Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 12 Bible Online

ወንጌል ዘዮሐንስ 12 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 12

¹ ወእምዝ ሖረ እግዚእ ኢየሱስ እምቅድመ ሰዱስ መዋዕል ዘፋሲካ ወበጽሐ ቢታንያ ኀበ ሀሎ አልዓዛር ዘአንሥኦ እምነ ምዉታን።

² ወገብሩ ሎቱ ምሳሐ በህየ ወማርታ ትሜጥዎሙ ወአልዓዛር አሐዱ ውእቱ እምእለ ይረፍቁ ምስሌሁ።

³ ወማርያሰ ነሥአት ዕፍረተ ልጥረ ዘናርዱ ጵስጥቂስ ዘዕፁብ ሤጡ ወቀብዐቶ እገሪሁ ለእግዚእ ኢየሱስ ወመዝመዘቶ በሥዕርታ ወመልአ ቤተ መዐዛሁ ለውእቱ ዕፍረት።

⁴ወይቤ ይሁዳ ስምዖን አስቆሮታዊ አሐዱ እምአርዳኢሁ ዘሀለዎ ያግብኦ።

⁵ ለምንት ኢሤጥዎ ለዝንቱ ዕፍረት ለሠለስቱ ምእት ዲናር ይትወሀብ ለነዳያን።

⁶ ወዘንተ ዘይቤ አኮ ዘያጽሕቅዎ ነዳያን አላ እስመ ሰራቂ ውእቱ ወየዐቅብ አስከሬነ።[20] ወይነሥእ እምዘይትወደይ ውስቴቱ።

⁷ወይቤሎ እግዚእ ኢየሱስ ኅድጋ እስመ ተዐቅቦ ለዕለተ ቀበርየ።

⁸ ወነዳያንሰ በኵሉ ጊዜ ሀለዉ ምስሌክሙ ወዘልፈ ትረክብዎሙ ወጊዜ ፈቀድክሙ ታሤንዩ ሎሙ ወኪያየሰ አኮ በኵሉ ጊዜ ዘትረክቡኒ።

⁹ወብዙኃን እምነ አይሁድ እለ አእመሩ ከመ ሀሎ እግዚእ ኢየሱስ ህየ ወሖሩ ኀቤሁ ወአኮ በእንተ እግዚእ ኢየሱስ ባሕቲቱ ዘሖሩ ዳእሙ ከመ ይርአይዎ ለአልዓዛርሂ ዘአንሥኦ እግዚእ ኢየሱስ እምዉታን።

¹⁰ወተማከሩ ሊቃነ ካህናት ከመ ይቅትልዎ ለአልዓዛር።

¹¹እስመ ብዙኃን እምውስተ አይሁድ የሐውሩ በእንቲኣሁ ወየአምኑ በእግዚእ ኢየሱስ።

¹² ወበሳኒታ ሰብእ ብዙኃን እለ መጽኡ ለበዓል ሶበ ሰምዑ ከመ ይመጽእ እግዚእ ኢየሱስ ኢየሩሳሌም።

¹³ ነሥኡ ጸበርተ ተመርት ዘበቀልት ወተቀበልዎ ወፂኦሙ እንዘ ይጸርሑ ወይቤሉ ሆሣዕና ቡሩክ ዘይመጽእ በስመ እግዚአብሔር ወንጉሦሙ ለእስራኤል።

¹⁴ወረከበ እግዚእ ኢየሱስ ዕዋለ አድግ ወተጽዕነ ዲቤሃ።

¹⁵ በከመ ጽሑፍ «ኢትፍርሂ ወለተ ጽዮን ነዋ ንጉሥኪ ይመጽእ እንዘ ይጼዐን ዲበ ዕዋለ አድግ።»

¹⁶ወቀዲሙሰ ኢያእመሩ አርዳኢሁ ዘንተ ነገረ ዘእንበለ አመ ተሰብሐ እግዚእ ኢየሱስ አሜሃ ተዘከሩ ከመ ጽሑፍ ዝንቱ በእንቲኣሁ ወከመዝ ገብሩ ሎቱ።

