Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 10 Bible Online

ወንጌል ዘዮሐንስ 10 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 10

¹አማን አማን እብለክሙ ዘኢቦአ እንተ አንቀጽ ውስተ ዐጸደ አባግዕ ወዐርገ እንተ ካልእ ገጽ ሰራቂ ወፈያት ወጕሕልያ ውእቱ።

²ወዘሰ እንተ አንቀጽ ይበውእ ኖላዌ አባግዕ ውእቱ።

³ወሎቱሰ ዐጻዊኒ ያርኅዎ ወአባግዕኒ ይሰምዓሁ ቃሎ ወይጼውዖን ለአባግዒሁ በበአስማቲሆን ወያወፅኦን ወያወፍሮን።

⁴ወሶበ አውፅኦን ወአውፈሮን ለኵሎን የሐውር ቅድሜሆን ወይተልዋሁ አባግዒሁ እስመ የአምራ ቃሎ።

⁵ወለነኪርሰ ኢይተልዋሁ አላ ይጐይያ እምኔሁ እስመ ኢየአምራ ቃሎ ለነኪር።

⁶ዘንተ ምሳሌ ይቤሎሙ እግዚእ ኢየሱስ ወእሙንቱሰ ኢያእመሩ ዘይቤሎሙ።

⁷ወካዕበ ይቤሎሙ እግዚእ ኢየሱስ አማን አማን እብለክሙ አነ ውእቱ አንቀጸ አባግዕ።

⁸ ወኵሎሙ እለ መጽኡ እምቅድሜየ ሰረቅት ወጕሕልያ እሙንቱ ወባሕቱ ኢይሰምዓሆሙ አባግዕ።

⁹ አነ ውእቱ አንቀጸ አባግዕ ዘበአማን ዘቦአ ብእሲ እንተ ኀቤየ ይድኅን ወይበውእ ወይወፅእ ወይረክብ ምርዓየ።

¹⁰ወሰራቂሰ ኢይመጽእ ዘእንበለ ከመ ይስርቅ ወይጥባሕ ወያኀጕል ወአንሰኬ መጻእኩ ከመ ይርከቡ ሕይወተ ዘለዓለም ወፈድፋደ ይርከቡ።

¹¹ አነ ውእቱ ኖላዊ ኄር ወኖላዊሰ ኄር ይሜጡ ነፍሶ ቤዛ አባግዒሁ።

¹²ወዐሳብሰ ዘኢኮነ ኖላዌ ወዘኢኮና አባግዕ ዘዚኣሁ ሶበ ይሬኢ ተኵላ እንዘ ይመጽእ ይጐይይ ወየኀድግ አባግዒሁ ወይመሥጦን ተኵላ ወይዘርዎን ለአባግዕ።

¹³ወዐሳብሰ ይጐይይ እስመ ዐሳብ ውእቱ ወኢያኀዝኖ በእንተ አባግዕ።

¹⁴ አነ ውእቱ ኖላዊ ኄር ወአአምር ዘዚኣየ መርዔትየ ወየአምራኒ እሊኣየ።

¹⁵ ወበከመ የአምረኒ አብ አነኒ አአምሮ ለአብ ወእሜጡ ነፍስየ ቤዛ አባግዕየ።

¹⁶ ወብየ ካልኣትኒ አባግዕ እለ ኢኮና እምዝንቱ ዐጸድ ወኪያሆንሂ ሀለወኒ አምጽኦን ዝየ ወይሰምዓኒ ቃልየ ወይከውና አሐደ መርዔተ ለአሐዱ ኖላዊ።

¹⁷ ወበእንተ ዝንቱ ያፈቅረኒ አብ እስመ አነ እሜጡ ነፍስየ ቤዛ አባግዕየ ከመ ካዕበ አንሥኣ።

¹⁸ ወአልቦ ዘየሀይደንያ አላ ለልየ እሜጥዋ በፈቃድየ እስመ ብዉሕ ሊተ አንብራሂ ወእሢማ ወብዉሕ ሊተ ካዕበ አንሥኣ ዘንተ ትእዛዘ ነሣእኩ እምኀበ አቡየ።

