Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 20 Bible Online

ወንጌል ዘዮሐንስ 20 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 20

¹ ወበእሑድ ሰንበት መጽአት ማርያም መግደላዊት በጽባሕ ኀበ መቃብር እንዘ ዓዲሁ ጽልመት ወረከበት እብነ እቱተ እምአፈ መቃብር።

² ወሮጸት ወበጽሐት ኀበ ስምዖን ጴጥሮስ ወኀበ ዝኩ ካልእ ረድእ ዘያፈቅሮ እግዚእ ኢየሱስ ወትቤሎሙ ነሥእዎ ለእግዚእየ እምውስተ መቃብር ወኢየአምር ኀበ ወሰድዎ።

³ወወፅኡ ጴጥሮስ ወዝኩ ካልእ ረድእ ወሖሩ ኀበ መቃብር።

⁴ወእንዘ ይረውጹ ክልኤሆሙ ኅቡረ በደሮ ለጴጥሮስ ዝኩ ካልእ ረድእ በጺሐ ኀበ መቃብር።

⁵ ወሶበ ሐወጸ ርእየ መዋጥሐ ንቡረ ወኢቦአ ባሕቱ።

⁶ወተለዎ ስምዖን ጴጥሮስ ወበጽሐ ወቦአ ውስተ መቃብር ወረከበ መዋጥሐ ንቡረ ውስተ አሐዱ ገጽ።

⁷ ወሰበነኒ ዘዲበ ርእሱ እንተ ባሕቲቱ ጥብሉለ ወአኮ ምስለ መዋጥሕ።

⁸ወእምዝ ቦአ ዝኩኒ ካልእ ረድእ ዘበደሮ በጺሐ ኀበ መቃብር ወርእዩ ወአምኑ።

⁹ እስመ ዓዲሁ ኢያእመሩ ዘውስተ መጻሕፍት ከመ ሀለዎ ይትነሣእ እምነ ምዉታን።

¹⁰ወእምዝ ሖሩ ክልኤሆሙ አርዳኢሁ ወአተዉ ቤቶሙ።

¹¹ ወማርያምሰ ቆመት ኀበ መቃብር አፍኣ ወትበኪ ወእንዘ ትበኪ ሐወጸት ውስተ መቃብር።

¹²ወርእየት ክልኤተ መላእክተ በጸዓድው አልባስ ወይነብሩ አሐዱ ትርአሰ ወአሐዱ ትርጋፀ ኀበ ነበረ ሥጋሁ ለእግዚእ ኢየሱስ።

¹³ወይቤልዋ እሙንቱ መላእክት ምንት ያበክየኪ ኦ ብእሲቶ ወመነ ተኀሥሢ ወትቤሎሙ ነሥእዎ ለእግዚእየ እምውስተ መቃብር ወኢየአምር ኀበ ወሰድዎ።

¹⁴ ወዘንተ ብሂላ ተመይጠት ድኅሬሃ ወርእየቶ ለእግዚእ ኢየሱስ እንዘ ይቀውም ወኢያመረት ከመ እግዚእ ኢየሱስ ውእቱ።

¹⁵ወይቤላ እግዚእ ኢየሱስ ብእሲቶ ምንት ያበክየኪ ወመነ ተኀሥሢ ወመሰላ ላቲሰ ዐቃቤ ገነት ውእቱ ወትቤሎ እግዚእየ እመኒ አንተ ነሣእኮ ንግረኒ ኀበ ወሰድኮ ከመ እሑር አነ ወእንሥኦ ኀቤየ ወእቅብዖ ዕፍረተ።

¹⁶ ወይቤላ እግዚእ ኢየሱስ ማርያም ወተመይጠት ወትቤሎ በነገረ ዕብራይስጥ ረቡኒ ዘበትርጓሜሁ ሊቅ ብሂል።

¹⁷ ወይቤላ እግዚእ ኢየሱስ ኢትልክፍኒ እስመ ዓዲ ኢዐረጉ ኀበ አቡየ ወሑሪ ባሕቱ ኀበ አኀውየ ወበሊዮሙ አዐርግአ ኀበ አቡየ ወአቡክሙ ኀበ አምላኪየ ወአምላክክሙ።

