Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 18 Bible Online

ወንጌል ዘዮሐንስ 18 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 18

¹ ወዘንተ ብሂሎ ወፅአ እግዚእ ኢየሱስ ምስለ አርዳኢሁ ማዕዶተ ቄድሮስ ፈለገ አርዝ ወቦ ህየ ገነት ዐጸደ ሐምል ወቦአ እግዚእ ኢየሱስ ውስቴታ ምስለ አርዳኢሁ።

² ወየአምሮ ይሁዳ ዘያገብኦ ለውእቱ መካን እስመ ብዙኀ ጊዜ የሐውር እግዚእ ኢየሱስ ህየ ምስለ አርዳኢሁ።

³ ወነሥኦሙ ይሁዳ ለሠገራተ ሰጲራ እምኀበ ሊቃነ ካህናት ወፈሪሳውያን ወነሥአ ረድኤተ ወዓልያኒሆሙ ወሖረ ህየ በመኃትወ ጽጕ ወበፓናት ወበንዋየ ሐቅል።

⁴ወአእሚሮ እግዚእ ኢየሱስ ኵሎ ዘይበጽሕ ላዕሌሁ ወፅአ አፍኣ ኀቤሆሙ ወይቤሎሙ መነ ተኀሥሡ።

⁵ ወአውሥኡ ወይቤልዎ ኢየሱስሃ ናዝራዌ ወይቤሎሙ እግዚእ ኢየሱስ አነ ውእቱ ወሀለወ ይሁዳኒ ዘያገብኦ ይቀውም ምስሌሆሙ።

⁶ወሶበ ይቤሎሙ እግዚእ ኢየሱስ አነ ውእቱ ገብኡ ድኅሬሆሙ ወወድቁ ዲበ ምድር።

⁷ወእምዝ ካዕበ ተስእሎሙ ወይቤሎሙ መነ ተኀሥሡ ወይቤልዎ ኢየሱስሃ ናዝራዌ።

⁸ወአውሥአ እግዚእ ኢየሱስ ወይቤሎሙ አኮኑ እቤለክሙ አነ ውእቱ ወእመሰ ኪያየ ተኀሥሡ ኅድግዎሙ ለእሉ ይሑሩ።

⁹ ከመ ይብጻሕ ቃሉ ዘይቤ እለሰ ወሀብከኒ ኢተኀጕለ ወኢአሐዱሂ እምኔሆሙ።

¹⁰ወቦ መጥባሕት ለስምዖን ጴጥሮስ ወመልሐ መጥባሕቶ ወዘበጦ ለገብረ ሊቀ ካህናት ወመተረ እዝኖ ዘየማን ወስሙ ለውእቱ ገብር ማልኮስ።

¹¹ ወይቤሎ እግዚእ ኢየሱስ ለጴጥሮስ አግብኣ ለመጥባሕትከ ውስተ ቤታ ጽዋዐ ዘወሀበኒ አቡየ ኢየኀድግ ዘእንበለ እስተይ።

¹²ወአኀዝዎ ለእግዚእ ኢየሱስ ሠገራተ ሰጲራ ወሊቀ ዐሠርቱ ምእት ወወዓልያኒሆሙ ለአይሁድ ወኀመይዎ።

¹³ወወሰድዎ ኀበ ሐና ቀዲሙ እስመ ሐሙሁ ውእቱ ለቀያፋ ሊቀ ካህናት ዘእብሬቱ ይእቲ ዓመት።

¹⁴ ወቀያፋሰ ውእቱ ዘአምከሮሙ ለአይሁድ ወይቤሎሙ ይኄይስ ይሙት አሐዱ ብእሲ እምይትኀጐል ኵሉ ሕዝብ።

¹⁵ ወተለውዎ ለእግዚእ ኢየሱስ እምርኁቅ ስምዖን ጴጥሮስ ወካልእኒ ረድእ ወውእቱሰ ረድእ ልሙድ በኀበ ሊቀ ካህናት ወቦአ ምስለ እግዚእ ኢየሱስ ውስተ ዐጸደ ሊቀ ካህናት።

¹⁶ወጴጥሮስሰ ቆመ አፍኣ ኀበ ኆኅት ወወፅአ ዝኩ ረድእ ዘልሙድ በኀበ ሊቀ ካህናት ወተናገራ ለዐጻዊት ወአብኦ ለጴጥሮስ።

¹⁷ወትቤሎ ይእቲ አመት ዐጻዊት ለጴጥሮስ አንተሂ እምአርዳኢሁኑ ለውእቱ ብእሲ አንተ ወይቤላ ውእቱኒ ኢኮንኩ።

¹⁸ ወሀለዉ ይቀውሙ አግብርቲሆሙ ወወዓልያኒሆሙ ወይበቁጹ አፍሓመ ወይስሕኑ እስመ ብዙኅ ቍራ ለይእቲ ሌሊት ወይቀውም ጴጥሮስኒ ወይስሕን ምስሌሆሙ።

¹⁹ወተስእሎ ሊቀ ካህናት ለእግዚእ ኢየሱስ በእንተ አርዳኢሁ ወበእንተ ትምህርቱ።

²⁰ ወአውሥአ እግዚእ ኢየሱስ ወይቤሎ አንሰ ክሡተ ተናገርኩ በውስተ ዓለም ወበኵሉ ጊዜ መሀርኩ በምኵራብ ወበቤተ መቅደስ ኀበ ይትጋብኡ ኵሎሙ አይሁድ ወአልቦ ዘተናገርኩ ጽሚተ ወኢምንተኒ።

