Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 13 Bible Online

ወንጌል ዘዮሐንስ 13 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 13

¹ ወእምቅድመ በዓለ ፋሲካ ሶበ ኮነ የአምር እግዚእ ኢየሱስ ከመ በጽሐ ጊዜሁ ከመ ይፈልስ እምዝንቱ ዓለም ወየሐውር ኀበ አብ ዘፈነዎ ወአፍቀሮሙ ለእሊኣሁ እለ ውስተ ዓለም ወለዝሉፉ አፍቀሮሙ።

² ወእንዘ ይዴረሩ ቦአ ሰይጣን ውስተ ልበ ይሁዳ ስምዖን አስቆሮታዊ ከመ ያግብኦ።

³ወሶበ ኮነ የአምር እግዚእ ኢየሱስ ከመ አወፈዮ አብ ኵሎ ውስተ እዴሁ ወከመ እምኀበ እግዚአብሔር ወፅአ ወኀበ እግዚአብሔር የሐውር።

⁴ወተንሥአ እምኀበ ይዴረሩ ወአንበረ አልባሲሁ ወነሥአ መክፌ ዘለንጽ ወቀነተ ሐቌሁ።

⁵ ወወደየ ማየ ውስተ ንብቲራ ወአኀዘ ይኅፅብ እገሪሆሙ ለአርዳኢሁ ወመዝመዘ በውእቱ መክፌ ዘቀነተ።

⁶ወበጽሐ ኀበ ስምዖን ጴጥሮስ ወይቤሎ አንተኑ እግዚኦ ዘተኀፅበኒ እገርየ።

⁷ወአውሥአ እግዚእ ኢየሱስ ወይቤሎ ዘእገብር አነ አንተ ኢተአምር ይእዜ ወባሕቱ ድኅረሰ ተአምሮ።

⁸ ወይቤሎ ጴጥሮስ ኢተኀፅበኒ እገርየ ለዓለም ወአውሥአ እግዚእ ኢየሱስ ወይቤሎ አማን አማን እብለከ እመ አነ ኢኀፀብኩከ እገሪከ አልብከ ክፍል ምስሌየ።

⁹ወይቤሎ ስምዖን ጴጥሮስ እግዚኦ አኮ እገርየ ባሕቲቶ ዘተኀፅበኒ ወዓዲ እደውየኒ ወርእስየኒ።

¹⁰ ወይቤሎ እግዚእ ኢየሱስ ዘሰ ወድአ ተኀፅበ ኢይፈቅድ ይትኀፀብ ዘእንበለ እገሪሁ ዳእሙ እስመ ንጹሕ ኵለንታሁ ወአንትሙሰ ንጹሓን አንትሙ ወባሕቱ አኮ ኵልክሙ ንጹሓን።

¹¹ እስመ የአምር እግዚእ ኢየሱስ ዘያገብኦ ወበእንተ ዝንቱ ይቤ አኮ ኵልክሙ ንጹሓን።

¹²ወሶበ ኀፀቦሙ እገሪሆሙ ነሥአ አልባሲሁ ወረፈቀ ካዕበ ምስሌሆሙ ወይቤሎሙ አእመርክሙኑ ዘገበርኩ ለክሙ።

¹³ አንትሙሰ ትብሉኒ ሊቅነ ወእግዚእነ ወሠናየ ትብሉ እስመ ከማሁ አነ።

¹⁴ ወሶበ እንዘ አነ እንከ ሊቅክሙ ወእግዚእክሙ ኀፀብኩክሙ እገሪክሙ ከማሁኬ አንትሙኒ ይደልወክሙ ትኅፅቡ እግረ ቢጽክሙ።

¹⁵ እስመ አርኣያየ ወሀብኩክሙ ከመ ትግበሩ አንትሙኒ በከመ ገብርኩ ለክሙ አነ።

¹⁶ አማን አማን እብለክሙ አልቦ ገብር ዘየዐቢ እምእግዚኡ ወአልቦ ሐዋርያ ዘየዐቢ እምዘፈነዎ።

¹⁷ ወእመሰ ዘንተ ተአምሩ ብፁዓን አንትሙ እመ ገበርክምዎ ለዝ።

¹⁸ ወአኮ በእንተ ኵልክሙ ዘእብል ዘንተ እስመ አነ አአምር መኑ እሙንቱ እለ ኀረይኩ ወባሕቱ ከመ ይብጻሕ ቃለ መጽሐፍ ዘይቤ «ዘይሴሰይ እክልየ አንሥአ ሰኰናሁ ላዕሌየ።»