¹⁸ወሖረት ማርያም መግደላዊት ወአብሠረቶሙ ለአርዳኢሁ ወትቤሎሙ ርኢክዎ ለእግዚእነ ወነገረቶሙ ዘንተ ዘከመ ይቤላ።

¹⁹ ወመስዮ በይእቲ ዕለት ዘውእቱ እሑድ ሰንበት እንዘ ዕጽው ኆኅት ኀበ ሀለዉ አርዳኢሁ ጉቡኣን በእንተ ፍርሀቶሙ ለአይሁድ መጽአ እግዚእ ኢየሱስ ወቆመ ማእከሎሙ ወይቤሎሙ ሰላም ለክሙ።

²⁰ ወዘንተ ብሂሎ አርአዮሙ እደዊሁ ወእገሪሁ ወገቦሁ ወተፈሥሑ አርዳኢሁ ሶበ ርእይዎ ለእግዚእነ።

²¹ ወይቤሎሙ ካዕበ እግዚእ ኢየሱስ ሰላም ለክሙ ወበከመ ፈነወኒ አብ ከማሁ አነሂ እፌንወክሙ።

²² ወዘንተ ብሂሎ ነፍኀ ላዕሌሆሙ ወይቤሎሙ ንሥኡ መንፈሰ ቅዱሰ።

²³ ለእለ ኀደግሙ ኀጢአት ይትኀደግ ሎሙ ወለእለሰ ኢኀደግሙ ኢይትኀደግ ሎሙ።

²⁴ ወቶማስ አሐዱ እምዐሠርቱ ወአሐዱ አርዳኢሁ ዘይብልዎ ዲዲሞስ ኢሀሎ ምስሌሆሙ ሶበ መጽአ እግዚእ ኢየሱስ።

²⁵ ወይቤልዎ ካልኣኒሁ አርዳእ ርኢናሁ ለእግዚእነ ወይቤሎሙ እመ ኢርኢኩ እደዊሁ ወእገሪሁ ኀበ ቀነውዎ ወእመ ኢወደይኩ አጽባዕትየ ውስተ ቅንዋቲሁ ወእመ ኢያባእኩ እዴየ ውስተ ገቦሁ ኢየአምን።

²⁶ወእምድኅረ ሰሙን መዋዕል እንዘ ሀለዉ ካዕበ አርዳኢሁ ውስጠ ወቶማስኒ ሀሎ ምስሌሆሙ እንዘ ዕጽው ኆኅት መጽአ እግዚእ ኢየሱስ ወቆመ ማእከሎሙ ወይቤሎሙ ሰላም ለክሙ።

²⁷ወእምዝ ይቤሎ ለቶማስ አምጽእ አጽባዕተከ ዝየ ወርኢ እደውየ ወእገርየ ወሀብ እዴከ ወአብእ ውስተ ገቦየ ወኢትኩን ናፋቄ አላ እመን።

²⁸ወአውሥአ ቶማስ ወይቤሎ እግዚእየ ወአምላኪየ።

²⁹ ወይቤሎ እግዚእ ኢየሱስ እስመ ርኢከኒሁ አመንከኒ ብፁዓንሰ እለ እንዘ ኢይሬእዩኒ የአምኑኒ።

³⁰ወብዙኃተ ካልኣተ ተኣምራተ ገብረ እግዚእ ኢየሱስ በቅድመ አርዳኢሁ ዘኢተጽሕፈ ውስተ ዝንቱ መጽሐፍ።

³¹ ወዝንቱሰ ተጽሕፈ እምኔሆን ከመ ትእመኑ አንትሙ ከመ እግዚእ ኢየሱስ ውእቱ ክርስቶስ ወልደ እግዚአብሔር ወአሚነክሙ ሕይወተ ዘለዓለም ትርከቡ በስመ ዚኣሁ።