Read Ge'ez NT – ሐዲስ ኪዳን በልሳነ ግእዝ ወንጌል ዘሉቃስ 9 Bible Online

ወንጌል ዘሉቃስ 9 - Ge'ez NT – ሐዲስ ኪዳን በልሳነ ግእዝ bible

ወንጌል ዘሉቃስ 9

¹ ወጸውዖሙ ለዐሠርቱ ወክልኤቱ ሐዋርያት ወወሀቦሙ ኀይለ ወሥልጣነ ወአብሖሙ ላዕለ ኵሉ አጋንንት ያሕይዉ ድዉያነ።

²ወፈነዎሙ ይስብኩ መንግሥተ እግዚአብሔር ወይፈውሱ ድዉያነ ወኵሎሙ ሕሙማነ።

³ ወይቤሎሙ ኢትንሥኡ ለፍኖት ኢበትረ ወኢጽፍነተ ወኢእክለ ወኢወርቀ ወኢክልኤተ ክዳናተ።

⁴ወቤተ ኀበ ቦእክሙ ህየ ኅድሩ ወኢትፃኡ እምህየ እስከ ተኀልፉ።

⁵ ወዘሰ ኢተወክፈክሙ ወፂአክሙ እምይእቲ ሀገር ንግፉ ጸበለ እገሪክሙ ከመ ይኩን ስምዐ ላዕሌሆሙ።

⁶ወወፂኦሙ ዖዱ አህጉረ አድያም ወሰበኩ ወንጌለ ወፈወሱ በኵለሄ።

⁷ ወሰምዐ ሄሮድስ ንጉሥ ኵሎ ዘኮነ ወዘከመ ገብረ ወየኀጥእ ዘይብል እስመ ቦ እለ ይብሉ ዮሐንስ ተንሥአ እምነ ምዉታን።

⁸ ወቦ እለ ይብሉ ኤልያስ አስተርአየ ወቦ እለ ይብሉ አሐዱ እምነቢያት ቀደምት ተንሥአ።

⁹ ወይቤ ሄሮድስ ለዮሐንስሰ አነ መተርኩ ርእሶ መኑ እንከ ውእቱ ዝንቱ ዘእሰምዕ በእንቲኣሁ ወይፈቅድ ይርአዮ።

¹⁰ ወሶበ ተሠውጡ ሐዋርያት ነገርዎ ኵሎ ዘገብሩ ወነሥኦሙ በባሕቲቶሙ ወተግኅሡ ወወፅኡ ሐቅለ ሀገር እንተ ስማ ቤተ ሳይዳ።

¹¹ወአእሚሮሙ ሕዝብ ተለውዎ ወተቀበሎሙ ወነገሮሙ በእንተ መንግሥተ እግዚአብሔር ወለእለሂ ይፈቅዱ ይትፈወሱ አሕየዎሙ።

¹² ወተቈልቊሎ ፀሐይ መጽኡ ዐሠርቱ ወክልኤቱ አርዳኢሁ ወይቤልዎ ፈኑ ሰብአ ይእትዉ አህጉረ አድያም ወይቢቱ ውስተ አዕጻዳት ወይርከቡ ዘይበልዑ እስመ ሐቅል ውእቱ ኀበ ሀለውነ።

¹³ወይቤሎሙ ሀብዎሙ አንትሙ ዘይበልዑ ወይቤልዎ አልብነ ዝየ ዘእንበለ ኀምስ ኅብስት ወክልዔቲ ዓሣት እመ ኢሖርነ ንሣየጥ መብልዐ ለዝንቱ ኵሉ ሕዝብ።

¹⁴ወየአክሉ ዕደው ኀምሳ ምእት ወይቤሎሙ ለአርዳኢሁ አርፍቅዎሙ በበ ኀምሳ ለለ ምርፋቆሙ።

¹⁵ወገብሩ ከማሁ ወረፈቁ ኵሎሙ።

¹⁶ወነሥኦን ለኀምስ ኅብስት ወለክልኤቲ ዓሣት ወነጸረ ሰማየ ወባረከ ወፈተተ ወወሀቦሙ ለአርዳኢሁ ያቅርቡ ለሰብእ ወአቅረቡ።[18]

¹⁷ ወበልዑ ወጸግቡ ኵሎሙ ወዘአግኀሡ ዘተርፈ ፍተታት መልአ ዐሠርተ ወክልኤተ መሣይምተ።

¹⁸ ወእምዝ እንዘ ይጼሊ በባሕቲቱ ወአርዳኢሁኒ ምስሌሁ ተስእሎሙ ወይቤሎሙ መነ ይብለኒ ሰብእ።

¹⁹ወተሰጥውዎ ወይቤልዎ ቦ እለ ይብሉከ ዮሐንስሃ መጥምቀ ወቦ እለ ይብሉከ ኤልያስሃ ወቦ እለ ይብሉከ አሐዱ እምነቢያት ቀደምት ተንሥአ።

