Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 1 Bible Online

ወንጌል ዘዮሐንስ 1 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 1

¹ ቀዳሚሁ ቃል ውእቱ ወውእቱ ቃል ኀበ እግዚአብሔር ውእቱ ወእግዚአብሔር ውእቱ ቃል።

² ወከማሁ[1] ቀዳሚሁ እምቀዲሙ ኀበ እግዚአብሔር ውእቱ።

³ ወኵሉ ቦቱ ኮነ ወዘእንበሌሁሰ አልቦ ዘኮነ ወኢምንትኒ እምዘኮነ።

⁴ ወዘሂ ኮነ በእንቲኣሁ ቦቱ ሕይወት ውእቱ[2] ወሕይወትሰ ብርሃኑ ለዕጓለ እመሕያው ውእቱ።

⁵ ወብርሃንሰ ዘውስተ ጽልመት ያበርህ ወያርኢ ወጽልመትኒ ኢይረክቦ ወኢይቀርቦ።

⁶ ወሀሎ አሐዱ ብእሲ ዘተፈነወ እምኀበ እግዚአብሔር ዘስሙ ዮሐንስ።

⁷ ወውእቱ መጽአ ለስምዕ ከመ ይኩን ሰማዕተ በእንተ ብርሃን ከመ ኵሉ ይእመን ቦቱ።

⁸ ወለሊሁሰ ኢኮነ ብርሃነ ዳእሙ ሰማዕተ ይኩን በእንተ ብርሃን።

⁹ ወብርሃነ ጽድቅሰ ዘያበርህ ለኵሉ ሰብእ ዘመጽአ ውስተ ዓለም።

¹⁰ወውስተ ዓለም ሀሎ ወዓለምኒ ቦቱ ኮነ ወዓለምሰ ኢያእመሮ።

¹¹ ውስተ ዚኣሁ መጽአ ወእሊኣሁሰ ኢተወክፍዎ።

¹² ወለእለሰ ተወክፍዎ ወሀቦሙ ሥልጣነ ውሉደ እግዚአብሔር ይኩኑ ለእለ አምኑ በስሙ።

¹³ እለ ኢኮኑ እምነ ዘሥጋ ወደም ወኢእምሥምረተ ብእሲ ወብእሲት[3] አላ እም እግዚአብሔር ተወልዱ።

¹⁴ ወውእቱ ቃል ሥጋ ኮነ ወኀደረ ላዕሌነ[4] ወርኢነ ስብሐቲሁ ከመ ስብሐተ አሐዱ ዋሕድ ለአቡሁ ዘምሉእ ጸጋ ወጽድቀ ወሞገሰ።

¹⁵ ዮሐንስ ሰማዕቱ በእንቲኣሁ ከልሐ ወይቤ ዝውእቱ ዘእቤለክሙ አነ በእንቲኣሁ ይመጽእ እምድኅሬየ ብእሲ ዘሀሎ እምቅድሜየ እስመ ውእቱ ቀደመኒ።

¹⁶ እስመ እምተረፈ ዚኣሁ ነሣእነ ንሕነ ኵልነ ጸጋ በዲበ ጸጋ።

¹⁷ እስመ ኦሪት በሙሴ ተውህበት ለነ ጸጋሰ ወጽድቅ በኢየሱስ ክርስቶስ ኮነ ለነ።

¹⁸ ለእግዚአብሔርሰ አልቦ ዘርእዮ ግሙራ አላ ወልድ ዋሕድ ዘሀሎ ውስተ ሕፅነ አቡሁ ውእቱ ነገረነ።

¹⁹ ወዝንቱ ውእቱ ስምዑ ለዮሐንስ አመ ለአኩ ኀቤሁ አይሁድ እምኢየሩሳሌም ካህናተ ወሌዋውያነ ከመ ይሰአልዎ ወይበልዎ መኑ አንተ።

