Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 3 Bible Online

ወንጌል ዘዮሐንስ 3 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 3

¹ ወሀሎ አሐዱ ብእሲ እምፈሪሳውያን ዘስሙ ኒቆዲሞስ መልአኮሙ ለአይሁድ።

² ወውእቱ መጽአ ኀበ እግዚእ ኢየሱስ ቀዲሙ ሌሊተ ወይቤሎ ረቢ ነአምር ከመ እምኀበ እግዚአብሔር መጻእከ ከመ ትኩን መምህረ እስመ አልቦ ዘይክል ይግበር ዘንተ ተአምረ ዘአንተ ትገብር ዘእንበለ ዘእግዚአብሔር ምስሌሁ።

³ ወአውሥአ እግዚእ ኢየሱስ ወይቤሎ አማን አማን እብለከ ዘኢተወልደ ዳግመ ኢይሬእያ ለመንግሥተ እግዚአብሔር።

⁴ወይቤሎ ኒቆዲሞስ እፎ ይክል ሰብእ ዳግመ ተወልዶ እምድኅረ ልህቀ ይክልኑ በዊአ ወገቢአ ውስተ ከርሠ እሙ ወይትወለድ ዳግመ።

⁵ ወአውሥአ እግዚእ ኢየሱስ ወይቤሎ አማን አማን እብለከ ዘኢተወልደ ዳግመ እማይ ወእመንፈስ ቅዱስ ኢይክል በዊአ ውስተ መንግሥተ እግዚአብሔር።

⁶ እስመ ዘተወልደ እምሥጋ ሥጋ ውእቱ ወዘተወልደ እመንፈስ መንፈስ ውእቱ።

⁷ወበእንተ ዝንቱ ኢታንክር እስመ እቤለከ ሀለወክሙ ትትወለዱ ዳግመ።

⁸ እስመ መንፈስ ኀበ ፈቀደ ይነፍኅ ወቃሎ ትሰምዕ ወኢተአምር እምኀበ ይመጽእ ወኀበሂ የሐውር ከማሁኬ ውእቱ ኵሉ ዘይትወለድ እመንፈስ ቅዱስ።

⁹ወአውሥአ ኒቆዲሞስ ወይቤሎ እፎ ይትከሀል ዝንቱ ይኩን።

¹⁰ወአውሥአ እግዚእ ኢየሱስ ወይቤሎ አንተ ሊቆሙ ለእስራኤል ወዘንተ ነገረ ኢተአምር።

¹¹ አማን አማን እብለከ ከመ ዘነአምር ንነግር ወበዘርኢነ ሰማዕተ ንከውን ወስምዐነሰ ተአብዩነ ነሢአ።

¹²ወሶበ እንዘ ዘበምድር እነግረክሙ ኢተአምኑኒ እፎ እንከ ተአምኑኒ እመ ነገርኩክሙ ዘበሰማያት።

¹³ ወአልቦ ዘዐርገ ውስተ ሰማይ ዘእንበለ ዘወረደ እምሰማይ ወልደ ዕጓለ እመሕያው ዘውእቱ ይነብር ውስተ ሰማይ።

¹⁴ ወበከመ ሙሴ ሰቀሎ ለአርዌ ምድር በገዳም ከማሁ ሀለዎ ለወልደ ዕጓለ እመሕያው ይሰቀል።

¹⁵ ከመ ኵሉ ዘየአምን ቦቱ ኢይትኀጐል አላ የሐዩ ለዓለም።

¹⁶ እስመ ከመዝ አፍቀሮ እግዚአብሔር ለዓለም እስከ ወልዶ ዋሕደ መጠወ ወወሀበ ቤዛ ለኵሉ ከመ ኵሉ ዘየአምን ቦቱ ኢይትኀጐል አላ ይረክብ ሕይወተ ዘለዓለም።

