Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 5 Bible Online

ወንጌል ዘሉቃስ 5 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 5

¹ ወሀለዉ ኀቤሁ ሰብእ ብዙኃን ወያጸምዑ ቃለ እግዚአብሔር ወውእቱሰ ይቀውም መንገለ ሐይቀ ባሕረ ጌንሴሬጥ።

²ወርእየ ክልኤተ አሕማረ ኀበ ውእቱ ሐይቅ ወወረዱ እምኔሆን መሠግራን ይኅፅቡ መሣግሪሆሙ።

³ወዐርገ ውስተ አሐቲ ሐመር እምኔሆን ወይእቲ ሐመር እንተ ስምዖን ወይቤሎ ከመ ያርኅቃ ሕቀ እምነ ምድር ወነበረ ውስተ ሐመር ወመሀሮሙ ለሕዝብ።

⁴ ወሶበ አርመመ ይቤሎ ለስምዖን ያእትቱ መንገለ ዕመቀ ባሕር ወያውርዱ መሣግሪሆሙ ወያሥግሩ።

⁵ ወአውሥአ ስምዖን ወይቤሎ ሊቅ ሰራሕነ ኵላ ሌሊተ እንዘ ናወርድ መሣግሪነ ወአልቦ ዘአኀዝነ ወባሕቱ እስመ አዘዝከነ ናወርድ መሣግሪነ።

⁶ ወገቢሮሙ ከማሁ ተእኅዙ ብዙኃን ዓሣት ፈድፋደ እስከ ይትበተክ መሣግሪሆሙ።

⁷ወጸውዕዎሙ ለቢጾሙ እለ ውስተ ካልእ ሐመር ከመ ይምጽኡ ወይርድእዎሙ ወመጽኡ ወመልኡ ክልኤሆን አሕማረ እስከ ይሰጠማ።

⁸ወርእዮ ስምዖን ጴጥሮስ አስተብረከ ወሰገደ ታሕተ እገሪሁ ለእግዚእ ኢየሱስ ወይቤሎ ኅድገኒ እግዚኦ ወሑር እምኔየ እስመ ብእሲ ኃጥእ አነ።

⁹እስመ አኀዞ ድንጋፄ ወኵሎሙ እለ ምስሌሁ ደንገፁ በእንተ ዓሣት ዘተሠግሩ።

¹⁰ ወከማሁ ያዕቆብኒ ወዮሐንስ ደቂቀ ዘብዴዎስ አዕርክቲሁ ለስምዖን ወይቤሎ እግዚእ ኢየሱስ ለስምዖን ኢትፍራህ እምይእዜሰ ሰብአ ታሤግር።

¹¹ ወአውፅኡ አሕማሪሆሙ ውስተ ምድር ወኀደጉ ኵሎ ወተለውዎ።

¹² ወእንዘ ሀሎ ውስተ አሐቲ ሀገር መጽአ ብእሲ ዘለምጽ ኵለንታሁ ወሶበ ርእዮ ለእግዚእ ኢየሱስ ሰገደ ሎቱ በገጹ ወአስተብቍዖ ወይቤሎ እግዚኦ እመሰ ፈቀድከ ትክል አንጽሖትየ።

¹³ወሰፍሐ እዴሁ ወገሠሦ ወይቤሎ እፈቅድ ንጻሕ ወኀደጎ ለምጹ ሶቤሃ።

¹⁴ ወከልኦ ኢይንግር ወኢለመኑሂ ወይቤሎ ሑር ወአፍትን ርእሰከ ለካህን ወአብእ መባአከ በእንተ ዘነጻሕከ በከመ አዘዘ ሙሴ ከመ ይኩን ስምዐ ላዕሌሆሙ።

¹⁵ወተሰምዐ ነገሩ ፈድፋደ ወይመጽኡ ብዙኃን ሰብእ ኀቤሁ ይስምዕዎ ወይትፌወሱ እምደዌሆሙ።

¹⁶ ወውእቱሰ ይወፅእ ገዳመ ወይጼሊ በህየ።

¹⁷ ወእምዝ ኮነ በአሐቲ ዕለት እመዋዕል እንዘ ሀሎ ይሜህሮሙ ወይነብሩ ፈሪሳውያን ወሊቃናተ ኦሪት እለ መጽኡ እምገሊላ ወእምኵሉ አህጉረ ይሁዳ ወእምኢየሩሳሌም ወኀይለ እግዚአብሔር ውእቱ በዘይፌውስ።

¹⁸ወአምጽኡ ኀቤሁ ብእሴ መፃጕዐ እንዘ ይጸውርዎ አርባዕቱ ዕደው በዐራት ወፈቀዱ ያብእዎ ኀቤሁ ይፈውሶ።

¹⁹ወኀጥኡ እንተ ኀበ ያበውእዎ እስመ ጽፉቅ ሰብእ ወዐርጉ ናሕሰ ወነሠቱ ጠፈረ ወአውረድዎ ምስለ ዐራቱ ውስተ ቤት ቅድሜሁ ለእግዚእ ኢየሱስ።