²⁰ ወይቤሎሙ አንትሙሰኬ መነ ትብሉኒ ወተሰጥዎ ጴጥሮስ ወይቤሎ አንተ ውእቱ መሲሑ ለእግዚአብሔር ።

²¹ወገሠጾሙ ወከልኦሙ ኢይንግሩ ዘንተ ወኢለመኑሂ።

²² ወይቤሎሙ ሀለዎ ለወልደ ዕጓለ እመሕያው ብዙኀ ያሕምምዎ ወያመክርዎ ረበናት ወሊቃነ ካህናት ወጸሐፍት ወይቅትልዎ ወይትነሣእ በሣልስት ዕለት።

²³ ወይቤሎሙ ለኵሎሙ ዘይፈቅድ ይትልወኒ ይጽልኣ ለነፍሱ ወያጥብዕ ወይንሣእ መስቀለ ሞቱ ወኵሎ ዕለተ ይትልወኒ።

²⁴ ወዘሰ ይፈቅድ ያድኅና ለነፍሱ ይገድፋ ወዘሰ ገደፋ ለነፍሱ ያድኅና።

²⁵ወምንተ ይበቍዖ ለሰብእ ለእመ ኵሎ ዓለመ ረብኀ ወነፍሶ ኀጕለ።

²⁶ ወለዘኒ ኀፈረኒ ወኀፈረ ቃልየ የኀፍሮ ሎቱኒ ወልደ ዕጓለ እመሕያው አመ ይመጽእ በስብሐቲሁ ወበስብሐተ አቡሁ ወምስለ ቅዱሳን መላእክቲሁ።

²⁷አማን አማን እብለክሙ ሀለዉ እምእለ ይቀውሙ ዝየ እለ ኢይጥዕምዎ ለሞት እስከ ይሬእይዋ ለመንግሥተ እግዚአብሔር።

²⁸ ወእምድኅረ ዝንቱ ነገር አመ ሳምንት ዕለት ነሥኦሙ እግዚእ ኢየሱስ ለጴጥሮስ ወለያዕቆብ ወለዮሐንስ ወዐርገ ደብረ ከመ ይጸሊ።

²⁹ወእንዘ ይጼሊ ተወለጠ ርእየተ ገጹ ወአልባሲሁኒ ጻዕደወ ወበረቀ ከመ መብረቅ።

³⁰ወናሁ መጽኡ ክልኤቱ ዕደው ወይትናገሩ ምስሌሁ እሉ እሙንቱ ሙሴ ወኤልያስ።

³¹እለ አስተርአዩ በስብሐት ወነገሩ ስብሐቲሁ ዘሀለዎ ይኩን በኢየሩሳሌም ወፀአቶሂ።

³²ወረከበ ጴጥሮስሃ ወእለ ምስሌሁ ክቡዳን አዕይንቲሆሙ በድቃስ ወነቂሖሙ ርእዩ ስብሐቲሁ ወዕደወኒ ክልኤተ እለ ይቀውሙ ምስሌሁ።

³³ወእምዝ ሶበ ፈቀዱ ይትሌለዩ እምኔሁ ይቤሎ ጴጥሮስ ለእግዚእ ኢየሱስ ሊቅ ይኄይሰነ ንንበር ዝየ ወንግበር ሠለስተ ሰቃልወ አሐደ ለከ ወአሐደ ለሙሴ ወአሐደ ለኤልያስ ወኢየአምር ዘይብል።

³⁴ወዘንተ ብሂሎ ጸለሎሙ ደመና ወፈርሁ ሶበ ቦኡ ውስተ ደመና።

³⁵ ወመጽአ ቃል እምውስተ ደመና ዘይብል ዝንቱ ውእቱ ወልድየ ዘኀረይኩ ወሎቱ ስምዕዎ።

³⁶ወመጺኦ ቃል ተረክበ እግዚእ ኢየሱስ ባሕቲቶ ወእሙንቱሰ አርመሙ ወኢነገሩ ወኢለመኑሂ ዘርእዩ ወዘሰምዑ ውእተ አሚረ።

³⁷ ወእምዝ በሳኒታ ዕለት ወረዱ እምደብር ወተቀበልዎ ሕዝብ ብዙኃን።

³⁸ወዐውየወ አሐዱ ብእሲ በማእከለ ሕዝብ ወይቤሎ ብቍዐኒ ኦ ሊቅ ረአይ ሊተ ወልድየ እስመ አሐዱ ሊተ ውእቱ።

³⁹ወናሁ ጋኔን የሀይደንዮ ወያዌግቦ ወይነጽሖ ወያስተራግፆ ወያሤውኖ ወእምዕፁብ የኀድጎ ቀጥቂጦ።

⁴⁰ወአስተብቋዕክዎሙ ለአርዳኢከኒ ከመ ያውፅእዎ ወስእንዎ አውፅኦቶ።

⁴¹ወአውሥአ እግዚእ ኢየሱስ ወይቤ ኦ ትውልድ ዕሉት እንተ አልባቲ ሃይማኖት እስከ ማእዜኑ እሄሉ ምስሌክሙ ወእትዔገሠክሙ አምጽኦ ዝየ ለወልድከ።

