Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 11 Bible Online

ወንጌል ዘዮሐንስ 11 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 11

¹ ወሀሎ አሐዱ ብእሲ ዘይደዊ ዘስሙ አልዓዛር በቢታንያ ዘሀገረ ማርያ ወማርታ እኅታ።

² ወማርያሰ ይእቲ እንተ ቀብዐቶ ለእግዚእነ ዕፍረተ ወመዝመዘት እገሪሁ በሥዕርታ ወእኁሃ ላቲ አልዓዛር ይደዊ።

³ወለአካ አኃቲሁ ኀበ እግዚእ ኢየሱስ እንዘ ይብላ እግዚእነአ ናሁ ዘታፈቅር ይደዊ።

⁴ ወሰሚዖ እግዚእ ኢየሱስ ይቤ ዝንቱ ደዌ ኢኮነ ለሞት አላ በእንተ ስብሐተ እግዚአብሔር ወከመ ይሰባሕ ወልደ እግዚአብሔር በእንቲኣሁ።

⁵ወያፈቅሮሙ እግዚእ ኢየሱስ ለማርታ ወለማርያ እኅታ ወለአልዓዛር።

⁶ወሶበ ሰምዐ ከመ ይደዊ ነበረ ኀበ ሀለወ ብሔር ሰኑየ መዋዕለ።

⁷ወእምዝ ይቤሎሙ ለአርዳኢሁ ንሑር ብሔረ ይሁዳ ካዕበ።

⁸ ወይቤልዎ አርዳኢሁ ረቢ አኮኑ ይእዜ የኀሥሡ አይሁድ ይውግሩከ ወካዕበ ተሐውርኑ ህየ።

⁹ ወአውሥአ እግዚእ ኢየሱስ ወይቤሎሙ አኮኑ ዐሠርቱ ወክልኤቱ ሰዓቱ ለዕለት ብእሲ ዘየሐውር መዓልተ ኢይትዐቀፍ እስመ ይሬኢ ብርሃኖ ለዝንቱ ዓለም።