¹⁷ወሰማዕተ ኮንዎ እሙንቱ ሕዝብ እለ ሀለዉ ህየ ምስሌሁ ከመ ጸውዖ ለአልዓዛር እመቃብር ወአንሥኦ እምነ ምዉታን።

¹⁸ወበእንተ ዝንቱ ወፅኡ ኵሉ ሕዝብ ይትቀበልዎ እስመ ሰምዑ ተኣምረ ዘገብረ ወዘንተሂ መንክረ።

¹⁹ ወይቤሉ ፈሪሳውያን በበይናቲሆሙ ትሬእዩኑ ከመ አልቦ ዘትበቍዑ ወኢምንተኒ ናሁ ኵሉ ዓለም ተለዎ ድኅሬሁ።

²⁰ወቦ እምሰብአ ጽርእ እምውስተ አረሚ እለ ዐርጉ ይስግዱ ለበዓል።

²¹ወሖሩ እሙንቱሂ ኀበ ፊልጶስ ዘቤተ ሳይዳ ዘገሊላ ወሰአልዎ ወይቤልዎ እግዚኦ ንፈቅድ ንርአዮ ለእግዚእ ኢየሱስ።

²²ወሖረ ፊልጶስ ወነገሮ ለእንድርያስ ወሖሩ እንድርያስ ወፊልጶስ ወነገርዎ ለእግዚእ ኢየሱስ።

²³ወአውሥአ እግዚእ ኢየሱስ ወይቤሎሙ ናሁ በጽሐ ጊዜሁ ከመ ይሰባሕ ወልደ ዕጓለ እመሕያው።

²⁴ አማን አማን እብለክሙ እመ ኢወደቀት ኅጠተ ሥርናይ ውስተ ምድር ወኢሞተት ባሕቲታ ትነብር ወእመሰ ሞተት ብዙኀ ፍሬ ትፈሪ።

²⁵ ወዘሰ ያፈቅራ ለነፍሱ ለይግድፋ ወዘሰ ጸልኣ ለነፍሱ በዝንቱ ዓለም የዐቅባ ለሕይወት ዘለዓለም።

²⁶ ወእመቦ ዘይትለአከኒ ሊተ ለይትልወኒ እስመ ኀበ ሀሎኩ አነ ህየ ይሄሉ ዘይትለአከኒ ወለዘሊተ ተልእከኒ ያከብሮ አቡየ።

²⁷ወይእዜሰ ተሀውከተኒ ነፍስየ ወምንተ እንከ እብል አባ አድኅና ለነፍስየ እምዛቲ ሰዓት ወባሕቱ በእንተ ዝንቱ መጻእኩ ወበጻሕክዋ ለዛቲ ሰዓት።

²⁸ አባ ሰብሖ ለወልድከ ወመጽአ ቃል እምሰማይ ዘይብል ሰባሕኩከሂ ወዓዲ ካዕበ እሴብሐከ።

²⁹ወሕዝብሰ እለ ይቀውሙ ወይሰምዑ ይቤሉ ነጐድጓድ ውእቱ ወቦ እለ ይቤሉ መልአክ ተናገሮ።

³⁰ ወአውሥአ እግዚእ ኢየሱስ ወይቤሎሙ አኮ በእንቲኣየ ዘመጽአ ዝ ቃል አላ በእንቲኣክሙ።

³¹ ወናሁ እብለክሙ ይእዜ በጽሐ ኵነኔሁ ለዝንቱ ዓለም ወእምይእዜሰ ይሰድድዎ ለመልአከ ዝንቱ ዓለም ወያወፅእዎ አፍኣ።

³² ወአነኒ እምከመ ተለዐልኩ እምድር እስሕብ ኵሎ ኀቤየ።

³³ ወዘንተ ዘይቤ እንዘ ይኤምሮሙ በአይ ሞት ሀለዎ ይሙት።

³⁴ ወአውሥእዎ ሕዝብ ወይቤልዎ ንሕነሰ ሰማዕነ በውስተ ኦሪት ከመ ለዓለም ይነብር ክርስቶስ ወእፎ እንከ ትብለነ አንተ ሀለዎ ለወልደ ዕጓለ እመሕያው ይትለዐል መኑ እንከ ዝንቱ ወልደ ዕጓለ እመሕያው።

