሙ ለእመ አርመሙ እሉ እሎንቱ አእባን ይኬልሑ።

⁴¹ ወበጺሖ ርእያ ለሀገር ወበከየ ላዕሌሃ።

⁴² ወይቤላ ሶበሰ ተአምሪ ዮም ሰላምኪ ወባሕቱ እምይእዜሰ ተሰወረ እምአዕይንትኪ።

⁴³ ወይበጽሐኪ መዋዕል አመ የዐግቱኪ ፀርኪ ወይትአየኑኪ ወየሐጽሩኪ ወያስተጋብኡኪ እምኵለሄ።

⁴⁴ ወይነፅኁኪ ለኪ ወለውሉድኪኒ ምስሌኪ ወኢየኀድጉ እብነ ዲበ እብን በውስቴትኪ እስመ ኢያእመርኪ መዋዕለ ሣህልኪ።

⁴⁵ ወቦአ ምኵራበ ወሰደደ ኵሎሙ እለ ይሠይጡ ወይሣየጡ በቤተ መቅደስ ወገፍትዐ ማእዳቲሆሙ ለመወልጣን ወመናብርቲሆሙ ለእለ ይሠይጡ ርግበ።

⁴⁶ ወይቤሎሙ ጽሑፍ ዘይብል «ቤትየሰ ቤተ ጸሎት ይሰመይ» ወአንትሙሰ ረሰይክምዎ በኣተ ፈያት ወሰረቅት።

⁴⁷ ወኵሎ አሚረ ይሜህሮሙ በምኵራብ ወየኀሥሡ ሊቃነ ካህናት ወጸሐፍት ወሊቃናተ ሕዝብ በዘይቀትልዎ።

⁴⁸ወኀጥኡ ዘይሬስይዎ እስመ ኵሎሙ ሕዝብ ይሰቀሉ በአፅምዖቱ።