Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 2 Bible Online

ወንጌል ዘዮሐንስ 2 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 2

¹ወአመ ሣልስት ዕለት ከብካብ ኮነ በቃና ዘገሊላ ወሀለወት ህየ እሙ ለእግዚእ ኢየሱስ።

²ወጸውዕዎ ለእግዚእ ኢየሱስ ወለአርዳኢሁ ውስተ ከብካብ።

³ወሶበ ኀልቀ ወይኖሙ ትቤሎ እሙ ለእግዚእ ኢየሱስ ወይንኬ አልቦሙ።

⁴ ወይቤላ እግዚእ ኢየሱስ ምንት ብየ ምስሌኪ ኦ ብእሲቶ ዓዲ ኢበጽሐ ጊዜየ።

⁵ወትቤሎሙ እሙ ለእለ ይትለአኩ ኵሎ ዘይቤለክሙ ግበሩ።

⁶ ወሀለዋ ህየ መሣብክት ስድስቱ እለ እብን በዘያጥሕሩ ቦቶን አይሁድ ንቡራት ህየ ወያገምራ በበ ክልኤቱ ወበበ ሠለስቱ መስፈርት ዘቀሡት።

⁷ወይቤሎሙ እግዚእ ኢየሱስ ምልእዎንኬ ለእላ መሣብክት ማየ ወመልእዎን እስከ አፉሂን ወእስከ ላዕሎን።

⁸ወይቤሎሙ ቅድሑኬ ይእዜ ወሰዱ ወሀብዎ ለሊቀ ምርፋቅ ወወሰዱ ወወሀብዎ።

⁹ወጥዒሞ አንከረ ሊቀ ምርፋቅ ውእተ ማየ ዘኮነ ወይነ ወኢያእመረ እምኀበ አምጽእዎ ወገዛእትሰ እለ ቀድሕዎ የአምሩ ውእተ ማየ ዘኮነ ወይነ[6]።

¹⁰ ወጸውዖ ሊቀ ምርፋቅ ለመርዓዊ ወይቤሎ ኵሉ ሰብእ ዘይሤኒ ወይነ ያቀድም አስትዮ ወእምድኅረ ሰክሩ ያሰቲ ዘይቴሐት ወአንተሰ ዘይሤኒ ወይነ ዐቀብከ ወአስተደኀርከ እስከ ይእዜ።

¹¹ ወዝንቱ ቀዳሜ ተአምር ዘገብረ እግዚእ ኢየሱስ በቃና ዘገሊላ ወአርአየ ስብሐቲሁ ወአምኑ ቦቱ አርዳኢሁ።

¹² ወእምድኅረ ዝንቱ ወረዱ ቅፍርናሆም ውእቱ ወእሙ ወአኀዊሁ ወአርዳኢሁ ወነበሩ ህየ ኅዳጠ መዋዕለ ወአኮ ብዙኀ።

¹³ ወቀርበ በዓለ ፋሲካሆሙ ለአይሁድ ወዐርገ እግዚእ ኢየሱስ ኢየሩሳሌም።

¹⁴ ወረከበ በምኵራብ እለ ይሠይጡ ወይሣየጡ አልሕምተ ወአባግዐ ወአርጋበ ወመወልጣነ እንዘ ይነብሩ።

¹⁵ወገብረ መቅሠፍተ ጥብጣቤ ዘሐብል ወሰደደ ኵሎ እምኵራብ አባግዐኒ ወአልሕምተኒ ወዘረወ ወርቆሙ ለመወልጣን ወገፍትዐ ማእዳቲሆሙ ወመናብርቲሆሙ ለእለ ይሠይጡ ርግበ ገንጰለ።

¹⁶ወይቤሎሙ ለእለ ይሠይጡ አርጋበ አሰስሉ ወአውፅኡ ዘንተ እምዝየ ወኢትረስዩ ቤተ አቡየ ቤተ ምሥያጥ።

¹⁷ ወተዘከሩ አርዳኢሁ ከመ ጽሑፍ ውእቱ ዘይብል «ቅንአተ ቤትከ በልዐኒ።»

¹⁸ ወአውሥእዎ አይሁድ ወይቤልዎ ምንተ ትእምርተ ታርኢ ዘዘንተ ትገብር።

¹⁹ ወአውሥአ እግዚእ ኢየሱስ ወይቤሎሙ ንሥትዎ ለዝንቱ ቤተ መቅደስ ወበሠሉስ ዕለት አነሥኦ።

²⁰ወይቤልዎ አይሁድ በአርብዓ ወስድስቱ ዓመት ተሐንጸ ዝንቱ ቤተ መቅደስ ወአንተሰ በሠሉስ መዋዕል ታነሥኦ።

²¹ ወውእቱሰ በእንተ ቤተ ሥጋሁ ይቤሎሙ፤

²² ወአመ ተንሥአ እምነ ምዉታን ተዘከሩ አርዳኢሁ ከመ በእንተዝ ይቤሎሙ ወአምኑ በቃለ መጻሕፍት ወበቃለ እግዚእ ኢየሱስ ዘይቤሎሙ።

²³ወእንዘ ሀሎ እግዚእ ኢየሱስ ኢየሩሳሌም በበዓለ ፋሲካ ብዙኃን አምኑ በስሙ ሶበ ርእዩ ተኣምረ ዘገብረ።

²⁴ ወውእቱሰ እግዚእ ኢየሱስ ኢየአምኖሙ እስመ የአምሮ ለኵሉ ለለ አሐዱ።

²⁵ ወኢይፈቅድ ይንግርዎ ግዕዞ ለሰብእ እስመ ለሊሁ የአምሮ ለሰብእ።