Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 24 Bible Online

ወንጌል ዘሉቃስ 24 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 24

¹ ወበእሑድ ሰንበት በጽባሕ አሌለያ ገዪሠ ወሖራ ኀበ መቃብር ወወሰዳ ውእተ አፈዋተ ዘአስተዳለዋ ወካልኣትኒ አንስት ምስሌሆን።

² ወረከባሃ ለይእቲ እብን ኀበ አንኰርኰረት እምነ መቃብር።

³ወቦኣ ወኢረከባ ሥጋሁ ለእግዚእ ኢየሱስ።

⁴ወእንዘ ያነክራ ወየኀጥኣ በእንተ ዝንቱ አስተርአይዎን ክልኤቱ ዕደው ወቆሙ ኀቤሆን ወይበርቅ አልባሲሆሙ።

⁵ወፈርሃ ወአትሐታ ገጾን ውስተ ምድር ወይቤልዎን ምንተ ተኀሥሣሁ ለሕያው ምስለ ሙታን።

⁶ ተንሥአ ኢሀሎ ዝየሰ ተዘከራ ቃሎ ዘይቤለክን በገሊላ።

⁷ሀለዎ ለወልደ ዕጓለ እመሕያው ይግባእ ውስተ ዕደ ሰብእ ኃጥኣን ወይሰቅልዎ ወይቀትልዎ ወይትነሣእ በሣልስት ዕለት።

⁸ወተዘከራ ቃሎ።

⁹ወአቲዎን እምኀበ መቃብር ነገራሆሙ ዘንተ ለዐሠርቱ ወአሐዱ ወለቢጾሙኒ ኵሎሙ።

¹⁰ወእማንቱሰ ማርያም መግደላዊት ወዮሐና ወማርያም እንተ ያዕቆብ ወቢጾንሂ እለ ምስሌሆን ነገራሆሙ ዘንተ ለሐዋርያት።

¹¹ወኮነ ዝንቱ ነገር በቅድሜሆሙ ከመ ዝንጋዔ ወኢአምንዎን ወአክሐድዎን።

¹²ወተንሥአ ጴጥሮስ ወሮጸ ኀበ መቃብር ወሐወጸ ወርእየ መዋጥሐ ባሕቲቶ ንቡረ ወአተወ እንዘ ያነክር ዘኮነ።

¹³ወይእተ ዕለተ እንዘ የሐውሩ ክልኤቱ እምውስቴቶሙ ሀገረ እንተ ርኅቅት እምኢየሩሳሌም መጠነ ስሳ ምዕራፍ እንተ ስማ ኤማኁስ።

¹⁴ወይትናገሩ በበይናቲሆሙ በእንተ ኵሉ ዘኮነ።

¹⁵ ወእንዘ እሙንቱ ይትናገሩ ወይትኀሠሥዎ ለዝንቱ ቀርቦሙ እግዚእ ኢየሱስ ወሖረ ምስሌሆሙ።

¹⁶ወተእኅዛ አዕይንቲሆሙ ከመ ኢያእምርዎ።

¹⁷ወይቤሎሙ እግዚእነ ምንትኑ ዝንቱ ነገር ዘትትናገሩ በበይናቲክሙ እንዘ ተሐወሩ ትኩዛኒክሙ።

¹⁸ወአውሥአ አሐዱ እምኔሆሙ ዘስሙ ቀለዮጳ ወይቤሎ አንተኑ ባሕቲትከ ነግድ ለኢየሩሳሌም ወኢያእመርከኑ ዘኮነ በውስቴታ በዝንቱ መዋዕል።

¹⁹ ወይቤሎ እግዚእ ኢየሱስ ምንትኑ ውእቱ ወይቤልዎ በእንተ ኢየሱስ ናዝራዊ ብእሲ ጻድቅ ወነቢይ ዘኮነ ከሃሌ በቃሉ ወበምግባሩ በቅድመ እግዚአብሔር ወበቅድመ ኵሉ ሰብእ።

