Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 14 Bible Online

ወንጌል ዘዮሐንስ 14 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 14

¹ ኢይደንግፅክሙ ልብክሙ እመኑ በእግዚአብሔር ወእመኑ ብየ።

²እስመ ውስተ ቤተ አቡየ ብዙኅ ማኅደር ወምዕራፍ ቦቱ፥ ወናሁ እብለክሙ ከመ አነ አሐውር ወአስተዳሉ ለክሙ መካነ።[21] ወእመአኮሰ እምኢይቤለክሙ ከመ አሐውር ወአስተዳሉ ለክሙ ማኅደረ።

³ ወእምከመ ሖርኩ ወአስተዳሎኩ ለክሙ መካነ ወምዕራፈ ወማኅደረ[22] እመጽእ ካዕበ ወእነሥአክሙ ኀቤየ ከመ ተሀልዉ አንትሙኒ ኀበ ሀሎኩ አነ።

⁴ወለሊክሙ ኢተአምሩ ኀበ አሐውር ወፍኖቶሰ ተአምሩ።

⁵ወይቤሎ ቶማስ እግዚኦ ዘኢነአምር ኀበ ተሐውር በእፎ እንከ ነአምር ፍኖቶ።

⁶ ወይቤሎ እግዚእ ኢየሱስ አነ ውእቱ ፍኖተ ጽድቅ ወሕይወት ወአልቦ ዘይመጽእ ኀበ አብ ዘእንበለ እንተ ኀቤየ።

⁷እምከመ ሊተ አእመርክሙኒ እምአእመርክምዎ ለአቡየኒ ወይእዜሰ አእመርክምዎሂ ወርኢክምዎሂ።

⁸ ወይቤሎ ፊልጶስ እግዚኦ አርእየነሁ ለአብ ወየአክለነ።

⁹ ወይቤሎ እግዚእ ኢየሱስ መጠነዝ መዋዕል ሀሎኩ ምስሌክሙ ኢያእመርከኒኑ ፊልጶስ ዘርእየ ኪያየ ርእዮ ለአብ እፎ እንከ ትብል አርእየነሁ ለአብ።

¹⁰ ኢተአምንሁ ከመ አነ በአብ ወአብ ብየ ወዝኒ ቃል ዘአነ ነገርኩክሙ አኮ እምኀቤየ ዘነበብኩ አላ አብ ዘሀሎ ብየ ውእቱ ይገብሮ ለዝንቱ ግብር።

¹¹እመኑ ከመ አነ በአብ ወአብ ብየ ወእመ አኮሰ በእንተ ግብርየ እመኑኒ።

¹² አማን አማን እብለክሙ ዘየአምን ብየ ግብረ ዘአነ እገብር ውእቱኒ ይገብር ወዘየዐቢ እምኔሁ ይገብር እስመ አነ አሐውር ኀበ አብ።

¹³ ወኵሎ ዘሰአልክሙ በስምየ እገብር ለክሙ ከመ ይሰባሕ አብ በወልድ።

¹⁴ ወእመቦ ዘሰአልክሙ በስምየ እገብር ለክሙ ኪያሁ።

¹⁵ ወእመሰ ታፈቅሩኒ ዕቀቡ ትእዛዝየ።

¹⁶ ወአነ እስእሎ ለአብ ይፈኑ ለክሙ ጰራቅሊጦስሃ ካልአ ዘይሄሉ ምስሌክሙ ለዓለም።

¹⁷ መንፈሰ ጽድቅ ዘኢይክል ዓለም ነሢኦቶ እስመ ኢይሬእዮ ወኢየአምሮ ወአንትሙሰ ተአምርዎ እስመ ኀቤክሙ ይነብር ወውስቴትክሙ ይሄሉ።

¹⁸ ወኢየኀድገክሙ ዕጓለ ማውታ ትኩኑ እስመ አነ እመጽእ ኀቤክሙ።

¹⁹ ዓዲ ኅዳጠ ኢይሬእየኒ እንከ ዓለም ወአንትሙሰ ትሬእዩኒ እስመ አነ ሕያው ወአንትሙሂ ተሐይዉ።

²⁰ይእተ አሚረ ተአምሩ ከመ አነ በአብ ወአብ ብየ ወአንትሙሂ ብየ ወአነሂ ብክሙ።

²¹ዘቦቱ ትእዛዝየ ወየዐቅቦ ውእቱ ዘያፈቅረኒ ወለዘአፍቀረኒ ያፈቅሮ አቡየ ወአነሂ አፈቅሮ ወአሬእዮ ርእስየ።

²² ወይቤሎ ይሁዳ ዘአኮ አስቆሮታዊ እግዚኦ ምንትኑ ዘትቤ ከመ ለነ ዳዕሙ ሀለወከ ታርኢ ርእሰከ ወአኮ ለዓለም።

²³ ወአውሥአ እግዚእ ኢየሱስ ወይቤሎ ዘያፈቅረኒ ይዕቀብ ቃልየ ወያፈቅሮ አቡየ ወእመቦ ዘዐቀበ ቃልየ አነ ወአቡየ[23] ንመጽእ ኀቤሁ ወንገብር ምዕራፈ ውስቴቱ።

²⁴ ወዘሰ ኢያፈቅረኒ ኢየዐቅብ ቃልየ ወዝኒ ቃል ዘትሰምዑ ኢኮነ ቃለ ዚኣየ አላ ቃሉ ውእቱ ለአብ ዘፈነወኒ።

²⁵ወዘንተ ነገርኩክሙ እንዘ ሀሎኩ ምስሌክሙ።

²⁶ ወባሕቱ ጰራቅሊጦስ መንፈሰ ጽድቅ ዘይፌኑ አብ በስምየ ውእቱ ይሜህረክሙ ኵሎ ወያዜክረክሙ ኵሎ ዘነገርኩክሙ አነ።

²⁷ ሰላምየ አኀድግ ለክሙ ወሰላመ አቡየ እሁበክሙ አኮ በከመ ይሁብ ዓለም ዘእሁበክሙ አነ ኢይደንግፅክሙ ልብክሙ ወኢትፍርሁ።

²⁸ሰማዕክሙ ዘእቤለክሙ ከመ አነ አሐውር ወእሠወጥ ኀቤክሙ ሶበሰ ታፈቅሩኒ እምተፈሣሕክሙ በሐዊሮትየ ኀበ አብ እስመ ውእቱ አብ የዐብየኒ።

²⁹ወይእዜ ነገርኩክሙ ዘእንበለ ይኩን ከመ አመ ኮነ ትእመኑ።

³⁰ ወኢይትናገር እንከ ብዙኀ ምስሌክሙ እስመ ይመጽእ መልአኩ ለዝንቱ ዓለም ወኢይረክብ በላዕሌየ ወኢምንተኒ።

³¹ ወባሕቱ ከመ ያእምር ዓለም ከመ አነ አፈቅሮ ለአብ ወበከመ ወሀበኒ አብ ትእዛዞ ከማሁ እገብር ተንሥኡ ንሑር እምዝየ።