Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 4 Bible Online

ወንጌል ዘዮሐንስ 4 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 4

¹ ወአእሚሮ እግዚእ ኢየሱስ ከመ ሰምዑ ፈሪሳውያን ከመ በዝኁ አርዳኢሁ ለእግዚእ ኢየሱስ ወአብዝኁ አጥመቆ እምዮሐንስ።

²ወባሕቱ ለሊሁሰ እግዚእ ኢየሱስ ኢያጥመቀ ዳእሙ አርዳኢሁ።

³ወኀደጋ ለምድረ ይሁዳ ወሖረ ካዕበ ገሊላ፤

⁴ወእንዘ ሀለዎ ይኅልፍ እንተ ሰማርያ።

⁵ በጽሐ ሀገረ ሳምር እንተ ስማ ሲካር ቅሩበ ዐጸደ ወይን ዘወሀቦ ያዕቆብ ለዮሴፍ ወልዱ።

⁶ወሀሎ ህየ ዐዘቅተ ማይ ዘያዕቆብ ወደኪሞ እግዚእ ኢየሱስ በሐዊረ ፍኖት ነበረ ህየ ኀበ ውእቱ ዐዘቅት ወቀትር ሶቤሃ ጊዜ ስሱ ሰዓት።

⁷ወናሁ መጽአት ብእሲት እምሰማርያ ከመ ትቅዳሕ ማየ ወይቤላ እግዚእ ኢየሱስ አስትይኒ ማየ።

⁸እስመ አርዳኢሁሰ ሖሩ ሀገረ ከመ ይሣየጡ ሲሳዮሙ።

⁹ ወትቤሎ ይእቲ ብእሲት ሳምራዊት እፎኑ እንዘ አይሁዳዊ አንተ ትስእል እምኀቤየ ትስተይ ማየ እንዘ ሳምራዊት አነ እስመ ኢየኀብሩ ሕርመተ አይሁድ ምስለ ሳምራውያን።[9]

¹⁰ ወአውሥአ እግዚእ ኢየሱስ ወይቤላ ሶበሰ ተአምሪ ጸጋሁ ለእግዚአብሔር ወመኑ ውእቱ ዘይስእለኪ ወይብለኪ አስትይኒ ማየ አንቲኒ ዓዲ እምሰአልኪዮ ወውእቱኒ እምወሀበኪ ማየ ሕይወት።

¹¹ወትቤሎ ይእቲ ብእሲት እግዚእየ ማሕየብኒ አልብከ ወዐዘቅቱኒ ዕሙቅ ውእቱ እምአይቴ እንከ ለከ ማየ ሕይወት።

¹²አንተኑ ተዐቢ እምያዕቆብ አቡነ ዘወሀበነ ዘንተ ዐዘቅተ ውእቱኒ ሰትየ እምኔሃ ወአንስትያሁኒ፤[10] ወደቂቁኒ ወእንስሳሁኒ።

¹³ወአውሥአ እግዚእ ኢየሱስ ወይቤላ ኵሉ ዘይሰቲ እምዝ ማይ ይጸምእ ዳግመ።

¹⁴ ወዘሰ ይሰቲ እማይ ዘእሁቦ አነ ኢይጸምእ ለዓለም አላ ውእቱ ማይ ዘእሁቦ አነ ይከውን ውስቴቱ ነቅዐ ማይ ዘይፈለፍል ለሕይወት ዘለዓለም።

