Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 21 Bible Online

ወንጌል ዘሉቃስ 21 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 21

¹ወነጸረ ወርእየ አብዕልተ ዘያበውኡ መባኦሙ ውስተ ሙዳየ ምጽዋት።

² ወርእየ ዕቤረ መበለተ እንዘ ታበውእ ክልኤ ጸራይቀ።

³ ወይቤሎሙ አማን እብለክሙ ከመ ዛቲ ዕቤር ነዳይት አብዝኀት አብኦ መባአ ለእግዚአብሔር።

⁴እስመ እሉ ኵሎሙ እምተረፎሙ አብኡ መባአ ለእግዚአብሔር ወዛቲሰ እምተጽናሳ ኵሎ ጥሪታ ዘባ አብአት።

⁵ ወቦ እለ ይቤልዎ በእንተ ቤተ መቅደስ ሠናይ እበኒሁ ወሥርግው ንድቁ።

⁶ ወይቤሎሙ ትሬእዩኑ ዘንተ ይመጽእ መዋዕል አመ ኢይትኀደግ ዝየ እብን ዲበ እብን ዘኢይትነሠት።

⁷ወተስእልዎ ወይቤልዎ ሊቅ ማእዜ ይከውን ዝንቱ ወምንት ተአምሪሁ አመ ይከውን ዝንቱ።

⁸ ወይቤሎሙ ዑቁ ኢያስሕቱክሙ ብዙኃን ይመጽኡ በስምየ እንዘ ይብሉ አነ ውእቱ ክርስቶስ ወበጽሐ ዕድሜሁ ወኢትሑሩ ወኢትትልውዎሙ።

⁹ወአመ ሰማዕክሙ ቀትለ ወሀከከ ኢትደንግፁ እስመ ይከውን ቅድመ ከመዝ ወባሕቱ አኮ ሶቤሃ ዘየኀልቅ።

¹⁰ወይቤሎሙ ይትነሥኡ ሕዝብ ዲበ ሕዝብ ወነገሥት ዲበ ነገሥት።

¹¹ወይመጽእ ዐቢይ ድልቅልቅ ወረኃብ በበብሔሩ ወፍርሀት ላዕለ ሰብእ ወተኣምር ዐቢይ ይከውን እምሰማይ።

¹² ወእምቅድመ ዝንቱ ኵሉ ይእኅዙክሙ ወይወስዱክሙ አዕዋዳተ ወይሰድዱክሙ ወይሞቅሑክሙ ወይወሰዱክሙ ኀበ ነገሥት ወመሳፍንት በእንተ ስምየ።

¹³ወዝንቱ ይረክበክሙ ከመ ይኩን ስምዐ ላዕሌሆሙ።

¹⁴ ዑቁ ኢተኀልዩ በልብክሙ ዘትብሉ።

¹⁵አነ እሁበክሙ አፈ ወጥበበ በዘኢይክሉ ተዋሥኦተክሙ ወተዋቅሦተክሙ እለ ይትነሥኡ ላዕሌክሙ

¹⁶ ወያገብኡክሙ አዝማዲክሙ ወአኀዊክሙ ወአዕርክቲክሙ ወቢጽክሙ።

¹⁷ ወኵሉ ይጸልአክሙ በእንተ ስምየ ወይቀትሉክሙ።

¹⁸ ወኢትትኀጐል አሐቲ እምሥዕርተ ርእስክሙ።

¹⁹ ወበትዕግሥትክሙ ታጠርይዋ ለነፍስክሙ።

²⁰ ወአመ ርኢክሙ እምዘ የዐገትዋ ሠራዊት ለኢየሩሳሌም አእምሩ ከመ በጽሐ ሙስናሃ።

²¹ ወይእተ አሚረ እለ ውስተ ይሁዳ ይጐዩ ውስተ አድባር ወእለሂ ማእከላ ይወፅኡ እምኔሃ ወእለሂ ውስተ በሐውርቲሃ ኢይበውእዋ።

²² እስመ ዕድሜሃ ውእቱ በዘይትቤቀልዋ ከመ ይብጻሕ ኵሉ ዘጽሑፍ ላዕሌሃ።

²³ወባሕቱ አሌ ሎን ለፅኑሳት ወለእለ የሐፅና በውእቱ መዋዕል እስመ ይከውን ዐቢይ ምንዳቤ ዲበ ምድር ወመቅሠፍት ዲበ ዝንቱ ሕዝብ።

²⁴ ወይወድቁ በኲናት ወይፄወዉ ውስተ ኵሉ አሕዛብ ወይከይድዋ አሕዛብ ለኢየሩሳሌም እስከ ይበጽሕ ዕድሜሆሙ ለአሕዛብ።

²⁵ ወይከውን ተአምር ውስተ ፀሓይ ወወርኅ ወከዋክብትኒ ይወድቁ እምሰማይ ዲበ ምድር[51] ወይትመነደቡ አሕዛብ ወየኀሥሩ እምድምፀ ባሕር ወባሕርኒ ትደምፅ ወትትከወስ።[52]

²⁶ወትወፅእ ነፍሰ ዕጓለ እመሕያው እምፍርሀት ወእምትሕዝብት ዘይመጽእ በዓለም እስመ ይትከወስ ኀይለ ሰማያት ይእተ አሚረ።

²⁷ አሜሃ ይሬእይዎ ለወልደ ዕጓለ እመሕያው እንዘ ይመጽእ በደመና ሰማይ ምስለ ኀይል ብዙኅ ወስብሐት።

²⁸ ወአመ ኮነ ዝንቱ ኵሉ ስግዱ ወአንሥኡ ርእሰክሙ እስመ በጽሐ ዘያድኅነክሙ።

²⁹ወመሰለ ሎሙ ወይቤሎሙ ርእዩ በለሰ ወኵሎ ዕፀወ።

³⁰ ወእም ከመ ርኢክሙ ከመ ሠረጹ ተአምሩ ከመ አልጸቀ ማእረር።

³¹ከማሁ አንትሙኒ እምከመ ርኢክሙ ከመ ኮነ ዝንቱ አእምሩ ከመ በጽሐት መንግሥተ እግዚአብሔር።

³²አማን እብለክሙ ከመ ኢተኀልፍ ዛቲ ትውልድ እስከ ይከውን ዝንቱ ኵሉ።

³³ ሰማይ ወምድር የኀልፍ ወቃልየሰ ኢየኀልፍ።

³⁴ ዑቁ ርእሰክሙ ኢታክብዱ ልበክሙ በበሊዕ ወበስታይ ወበፈጊዕ ወበኀልዮ መንበርት ወትበጽሐክሙ ይእቲ ዕለት ግብተ።

³⁵ከመ መሥገርት እንተ ትወርድ ዲበ ኵሎሙ እለ ይነብሩ ዲበ ምድር።

³⁶ ትግሁ እንከ በኵሉ ጊዜ ከመ ትክሀሉ አምሥጦ በጸሎትክሙ እምነ ዝንቱ ኵሉ ዘይመጽእ ወትቁሙ ቅድሜሁ ለወልደ ዕጓለ እመሕያው።

³⁷ ወኮነ መዓልተ ይሜህር በምኵራብ ወሌሊተ ይወፅእ ወይበይት ውስተ ደብረ ዘይት ዘስሙ ኤሌዎን።

³⁸ወኵሉ ሕዝብ ይገይሡ ኀቤሁ ውስተ ምኵራብ ያፅምዕዎ ቃሎ።