Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 23 Bible Online

ወንጌል ዘሉቃስ 23 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 23

¹ ወተንሥኡ ኵሎሙ በምልኦሙ ወወሰድዎ ኀበ ጲላጦስ።

² ወአኀዙ ያስተዋድይዎ ወይቤሉ ረከብናሁ ለዝንቱ እንዘ ያዐልዎሙ ለሕዝብነ ወይከልኦሙ ኢየሀቡ ጸባሕተ ለቄሳር ወይሬሲ ርእሶ ክርስቶስሃ ንጉሠ እስራኤል።

³ወሐተቶ ጲላጦስ ወተስእሎ ወይቤሎ አንተኑ ንጉሦሙ ለአይሁድ ወአውሥአ እግዚእ ኢየሱስ ወይቤሎ አንተ ትብል ከመ አነ ውእቱ።

⁴ወይቤሎሙ ጲላጦስ ለሊቃነ ካህናት ወለሕዝብ አልቦ ዘረከብኩ አበሳ ላዕለ ዝንቱ ብእሲ።

⁵ወዐውየዉ ወይቤሉ የሀውኮሙ ለሕዝብ ወይሜህር በኵሉ ይሁዳ እኂዞ እምገሊላ እስከ ዝየ።

⁶ወሰሚዖ ጲላጦስ እንዘ ይብሉ ገሊላ ተስእለ ገሊላውያነ ለእመ ገሊላዊ ብእሲሁ።

⁷ ወአእሚሮ ከመ እምኵናነ ሄሮድስ ውእቱ ፈነዎ ኀበ ሄሮድስ እስመ ሀሎ ውእቱ በኢየሩሳሌም በውእቱ መዋዕል።

⁸ ወሶበ ርእዮ ሄሮድስ ለእግዚእ ኢየሱስ ተፈሥሐ ፈድፋደ እስመ ይፈቅድ ይርአዮ እምጕንዱይ መዋዕል እስመ ይሰምዕ ነገሮ ወይሴፎ ይርአይ ተአምረ በኀቤሁ ዘይገብር።

⁹ወሐተቶ በብዙኅ ነገር ወአልቦ ዘተሰጥዎ አሐተ ቃለ።

¹⁰ወይቀውሙ ሊቃነ ካህናት ወጸሐፍት ወብዙኀ ያስተዋድይዎ።

¹¹ወአስተኣከዮ ሄሮድስ ወተሣለቁ ላዕሌሁ ወዓልያኒሁ ወአልበስዎ ልብሰ ቀይሐ ወፈነዎ ኀበ ጲላጦስ።

¹² ወይእተ አሚረ ተኳነኑ ሄሮድስ ወጲላጦስ እስመ ጋእዝ ቦሙ እምቅድም።

¹³ወጸውዖሙ ጲላጦስ ለሊቃነ ካህናት ወለመኳንንተ ሕዝብ።

¹⁴ወይቤሎሙ አምጻእክምዎ ኀቤየ ለዝንቱ ብእሲ ከመ ዐላዌ ሕዝብ ወናሁ አነ ሐተትክዎ በቅድሜክሙ ወአልቦ ዘረከብኩ ሎቱ ጌጋየ ለዝንቱ ብእሲ እምዘአንትሙ አስተዋደይክምዎ።