¹⁷እስመ ኢፈነዎ እግዚአብሔር ለወልዱ ውስተ ዓለም ከመ ይኰንኖ ለዓለም ዘእንበለ ከመ ያሕይዎ ለዓለም በእንቲኣሁ።

¹⁸ ዘየአምን ቦቱ ኢይትኴነን ወዘሰ ኢየአምን ቦቱ ወድአ ተኰነነ እስመ ኢአምነ በስመ ወልደ እግዚአብሔር ዋሕድ።

¹⁹ ወዝ ውእቱ ኵነኔሁ እስመ ብርሃን መጽአ ውስተ ዓለም ወአብደረ ሰብእ ጽልመተ እምብርሃን ፈድፋደ እስመ እኩይ ምግባሩ።

²⁰ እስመ ኵሉ ዘእኩይ ምግባሩ ይጸልእ ብርሃነ ወኢይመጽእ ኀበ ብርሃን ከመ ኢይትከሠቶ ምግባሩ እስመ እኩይ ውእቱ።

²¹ ወዘሰ ጽድቀ ይገብር ይመጽእ ኀበ ብርሃን ከመ ያስተርኢ ምግባሩ እስመ በእንተ እግዚአብሔር ይገብር።

²² ወእምዝ ሖረ እግዚእ ኢየሱስ ምስለ አርዳኢሁ ውስተ ምድረ ይሁዳ ወህየ ነበረ ምስሌሆሙ እንዘ ያጠምቅ።

²³ ወሀሎ ዮሐንስኒ ያጠምቅ በሄኖን በቅሩበ ሳሌም በማዕዶተ ዮርዳኖስ እስመ ቦቱ ህየ ብዙኅ ማያት ወይመጽኡ ኀቤሁ ብዙኃን ወያጠምቆሙ።

²⁴ እስመ ዓዲሁ ኢተወድየ ዮሐንስ ውስተ ቤተ ሞቅሕ።

²⁵ ወእምዝ ኮነ ተኃሥሦ ማእከለ አርዳኢሁ ለዮሐንስ ምስለ አይሁድ በእንተ አጥሕሮ።

²⁶ ወሖሩ ኀበ ዮሐንስ ወይቤልዎ ረቢ ዝኩ ዘምስሌከ ሀሎ በማዕዶተ ዮርዳኖስ ዘአንተ ሰማዕተ ኮንከ በእንቲኣሁ ናሁ ሀሎ ውእቱሂ ያጠምቅ ወኵሉ የሐውር ኀቤሁ።

²⁷ ወአውሥአ ዮሐንስ ወይቤ ኢይክል ሰብእ ነሢአ ጸጋ ለሊሁ ወኢምንተኒ እመ ኢተውህበ ሎቱ እምሰማይ።

²⁸ አንትሙ ለሊክሙ ሰማዕትየ ከመ እቤለክሙ አንሰ ኢኮንኩ ክርስቶስሃ ዳእሙ ተፈነውኩ ቅድሜሁ እስብክ።

²⁹ ዘቦቱ መርዓት መርዓዊ ውእቱ ወአርኩሰ ለመርዓዊ ዘይቀውም ወይሰምዖ ፍሥሓ ይትፌሣሕ በእንተ ቃለ መርዓዊ ወመርዓት ወፍሥሓ ዚኣየሰ ናሁ ተፈጸመት።

³⁰ወእንቲኣሁሰ ትበዝኅ ወእንቲኣየሰ ተሰልጠት።

³¹ እስመ ዘእምላዕሉ መጽአ መልዕልተ ኵሉ ውእቱ ወዘእምድርሰ ምድራዊ ውእቱ ወዘበምድር ይነገር ወዘሰ እምሰማይ መጽአ መልዕልተ ኵሉ ውእቱ።

³² ወበዘርእየ ወበዘሰምዐ ሰማዕተ ይከውን ወስምዖሰ አልቦ ዘይትዌከፎ።

³³ ወለዘሰ ተወክፎ ስምዖ ዐተቦ እግዚአብሔር እስመ ጻድቅ ውእቱ።[7]

³⁴ወዘእግዚአብሔር ፈነዎ ቃለ እግዚአብሔር ይነግር እስመ አኮ በመስፈርት ዘይሁብ እግዚአብሔር መንፈሶ።

³⁵ አብሰ ያፈቅር ወልዶ ወኵሎ ኵነኔሁ አወፈዮ ውስተ እዴሁ።

³⁶ ዘየአምን በወልድ ቦ ሕይወት ዘለዓለም ወዘሰ ኢየአምን በወልድ ኢይሬእያ ለሕይወት ዘለዓለም[8] አላ መቅሠፍተ መዓቱ ለእግዚአብሔር ይነብር ላዕሌሁ።