²⁰ወአምነ ወኢክሕደ ከመ ኢኮነ ውእቱ ክርስቶስሃ።

²¹ ወይቤልዎ መኑ አንተ ኤልያስኑ አንተ ወይቤ ኢኮንኩ ወይቤልዎ ነቢይኑ አንተ ወይቤ አልቦ።

²²ወይቤልዎ መኑመ አንተ እንከ ከመ ናይድዖሙ ወናጠይቆሙ ለእለ ለአኩነ ወፈነዉነ ወመነ ትብል ርእሰከ።

²³ ወይቤ አንሰ ቃለ ዐዋዲ ዘይሰብክ በገዳም ወይብል ጺሑአ ፍኖቶ ለእግዚአብሔር በከመ ይቤ ኢሳይያስ ነቢይ።

²⁴ ወእለሰ ተፈነዉ እምፈሪሳውያን እሙንቱ።

²⁵ወተስእልዎ ወይቤልዎ በእፎ እንከ ታጠምቅ ለእመ ኢኮንከ ክርስቶስሃ ወኢኤልያስሃ ወኢነቢየ።

²⁶ ወአውሥአ ዮሐንስ ወይቤሎሙ አንሰ አጠምቀክሙ በማይ ወማእከሌክሙ ሀሎ ይቀውም ዘኢተአምርዎ አንትሙ።

²⁷ ዘይመጽእ እምድኅሬየ ውእቱ ዘሀሎ እምቅድሜየ ዘኢይደልወኒ እፍታሕ ቶታነ አሣእኒሁ እምእገሪሁ ወውእቱ ያጠምቀክሙ በመንፈስ ቅዱስ ወበእሳት።[5]

²⁸ ወከመዝ ኮነ በቢታንያ በቤተ ራባ፥ በማዕዶተ ዮርዳኖስ በኀበ ሀሎ ዮሐንስ ያጠምቅ።

²⁹ ወአመ ሳኒታ ርእዮ ዮሐንስ ለእግዚእ ኢየሱስ እንዘ ይመጽእ ኀቤሁ ወይቤ ነዋ በግዑ ለእግዚአብሔር ዘያአትት ወያሴስል ኀጢአተ ዓለም።

³⁰ዝንቱ ውእቱ ዘእቤለክሙ አነ በእንቲኣሁ ይመጽእ እምድኅሬየ ብእሲ ዘሀሎ እምቅድሜየ እስመ እምቅድሜየ ውእቱ ኮነ።

³¹ወአንሰ ኢየአምሮ ዳእሙ ከመ ያእምርዎ እስራኤል በእንተዝ መጻእኩ አነ ከመ አጥምቅ በማይ።

³² ወነገረ ስምዖ ዮሐንስ ወይቤ ርኢኩ መንፈስ ቅዱስ እንዘ ይወርድ እምሰማይ ከመ እንተ ርግብ ወይነብር ዲቤሁ።

³³ ወአንሰ ኢየአምሮ ወባሕቱ ዘፈነወኒ ከመ አጥምቅ በማይ ውእቱ ይቤለኒ ዲበ ዘርኢከ ይወርድ መንፈስ ቅዱስ ወይነብር ዲቤሁ ውእቱኬ ዘያጠምቅ በመንፈስ ቅዱስ።

