Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 19 Bible Online

ወንጌል ዘዮሐንስ 19 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 19

¹ ወእምዝ ነሥኦ ጲላጦስ ለእግዚእ ኢየሱስ ወቀሠፎ።

²ወጸፈሩ ሐራ አክሊለ ዘሦክ ወአስተቀጸልዎ ላዕለ ርእሱ ወአልበስዎ ልብሰ ሜላት።

³ወይመጽኡ ኀቤሁ ወይብልዎ በሓ ንጉሠ አይሁድ ወይጸፍዕዎ ገጾ።

⁴ወወፅአ ካዕበ ጲላጦስ አፍኣ ወይቤሎሙ ናሁ አወፅኦ ለክሙ አፍኣ ከመ ታእምሩ ከመ አልቦ ዘረከብኩ ላዕሌሁ ጌጋይ ወኢአሐተኒ።

⁵ ወወፅአ እግዚእ ኢየሱስ አፍኣ እንዘ ይትቄጸል አክሊለ ዘሦክ ወይለብስ ሜላተ ወይቤሎሙ ጲላጦስ ነዋ ውእቱ ብእሲ።

⁶ወሶበ ርእይዎ ሊቃነ ካህናት ወወዓልያኒሆሙ ከልሑ ወይቤሉ ስቅሎ ስቅሎ ወይቤሎሙ ጲላጦስ ንሥእዎ ለሊክሙ ስቅልዎ አንሰ ኢረከብኩ ላዕሌሁ ጌጋየ።

⁷ ወአውሥኡ አይሁድ ወይቤልዎ ንሕነሰ ሕግ ብነ ወበከመ ሕግነ ርቱዕ ይሙት እስመ ወልደ እግዚአብሔር ረሰየ ርእሶ።

⁸ወሰሚዖ ጲላጦስ ዘንተ ነገረ ፈርሀ ፈድፋደ።

⁹ ወቦአ ካዕበ ኀበ ዐውድ ወይቤሎ ለእግዚእ ኢየሱስ እምአይቴ አንተ ወኢተሰጥዎ እግዚእ ኢየሱስ ወኢምንተኒ።

¹⁰ወይቤሎ ጲላጦስ ሊተሂ ኢትነብበኒሁ ኢተአምርሁ ከመ ብዉሕ ሊተ እቅትልከሂ ወብዉሕ ሊተ አሕዩከሂ።

¹¹ወአውሥአ እግዚእ ኢየሱስ ወይቤሎ ኢኮንከ ብዉሐ ላዕሌየ ወኢምንተኒ እመ ኢተውህበ ለከ እምሰማይ ወበእንተ ዝንቱ ለዘአግብአኒ ኀቤከ ዘየዐቢ ጌጋይ ላዕሌሁ።

¹²ወበእንተዝ ፈቀደ ጲላጦስ ያሕይዎ ወከልሑ አይሁድ ወይቤሉ እመ አሕየውኮ ለዝንቱ ኢኮንከ ዐርኮ ለቄሳር እስመ ኵሉ ዘያነግሥ ርእሶ ዐላዌ ነጋሢ ውእቱ።

¹³ ወሰሚዖ ጲላጦስ ዘንተ ነገረ አውፅኦ ለእግዚእ ኢየሱስ አፍኣ ወነበረ ዲበ መንበር ውስተ መካን ዘስሙ ሊቶስጥሮስ ወበዕብራይስጥ ይብልዎ ገቦታ።

¹⁴ወዐርበ ፋሲካ ወውእቱ ጊዜ ቀትር ዘስሱ ሰዓት ወይቤሎሙ ጲላጦስ ለአይሁድ ነዋ ንጉሥክሙ ወከልሑ ወይቤሉ አእትቶ ወስቅሎ።

¹⁵ወይቤሎሙ ጲላጦስ ለንጉሥክሙኑ እስቅሎ ወአውሥኡ ሊቃነ ካህናት ወይቤሉ አልብነ ንጉሥ ዘእንበለ ቄሳር።

¹⁶ ወእምዝ ወሀቦሙ ይስቅልዎ ወተመጠውዎ ለእግዚእ ኢየሱስ ወአውፅእዎ አፍኣ።

¹⁷ ወወሰድዎ እንዘ ይጸውር መስቀሎ ውስተ መካን ዘስሙ ቀራንዮ ወበዕብራይስጥ ይብልዎ ጎልጎታ።

¹⁸ወህየ ሰቀልዎ ወሰቀሉ ምስሌሁ ካልኣነ ክልኤተ ፈያተ አሐደ እምለፌ ወአሐደ እምለፌ ወማእከሎሙ ኢየሱስሃ።

¹⁹ወጸሐፈ ጲላጦስ መጽሐፈ ወአንበረ ዲበ መስቀሉ ወይብል መጽሐፉ ኢየሱስ ናዝራዊ ንጉሦሙ ለአይሁድ ውእቱ ዝንቱ።

²⁰ወብዙኃን እምአይሁድ እለ አንበብዋ ለይእቲ መጽሐፍ እስመ ቅሩብ ውእቱ መካን ለሀገር ኀበ ሰቀልዎ ለእግዚእ ኢየሱስ ወጽሕፈቱ ጽሑፍ ውእቱ በዕብራይስጥ ወበሮማይስጥ ወበጽርእ።