¹⁰ ወዘሰ የሐውር ሌሊተ ይትዐቀፍ እስመ አልቦ ውስቴቱ ብርሃን ዘይሬኢ።

¹¹ ወዘንተ ነገረ ይቤሎሙ ለአርዳኢሁ ወእምዝ ይቤሎሙ አልዓዛር ዐርክነ ኖመ ወባሕቱ አሐውር አንቅሆ።

¹²ወይቤልዎ አርዳኢሁ እግዚኦ እመሰ ኖመ ይነቅህ ወይጥዒ።

¹³ወእግዚእ ኢየሱስ ይቤ በእንተ ንዋመ ሞቱ ወሎሙሰ መሰሎሙ በእንተ ንዋመ ድቃስ ዘይቤሎሙ።

¹⁴ወእምዝ ይቤሎሙ እግዚእ ኢየሱስ ገሃደ አልዓዛር ሞተ።

¹⁵ወአንሰ እትፌሣሕ በእንቲኣክሙ እስመ ኢሀሎኩ ህየ ከመ ትእመኑ ወባሕቱ ንሑር ኀቤሁ።

¹⁶ ወይቤሎሙ ቶማስ ዘይብልዎ ዲዲሞስ ለቢጹ አርዳእ ንሑርኬ ንሕነኒ ከመ ንሙት ምስሌሁ።

¹⁷ወሖረ እግዚእ ኢየሱስ ቢታንያ ወበጺሖ ህየ ረከቦ በዘወድአ ረቡዐ መዋዕለ እምዘተቀበረ።

¹⁸ወቢታንያሰ ቅርብት ይእቲ ለኢየሩሳሌም መጠነ ዐሠርቱ ወኀምስቱ ምዕራፍ።

¹⁹ወብዙኃን እምነ አይሁድ እለ ሖሩ ኀበ ማርያ ወማርታ ከመ ያላቅስዎን በእንተ እኁሆን።

²⁰ ወሶበ ሰምዐት ማርታ ከመ መጽአ እግዚእ ኢየሱስ ወፅአት ወተቀበለቶ ወማርያሰ ነበረት ቤተ።

²¹ወትቤሎ ማርታ ለእግዚእ ኢየሱስ እግዚእየ ሶበሰ ሀሎከ ዝየ እምኢሞተ እኁየ።

²²ወይእዜኒ አአምር ከመ ዘሰአልኮ ለእግዚአብሔር ይሁበከ እግዚአብሔር።

²³ወይቤላ እግዚእ ኢየሱስ እኁኪሰ ይትነሣእ።

²⁴ ወትቤሎ ማርታ አአምር ከመ ይትነሣእ አመ ትንሣኤ ምዉታን በደኃሪት ዕለት።

²⁵ወይቤላ እግዚእ ኢየሱስ አነ ውእቱ ትንሣኤ ወሕይወት ዘየአምን ብየ እመኒ ሞተ የሐዩ።

²⁶ ወኵሉ ዘሕያው ወየአምን ብየ ኢይመውት ለዓለም ተአምኒኑ ዘንተ።

²⁷ ወትቤሎ እወ እግዚኦ አንሰ አአምን ከመ አንተ ውእቱ ክርስቶስ ወልደ እግዚአብሔር ዘመጽአ ውስተ ዓለም።

²⁸ወዘንተ ብሂላ ሖረት ወጸውዐታ ለማርያ እኅታ ጽሚተ ወትቤላ ናሁ መጽአ ሊቅነ ወይጼውዐኪ።

²⁹ወሶበ ሰምዐት ማርያ ተንሥአት ፍጡነ ወሖረት ኀቤሁ።

³⁰ወዓዲሁ ኢቦአ እግዚእ ኢየሱስ ውስተ ሀገር አላ ሀሎ ውስተ ብሔር ኀበ ተቀበለቶ ማርታ።

³¹ወሶበ ርእይዋ ለማርያ አይሁድ እለ ሀለዉ ምስሌሃ ውስተ ቤት ወእለ ያላቅስዋ ከመ ተንሥአት ፍጡነ ወወፅአት ተለውዋ ወመሰሎሙ ዘተሐውር ኀበ መቃብሩ ትብክዮ በህየ።

³²ወሶበ በጽሐት ማርያ ኀበ እግዚእ ኢየሱስ ርእየቶ ወሰገደት ሎቱ ታሕተ እገሪሁ ወትቤሎ እግዚእየ ሶበሰ ሀሎከ ዝየ እምኢሞተ እኁየ።

³³ ወሶበ ርእያ እግዚእ ኢየሱስ እንዘ ትበኪ ወአይሁድኒ እለ መጽኡ ምስሌሃ ከመ ይበክዩ ገዐረ በመንፈሱ ወሆከ ርእሶ።

³⁴ ወይቤ አይቴ ቀበርክምዎ ወይቤልዎ እግዚኦ ነዓ ትርአይ።

³⁵ወአንብዐ ካዕበ እግዚእ ኢየሱስ።

³⁶ወይቤሉ አይሁድ ርእዩ መጠነ ያፈቅሮ።

³⁷ ወቦ እምውስቴቶሙ እለ ይቤሉ እምኢክህለኑ ዝንቱ ዘከሠተ አዕይንቲሁ ለዘዕዉሩ ተወልደ ከመ ይግበር በዘኢይመውት ዝንቱኒ።

³⁸ወካዕበ ተከዘ በልቡ እግዚእ ኢየሱስ ወሖረ ኀበ መቃብሩ እንዘ ያነብዕ ወበኣት ውእቱ ወክዱን እብን ዐቢይ ዲቤሁ።

³⁹ወይቤሎሙ እግዚእ ኢየሱስ አእትትዋ ለእብን ወትቤሎ ማርታ እኅቱ ለዘሞተ እግዚእየ ወድአ ጼአ እስመ ረቡዐ ኮነ ዮም እምዘተቀብረ።