¹⁵ ወትቤሎ ይእቲ ብእሲት እግዚእየ ሀበኒዮ እምውእቱ ማይ ከመ ኢይጽማእ ወኢይምጻእ ዝየ ዳግመ እቅዳሕ ማየ።

¹⁶ወይቤላ እግዚእ ኢየሱስ ሑሪኬ ጸውዒ ምተኪ ወንዒ ዝየ።

¹⁷ወአውሥአቶ ይእቲ ብእሲት ወትቤሎ አልብየ ምት ወይቤላ እግዚእ ኢየሱስ ሠናየ ትቤሊ አልብየ ምት።

¹⁸ቀዲሙሰ ኀምስቱ ዕደው ነበሩ ምስሌኪ ወይእዜሰ ዘሀሎ ምስሌኪ ኢኮነ ምተኪ ወዘንተሰ አማን ትቤሊ።

¹⁹ ወትቤሎ ይእቲ ብእሲት እግዚእየ እሬእየከ ከመ ነቢይ አንተ።

²⁰ አበዊነሰ በዝንቱ ደብር ሰገዱ ወአንትሙሰ ትብሉ ከመ በኢየሩሳሌም መካን ውእቱ ኀበ ይሰግዱ።

²¹ ወይቤላ እግዚእ ኢየሱስ እመንኒ ብእሲቶ ከመ ትመጽእ ሰዓት ወይበጽሕ ጊዜሁ አመ ኢ በዝንቱ ደብር ወኢ በኢየሩሳሌም ዘኢይሰግዱ[11] ለአብ አላ በኵሉ ገጸ መካን።[12]

²² አንትሙሰ ትሰግዱ ለዘኢተአምሩ ወንሕነሰ ንሰግድ ለዘነአምር እስመ መድኀኒት እምነ አይሁድ ውእቱ።

²³ወባሕቱ ትመጽእ ሰዓት ወይእዜ ይእቲ አመ እለ በርቱዕ በአማን ሰጋድያን ይሰግዱ ለአብ በመንፈስ ወበጽድቅ እስመ አብኒ ዘከመዝ የኀሥሥ እለ ይሰግዱ ሎቱ።

²⁴ እስመ እግዚአብሔር መንፈስ ውእቱ ወእለሂ ይሰግዱ ሎቱ በመንፈስ ወበጽድቅ ሀለዎሙ ይስግዱ ሎቱ።

²⁵ ወትቤሎ ይእቲ ብእሲት ነአምር ከመ ይመጽእ ማስያስ ዘይብልዎ ክርስቶስ ወአመ መጽአ ውእቱ ይነግረነ ኵሎ።

²⁶ ወይቤላ እግዚእ ኢየሱስ አነ ውእቱ ዘእትናገረኪ።

²⁷ወእምዝ መጽኡ አርዳኢሁ ወአንከርዎ እስመ ምስለ ብእሲት ይትናገር ወባሕቱ አልቦ ዘይቤሎ ምንተ ተኀሥሥ ወምንተ ትትናገር ምስሌሃ።

²⁸ወኀደገት ቀሡታ ይእቲ ብእሲት ወአተወት ሀገረ ወነገረት ለሰብእ።

²⁹ወትቤ ንዑ ትርአዩ ብእሴ ዘነገረኒ ኵሎ ዘገበርኩ እንዳዒ ለእመ ውእቱ ክርስቶስ።

³⁰ወወፅኡ እምሀገር ወሖሩ ኀቤሁ።

³¹ወእምዝ ይቤልዎ አርዳኢሁ ረቢ ብላዕ እክለ።

³²ወይቤሎሙ እግዚእ ኢየሱስ አንሰ ብየ መብልዕ ዘእበልዕ ዘኢተአምሩ አንትሙ።

³³ወተባሀሉ አርዳኢሁ በበይናቲሆሙ፤ ቦኑ እንጋ ሰብእ ዘአምጽአ ሎቱ ዘይበልዕ፤[13]

³⁴ ወይቤሎሙ እግዚእ ኢየሱስ ሊተሰ መብልዕየ ውእቱ ከመ እግበር ፈቃዶ ለአቡየ ዘፈነወኒ ወከመ እፈጽም ግብሮ።

³⁵ አኮኑ አንትሙ እለ ትብሉ እስከ ራብዕ ወርኅ ይከውን ማእረር ወናሁ እብለክሙ አንሥኡ አዕይንቲክሙ ወነጽሩ ኀበ በሓውርት ከመ ጻዕደወ ወበጽሐ ማእረር።

