Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 16 Bible Online

ወንጌል ዘዮሐንስ 16 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 16

¹ዘንተ ነገርኩክሙ ከመ ኢትትዐቀፉ።

² እስመ እምኵራባቲሆሙ ያወፅኡክሙ ወባሕቱ ትመጽእ ሰዓት ከመ ኵሉ ዘይቀትለክሙ ይመስሎ ከመ ዘመሥዋዕተ ያበውእ ለእግዚአብሔር።

³ ወዘንተኒ ዘይገብሩ ላዕሌክሙ እስመ ኢየአምርዎ ለአብ ወኢኪያየ።

⁴ወባሕቱ ዘንተ ነገርኩክሙ ከመ ትዘከርዎ አመ በጽሐ ጊዜሁ ከመ አነ እቤለክሙ ወቀዲሙሰ ኢነገርኩክሙ ዘንተ እስመ ሀሎኩ ምስሌክሙ።

⁵ ወይእዜሰ ባሕቱ አሐውር ኀበ አብ ዘፈነወኒ ወኢአሐዱሂ እምኔክሙ ኢትብሉኒ አይቴ ተሐውር።

⁶ወባሕቱ እስመ ዘንተ ነገርኩክሙ ኀዘን መልአ ውስተ ልብክሙ።

⁷ ወአንሰ አማን ህልወ እብለክሙ ይኄይሰክሙ እሑር አነ ኀበ አብ እስመ እመ ኢሖርኩ አነ ኢይመጽእ ጰራቅሊጦስ ኀቤክሙ ወእመሰ ሖርኩ አነ እፌንዎ ለክሙ።

⁸ወመጺኦ ውእቱ ይዛለፎ ለዓለም በእንተ ኀጢአት ወበእንተ ጽድቅ ወበእንተ ኵነኔ።

⁹ በእንተ ኀጢአትሰ እስመ ኢአምኑ ብየ።

¹⁰ወበእንተ ጽድቅኒ እስመ አነ አሐውር ኀበ አብ ወኢትሬእዩኒ እንከ።

¹¹ ወበእንተሰ ኵነኔ እስመ ይትኴነን መልአኩ ለዝንቱ ዓለም።

¹²ወብየ ብዙኅ ነገር ዘእነግረክሙ ወባሕቱ ኢትክሉ ጸዊሮቶ ይእዜ።

¹³ ወመጺኦ ውእቱ መንፈሰ ጽድቅ ይመርሐክሙ ኀበ ኵሉ ጽድቅ እስመ ኢይነግር ዘእምኀቤሁ ወዘሰምዐ ዳእሙ ይነግር ወዘይመጽእሂ ይነግረክሙ።

¹⁴ ወኪያየ ይሴብሕ ውእቱ እስመ እምዚኣየ ይነሥእ ወይነግረክሙ ኵሎ።

¹⁵ እስመ ኵሉ ዘቦ ለአቡየ ዚኣየ ውእቱ ወበእንተ ዝንቱ እብለክሙ እምዚኣየ ይነሥእ ወይነግረክሙ።

¹⁶ ዓዲ ኅዳጠ ኢትሬእዩኒ ወካዕበ ኅዳጠ ትሬእዩኒ እስመ አሐውር ኀበ አብ።

¹⁷ወተባሀሉ አርዳኢሁ በበይናቲሆሙ ምንትኑ ዝንቱ ዘይብለነ ዓዲ ኅዳጠ ኢትሬእዩኒ ወካዕበ ኅዳጠ ትሬእዩኒ እስመ አሐውር ኀበ አብ።

¹⁸ወይቤሉ ምንትኑ ዝንቱ ዘይብለነ ኅዳጠ ኢነአምር ዘይትናገር ቦቱ።

¹⁹ወአእመሮሙ እግዚእ ኢየሱስ ከመ ይፈቅዱ ይሰአልዎ ወይቤሎሙ በእንተ ዝንቱኑ ትትኃሠሡ በበይናቲክሙ እስመ እቤለክሙ ዓዲ ኅዳጠ ኢትሬእዩኒ ወካዕበ ኅዳጠ ትሬእዩኒ።

²⁰ አማን አማን እብለክሙ ከመ ትበክዩ ወትላሕዉ አንትሙ ወዓለምሰ ይትፌሣሕ ወአንትሙሰ ተኀዝኑ አላ ኀዘንክሙ ፍሥሓ ይከውነክሙ።

²¹ በከመ ብእሲት ትቴክዝ ሶበ አልጸቀት ትለድ እስመ በጽሐ ጊዜሃ ወእምከመ ወለደት ዕጓላ ኢትዜከሮ እንከ ለሕማማ በእንተ ፍሥሓሃ እስመ ወለደት ብእሴ ውስተ ዓለም።

²² ወከማሁ አንትሙኒ ትቴክዙ ይእዜ ወባሕቱ ካዕበ እሬእየክሙ ወይትፌሥሐክሙ ልብክሙ ወፍሥሓክሙኒ አልቦ ዘየሀይደክሙ።

²³ ወይእተ አሚረ አልቦ ዘትስእሉኒ ኪያየ ወኢምንተኒ አማን አማን እብለክሙ ከመ እመ ሰአልክምዎ ለአብ በስምየ ኵሎ ይሁበክሙ።

²⁴ ወእስከ ይእዜሰ ኢሰአልክምዎ ወኢምንተኒ በስምየ ሰአሉ ወትነሥኡ ከመ ፍጹመ ይኩን ፍሥሓክሙ፥

²⁵ወይእዜሰ በምሳሌ ነገርኩክሙ ወባሕቱ ይበጽሕ ጊዜሁ አመ ኢይነግረክሙ በምሳሌ አላ አየድዐክሙ ክሡተ በእንተ አብ።

²⁶ወይእተ አሚረ ትስእሉ በስምየ ወኢይብለክሙ ከመ አነ ዘእስእሎ ለአብ በእንቲኣክሙ።[25]

²⁷ እስመ ለሊሁ አብ ያፈቅረክሙ እስመ አንትሙ አፍቀርክሙኒ ወአመንክሙኒ ከመ እምኀበ እግዚአብሔር ወፃእኩ።

²⁸[26] ወመጻእኩ ውስተ ዓለም ወካዕበ አኀድጎ ለዓለም ወአሐውር ኀበ አብ።

²⁹ወይቤልዎ አርዳኢሁ ይእዜሰ ገሃደ ተናገርከነ ወአልቦ ዘመሰልከ ወኢምንተኒ።

³⁰ ወይእዜ አእመርነ ከመ ኵሎ ተአምር አንተ ወኢትፈቅድ ይንግርከ መኑሂ ወበዝንቱ አእመርነ ከመ እምኀበ እግዚአብሔር ወፃእከ።

³¹ወይቤሎሙ እግዚእ ኢየሱስ ይእዜሰኬ አእምሩ ወእመኑ።

³²ናሁኬ ይበጽሕ ጊዜሁ ወበጺሖኒ ከመ ኵልክሙ ትዘረዉ ለለአሐዱ ውስተ መካኑ ወተኀድጉኒ ባሕቲትየ ወኢኮንኩ አነ ባሕቲትየ እስመ አብ ምስሌየ ውእቱ።

³³ ወዝንቱ ውእቱ ዘነገርኩክሙ ከመ በኀቤየ ሰላመ ትርከቡ ወበዓለምሰ ሀለወክሙ ሕማመ ትርከቡ ወባሕቱ ጽንዑ እስመ አነ ሞእክዎ ለዓለም።