¹⁹ ወተናፈቁ እንከ ካዕበ አይሁድ በበይናቲሆሙ በእንተ ዝንቱ ነገር።

²⁰ወይቤሉ ብዙኃን እምኔሆሙ ጋኔን አኀዞ ወየአብድ ምንትኑ ታጸምዕዎ።

²¹ ወቦ እለ ይቤሉ ዝንቱ ነገር ኢኮነ ዘእምጋኔን ዘጋኔኑ ይክል ከሢተ አዕይንቲሆሙ ለዕዉራን።

²²ወኮነ በውእቱ መዋዕል ሐድሶ ሕንጸታ ለኢየሩሳሌም ወክረምት ውእቱ።

²³ ወአንሶሰወ እግዚእ ኢየሱስ በቤተ መቅደስ በሕዋረ ሰሎሞን።

²⁴ወዐገትዎ አይሁድ ወይቤልዎ እስከ ማእዜኑ ታመነድበነ ነፍሰነ ለእመ አንተሁ ውእቱ ክርስቶስ ንግረነ ገሃደ።

²⁵ ወአውሥአ እግዚእ ኢየሱስ ወይቤሎሙ ነገርኩክሙ ወኢተአምኑኒ ግብር ዘእገብር አነ በስመ አቡየ ውእቱ ሰማዕትየ።

²⁶ ወአንትሙሰ ኢተአምኑኒ እስመ ኢኮንክሙ እምነ አባግዕየ በከመ እቤለክሙ።

²⁷ወአባግዕየሰ እሊኣየ ይሰምዓኒ ቃልየ ወአነሂ አአምሮን ወእማንቱ ይተልዋኒ።

²⁸ ወአነሂ እሁቦን ሕይወተ ዘለዓለም ወኢይትኀጐላ ለዓለም ወአልቦ ዘየሀይደንዮን እምእዴየ።

²⁹ እስመ አቡየ ዘወሀበንዮን ውእቱ የዐቢ እምኵሉ ወአልቦ ዘይክል ሀዪደ እምእዴሁ ለአቡየ።

³⁰ አነ ወአብ አሐዱ ንሕነ።

³¹ወነሥኡ አይሁድ እብነ ካዕበ ከመ ይውግርዎ።

³²ወአውሥአ እግዚእ ኢየሱስ ወይቤሎሙ ብዙኀ ግብረ ሠናየ አርአይኩክሙ ዘእምኀበ አቡየ በአይ ግብር እምኔሆሙ ትዌግሩኒ።

³³ ወአውሥኡ አይሁድ ወይቤልዎ በእንተ ሠናይሰ ግብርከ ኢንዌግረከ ወባሕቱ በበይነ ፅርፈትከ እስመ እንዘ ሰብእ አንተ እግዚአብሔርሃ ትሬሲ ርእሰከ።

³⁴ ወአውሥአ እግዚእ ኢየሱስ ወይቤሎሙ አኮኑ ጽሑፍ ውስተ ኦሪትክሙ «አንሰ እቤ አማልክት አንትሙ።»

³⁵ወሶበ ለእልክቱ አማልክት ይቤሎሙ እለ ኮነ ቃለ እግዚአብሔር ኀቤሆሙ ወኢይትከሀል ይትነሠት ቃለ መጽሐፍ።

³⁶ወዘሰ ቀደሶ አብ ወፈነዎ ውስተ ዓለም እፎ እንከ ትብሉኒ ትፀርፍ ለእመ እቤለክሙ ወልደ እግዚአብሔር አነ።

³⁷ወእመሰ ኢይገብር ግብሮ ለአቡየ ኢትእመኑ ብየ።

³⁸ወእመሰ እገብር ለእመ ኪያየ ኢአመንክሙ ለግብርየ እመኑ ከመ ታእምሩ ወትጠይቁ ከመ አነ በአብ ወአብ ብየ።

³⁹ ወኀሠሡ ካዕበ የአኀዝዎ ወአምሠጠ እምእዴሆሙ።

⁴⁰ ወሖረ ካዕበ ማዕዶተ ዮርዳኖስ ብሔረ ኀበ አጥመቀ ዮሐንስ ቀዲሙ ወነበረ ህየ።

⁴¹ወብዙኃን ሖሩ ኀቤሁ ወይቤሉ ዮሐንስ አልቦ ዘገብረ ተአምረ ወኢምንተኒ ወባሕቱ ኵሉ ዘይቤ ዮሐንስ በእንተዝ ብእሲ እሙነ ኮነ።

⁴²ወብዙኃን እለ አምኑ ቦቱ በህየ።