³⁵ ወይቤሎሙ እግዚእ ኢየሱስ ዓዲ ኅዳጠ መዋዕለ ሀሎ ምስሌክሙ ብርሃን አንሶስዉ እንዘ ብክሙ ብርሃን ዘእንበለ ይርከብክሙ ጽልመት እስመ ዘየሐውር ውስተ ጽልመት ኢየአምር ኀበ የሐውር።

³⁶ አምጣነ ብክሙ ብርሃን እመኑ በብርሃን ከመ ትኩኑ ውሉደ ብርሃን ወዘንተ ብሂሎ እግዚእ ኢየሱስ ሖረ ወተኀብኦሙ።

³⁷ወእንዘ መጠነዝ ተኣምረ ይገብር በቅድሜሆሙ ኢአምኑ ቦቱ።

³⁸ ከመ ይብጻሕ ቃለ ኢሳይያስ ነቢይ ዘይቤ «እግዚኦ መኑ የአምነነ ስምዐነ ወለመኑ ተከሥተ መዝራዕቱ ለእግዚአብሔር።»

³⁹ ወበእንተ ዝንቱ ስእኑ አሚነ እስመ ካዕበ ይቤ ኢሳይያስ።

⁴⁰«ዖራ አዕይንቲሆሙ ወገዝፋ አልባቢሆሙ ከመ ኢይርአዩ በአዕይንቲሆሙ ወኢይለብዉ በአልባቢሆሙ ወከመ ኢይትመየጡ ኀቤየ ወኢይሣሀሎሙ።»

⁴¹ ወዘንተ ይቤ ኢሳይያስ እስመ ርእየ ስብሐቲሁ ወነገረ በእንቲኣሁ።

⁴² ወቦ ብዙኃን እመላእክተ ሕዝብ እለ አምኑ ቦቱ ወባሕቱ ኢያግሀዱ በእንተ ፍርሀቶሙ ለፈሪሳውያን ከመ ኢይስድድዎሙ እምነ ምኵራብ።

⁴³ እስመ አብደሩ ስብሐተ ሰብእ ፈድፋደ እምስብሐተ እግዚአብሔር።

⁴⁴ወጸርሐ እግዚእ ኢየሱስ ወይቤ ዘየአምን ብየ አኮ ብየ ባሕቲቶ ዘየአምን ዘእንበለ በዘፈነወኒ።

⁴⁵ ወዘርእየ ኪያየ ርእዮ ለዘፈነወኒ።

⁴⁶ወአንሰ ብርሃን መጻእኩ ውስተ ዓለም ከመ ኵሉ ዘየአምን ብየ ኢይንበር ውስተ ጽልመት።

⁴⁷ ወዘኒ ሰምዐ ቃልየ ወኢዐቀቦ አኮ አነ ዘእኴንኖ እስመ ኢመጻእኩ ከመ እኰንኖ ለዓለም ዘእንበለ ከመ አሕይዎ ለዓለም።

⁴⁸ ወዘሰ ክሕደኒ ወኢተወክፈ ቃልየ ሀሎ ዘይኴንኖ ቃል ዘአነ ነበብኩ ውእቱ ይኴንኖ በደኃሪት ዕለት።

⁴⁹ እስመ አኮ ዘእምኀቤየ ዘነበብኩ አላ አብ ዘፈነወኒ ውእቱ ትእዛዞ ወሀበኒ ዘከመ እነብብ ወዘከመ እብል።

⁵⁰ ወአአምር ከመ ትእዛዙ ሕይወት ውእቱ ዘለዓለም ወዘሂ እነግር አነ በከመ ይቤለኒ አብ ከማሁ እነግር።