Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 22 Bible Online

ወንጌል ዘሉቃስ 22 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 22

¹ ወቀርበ በዓለ መጸለት ዘስሙ ፋሲካ።

²ወየኀሠሡ ሊቃነ ካህናት ወጸሐፍት በዘይቀትልዎ ወኮኑ ይፈርህዎሙ ለሕዝብ።

³ ወቦአ ሰይጣን ውስተ ልበ ይሁዳ አስቆሮታዊ ዘእምዐሠርቱ ወክልኤቱ ኍልቁ።

⁴ወሖረ ወተናገሮሙ ለሊቃነ ካህናት ወለጸሐፍት ዘከመ ያገብኦ ሎሙ።

⁵ወተፈሥሑ ወተሰናዐዉ ምስሌሁ ወተናገርዎ የሀብዎ ሠላሳ ብሩረ ወአስተኃለቁ ነገረ።

⁶ወየኀሥሥ ሣኅተ ያግብኦ ሎሙ እንዘ አልቦ ሰብእ።

⁷ ወበጽሐት ዕለተ መጸለት አመ ይጠብሑ ፍሥሐ።

⁸ወይቤሎሙ እግዚእ ኢየሱስ ለጴጥሮስ ወለዮሐንስ ሑሩ ወአስተዳልዉ ለነ ፍሥሐ ዘንበልዕ።

⁹ወይቤልዎ በአይቴ ትፈቅድ ናስተዳሉ ለከ።

¹⁰ወይቤሎሙ በዊአክሙ ሀገረ ትረክቡ ብእሴ ዘይጸውር ጻሕበ ማይ ወትልውዎ ኪያሁ ኀበ ቦአ ቤተ።

¹¹ወበልዎ ለበዓለ ውእቱ ቤት ይቤለከ ሊቅ አይቴኑ ቤት ኀበ እበልዕ ፍሥሐ ምስለ አርዳእየ።

¹² ወውእቱ ያርእየክሙ ጽርሐ ዐቢየ ወንጹፈ ወሥርግወ ወበህየ አስተዳልዉ ለነ።

¹³ወሐዊሮሙ ረከቡ በከመ ይቤሎሙ ወአስተዳለዉ ፍሥሐ።

¹⁴ ወሶበ ኮነ ጊዜሁ ረፈቀ እግዚእ ኢየሱስ ወዐሠርቱ ወክልኤቱ ሐዋርያቲሁ ምስሌሁ።

¹⁵ወይቤሎሙ ፈቲወ ፈተውክዎ ለዝንቱ ፋሲካ እብላዕ ምስሌክሙ ዘእንበለ ይብጽሐኒ ሕማምየ።

¹⁶ እብለክሙ ባሕቱ ከመ ኢይበልዕ እንከ እምኔሁ እስከ ይትፌጸም በመንግሥተ እግዚአብሔር።

¹⁷ወተመጠወ ጽዋዐ ወአእኰተ ወይቤ ንሥኡ ዘንተ ወተካፈልዎ ኵልክሙ።

¹⁸ እብለክሙ ኢይሰቲ እንከ እምዝንቱ ፍሬ ወይን እስከ ትመጽእ መንግሥተ እግዚአብሔር ።[53]

¹⁹ ወነሥአ ኅበስተ ወአእኲቶ ፈተተ ወወሀቦሙ ወይቤሎሙ ዝንቱ ውእቱ ሥጋየ ዘይትወሀብ በእንቲኣክሙ ለቤዛ ብዙኃን ወከመዝ ግበሩ ተዝካርየ በእንቲኣየ።

²⁰ ወከማሁ ጽዋዐኒ እምድኅረ ተደሩ ይቤሎሙ ዝንቱ ጽዋዕ ዘሐዲስ ሥርዐት ደምየ[54] ውእቱ ዘይትከዐው በእንቲኣክሙ ወበእንተ ብዙኃን።

²¹ወባሕቱ ናሁ እዴሁ ለዘያገብአኒ ምስሌየ ውስተ ማእድ።

²² ወወልደ ዕጓለ እመሕያውሰ የሐውር በከመ ተሠርዐ በእንቲኣሁ ወባሕቱ አሌ ሎቱ ለውእቱ ብእሲ ዘበውስተ እዴሁ ይትሜጠውዎ ለወልደ ዕጓለ እመሕያው።

