Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 17 Bible Online

ወንጌል ዘዮሐንስ 17 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 17

¹ ወዘንተ ነገረ ተናጊሮ እግዚእ ኢየሱስ አንሥአ አዕይንቲሁ ውስተ ሰማይ ወይቤ አባ በጽሐ ጊዜሁ ከመ ትሰብሖ ለወልድከ ወከመ ወልድከኒ ይሰብሕከ።

² በከመ አኰነንኮ ላዕለ ኵሉ ዘሥጋ ወነፍስ ከመ የሀቦሙ ሕይወተ ዘለዓለም ለኵሎሙ እለ ወሀብካሁ።

³ ወዛቲ ይእቲ ሕይወት ዘለዓለም ከመ ያእምሩከ ለከ ለአሐዱ ዘበአማን አምላከ ጽድቅ ባሕቲትከ ወለዘፈነውኮ ኢየሱስ ክርስቶስ ወልድከ።

⁴ አንሰ ሰባሕኩከ በዲበ ምድር ፈጺምየ ግብረ ዘወሀብከኒ ከመ እግበር።

⁵ ወይእዜኒ አንተ አባ ሰብሐኒ በስብሐትየ ዘሀሎ ምስሌከ እምቅድመ ይትፈጠር ዓለም።

⁶ ወነገርኩ ስመከ ለሰብእ ለእለ ወሀብከኒ እምዓለም እስመ እሊኣከ እሙንቱ ወሊተ ወሀብከኒዮሙ ወዐቀቡ ቃለከ።

⁷ወይእዜኒ አእመሩ ከመ ኵሉ ዘወሀብከኒ እምኀቤከ ውእቱ።

⁸እስመ ወሀብክዎሙ ቃለ ዘወሀብከኒ ወእሙንቱሂ ነሢኦሙ አማን አእመሩ ከመ እምኀቤከ ወፃእኩ ወአምኑ ከመ አንተ ፈነውከኒ።

⁹ ወአንሰ በእንቲኣሆሙ እስእል ወአኮ በእንተ ዓለም ዘእስእለከ አላ በእንተ እለ ወሀብከኒ እስመ እሊኣከ እሙንቱ።

¹⁰ ወኵሉ ዘዚኣየ ዚኣከ ውእቱ ወዘዚኣከኒ ዚኣየ ውእቱ ወተሰባሕኩ ቦሙ።

¹¹ ወኢይሄሉ እንከ ውስተ ዓለም ወእሙንቱሰ ውስተ ዓለም ይሄልዉ ወአንሰ ኀቤከ እመጽእ ኦ አባ ቅዱስ ዕቀቦሙ በስምከ ለእለ ወሀብከኒ ከመ ይኩኑ አሐደ ብነ ከማነ።

¹² አመሰ ሀሎኩ አነ ምስሌሆሙ ውስተ ዓለም ዐቀብክዎሙ በስምከ ለእለ ወሀብከኒ ናሁ ዐቀብክዎሙ ወተማሕፀንክዎሙ ወኢተኀጕለ አሐዱሂ እምኔሆሙ ዘእንበለ ወልደ ኀጕል ከመ ይብጻሕ ቃለ መጽሐፍ።

¹³ ወይእዜሰ ባሕቱ እመጽእ ኀቤከ ወዘንተ እነግር ውስተ ዓለም ከመ ይኩን ፍሥሓየ ፍጹመ በላዕሌሆሙ።

¹⁴ወአንሰ ፈጺምየ ወሀብክዎሙ ቃለከ ወዓለምሰ ጸልኦሙ እስመ ኢኮኑ እሙንቱ እምዓለም በከመ ኢኮንኩ አነ እምዓለም።

¹⁵ አኮ ዘእስእለከ ከመ ትንሥኦሙ እምዓለም ዘእንበለ ዳእሙ ከመ ትዕቀቦሙ እምእኩይ።

¹⁶እስመ እሙንቱ ኢኮኑ እምዓለም በከመ ኢኮንኩ አነ እምዓለም።

¹⁷ ቀድሶሙ በጽድቅከ እስመ ጽድቅ ውእቱ ቃልከ።

¹⁸ በከመ ፈነውከኒ ውስተ ዓለም ኪያየ አነኒ ፈነውክዎሙ ውስተ ዓለም።

¹⁹ ወበእንቲኣሆሙ አነ እቄድስ ርእስየ ከመ ይኩኑ እሙንቱኒ ቅዱሳነ በጽድቅ።

²⁰ወአኮ በእንተ እሉ ባሕቲቶሙ ዘእስእለከ አላ በእንተሂ እለ የአምኑ ብየ በቃሎሙ።

²¹ ከመ ይኩኑ አሐደ ኵሎሙ በከመ አንተ አብ ብየ ወአነሂ ብከ ከመ ይኩኑ እሙንቱሂ አሐደ ብነ ከማነ ከመ ይእመን ዓለም ከመ አንተ ፈነውከኒ።

²² ወአነሂ ወሀብክዎሙ ቃለከ ዘወሀብከኒ ከመ ይኩኑ አሐደ ከማነ በከመ አሐዱ ንሕነ።

²³ ወአነሂ ቦሙ ወአንተሂ ብየ ከመ ይኩኑ ፍጹማነ በአሐዱ ከመ ያእምር ዓለም ከመ አንተ ፈነውከኒ ወአፍቀርክዎሙ አነ በከመ አንተ ኪያየ አፍቀርከኒ።

²⁴ አባ እለሰ ወሀብከኒ እፈቅድ ከመ የሀልዉ ኀበ ሀሎኩ አነ ምስሌየ ከመ ይርእዩ ስብሐትየ ዘወሀብከኒ እስመ አፍቀርከኒ እምቅድመ ይትፈጠር ዓለም።

²⁵አባ ጻድቅ ወዓለምሰ ኢያእመረከ ወአንሰ አእመርኩከ ወእሉሂ አእመሩከ ከመ አንተ ፈነውከኒ።

²⁶ ወነገርክዎሙ ስመከ ወዓዲ እነግሮሙ ከመ የሀሉ ኀቤሆሙ ፍቅር ዘአፍቀርከኒ ወአነሂ እሄሉ ምስሌሆሙ።