Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 4 Bible Online

ወንጌል ዘሉቃስ 4 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 4

¹ ወመልአ መንፈስ ቅዱስ ላዕለ እግዚእ ኢየሱስ ወተመይጠ እምዮርዳኖስ ወወሰዶ መንፈስ ገዳመ።

² አርብዓ መዐልተ ወአርብዓ ሌሊተ ያሜክሮ ሰይጣን ወኢበልዐ ወኢሰትየ ምንተኒ በውእቶን መዋዕል ወተፈጺሞን እማንቱ መዋዕል ርኅበ።

³ወይቤሎ ሰይጣን እመሰ ወልደ እግዚአብሔር አንተ በል ዝንቱ እብን ይኩን ኅብስተ።

⁴ ወአውሥአ እግዚእ ኢየሱስ ወይቤሎ ጽሑፍ ዘይብል «አኮ በኅብስት ክመ ዘየሐዩ ሰብእ አላ በኵሉ ቃል ዘይወፅእ እምአፉሁ ለእግዚአብሔር።»

⁵ወአዕረጎ ሰይጣን ውስተ ደብር ነዋኅ ወአርአዮ መንግሥታተ ኵሉ ዓለም ከመ ወኢምንትኒ።

⁶ወይቤሎ ሰይጣን ዘንተ ኵሎ ምኵናነ ለከ እሁበከ ወዘንተኒ ክብረ እስመ ሊተ ተውህበ ወለዘፈቀድኩ እሁቦ።

⁷ወእምከመ ሰገድከ ሊተ አንተ ቅድሜየ ለከ ይኩንከ ኵሉ።

⁸ ወአውሥአ ወይቤሎ እግዚእ ኢየሱስ ሑር እምድኅሬየ ሰይጣን ጽሑፍ «ለእግዚአብሔር አምላክከ ትስግድ ወኪያሁ ባሕቲቶ ታምልክ።»

⁹ወወሰዶ ኢየሩሳሌም ወአቀሞ ዲበ ርእሰ ማዕዘንተ ቤተ መቅደስ ወይቤሎ እመሰ ወልደ እግዚአብሔር አንተ ረድ ለሊከ ታሕተ እምዝየ ወተወረው።

¹⁰ እስመ ጽሑፍ «ከመ ለመላእክቲሁ ይኤዝዞሙ በእንቲኣከ ከመ ይዕቀቡከ በኵሉ ፍናዊከ።

¹¹ወበእደዊሆሙ ያነሥኡከ ከመ ኢትትዐቀፍ በእብን እግረከ።»

¹² ወአውሥአ እግዚእ ኢየሱስ ወይቤሎ ተብህለ «ኢታመክሮ ለእግዚአብሔር አምላክከ።»

¹³ ወፈጺሞ ሰይጣን አመክሮቶ በኵሉ ኀደጎ እስከ ጊዜሁ።

¹⁴ ወተመይጠ እግዚእ ኢየሱስ በኀይለ መንፈስ ቅዱስ ወሖረ ገሊላ ወተሰምዐ ነገሩ በኵሉ በሓውርት።

¹⁵ወይሜህሮሙ በኵሉ ምኵራባቲሆሙ ወያነክሩ ምህሮቶ ወይሴብሕዎ ኵሉ።

¹⁶ ወሖረ ናዝሬተ ኀበ ተሐፅነ ወቦአ ምኵራበ በዕለተ ሰንበት በከመ ያለምድ ወተንሥአ ያንብብ።

¹⁷ወወሀብዎ መጽሐፈ ኢሳይያስ ነቢይ ወከሢቶ መጽሐፈ ረከበ መካነ ኀበ ጽሑፍ ዘይብል።

¹⁸ «መንፈሰ እግዚአብሔር ላዕሌየ ዘበእንቲአሁ ቀብዐኒ እዜንዎሙ ለነዳያን ፈነወኒ ወእስብክ ሎሙ ግዕዛነ ለፂዉዋን ወአስተፍሥሖሙ ለኅዙናን ወይርአዩ ዕዉራን ወአንግፎሙ ለግፉዓን ወእፍትሖሙ ለሙቁሓን ወእፈውሶሙ ለቍሱላን።

¹⁹ ወእስብክ ዐመተ እግዚአብሔር ኅሪተ»።[11]

²⁰ወከደነ መጽሐፈ ወመጠዎ ለላእክ ወነበረ ወአንሥኡ አዕይንቲሆሙ ኵሎሙ እለ ሀለዉ ውስተ ምኵራብ ወነጸርዎ።

²¹ወአኀዘ ይበሎሙ ዮም በጽሐ ቃለ ዝንቱ መጽሐፍ ወተሰልጠ ውስተ እዘኒክሙ።

²² ወእለ ሰምዕዎ ኵሎሙ አንከሩ ሞገሰ ቃሉ ወሣእሣአ አፉሁ ወይቤሉ አኮኑ ዝንቱ ውእቱ ወልደ ዮሴፍ።

²³ ወይቤሎሙ ቦኑ ትብሉኒ ኵልክሙ ዛተ ምሳሌ ዐቃቤ ሥራይ ፈውስ ርእሰከ ኵሎ ዘሰማዕነ ዘገበርከ በቅፍርናሆም ግበር በዝየኒ በሀገርከ።