³⁴ወለልየ ርኢኩ ወአነ ሰማዕቱ ከመ ዝንቱ ውእቱ ወልዱ ለእግዚአብሔር።

³⁵ወበሳኒታ ካዕበ እንዘ ይቀውም ዮሐንስ ወክልኤቱ እምአርዳኢሁ።

³⁶ርእዮ ለእግዚእ ኢየሱስ እንዘ የሐውር ወይቤ ነዋ በግዑ ለእግዚአብሔር ዘያአትት ወያሴስል ኀጢአተ ዓለም።

³⁷ወሰምዕዎ ክልኤሆሙ አርዳኢሁ እንዘ ይብል ከመዝ ወተለውዎ ለእግዚእ ኢየሱስ።

³⁸ወተመዪጦ እግዚእ ኢየሱስ ርእዮሙ እንዘ ይተልውዎ ወይቤሎሙ ምንተ ተኀሥሡ።

³⁹ ወይቤልዎ ረቢ ዘበትርጓሜሁ ሊቅ ብሂል አይቴ ተኀድር።

⁴⁰ ወይቤሎሙ ንዑ ትርአዩ ኀበ አኀድር ወሖሩ ወርእዩ ኀበ የኀድር ወወዐሉ ኀቤሁ ይእተ ዕለተ እስከ ዐሥሩ ሰዓት።

⁴¹ወአሐዱ ውእቱ እንድርያስ እኍሁ ለስምዖን ጴጥሮስ እምክልኤቱ እለ ሰምዑ በኀበ ዮሐንስ ወተለውዎ ለእግዚእ ኢየሱስ።

⁴² ወለሊሁ አቅደመ ረኪበ እኅዋሁ ስምዖንሃ ወይቤሎ ረከብናሁ ለማስያስ ዘበትርጓሜሁ ይብልዎ ክርስቶስ።

⁴³ ወውእቱ ወሰዶ ኀበ እግዚእ ኢየሱስ ወሶበ ርእዮ እግዚእ ኢየሱስ ይቤሎ አንተኑ ስምዖን ወልደ ዮና አንተኬ ትሰመይ ኬፋ ዘበትርጓሜሁ ጴጥሮስ።

⁴⁴ወበሳኒታ ፈቀደ ይሑር ገሊላ ወረከቦ እግዚእ ኢየሱስ ለፊልጶስ ወይቤሎ ትልወኒ።

⁴⁵ ወውእቱሰ ፊልጶስ ዘቤተ ሳይዳ እምሀገረ እንድርያስ ወጴጥሮስ።

⁴⁶ ወረከቦ ፊልጶስ ለናትናኤል ወይቤሎ ረከብናሁ ለኢየሱስ ወልደ ዮሴፍ ዘእምናዝሬት ዘጸሐፈ ሙሴ ውስተ ኦሪት ወነቢያትኒ ተነበዩ በእንቲአሁ።

⁴⁷ ወይቤሎ ናትናኤል ቦኑ ይትከሀል እምናዝሬት ከመ ይፃእ ብእሲ ኄር ወይቤሎ ፊልጶስ ነዓ ትርአይ።

⁴⁸ወሶበ ርእዮ እግዚእ ኢየሱስ ለናትናኤል እንዘ ይመጽእ ኀቤሁ ይቤ በእንቲኣሁ ነዋ ዘበአማን እስራኤላዊ ዘአልቦ ጽልሑት ውስተ ልቡ።

⁴⁹ ወይቤሎ ናትናኤል በአይቴ ተአምረኒ ወአውሥአ እግዚእ ኢየሱስ ወይቤሎ እምቅድመ ይጸውዕከ ፊልጶስ ርኢኩከ በታሕተ ዕፀ በለስ።

⁵⁰ ወአውሥአ ናትናኤል ወይቤሎ ረቢ አማን አንተ ውእቱ ወልደ እግዚአብሔር ወንጉሠ እስራኤል አንተ።

⁵¹ ወአውሥአ እግዚእ ኢየሱስ ወይቤሎ እስመ እመ እቤለከሁ ርኢኩከ በታሕተ ዕፀ በለስ ተአምንሁ እምይእዜሰ ዘየዐቢ እምዝ ትሬኢ።

⁵²ወይቤሎሙ አማን አማን እብለክሙ እምይእዜሰ ትሬእዩ እንዘ ይትረኀዋ ሰማያት ወመላእክተ እግዚአብሔር እንዘ የዐርጉ ወይወርዱ ኀበ ወልደ ዕጓለ እመሕያው።