⁴² ወእንዘ ያመጽኦ ነጽሖ ጋኔኑ ወአስተራገፆ ወገሠጾ እግዚእ ኢየሱስ ለውእቱ ጋኔን እኩይ ወአሕየዎ ለውእቱ ወልድ ወአወፈዮ ለአቡሁ ወአንከሩ ኵሎሙ እምዕበዩ ለእግዚአብሔር።

⁴³ወእንዘ እሙንቱ ያነክሩ በእንተ ኵሉ ዘገብረ እግዚእ ኢየሱስ ይቤሎሙ ለአርዳኢሁ።

⁴⁴አንትሙሰ ደይዎ ውስተ ልብክሙ ለዝንቱ ነገር እስመ ሀለዎ ለወልደ ዕጓለ እመ ሕያው ይግባእ ውስተ እደ ሰብእ።

⁴⁵ ወኢለበውዎ ለዝንቱ ነገር እስመ ስዉር ውእቱ እምኔሆሙ ከመ ኢይሕንክዎ ወይፈርህዎ ተጠይቆቶ በእንተ ዝንቱ ነገር።

⁴⁶ ወኀለዩ በበይናቲሆሙ እንዘ ይብሉ መኑ የዐቢ እምኔሆሙ።

⁴⁷ወአእመሮሙ እግዚእ ኢየሱስ ዘይኄልዩ በልቦሙ ወነሥአ ሕፃነ ወአቀሞ በማእከሎሙ።

⁴⁸ ወይቤሎሙ ዘተወክፈ ዘመጠነዝ ሕፃነ በስምየ ኪያየ ተወክፈ ወዘኒ ኪያየ ተወክፈ ተወክፎ ለዘፈነወኒ እስመ ዘአትሐተ ርእሶ እምኵሉ ውእቱ የዐቢ።

⁴⁹ወአውሥአ ዮሐንስ ወይቤሎ ሊቅ ቦ ዘርኢነ አሐደ ብእሴ እንዘ ያወፅእ አጋንንተ በስምከ ወከላእናሁ እስመ ኢተለወከ ምስሌነ።

⁵⁰ ወይቤሎሙ እግዚእ ኢየሱስ ኢትክልእዎ እስመ እምከመ ኢኮነ ዕድውክሙ ቢጽክሙ ውእቱ።

⁵¹ ወተፈጺሞ መዋዕለ ዕርገቱ አንጸረ ገጾ ለሐዊር ውስተ ኢየሩሳሌም።

⁵² ወፈነወ ሐዋርያተ ቅድመ ገጹ ወሐዊሮሙ ቦኡ ሀገረ ሳምር ከመ ያስተዳልዉ ሎቱ።

⁵³ወኢተወክፍዎሙ እስመ ኅሉፍ ገጹ ለኢየሩሳሌም።

⁵⁴ ወርእዮሙ አርዳኢሁ ያዕቆብ ወዮሐንስ ዘንተ ይቤልዎ እግዚኦ ትፈቅድኑ ንበል ይረድ እሳት እምሰማይ ወያጥፍኦሙ በከመ ገብረ ኤልያስ።

⁵⁵ ወተመይጠ ወገሠጾሙ ወይቤሎሙ ኢተአምሩኑ ዘአይ መንፈስ አንትሙ።

⁵⁶ እስመ ኢመጽአ ወልደ ዕጓለ እመሕያው ከመ ያጥፍእ ነፍሳተ ሰብእ ዘእንበለ ከመ ዘእንበለ ከመ ያድኅን ዘተኀጕለ ወሖሩ ካልእተ ሀገረ።

⁵⁷ ወእምዝ እንዘ የሐውሩ በፍኖት ይቤሎ አሐዱ ሊቅ እትሉከኑ ኀበ ሖርከ።

⁵⁸ወይቤሎ እግዚእ ኢየሱስ ለቈናጽልኒ ግበብ ቦሙ ወለአዕዋፈ ሰማይኒ ምጽላል ቦሙ ለወልደ ዕጓለ እመሕያውሰ አልቦቱ ኀበ ያሰምክ ርእሶ።

⁵⁹ወይቤሎ ለካልኡኒ ትልወኒ[19] ወውእቱሰ ይቤ እግዚኦ አብሐኒ እሑር ቅድመ ወእቅብሮ ለአቡየ።

⁶⁰ወይቤሎ እግዚእ ኢየሱስ ኅድጎሙ ለምዉታን ይቅብሩ ምዉታኒሆሙ ወአንተሰ ሑር ወስብክ መንግሥተ እግዚአብሔር።

⁶¹ ወይቤሎ ሣልሱኒ እትሉከኑ እግዚኦ ወባሕቱ አብሐኒ እሑር እሥራዕ ኵሎ ሰብአ ቤትየ።

⁶²ወይቤሎ እግዚእ ኢየሱስ አልቦ ዘይእኅዝ ዕርፈ ወየሐርስ ድኅሪተ ወይከውን ድልወ ለመንግሥተ እግዚአብሔር ።[20]