⁴⁰ወይቤላ እግዚእ ኢየሱስ ኢይቤለኪኑ ከመ እመ ተአመንኪ ትሬእዪ ስብሐተ እግዚአብሔር ወአእተትዋ ለይእቲ እብን።

⁴¹ ወአንሥአ አዕይንቲሁ እግዚእ ኢየሱስ ላዕለ ወይቤ አአኵተከ አባ እስመ ሰማዕከኒ።

⁴² ወአንሰ አአምር ከመ ዘልፈ ትሰምዐኒ ወባሕቱ በእንተ እለ ይቀውሙ ሰብእ እብል ዘንተ ከመ ይእመኑ ከመ አንተ ፈነውከኒ።

⁴³ወዘንተ ብሂሎ ከልሐ በዐቢይ ቃል ወይቤ አልዓዛር አልዓዛር ነዓ ፃእ አፍኣ።

⁴⁴ወወፅአ ውእቱ ምዉት እንዘ ግኑዝ ወእሱር እደዊሁ ወእገሪሁ ወገጹኒ ጥብሉል በሰበን ወይቤሎሙ እግዚእ ኢየሱስ ፍትሕዎኬ እንከሰ ወኅድግዎ ይሑር።

⁴⁵ ወብዙኃን እምአይሁድ እለ መጽኡ ኀበ ማርያ ወማርታ ርእዮሙ ዘገብረ እግዚእ ኢየሱስ አምኑ ቦቱ።

⁴⁶ወቦ እምውስቴቶሙ እለ ሖሩ ኀበ ፈሪሳውያን ወአስተዋደይዎ ወነገርዎሙ ኵሎ ዘገብረ እግዚእ ኢየሱስ።

⁴⁷ ወአስተጋብእዎሙ ሊቃነ ካህናት ወፈሪሳውያን ለሕዝብ ወይቤልዎሙ ምንተ ንሬሲ ናሁ ዝንቱ ብእሲ ብዙኀ ተኣምረ ይገብር።

⁴⁸ወእመኒ ኀደግናሁ ከመዝ ኵሉ የአምን ቦቱ ወይመጽኡ ሰብአ ሮሜ ወይነሥኡነ ብሔረነ ወሕዝበነኒ።

⁴⁹ ወይቤሎሙ አሐዱ እምኔሆሙ ዘስሙ ቀያፋ ሊቀ ካህናት ዘእብሬቱ ይእቲ ዓመት አንትሙሰ ኢተአምሩ ወኢምንተኒ ወኢሂ ትመክሩ።

⁵⁰ ይኄይሰነ አሐደ ብእሴ ንቅትል ወይሙት ህየንተ ሕዝብ እምይትኀጐል ኵሉ ሕዝብ።

⁵¹ ወዘንተሰ አኮ እምልቡ ዘይቤ አላ እስመ ሊቀ ካህናት ውእቱ ወእብሬቱ ይእቲ ዓመት ተነበየ ዘንተ እስመ ሀለዎ ለእግዚእ ኢየሱስ ይሙት በእንተ ኵሉ ሕዝብ።

⁵² ወአኮ በእንተ ሕዝብ ባሕቲቶሙ አላ ከመ ያስተጋብኦሙ ለውሉደ እግዚአብሔር እለ ተዘርዉ አሐተኔ።

⁵³ወእምይእቲ ዕለት ተማከሩ ሊቃነ ካህናት ከመ ይቅትልዎ።

⁵⁴ወኢያንሶሰወ እንከ እግዚእ ኢየሱስ ገሃደ ማእከለ አይሁድ አላ ሖረ ኀበ ሀገር እንተ ትሰመይ ሀገረ ኤፍሬም ዘቅርብት ለበድው ወነበረ ህየ ምስለ አርዳኢሁ።

⁵⁵ ወቀርበ በዓለ ፋሲካሆሙ ለአይሁድ ወዐርጉ ብዙኃን ለኢየሩሳሌም እምበሓውርት እምቅድመ በዓለ ፋሲካ ያንጽሑ ርእሶሙ።

⁵⁶ወአኀዙ አይሁድ ይኅሥሥዎ ለእግዚእ ኢየሱስ ወይቤሉ በበይናቲሆሙ እንዘ ይቀውሙ ውስተ ቤተ መቅደስ ምንተ ትብሉ ናሁ ኢመጽአ ለበዓል።

⁵⁷ወአዘዙ ሊቃነ ካህናት ወፈሪሳውያን እምከመቦ ዘአእመረ ኀበ ሀሎ ይቅጽብዎሙ ከመ የአኀዝዎ።