¹⁵ወኀበ ሄሮድስኒ ፈነውኩክሙ ወውእቱኒ ፈነዎ ኀቤነ ወናሁ አልቦ ዘገብረ በዘይመውት።

¹⁶ አቅሥፎኬ ወእኅድጎ።

¹⁷ወቦ ልማድ በበዐል ያሕዩ ሎሙ አሐደ እምነ ሙቁሓን።

¹⁸ ወዐውየዉ ኵሎሙ ኅቡረ በምልኦሙ ወይቤሉ አእትቶ ወስቅሎ[58] ለዝ ወአሕዩ ለነ በርባንሃ።

¹⁹ወውእቱሰ በርባን ዘገብረ ሀከከ በውስተ ሀገር ወበቀቲለ ነፍስ ተሞቅሐ።

²⁰ወፈቂዶ ጲላጦስ ያሕይዎ ለእግዚእ ኢየሱስ[59] ካዕበ ይቤሎሙ ትፈቅዱኑ አሕይዎ ለክሙ ለኢየሱስ።

²¹ወዐውየዉ ወይቤሉ ስቅሎ ስቅሎ።

²²ወይቤሎሙ ጲላጦስ በሣልስ ምንተ እኩየ ገብረ ናሁ አልቦ ዘረከብኩ ላዕሌሁ በዘይመውት እቅሥፎኬ እንከሰ ወአሕይዎ።

²³ወዐውየዉ በዐቢይ ቃል ወሰአሉ ወይቤሉ ይስቅልዎ ወኀየለ ቃሎሙ ወቃለ ሊቃነ ካህናት።

²⁴ወኰነኖ ጲላጦስ ከመ ይኩኖሙ ስእለቶሙ፤

²⁵ወአሕየወ ሎሙ ዘሰአልዎ ዘበቀቲለ ነፍስ ወበገቢረ ሁከት ተሞቅሐ ወኢየሱስሃ መጠዎሙ ለፈቃዶሙ።

²⁶ ወሶበ ወሰድዎ አኀዝዎ ለስምዖን ቀሬናዊ እትወቶ እምሐቅል ወአጾርዎ መስቀሎ ይትልዎ ለእግዚእ ኢየሱስ።

²⁷ወተለውዎ ብዙኃን ሕዝብ ወአንስትኒ ይበክያሁ ወያስቈቅዋሁ።

²⁸ወተመይጦን እግዚእ ኢየሱስ ወይቤሎን አዋልደ ኢየሩሳሌም ኢትብክያኒ ኪያየሰ አላ ብክያ ላዕለ ርእስክን ወላዕለ ውሉድክን።

²⁹ እስመ ይመጽእ መዋዕል አመ ይብሉ ብፁዓት መካናት ወከርሥኒ እንተ ኢወለደት ወአጥባትኒ እለ ኢሐፀና።

³⁰ ይእተ አሚረ ይብልዎሙ ለአድባር ደቁ ላዕሌነ ወለአውግርኒ ድፍኑነ።

³¹በዝ ዕፅ ርጡብ እመ ከመዝ ዘገብሩ እፎኑመ ይከውን በይቡስ።

³² ወወሰዱ ካልኣነ ክልኤተ ፈያተ ይስቅሉ ምስሌሁ።

³³ወበጺሖሙ ብሔረ ዘስሙ ቀራንዮ በህየ ሰቀልዎ ወእልክተኒ ክልኤተ ፈያተ አሐደ በየማኑ ወአሐደ በፀጋሙ ሰቀሉ።

³⁴ ወይቤ እግዚእ ኢየሱስ አባ ስረይ ሎሙ እስመ በዘኢየእምሩ ይገብሩ ወተዓፀዉ ዲበ አልባሲሁ ወተካፈሉ።

³⁵ ወይቀውሙ ሕዝብ ወይሬእዩ ወመላእክትኒ ይዘንጕጕዎ ወይብልዎ ዘባዕደ ያድኅን ርእሶ ለያድኅን እመሰ ክርስቶስ ውእቱ ወኅሩዩ ለእግዚአብሔር።

³⁶ ወይሣለቁ ላዕሌሁ ሐራ ወይቀርቡ ወአምጽኡ ሎቱ ብሒአ ይስተይ።

³⁷ወይቤልዎ እመሰ ንጉሦሙ አንተ ለአይሁድ አድኅን ርእሰከ።

³⁸ወጸሐፉ መጽሐፈ ላዕሌሁ ወጽሕፈቱ በሮማይስጥ ወበጽርእ ወበዕብራይስጥ ዘይብል ዝንቱ ውእቱ ንጉሦሙ ለአይሁድ።

³⁹ወአሐዱ ፈያታዊ እምእለ ተሰቅሉ ምስሌሁ ፀረፈ ወይቤሎ እመሰ አንተ ክርስቶስ አድኅን ርእሰከ ወኪያነሂ።

⁴⁰ወአውሥአ ካልኡ ወገሠጾ ወይቤሎ ኢትፈርሆኑ ለእግዚአብሔር አምላክከ አንተ እንዘ ውስተ ዝንቱ ኵነኔ ሀለውከ።[60]

