Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 15 Bible Online

ወንጌል ዘዮሐንስ 15 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 15

¹ አነ ውእቱ ሐረገ ወይን ዘጽድቅ ወአቡየ ተካሊሁ ውእቱ።

²ወለኵሉ ዐጽቅ ዘኢይፈሪ በላዕሌየ ይገዝምዎ ወያአትትዎ ወለኵሉ ዐጽቅ ዘይፈሪ ያስተናጽሕዎ ከመ ብዙኀ ይፍረይ።

³ ወአንትሙሰ ወዳእክሙ ንጹሓን አንትሙ በእንተ ቃል ዘነገርኩክሙ።

⁴ንበሩ ብየ ወአነሂ ብክሙ ወበከመ ዐጽቅ ኢይክል ፈርየ ባሕቲቱ እመ ኢሀሎ ውስተ ጕንደ ወይኑ ከማሁ አንትሙኒ ኢትክሉ ፈርየ ለእመ ኢነበርክሙ ብየ።

⁵ አነ ውእቱ ጕንደ ወይን ወአንትሙሂ አዕጹቂሁ ዘነበረ ብየ ወአነሂ ቦቱ ውእቱኬ ዘይፈሪ ብዙኀ እስመ ዘእንበሌየሰ አልቦ ዘትክሉ ገቢረ ወኢምንተኒ።

⁶ ወእመቦ ዘኢነበረ ብየ ይገድፍዎ አፍኣ ከመ ዐጽቅ ይቡስ ወያስተጋብእዎ ወያውዕይዎ በእሳት።

⁷ ወእመሰ ነበርክሙ ብየ ወነበረ ቃልየ ኀቤክሙ ኵሎ ዘፈቀድክሙ ትስእሉ ወይከውን ለክሙ።

⁸ወበዝንቱ ይሴባሕ አቡየ እምከመ ብዙኀ ፍሬ ትፈርዩ ወትከውኑኒ አርዳእየ።

⁹ ወበከመ አፍቀረኒ አብ ከማሁ አነሂ አፍቀርኩክሙ ንበሩ በፍቅረ ዚኣየ።

¹⁰ ወእመሰ ታፈቅሩኒ ዕቀቡ ትእዛዝየ ወሀልዉ በፍቅረ ዚኣየ በከመ ዐቀብኩ አነ ትእዛዞ ለአቡየ ወእሄሉ በፍቅሩ።

¹¹ ወነገርኩክሙ ዘንተ ከመ የሀሉ ልብየ ወፍሥሓየ ወፍቅርየ ኀቤክሙ ከመ ፍጹመ ይኩን ፍሥሓክሙ።

¹² ወዛቲ ይእቲ ትእዛዘ እንቲኣየ ከመ ትትፋቀሩ በበይናቲክሙ በከመ አነ አፍቀርኩክሙ።

¹³ አልቦ ዘየዐቢ ወይኄይስ እምዝ ፍቅር ከመ ብእሲ ዘይሜጡ ነፍሶ ቤዛ ነፍሰ ቢጹ።

¹⁴ አንትሙሰኬ አዕርክትየ አንትሙ እምከመ ገበርክሙ ኵሎ ዘአዘዝኩክሙ።

¹⁵ ኢይብለክሙ እንከ አግብርትየ አላ አዕርክትየ አንትሙ እስመ ገብርሰ ኢየአምር ዘይሬስዮ እግዚኡ ወለክሙሰ አዕርክትየ እብለክሙ እስመ ኵሎ ዘሰማዕኩ በኀበ አቡየ ነገርኩክሙ።

¹⁶ አኮ አንትሙ ዘኀረይክሙኒ ወሤምክሙኒ[24] አላ አነ ኀረይኩክሙ ወሤምኩክሙ ወእሬስየክሙ ከመ ትሑሩ ወፍሬ ትፍረዩ ወውእቱ ፍሬክሙ ይነብር ለዓለም ከመ እመቦ ዘሰአልክምዎ ለአብ በስምየ ኵሎ ይሁበክሙ።

¹⁷ወዘንተ እኤዝዘክሙ ከመ ትትፋቀሩ በበይናቲክሙ።

¹⁸ እመሂ ዓለም ጸልአክሙ አእምሩ ከመ ኪያየ ቀደመ ጸሊአ።

¹⁹ ሶበሰ እምዓለም አንትሙ እምአፍቀረክሙ ዓለም እስመ ዓለም ያፈቅር እሊኣሁ ወባሕቱ እስመ ኢኮንክሙ እምዓለም አላ አነ ኀረይኩክሙ እምውስተ ዓለም ወበእንተ ዝንቱ ይጸልአክሙ ዓለም።

²⁰ ተዘከሩ ቃልየ ዘአነ እቤለክሙ አልቦ ገብር ዘየዐቢ እምእግዚኡ ወኢሐዋርያ እምዘፈነዎ እምከመ ኪያየ ሰደዱ ኪያክሙኒ ይሰድዱክሙ ወሶበሰ ዐቀቡ ቃልየ ቃለክሙኒ እምዐቀቡ።

²¹ ወባሕቱ ዘንተ ኵሎ ይገብሩ ላዕሌክሙ በእንተ ስምየ እስመ ኢየአምርዎ ለዘፈነወኒ።

²²ሶበሰ ኢመጻእኩ ወኢነገርክዎሙ እምድኅኑ ወእምኢኮኖሙ ጌጋየ ወይእዜሰ ባሕቱ አልቦሙ ምክንያት ለጌጋዮሙ።

²³ ዘጸልአ ኪያየ ጸልኦ ለአቡየ ወሶበ ኢገበርኩ ሎሙ ግብረ ዘባዕድ ኢገብሮ እምኢኮኖሙ ጌጋየ።

²⁴ወይእዜሰ ባሕቱ ርእዩኒሂ ወጸልኡኒሂ ኪያየሂ ወአቡየሂ።

²⁵ ወባሕቱ ከመ ይብጻሕ ቃል ዘጽሑፍ ውስተ ኦሪቶሙ ዘይቤ ጸልኡኒ በከንቱ።

²⁶ ወሶበ መጽአ ጰራቅሊጦስ ዘአነ እፌኑ ለክሙ እምኀበ አብ መንፈሰ ጽድቅ ዘይወፅእ እምኀበ አብ ውእቱ ሰማዕትየ።

²⁷ወአንትሙሂ ሰማዕትየ እስመ እምትካት ሀለውክሙ ምስሌየ።