²¹ለምንት እንከ ትሴአለኒ ሊተ ተሰአሎሙ ለእለ ሰምዑኒ ዘተናገርክዎሙ እስመ እሙንቱ የአምሩ ዘተናገርኩ አነ።

²² ወዘንተ ብሂሎ ጸፍዖ መልታሕቶ ለእግዚእ ኢየሱስ አሐዱ እምእለ ይቀውሙ ወዓልት ወይቤሎ ከመዝኑ ትትዋሥኦ ለሊቀ ካህናት።

²³ወአውሥአ እግዚእ ኢየሱስ ወይቤሎ እመሰ እኩየ ነበብኩ ስምዐ ኩን ላዕሌየ ወአስተዋድየኒ በእንተ እኩይ ወእመሰ ሠናየ ነበብኩ እንከ ለምንት ትዘብጠኒ።

²⁴ወፈነዎ ሐና ኅሙዮ ለእግዚእ ኢየሱስ ኀበ ቀያፋ ሊቀ ካህናት።

²⁵ወሀሎ ስምዖን ጴጥሮስ ይቀውም ወይስሕን ወይቤልዎ አንተሂ እምአርዳኢሁኑ አንተ ወክሕደ ወይቤ ኢኮንኩ።

²⁶ወይቤሎ አሐዱ እምአግብርቲሁ ለሊቀ ካህናት ዘእምአዝማዲሁ ለዝኩ ዘመተሮ ጴጥሮስ እዝኖ አኮኑ አነ ርኢኩከ ውስተ ገነት ምስሌሁ።

²⁷ወካዕበ ክሕደ ጴጥሮስ ወሶቤሃ ነቀወ ዶርሆ።

²⁸ ወወሰድዎ ለእግዚእ ኢየሱስ እምኀበ ቀያፋ ኀበ ዐውድ ወጎሕ ውእቱ ወኢቦኡ አይሁድ ውስተ ዐውደ ምኵናን እስመ ወድአ ጸብሐ ከመ ኢይርኰሱ እምቅድመ ይብልዑ ፍሥሐ።

²⁹ወወፅአ ጲላጦስ አፍኣ ኀቤሆሙ ወይቤሎሙ ምንትኑ ጌጋዩ ለዝ ብእሲ በዘ አምጻእክምዎ ኀቤየ።

³⁰ወአውሥኡ ወይቤልዎ ሶበሰ ኢኮነ ገባሬ እኪት እምኢያግባእናሁ ኀቤከ።

³¹ ወይቤሎሙ ጲላጦስ ንሥእዎ አንትሙ ወበከመ ሕግክሙ ኰንንዎ ወይቤልዎ አይሁድ ለነሰ ኢይከውነነ ንቅትል ወኢመነሂ።

³² ከመ ይብጻሕ ቃሉ ለእግዚእ ኢየሱስ ዘይቤ እንዘ ይኤምሮሙ በአይ ሞት ሀለዎ ይሙት።

³³ወቦአ ካዕበ ጲላጦስ ውስተ ዐውድ ወጸውዖ ለእግዚእ ኢየሱስ ወይቤሎ አንተኑ ንጉሦሙ ለአይሁድ።

³⁴ወአውሥአ እግዚእ ኢየሱስ ወይቤሎ ዘእምልብከኑ ትብል ዘንተ ወሚመ ቦኑ ባዕድ ዘነገረከ በእንቲኣየ።

³⁵ወአውሥአ ጲላጦስ ወይቤሎ አነሂ አይሁዳዊኑ አነ አኮኑ ሕዝብከ ወሊቃነ ካህናት አግብኡከ ኀቤየ ምንተኑ እግበርከ።[27]

³⁶ወአውሥአ እግዚእ ኢየሱስ ወይቤሎሙ መንግሥትየሰ ኢኮነት እምዝንቱ ዓለም ሶበሰ በዝንቱ ዓለም መንግሥትየ እምተአበሱ ሊተ ወዓልያንየ ከመ ኢያግብኡኒ አይሁድ ኀቤከ ወይእዜሰ ባሕቱ ኢኮነት እምዝየ መንግሥትየ።

³⁷ ወይቤሎ ጲላጦስ እንከሰኬ ንጉሥ አንተ ወአውሥአ እግዚእ ኢየሱስ ወይቤሎ ለሊከ ትቤ ከመ ንጉሥ አነ ወአንሰ በእንተ ዝንቱ ተወለድኩ ወእንበይነ ዝንቱ መጻእኩ ውስተ ዓለም ከመ እኩን ሰማዕተ በጽድቅ ወኵሉ ዘእምጽድቅ ውእቱ ይሰምዐኒ ቃልየ።

³⁸ ወይቤሎ ጲላጦስ ምንትኑ ውእቱ ጽድቅ ወዘንተ ብሂሎ ወፅአ ካዕበ ኀበ አይሁድ ወይቤሎሙ አንሰ አልቦ ዘረከብኩ ጌጋይ ላዕሌሁ ወኢአሐተኒ።

³⁹ ወባሕቱ ሀሎ ዘናለምድ ዘአሐዩ ለክሙ አሐደ እምነ ሙቁሓን ለለፋሲካ ትፈቅዱኑ አንከ አሕይዎ ለክሙ ለንጉሠ አይሁድ።

⁴⁰ ወከልሑ ካዕበ ኵሎሙ ወይቤሉ አኮ ዘንተ ዘታሐዩ አላ በርባንሃ ወበርባንሰ ሊቀ ፈያት ውእቱ።