²³ወተባሀሉ በበይናቲሆሙ አርዳኢሁ መኑ እንጋ ውእቱ እምኔሆሙ ዘዘንተ ይገብር።

²⁴ ወእምዝ ተዋክሑ በበይናቲሆሙ እንዘ ይብሉ መኑ እንጋ የዐቢ እምኔሆሙ።

²⁵ ወይቤሎሙ ነገሥቶሙ ለአሕዛብ ይኴንንዎሙ ወይቀንይዎሙ ወመኳንንቲሆሙ ረዳእያነ ይብልዎሙ።

²⁶ ወለክሙሰ አኮ ከመዝ አላ ዘየዐቢ እምኔክሙ ይኩንክሙ ከመ ዘይንእስ ወሊቅኒ ይኩን ከመ ላእክ።

²⁷ መኑ ውእቱ ዘየዐቢ ዘይረፍቅኑ ወሚመ ዘይትለአክ አኮኑ ዘይረፍቅ ወአንሰ ናሁ ከመ ላእክ በማእከሌክሙ።

²⁸ ወአንትሙሰ ባሕቱ እለ በእንቲኣየ ተዐገሥክሙ ምስሌየ በሕማምየ።

²⁹ አነኒ አስተዳሉ ለክሙ መንግሥተ በከመ ሊተ ወሀበኒ አቡየ።

³⁰ከመ ትብልዑ ወትስተዩ በማእድየ በመንግሥትየ ወትነብሩ ዲበ መናብርት ወትኴንኑ ዐሠርተ ወክልኤተ ሕዝበ እስራኤል።

³¹ ወይቤሎ እግዚእ ኢየሱስ ለስምዖን ስምዖን ስምዖን ናሁ ስኢለ ሰአለ ሰይጣን የኀንፅፅክሙ ወየኀንፍጽክሙ ከመ ዐለስ።

³² ወአንሰ ሰአልኩ በእንቲኣክሙ ከመ ኢይድክም ሃይማኖትክሙ[55] ወአንተኒ ተመዪጠከ ጸንዖሙ ለአኀዊከ።

³³ ወይቤሎ እግዚኦ አንሰኬ ጥቡዕ ለሐዊር ምስሌከ ውስተ ኢየሩሳሌም እመኒ ለተሞቅሖ ወእመኒ ለመዊት።

³⁴ወይቤሎ እብለከ ጴጥሮስ ዮም ዘእንበለ ይንቁ ዶርሆ ሥልሰ ትክሕደኒ ከመ ዘኢተአምረኒ።

³⁵ ወይቤሎሙ አመ ፈነውኩክሙ ዘእንበለ ቍናማት ወጽፍነት ወአሣእን ቦኑ ዘተጸነስክሙ።

³⁶ወይቤልዎ አልቦ ወይቤሎሙ ይእዜሰኬ ዘቦ ቍናማት ይንሣእ ሎቱ ወከማሁ ዘሂ ጽፍነት ወዘሰ አልቦ መጥባሕት ይሢጥ ልብሶ ወይሣየጥ ሎቱ መጥባሕተ።

³⁷ እብለክሙ ከመ ይበጽሐኒ ዘጽሑፍ ወይትፌጸም በላዕሌየ ዘይብል ምስለ ኃጥኣን ተኈለቈ ወኵሉ ዘበእንቲኣየ ይትፌጸም።

³⁸ወይቤልዎ እግዚኦ ነዋ ሀለዉ ኀቤነ ክልኤቱ መጣብሕ ዝየ ወይቤሎሙ የአክለክሙ እንከሰ።

³⁹ ወወፂኦ ሖረ በከመ ያለምድ ይጸሊ ደብረ ዘይት ወተለውዎ አርዳኢሁ።

⁴⁰ወበጺሖ ህየ ይቤሎሙ ጸልዩ ከመ ኢትባኡ ውስተ መንሱት።

⁴¹ወተአተተ እምኔሆሙ መጠነ ሙጋረ እብን ወሰገደ ወጸለየ።

⁴²እንዘ ይብል አባ ለእመ ትፈቅድ አግኅሦ ለዝንቱ ጽዋዕ እምኔየ ወባሕቱ ፈቃደ ዚኣከ ይኩን ወአኮ ፈቃደ ዚኣየ።

⁴³ ወአስተርአዮ መልአከ እግዚአብሔር እምሰማይ ዘይጼንዖ።

⁴⁴ ወፈርሀ ወአውተረ ጸልዮ ወኮነ ሐፉ ከመ ነጸፍጻፈ ደም ዘይወርድ ውስተ ምድር።

⁴⁵ወተንሢኦ እምኀበ ይጼሊ ሖረ ኀበ አርዳኢሁ ወረከቦሙ እንዘ ይነውሙ እምኀዘን።

⁴⁶ወይቤሎሙ ምንትኑ ያነውመክሙ ተንሥኡ ወጸልዩ ከመ ኢትባኡ ውስተ መንሱት።

⁴⁷ ወእንዘ ዘንተ ይብሎሙ በጽሑ ሕዝብ ወይሁዳ አሐዱ እምዐሠርቱ ወክልኤቱ አርዳኢሁ ይመርሖሙ ወቀርበ ኀቤሁ ለእግዚእ ኢየሱስ ወሰዐሞ ወዝ ውእቱ ትእምርት ዘወሀቦሙ ወይቤሎሙ ዘሰዐምክዎ ውእቱ ኪያሁ አኀዙ አጽኒዐክሙ።[56]

⁴⁸ ወይቤሎ እግዚእ ኢየሱስ ለይሁዳ በስዒምኑ ታገብኦ ለወልደ ዕጓለ እመሕያው አኮኑ ከመ ታቅትሎ።[57]