¹⁹ወእምይእዜሰ እነግረክሙ ዘእንበለ ይኩን ከመ አመ ኮነ ትእመኑ ከመ አነ ውእቱ።

²⁰ አማን አማን እብለክሙ ዘተወክፎ ለዘፈነውኩ አነ ኪያየ ተወክፈ ወዘኪያየ ተወክፈ ተወክፎ ለዘፈነወኒ።

²¹ ወዘንተ ብሂሎ እግዚእ ኢየሱስ ተሀውከ በመንፈሱ ወስምዐ ኮነ ወይቤ አማን አማን እብለክሙ ከመ አሐዱ እምኔክሙ ያገብአኒ።

²²ወተናጸሩ አርዳኢሁ በበይናቲሆሙ እስመ ኢያእመሩ ወኀጥኡ ከመ እንበይነ መኑ ይብል ዘንተ።

²³ ወሀሎ አሐዱ እምአርዳኢሁ ዘይረፍቅ ውስተ ሕፅኑ ለእግዚእ ኢየሱስ ወያፈቅሮ እግዚእ ኢየሱስ።

²⁴ወቀጸቦ ስምዖን ጴጥሮስ ሎቱ ወይቤሎ ተሰአል ወንግረነ ከመ እንበይነ መኑ ይብል ዘንተ።

²⁵ወሖረ ወረፈቀ ውእቱ ረድእ ዲበ እንግድዓሁ ለእግዚእ ኢየሱስ ወይቤሎ እግዚኦ መኑ ውእቱ ዘያገብአከ።

²⁶ ወአውሥአ እግዚእ ኢየሱስ ወይቤሎ ዝውእቱ ዘአነ እጸብሕ ሎቱ ኅብስተ ወእሜጥዎ ውእቱ ዘያገብአኒ ወጸብሐ ኅብስተ ወመጠዎ ለይሁዳ ስምዖን አስቆሮታዊ።

²⁷ወእምድኅረ ውእቱ ኅብስት ቦአ ሶቤሃ ሰይጣን ውስተ ልቡ ለይሁዳ ወይቤሎ እግዚእ ኢየሱስ ዘትገብር እንከ ፍጡነ ግበር።

²⁸ወኢያእመሩ እለ ይረፍቁ ምስሌሁ ከመ በእንተ ምንት ይቤሎ ዘንተ።

²⁹ወቦ እለ መሰሎሙ ከመ በእንተ አስከሬነ ቀምጠራ ዘሙዳየ ምጽዋት ዘሀሎ በኀበ ይሁዳ ዘይቤሎ እግዚእ ኢየሱስ ተሣየጥ ዘንፈቅድ ለበዓል አው ዘንሁብ ለነዳያን እስመ ውእቱ የዐቅብ አስከሬነ ቀምጠራ ዘሙዳየ ምጽዋት።

³⁰ወተመጢዎ ይሁዳ ውእተ ኅብስተ ወፅአ ሶቤሃ በሌሊት።

³¹ወወፂኦ ውእተ ጊዜ ይቤሎሙ እግዚእ ኢየሱስ ይእዜኬ እንከ ተሰብሐ ወልደ ዕጓለ እመሕያው ወእግዚአብሔርኒ ተሰብሐ ቦቱ።

³² ወእመሰ እግዚአብሔር ተሰብሐ ቦቱ እግዚአብሔርኒ ይሴብሖ ወሶቤሃ ይሴብሖ ወዓዲ ካዕበ ይሴብሖ።

³³ ደቂቅየ ዓዲ ኅዳጠ መዋዕለ ሀሎኩ ምስሌክሙ ተኀሥሡኒ ወበከመ እቤሎሙ ለአይሁድ ኀበ አነ አሐውር አንትሙ ኢትክሉ መጺአ ወለክሙኒ ይእዜ እነግረክሙ።

³⁴ ወእሁበክሙ ሐዲሰ ትእዛዘ ከመ ትትፋቀሩ በበይናቲክሙ በከመ አነ አፍቀርኩክሙ ከማሁ አንትሙኒ ተፋቀሩ በበይናቲክሙ።

³⁵ወበዝንቱ የአምረክሙ ኵሉ ከመ አርዳእየ አንትሙ እምከመ ተፋቀርክሙ በበይናቲክሙ።

³⁶ ወይቤሎ ስምዖን ጴጥሮስ እግዚኦ አይቴኑ ተሐውር ወአውሥአ እግዚእ ኢየሱስ ወይቤሎ ኀበሰ አነ አሐውር ኢትክል ተሊዎትየ ይእዜ ወባሕቱ ድኅረሰ ትተልወኒ።

³⁷ወይቤሎ ጴጥሮስ እግዚኦ በእንተ ምንት ኢይክል ተሊዎተከ ይእዜ ወአነ ነፍስየ ጥቀ እሜጡ በእንቲኣከ።

³⁸ወአውሥአ እግዚእ ኢየሱስ ወይቤሎ ነፍሰከኑ ትሜጡ በእንቲኣየ ኦ ስምዖን አማን አማን እብለከ ዘእንበለ ይንቁ ዶርሆ ሥልሰ ትክሕደኒ።