⁴¹ወለነሰ ዘበርቱዕ ረከበነ ዘይደልወነ ወበከመ ምግባሪነ ተፈደይነ ወዝንቱሰ አልቦ እኩይ ዘገብረ ወኢምንትኒ።

⁴² ወይቤሎ ለእግዚእ ኢየሱስ ተዘከረኒ እግዚኦ አመ ትመጽእ በመንግሥትከ።

⁴³ወአውሥአ እግዚእ ኢየሱስ ወይቤሎ አማን እብለከ እመን ፈድፋደ[61] ከመ ዮም ትሄሉ ምስሌየ ውስተ ገነት።

⁴⁴ወቀቲሮ ጊዜ ስሱ ሰዓት ሞተ ፀሐይ ወጸልመ ኵሉ ዓለም እስከ ጊዜ ተሱዓት ሰዓት።

⁴⁵ ወጸልመ ፀሐይ ወተሰጠ መንጦላዕተ ምኵራብ እማእከሉ እምላዕሉ እስከ ታሕቱ።[62]

⁴⁶ ወሶቤሃ ጸርሐ እግዚእ ኢየሱስ በዐቢይ ቃል ወይቤ አባ ውስተ እዴከ አመሐፅን ነፍስየ ወዘንተ ብሂሎ መጠወ ነፍሶ።

⁴⁷ወርእዮ መስፍነ ምእት ዘኮነ አእኰቶ ለእግዚአብሔር ወይቤ አማን ጻድቅ ውእቱ ዝብእሲ።

⁴⁸ወኵሎሙ ሕዝብ እለ ኮኑ ጉቡኣነ ሶበ ርእዩ ዘኮነ ጐድኡ እንግድዓቲሆሙ ወተሠውጡ ወአተዉ አብያቲሆሙ።

⁴⁹ ወይቀውሙ ኵሎሙ እለ የአምርዎ እምርኁቅ ወአንስትኒ እለ ተለዋሁ እምገሊላ ርእያ ዘንተ።

⁵⁰ወመጽአ ብእሲ ዘስሙ ዮሴፍ ባዕል[63] ብእሲ ኄር ወጻድቅ ወጠቢብ።

⁵¹ ወውእቱሰ ኢሀሎ ውስተ ምክሮሙ ወምግባሮሙ ለአይሁድ ወሀገሩ አርማትያስ ዘእምሀገረ ይሁዳ ወኮነ ይሴፈዋ ውእቱኒ ለመንግሥተ እግዚአብሔር።

⁵²ወሖረ ኀበ ጲላጦስ ወሰአለ ሥጋሁ ለእግዚእ ኢየሱስ።

⁵³ ወአውረደ ሥጋሁ ወገነዞ በሰንዱናት ወቀበሮ ውስተ መቃብር ዘአውቀረ ዘአልቦ ዘተቀብረ ውስቴቱ ወአንኰርኰረ እብነ ዐቢየ ወአንበረ ውስተ አፈ መቃብር ወኀለፈ።[64]

⁵⁴ወዐርብ ውእቱ ዕለት አሜሁ ለጸቢሐ ሰንበት።

⁵⁵ ወተለዋሁ ክልኤቲ አንስት እለ መጽኣ እምገሊላ ወርእያ መቃብሮ ወዘከመ ተወድየ ሥጋሁ። ወአተዋ ወአስተዳለዋ አፈዋተ ወኀደጋ በሰንበት ሐዊረ እስመ ከማሁ ሕጎሙ።