²⁴ ወይቤሎሙ አማን እብለክሙ ኢይከብር ነቢይ በሀገሩ።

²⁵ አማን እብለክሙ ብዙኃት መበለታት ሀለዋ በውስተ እስራኤል አመ መዋዕለ ኤልያስ ነቢይ አመ ተዐጽወ ሰማይ ሠለስተ ዓመተ ወስድስተ አውራኀ እስከ ኮነ ረኀብ ዐቢይ ውስተ ኵሉ ምድር።

²⁶ወኢተፈነወ ኤልያስ ኀበ አሐቲ እምኔሆን ዘእንበለ ኀበ አሐቲ ብእሲት መበለት ዘሰራጵታ ዘሲዶና።

²⁷ ወብዙኃን እለ ለምጽ ሀለዉ በውስተ እስራኤል አመ መዋዕለ ኤልሳዕ ነቢይ ወኢነጽሐ አሐዱሂ እምኔሆሙ ዘእንበለ ንእማን ሶርያዊ።

²⁸ ወተምዑ ኵሎሙ እለ ሀለዉ በምኵራብ ሰሚዖሙ ዘንተ።

²⁹ወተንሥኡ ሶቤሃ ወአውፅእዎ አፍኣ እምሀገር ወወሰድዎ ውስተ ሕፅነ ርእሰ ደብር ዘተነድቀት ላዕሌሁ ሀገሮሙ ከመ ያጽድፍዎ።

³⁰ ወውእቱሰ ኀለፈ እንተ ማእከሎሙ ወሖረ።

³¹ ወወረደ ቅፍርናሆም ሀገረ ገሊላ ወመሀሮሙ በሰንበት።

³² ወያነክሩ ምህሮቶ እስመ በትእዛዝ ውእቱ ቃሉ።

³³ወሀሎ ብእሲ በምኵራብ ዘጋኔን እኩይ ላዕሌሁ ወከልሐ በዐቢይ ቃል።

³⁴ወይቤ ምንት ብየ ምስሌከ ኢየሱስ ናዝራዊ መጻእከኑ ታጥፍአነ አአምረከ መኑ አንተ ኦ ቅዱሱ ለእግዚአብሔር።

³⁵ወገሠጾ እግዚእ ኢየሱስ ወይቤሎ ተፈፀም ወፃእ እምኔሁ ወነፅኆ ጋኔኑ ማእከለ ምኵራብ ወወፅአ እምኔሁ ወኢነከዮ ወኢምንተኒ።

³⁶ ወደንገፁ ኵሎሙ ወተናገሩ በበይናቲሆሙ ወይቤሉ ምንትኑ ዝ ነገር እስመ በትእዛዝ ወበኀይል ይኤዝዞሙ ለአጋንንት እኩያን ወይወፅኡ።

³⁷ወወፅአ ወተሰምዐ ነገሩ በኵሉ በሓውርተ አድያም።

³⁸ ወወፂኦ እምኵራብ ቦአ ቤተ ስምዖን ወሐማቱ ለስምዖን ተሐምም ዐቢየ ፈፀንተ ወነገርዎ በእንቲኣሃ።

³⁹ ወቆመ ኀቤሃ ወገሠጾ ለፈፀንታ ወኀደጋ ወተንሥአት ሶቤሃ ወተልእክቶሙ።

⁴⁰ወሶበ የዐርብ ፀሓይ አምጽኡ ኀቤሁ ኵሎ ድዉያነ ወሕሙማነ እለ ቦሙ ደዌ ዘዘ ዚኣሁ ወለለ አሐዱ እምኔሆሙ አንበረ እዴሁ ዲቤሆሙ ወፈወሶሙ።

⁴¹ ወብዙኃን አጋንንት ይወፅኡ ወይኬልሑ ወይብልዎ አንተ ውእቱ ክርስቶስ ወልደ እግዚአብሔር ወይጌሥጾሙ ወኢያበውሖሙ ይንብቡ እስመ የአምርዎ ከመ ውእቱ ክርስቶስ።

⁴²ወጸቢሖ ወፅአ ወሖረ ውስተ ገዳም ወኀሠሥዎ ሕዝብ ወሖሩ ኀቤሁ ወአኀዝዎ ወአቀምዎ ከመ ኢይኅልፍ እምኔሆሙ።

⁴³ ወይቤሎሙ ለካልኣትኒ አህጉር ሀለወኒ እዜንዎን በእንተ መንግሥተ እግዚአብሔር እስመ እንበይነ ዝንቱ ተፈነውኩ።

⁴⁴ወይሰብክ በምኵራባተ ገሊላ።