²¹ወይቤልዎ ሊቃነ ካህናት ለጲላጦስ ኢትጽሐፍ ከመ ውእቱ ንጉሦሙ ለአይሁድ አላ ለሊሁ ይቤ ንጉሦሙ ለአይሁድ አነ።

²²ወአውሥአ ጲላጦስ ወይቤሎሙ ዘጸሐፍኩ ጸሐፍኩ።

²³ወሐራሰ ሶበ ሰቀልዎ ለእግዚእ ኢየሱስ ነሥኡ አልባሲሁ ወረሰይዎ አርባዕተ ክፍለ ለለአሐዱ እምሐራ ወክዳኖሂ እልታኀ ዘአልቦ ርፍአት ዘእምላዕሉ እንመቱ።

²⁴ ወተባሀሉ በበይናቲሆሙ ኢንግምድ ወኢንስጥጥ አላ ንትፋሰስ ለዘረከቦ ይርከቦ ከመ ይብጻሕ ቃለ መጽሐፍ ዘይቤ «ተካፈሉ አልባስየ ለርእሶሙ ወተዓፀዉ ዲበ ዐራዝየ» ወከመዝ ገብሩ ሐራ።

²⁵ወይቀውማ ኀበ መስቀሉ ለእግዚእ ኢየሱስ እሙ ወእኅታ ለእሙ ወማርያም እንተ ቀለዮጳ ወማርያም መግደላዊት።

²⁶ ወሶበ ርእዮሙ እግዚእ ኢየሱስ ለእሙ ለእሙ ወለረድኡ ዘያፈቅር ይቀውሙ ይቤላ ለእሙ ብእሲቶ ነዋ ወልድኪ።

²⁷ወይቤሎ ለውእቱኒ ረድኡ ነያ እምከ ወእምይእቲ ሰዓት ነሥኣ ውእቱ ረድእ ወአእተዋ ቤቶ።

²⁸ ወእምዝ ሶበ ርእየ እግዚእ ኢየሱስ ከመ ተፈጸመ ኵሉ ከመ ይብጻሕ ቃለ መጽሐፍ ይቤ ጸማእኩ።

²⁹ ወቦ ህየ ግምዔ ዘምሉእ ብሒአ ወመልኡ ሰፍነገ እምውእቱ ብሒእ ወአሰሩ በቈጽለ ሁስጱ ዲበ ኅለት ወአስተርከቡ ውስተ አፉሁ ወዐጸሩ።

³⁰ ወሰሪቦ ብሒአ እግዚእ ኢየሱስ ይቤ ተፈጸመ ኵሉ ወአጽነነ ርእሶ ወመጠወ ነፍሶ።

³¹ ወአይሁድሰ እስመ ዐርብ ውእቱ ይቤሉ እላንቱ ሥጋት ኢይቢታ ዲበ መሳቅሊሆን በእንተ ሰንበት እስመ ዐባይ ዕለታ ለይእቲ ሰንበት ወሰአልዎ ለጲላጦስ ከመ ይስብሩ ቍየጺሆሙ ወያውርድዎሙ።

³²ወመጽኡ ሐራ ወሰበሩ ቍይጾ ለቀዳማዊ ወለካልኡኒ እለ ተሰቅሉ ምስሌሁ።

³³ወሶበ ሖሩ ኀበ እግዚእ ኢየሱስ ርእይዎ ወረከብዎ ከመ ሰለጠ መዊተ ወኢሰበሩ ቍይጾ።

³⁴አላ አሐዱ እምሐራ ረገዞ ገቦሁ ዘየማን በኲናት ወሶቤሃ ወፅአ እምኔሁ ደም ወማይ።

³⁵ወዘርእየ ስምዐ ኮነ ወጽድቅ ውእቱ ስምዑ ወአእመረ ውእቱ ከመ ጽድቀ ይነግር ከመ አንትሙሂ ትእመኑ።

³⁶ ወዝንቱ ኵሉ ዘኮነ ከመ ይብጻሕ ቃለ መጽሐፍ ዘይቤ «ዐጽሞ ኢትስብሩ እምኔሁ።»

³⁷ ወካዕበ ይብል ካልእኒ መጽሐፍ «ሀለዎሙ ይርአይዎ ለዘወግእዎ።»

³⁸ ወእምድኅረ ዝንቱ ሰአሎ ለጲላጦስ ዮሴፍ ዘአርማትያስ ወዝንቱ ረድኡ ለእግዚእ ኢየሱስ በኅቡእ በእንተ ፍርሀቶሙ ለአይሁድ ከመ ይንሣእ ሥጋሁ ለእግዚእ ኢየሱስ ወአብሖ ጲላጦስ ወሖረ ውእቱኒ ወነሥአ ሥጋሁ ለእግዚእ ኢየሱስ።

³⁹ ወመጽአ ኒቆዲሞስኒ ዘሖረ ኀቤሁ ለእግዚእ ኢየሱስ ቀዲሙ ሌሊተ ወአምጽአ ምእተ ልጥረ ከርቤ ወዓልወ ሕዉሰ በዘቦቱ ይቀብርዎ።

⁴⁰ወነሥኡ ሥጋሁ ለእግዚእ ኢየሱስ ወገነዝዎ በመዋጥሐ ክታን ዘሰንዱናት ምስለ አፈው በከመ ሕገ አይሁድ ሶበ ይገንዙ ወይቀብሩ።

⁴¹ ወቦ ህየ ገነት ውስተ ውእቱ መካን ኀበ ሰቀልዎ ወውስተ ውእቱ ገነት ዝኅር ሐዲስ ዘአልቦ ዘተቀብረ ውስቴቱ።

⁴²ወህየ ቀበርዎ ለእግዚእ ኢየሱስ እስመ ተፍጻሜተ ዐርቦሙ ውእቱ ለአይሁድ ወቅሩብ ውእቱ መቃብር ኀበ ሰቀልዎ።