²⁰ ወርእዮ ሃይማኖቶሙ ይቤሎ ለውእቱ ብእሲ ተኀድገ ለከ ኀጢአትከ።

²¹ ወአኀዙ የኀልዩ ጸሐፍት ወፈሪሳውያን ወይበሉ ምንትኑ ውእቱ ዝንቱ ዘይነብብ ፅርፈተ መኑ ይክል ኀዲገ ኀጢአት ዘእንበለ እግዚአብሔር ባሕቲቱ።

²²ወአእመሮሙ እግዚእ ኢየሱስ ዘይኄልዩ ወይቤሎሙ ምንተኑ ትኄልዩ በልብክሙ።

²³ምንት ይቀልል እምብሂለ ተኀድገ ለከ ኀጢአትከ ወእምብሂለ ተንሥእ ወጹር ዐራተከ ወሑር።

²⁴ከመ ታእምሩ ከመ ብዉሕ ሎቱ ለወልደ ዕጓለ እመሕያው ይኅድግ ኀጢአተ በዲበ ምድር ወይቤሎ ለውእቱ ድዉይ ለከ እብለከ ተንሥእ ወንሣእ ዐራተከ ወእቱ ቤተከ።

²⁵ወተንሥአ ሶቤሃ ወነሥአ ዐራቶ ዘዲቤሁ ይሰክብ በቅድሜሆሙ ወአተወ ቤቶ እንዘ ይሴብሖ ለእግዚአብሔር።

²⁶ወደንገፁ ኵሎሙ ወአእኰትዎ ለእግዚአብሔር ወፈርሁ ብዙኀ ወይቤሉ ርኢነ መንክረ ዮም።

²⁷ ወእምዝ ወፂኦ እምህየ ርእየ ብእሴ መጸብሐዌ ዘስሙ ሌዊ እንዘ ይነብር ኀበ ምጽባሕ ወይቤሎ ትልወኒ።

²⁸ወኀደገ ኵሎ ወተንሥአ ወተለዎ።

²⁹ ወገብረ ሎቱ ሌዊ ዐቢየ ምሳሐ በቤቱ ወብዙኃን ሰብእ ምስሌሁ መጸብሓን ወኃጥኣን እለ ረፈቁ ምስሌሆሙ ወባዕዳንሂ ብዙኃን።

³⁰ወአንጐርጐሩ ጸሐፍት ወፈሪሳውያን[12] ላዕለ አርዳኢሁ ወይቤልዎሙ ለምንት ትበልዑ ወትሰትዩ ምስለ መጸብሓን ወኃጥኣን።

³¹ወአውሥአ እግዚእ ኢየሱስ ወይቤሎሙ ሕሙማን ይፈቅድዎ ለዐቃቤ ሥራይ ወአኮ ጥዑያን።

³² ኢመጻእኩ እጸውዕ ጻድቃነ አላ ኃጥኣነ ለንስሓ።

³³ ወይቤልዎ ለምንት አርዳኢሁ ለዮሐንስ ጽፉቀ ይጸውሙ ወጸሎተ ይገብሩ ወከማሁ እለሂ ፈሪሳውያን ወአርዳኢከሰ እሊኣከ ይበልዑ ወይሰትዩ።

³⁴ወይቤሎሙ እግዚእ ኢየሱስ ኢይክሉ ደቂቁ ለመርዓዊ ጸዊመ እንዘ ሀሎ መርዓዊ ምስሌሆሙ።

³⁵ወባሕቱ ይመጽእ መዋዕል አመ ይነሥእዎ ለመርዓዊ እምኔሆሙ ወይእተ አሚረ ይጸውሙ።

³⁶ወይቤሎሙ በምሳሌ አልቦ ዘይጠቅብ ግምደ ደርግሐ ልብስ ውስተ ሥጠተ ልብስ ብሉይ ወእመአኮሰ ይሠጥጦ ሐዲስ ለብሉይ ወምስለ ብሉይ ኢይዔሪ ሐዲስ።

³⁷ወአልቦ ዘይወዲ ወይነ ሐዲሰ ውስተ ዝቅ ብሉይ ወእመአኮሰ ያነቅዖ ወወይኑሂ ይትከዐው ወዝቁሂ ይትኀጐል።

³⁸ወለወይንሰ ሐዲስ ውስተ ዝቅ ሐዲስ ይወድይዎ ወይትዓቀቡ በበይናቲሆሙ።

³⁹ወአልቦ ዘይሰቲ ጻዕፈ እንዘ ይፈቅድ ከራሜ እስመ ይኄይስ ከራሚ እምሐዲስ።