⁴⁹ወርእዮሙ እለ ምስሌሁ ይቤልዎ ለእግዚእ ኢየሱስ እግዚኦ ትፈቅድኑ ንዝብጦሙ በመጥባሕት።

⁵⁰ወዘበጦ አሐዱ እምኔሆሙ ለገብረ ሊቀ ካህናት ወመተሮ እዝኖ ዘየማን።

⁵¹ወአውሥአ እግዚእ ኢየሱስ ወይቤሎ ኅድግ ዘንተሰ ወገሠሦ እዝኖ ሶቤሃ ወአሕየዎ።

⁵²ወይቤሎሙ እግዚእ ኢየሱስ ለእለ መጽኡ ኀቤሁ የአኀዝዎ ሊቃነ ካህናት ወመገብተ ምኵራብ ወረበናት ከመ ሰራቂኑ ተአኀዙኒ መጻእክሙ ምስለ መጣብሕ ወዕፀው።

⁵³ ወእንዘ ኵሎ አሚረ ሀለውኩ ምስሌክሙ በምኵራብ እዴክሙ ጥቀ ኢሰፋሕክሙ ላዕሌየ ወባሕቱ ዝንቱ ውእቱ ሰዓትክሙ ወሥልጣኑ ለመኰንነ ጽልመት።

⁵⁴ ወአኀዝዎ ወወሰድዎ ቤተ ሊቀ ካህናት ወተለዎ ጴጥሮስ እምርኁቅ።

⁵⁵ ወአንደዱ እሳተ ማእከለ ዐጸድ ወነበሩ ወጴጥሮስኒ ነበረ ምስሌሆሙ ማእከሎሙ።

⁵⁶ወርእየቶ ወለት እንዘ ይነብር መንገለ በርህ ወተጠየቀቶ ወትቤ ዝኒ ምስሌሁ ሀሎ።

⁵⁷ወክሕደ ወይቤላ ብእሲቶ ኢየአምሮ ለዘትብሊ።

⁵⁸ወእምድኅረ ሕቅ ርእዮ ካልእ ወይቤሎ አንተሂ እምኔሆሙ አንተ ወይቤሎ ጴጥሮስ አንተ ብእሲ ኢኮንኩ።

⁵⁹ወኀሊፎ መጠነ አሐቲ ሰዓት አጥወቆ አሐዱ ካልእ እንዘ ይብል አማን ዝንቱሂ ምስሌሁ ሀሎ ወገሊላዊ ውእቱ ብእሲሁ።

⁶⁰ወይቤሎ ጴጥሮስ አንተ ብእሲ ኢየአምሮ ለዘትብል ወእንዘ ውእቱ ይትናገር ዘንተ ነቀወ ዶርሆ ሶቤሃ።

⁶¹ወተመይጠ እግዚእ ኢየሱስ ወነጸሮ ለጴጥሮስ ወተዘከረ ጴጥሮስ ቃሎ ለእግዚእነ ዘይቤሎ ሥልሰ ትክሕደኒ ዮም ዘእንለ ይንቁ ዶርሆ።

⁶²ወወፂኦ አፍኣ ጴጥሮስ በከየ ብካየ መሪረ።

⁶³ ወዕደውኒ እለ አኀዝዎ ለእግዚእ ኢየሱስ ኮኑ ይሣለቁ ላዕሌሁ ወይዘብጥዎ።

⁶⁴ወይገለብብዎ ወይጸፍዕዎ ገጾ ወይሴአልዎ ወይብልዎ ተነበይ ለነ መኑ ውእቱ ዘጸፍዐከ።

⁶⁵ወባዕደኒ ብዙኀ ይቤልዎ እንዘ ይፀርፉ ላዕሌሁ።

⁶⁶ ወጸቢሖ ተጋብኡ ሊቃነ ካህናት ወጸሐፍት ወሊቃናተ ሕዝብ ወወሰድዎ ውስተ ዐውዶሙ።

⁶⁷ወይቤልዎ እመ አንተሁ ክርስቶስ ንግረነ ገሃደ ወይቤሎሙ እመኒ አይዳእኩክሙ ኢተአምኑኒ።

⁶⁸ወእመኒ ተስእልኩክሙ ኢትነግሩኒ ወኢሂ ተኀድጉኒ።

⁶⁹ ወባሕቱ እምይእዜሰ ይነብር ወልደ ዕጓለ እመሕያው በየማነ ኀይለ እግዚአብሔር ።

⁷⁰ወይቤልዎ ኵሎሙ አንተኑ እንከ ውእቱ ወልደ እግዚአብሔር ወይቤሎሙ አንትሙ ትብሉ ከመ አነ ውእቱ ወልደ እግዚአብሔር ።

⁷¹ወይቤሉ ምንተ እንከ ንፈቅድ ሰማዕተ በእንቲኣሁ ናሁ ለሊነ ሰማዕነ እምአፉሁ።