³⁶እስመ ዘየዐጽድኒ ይነሥእ ዐስቦ ወያስተጋብእ ፍሬ ለሕይወት ዘለዓለም ከመ ኅቡረ ይትፈሥሑ ዘሂ ይዘርዕ ወዘሂ የአርር።

³⁷ወዝንቱ ነገር ቃለ ጽድቅ እሙን ውእቱ ከመ ካልእ ዘይዘርዕ ወካልእ ዘየአርር።

³⁸ወአንሰ ፈነውኩክሙ ትእርሩ ዘኢጻመውክሙ ዘባዕድ ጻመወ ወአንትሙ ትበውኡ ውስተ ጻማሆሙ ለእልክቱ።

³⁹ወብዙኃን እምይእቲ ሀገረ ሳምር እለ አምኑ ቦቱ በእንተ ዘትቤሎሙ ይእቲ ብእሲት ዘስምዐ ኮነት እንዘ ትብል ነገረኒ ኵሎ ዘገበርኩ።

⁴⁰ወበጺሖሙ ኀቤሁ ኵሎሙ ሳምራውያን አስተብቍዕዎ ከመ ይንበር ኀቤሆሙ ወነበረ ህየ ሰኑየ መዋዕለ።

⁴¹ወብዙኃን ጥቀ እምኔሆሙ እለ አምኑ ቦቱ በእንተ ቃሉ።

⁴²ወይቤልዋ ለይእቲ ብእሲት አኮ እንከ በነገረ ዚኣኪ ዘአመነ ቦቱ አላ ለሊነ ሰማዕነ ወጠየቅነ ከመ ዝንቱ ውእቱ ክርስቶስ በአማን መድኅነ ዓለም።

⁴³ ወእምድኅረ ሰኑይ መዋዕል ወፅአ እግዚእ ኢየሱስ እምህየ ወሖረ ገሊላ።

⁴⁴ ወለሊሁ እግዚእ ኢየሱስ ሰማዕተ ኮነ ከመ ኢይከብር ነቢይ በሀገሩ።

⁴⁵ ወበዊኦ ካዕበ ገሊላ ተቀበልዎ ኵሎሙ ገሊላውያን እስመ ርእዩ ኵሎ ተኣምረ ዘገብረ በኢየሩሳሌም አመ በዓል እስመ እሙንቱሂ ሖሩ ለበዓል።

⁴⁶ ወሖረ ካዕበ እግዚእ ኢየሱስ ውስተ ቃና ዘገሊላ ኀበ ረሰየ ማየ ወይነ ወሀሎ አሐዱ ገብረ ንጉሥ ሰብእ አብያታዊ ወይደዊ ወልዱ በቅፍርናሆም።

⁴⁷ ወሰሚዖ ከመ መጽአ እግዚእ ኢየሱስ እምይሁዳ ውስተ ገሊላ ሖረ ኀቤሁ ወሰአሎ ከመ ይረድ ወያሕዩ ሎቱ ወልዶ እስመ አልጸቀ ይሙት።

⁴⁸ ወይቤሎ እግዚእ ኢየሱስ እመ ተአምረ ወመንክረ ኢርኢክሙ ኢተአምኑ።

⁴⁹ወይቤሎ ውእቱ ገብረ ንጉሥ ሰብእ አብያታዊ እግዚኦ ረድ ፍጡነ ዘእንበለ ይሙት ወልድየ።

⁵⁰ ወይቤሎ እግዚእ ኢየሱስ ሑር ወልድከሰ ሐይወ ወአምነ ውእቱ ብእሲ በቃል ዘይቤሎ እግዚእ ኢየሱስ ወሖረ።

⁵¹ወእንዘ ይወርድ ተቀበልዎ አግብርቲሁ ወዜነውዎ ወይቤልዎ ወልድከሰ ሐይወ።

⁵²ወተስእሎሙ ሰዓታ እንተ ባቲ ሐይወ ወይቤልዎ ትማልም ጊዜ ሰብዐቱ ሰዓት ኀደጎ ፈፀንቱ።

⁵³ወአእመረ አቡሁ ከመ ጊዜ ይእቲ ሰዓት እንተ ይቤሎ እግዚእ ኢየሱስ ወልድከሰ ሐይወ ወአምነ ቦቱ ውእቱ ወኵሉ ሰብአ ቤቱ።

⁵⁴ወዝንቱ ካዕበ ዳግሙ ለእግዚእ ኢየሱስ ዘገብረ ተኣምረ መጺኦ እምይሁዳ ውስተ ገሊላ።