²⁰ወዘከመ አግብእዎ ሊቃነ ካህናት ወመኳንንቲነ ወኰነንዎ ለሞት ወሰቀልዎ።

²¹ ወንሕነሰ ነአምን ቦቱ ከመ ውእቱ ዘሀለዎ ያድኅኖሙ ለእስራኤል ወምስለ ዝንቱ ኵሉ ሠሉስ ዮም እምዘኮነ ዝንቱ።

²²ወቦ አንስትኒ እለ አንከራ ወነገራነ ለነ እለ ጌሣ ኀበ መቃብር።

²³ወኢረከባ ሥጋሁ ወተሠውጣ ወነገራነ ከመ ርእያ ርእየተ መላእክት እለ ይቤልዎን ከመ ሐይወ።

²⁴ወቦ እለ ሖሩ እምኔነሂ ኀበ መቃብር ወረከቡ ከማሁ በከመ ይቤላ አንስት ወሎቱሰ ኢረከብዎ።

²⁵ወይቤሎሙ እግዚእ ኢየሱስ ኦ አብዳን ወጕንዱያነ ልብ ለኢአሚን በኵሉ ዘይቤሉ ነቢያት።

²⁶ አኮኑ ከመዝ ሀለዎ ለክርስቶስ ይትቀተል ወይባእ ውስተ ስብሓቲሁ።

²⁷ ወአኀዘ ይፈክር ሎሙ እምዘሙሴ ወዘነቢያት ወእምኵሉ መጻሕፍት ዘበእንቲኣሁ።

²⁸ወቀርቡ ሀገረ ኀበ የሐውሩ ባቲ ወአኀዘ ይትራኀቆሙ፤

²⁹ ወአገበርዎ ወይቤልዎ ንበር ምስሌነ እስመ መስየ ወተቈልቈለ ፀሓይ ወቦአ ከመ ይኅድር ምስሌሆሙ።

³⁰ ወእምዝ እንዘ ይረፍቅ ምስሌሆሙ ነሥአ ኅብስተ ወባረከ ወፈተተ ወወሀቦሙ።

³¹ወተከሥታ አዕይንቲሆሙ ወአእመርዎ ወጠፍአ እምኔሆሙ ሶቤሃ ወኀጥእዎ።

³²ወይቤሉ በበይናቲሆሙ አኮኑ ይነድደነ ልብነ[65] ዘከመ ይነግረነ በፍኖት ወይፌክር ለነ መጻሕፍተ።

³³ወተንሥኡ ሶቤሃ ይእተ ሰዓተ ወተሠውጡ ኢየሩሳሌም ወረከብዎሙ ለዐሠርቱ ወአሐዱ ጉቡኣኒሆሙ ወለእለሂ ምስሌሆሙ።

³⁴ እንዘ ይብሉ አማን ተንሥአ እግዚእነ ወአስተርአዮ ለስምዖን።

³⁵ወነገርዎሙ እሙንቱሂ ዘበፍኖት ወዘከመሂ አእመርዎ ለእግዚእነ እንዘ ይፌትት ኅብስተ።

³⁶ ወእንዘ ዘንተ ይትናገሩ ቆመ ማእከሎሙ እግዚእ ኢየሱስ ወይቤሎሙ ሰላም ለክሙ ኢትፍርሁ አነ ውእቱ።

³⁷ ወደንገፁ ወፈርሁ ወመሰሎሙ ከመ ዘመንፈሰ ይሬእዩ።

³⁸ወይቤሎሙ ምንትኑ ያደነግፀክሙ ወለምንት የዐርግ ዘከመዝ ኅሊና ውስተ ልብክሙ።

³⁹ርእዩ እደውየ ወእገርየ ከመ አነ ውእቱ ወግሥሡኒ ወአእምሩ እስመ ለመንፈስሰ አልቦቱ ሥጋ ወዐፅም በከመ ትሬእዩ ብየ።

⁴⁰ ወዘንተ ብሂሎ አርአዮሙ እደዊሁ ወእገሪሁ።

⁴¹ወእንዘ ዓዲ ኢአምኑ እምድንጋፄ ወእንዘ ያነክሩ በትፍሥሕት ይቤሎሙ ደቂቅየ[66] ቦኑ ብክሙ ዝየ ዘንበልዕ።

⁴² ወወሀብዎ መክፈልተ ዓሣ ጥቡሰ ወእምጸቃውዐ መዓር።

⁴³ ወበልዐ በቅድሜሆሙ ወነሥአ ዘተርፈ ወወሀቦሙ።

⁴⁴ ወይቤሎሙ አኮኑ ዝንቱ ነገርየ ዘእቤለክሙ እንዘ ሀለውኩ ምስሌክሙ ከመ ሀለዎ ይብጻሕ ዘይቤ ኦሪተ ሙሴ ወነቢያት ወመዝሙር በእንቲኣየ።

⁴⁵ ወእምዝ ከሠተ ልቦሙ ከመ ይለብዉ መጻሕፍተ ወለበዉ።

⁴⁶ወይቤሎሙ ከማሁ ጽሑፍ ከመ ይትቀተል ክርስቶስ ወይትነሣእ እምነ ምውታን በሣልስት ዕለት፤

⁴⁷ ወይስብኩ[67] በስሙ ለንስሓ ወለኅደገተ ኀጢአት ለኵሉ አሕዛብ እኂዞሙ እም ኢየሩሳሌም።

⁴⁸ወአንትሙሰ ሰማዕቱ ለዝንቱ ነገር።

⁴⁹ ወናሁ አነ እፌኑ ተስፋሁ ለአቡየ ላዕሌክሙ ወአንትሙሰ ንበሩ ሀገረ ኢየሩሳሌም እስከ ትለብሱ ኀይለ እምአርያም።

⁵⁰ ወእምዝ አውፅኦሙ አፍኣ እስከ ቢታንያ ወአንሥአ እደዊሁ ወአንበረ ላዕሌሆሙ ወባረኮሙ።

⁵¹ወእንዘ ይባርኮሙ ተረኀቆሙ ወዐርገ ሰማየ።

⁵²ወእሙንቱሰ ሰገዱ ሎቱ ወተሠውጡ ኢየሩሳሌም በዐቢይ ፍሥሓ።

⁵³ወነበሩ በቤተ መቅደስ ዘልፈ እንዘ ይባርክዎ ወይሴብሕዎ ለእግዚአብሔር አሜን። መልአ ጽሕፈተ ብሥራቱ ለሉቃስ ረድእ አሐዱ እም ሰብዓ ወክልኤቱ አርድእት ወኮነ ዘጸሐፎ በልሳነ ዮናኒ ለሰብአ ሀገረ መቄዶንያ እምድኅረ ዕርገቱ ለእግዚእነ ኢየሱስ ውስተ ሰማይ በሥጋ በዕሥራ ወአሐዱ ዓመት ወአመ ዐሠርቱ ወአርባዕቱ ዓመተ መንግሥቱ ለቀላውዴዎስ ወስብሐት ለእግዚአብሔር። አሜን።