Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 5 Bible Online

ወንጌል ዘዮሐንስ 5 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 5

¹ ወእምድኅረዝ ኮነ በበዓሎሙ ለአይሁድ ዐርገ እግዚእ ኢየሱስ ኢየሩሳሌም።

² ወቦ ውስተ ኢየሩሳሌም ምጥማቃት ዘጵሩጳጥቄ ቅልንብትራ ዘውእቱ ቀላየ አባግዕ ብሂል ወይብልዋ ስማ በዕብራይስጥ ቤተ ሳይዳ[14] ወባቲ ኀምስቱ ሕዋራት።

³ወህየ ይሰክቡ ብዙኃን ድዉያን ዕዉራን ወሐንካሳን ወይቡሳን[15] ወይጸንሑ ሁከተ ማይ።

⁴እስመ መልአከ እግዚአብሔር በጊዜ ይወርድ ውስተ ምጥማቃት ይትሀወክ ማይ ወዘይወርድ ቀዲሙ እምድኅረ ሁከተ ማይ ወይትኀፀብ የሐዩ እምኵሉ ደዌ ዘቦ።

⁵ወሀሎ ህየ አሐዱ ብእሲ ዘሠላሳ ወሰመንቱ ክረምቱ እምዘ ደወየ።

⁶ወኪያሁ ርእዮ እግዚእ ኢየሱስ እንዘ ይሰክብ ውስተ ዐራቱ አእመረ ከመ ጐንደየ ውስተ ደዌሁ ወይቤሎ ትፈቅድኑ ትሕየው።

⁷ወአውሥአ ውእቱ ድዉይ ወይቤሎ እወ እግዚኦ አላ ሰብእ አልብየ ከመ ሶበ ይትሀወክ ማይ ያውርደኒ ውስተ ምጥማቃት ወሶበ እመጽእ አነ ባዕድ ይቀድመኒ ወሪደ።

⁸ወይቤሎ እግዚእ ኢየሱስ ተንሥእ ወንሣእ ዐራተከ ወሑር።

⁹ ወሐይወ ሶቤሃ ውእቱ ብእሲ ወነሥአ ዐራቶ ወሖረ ወሰንበት አሜሃ ይእቲ ዕለት።

¹⁰ ወይቤልዎ አይሁድ ለዘሐይወ ሰንበት ውእቱ ዮም ወኢይከውነከ ትንሣእ ወትጹር ዐራተከ።

¹¹ወአውሥአ ወይቤሎሙ ዘአሕየወኒ ውእቱ ይቤለኒ ጹር ዐራተከ ወሑር።

¹²ወተስእልዎ አይሁድ ወይቤልዎ መኑ ውእቱ ብእሲሁ ዘይቤለከ ተንሥእ ወጹር ዐራተከ ወሑር።

¹³ወውእቱሰ ዘሐይወ ኢያእመረ መኑ ውእቱ ዘአሕየዎ እስመ ተሰወረ እግዚእ ኢየሱስ ማእከለ ብዙኃን ሰብእ እለ ሀለዉ በውእቱ መካን።

¹⁴ ወእምዝ ረከቦ እግዚእ ኢየሱስ ለውእቱ ዘሐይወ በምኵራብ ወይቤሎ ናሁኬ ሐየውከ ዑቅ ኢተአብስ ዳግመ ከመ ዘየአኪ እምዝ ኢይርከብከ።

¹⁵ወሖረ ውእቱ ብእሲ ወነገሮሙ ለአይሁድ ከመ እግዚእ ኢየሱስ ውእቱ ዘአሕየዎ።

¹⁶ ወበእንተ ዝንቱ ያስተዋድይዎ አይሁድ ለእግዚእ ኢየሱስ ወየኀሥሡ ይቅትልዎ እስመ ከመዝ ይገብር በሰንበት።

¹⁷ ወአውሥአ እግዚእ ኢየሱስ ወይቤሎሙ አቡየሂ እስከ ይእዜ ይገብር ወአነሂ ከማሁ እገብር።

¹⁸ ወበእንተ ዝንቱ ፈድፋደ የኀሥሡ አይሁድ ይቅትልዎ እስመ አኮ ክመ ሰንበተ ባሕቲቶ ዘይስዕር ዳእሙ ዓዲ አባሁ ይሬስዮ ለእግዚአብሔር ወያዔሪ ርእሶ ምስለ እግዚአብሔር።

¹⁹ ወእምዝ አውሥአ እግዚእ ኢየሱስ ወይቤሎሙ አማን አማን እብለክሙ ኢይክል ወልድ ገቢረ ዘእምኀቤሁ ወኢምንተኒ ዘእንበለ ዘርእዮ ለአብ ይገብር እስመ ግብረ ዘይገብር አብ ወልድኒ ኪያሁ ይገብር በአምሳሉ።

²⁰ እስመ አብ ያፈቅር ወልዶ ወኵሎ ያሬእዮ ዘውእቱ ይገብር ወዘየዐቢ እምዝ ያሬእዮ ግብረ ከመ አንትሙ ታንክሩ።

²¹ ወበከመ አብ ያነሥኦሙ ለምዉታን ወያሐይዎሙ ከማሁ ወልድኒ ለዘፈቀደ ያሐዩ።

²² እስመ አብሰ ኢይኴንን ወኢመነሂ አላ ኵሎ ኵነኔሁ አወፈዮ ለወልዱ።

²³ ከመ ኵሉ ሰብእ ያክብርዎ ለወልድ በከመ ያከብርዎ ለአብ ወዘሰ ኢያከብሮ ለወልድ ኢያከብሮ ለአብ ዘፈነዎ።

²⁴ አማን አማን እብለክሙ ዘይሰምዕ ቃልየ ወየአምን በዘፈነወኒ ይረክብ ሕይወተ ዘለዓለም ወኢየሐውር ውስተ ደይን አላ ዐደወ እሞት ውስተ ሕይወት።

²⁵ አማን አማን እብለክሙ ከመ ይበጽሕ ጊዜሁ ወይእዜ ውእቱ ከመ ምዉታን ይሰምዕዎ ቃሎ ለወልደ እግዚአብሔር ወእለሰ ሰምዕዎ የሐይዉ።

²⁶ ወበከመ ለአብ ቦቱ ሕይወት ኀቤሁ ከማሁ ለወልድኒ ወሀቦ ሕይወተ ከመ ይኩን ሕይወት ኀቤሁ።

²⁷ወወሀቦ ሥልጣነ ከመ ይግበር ፍትሐ ወኵነኔ እስመ ወልደ እግዚአብሔር ወልደ ዕጓለ እመሕያው ውእቱ።

²⁸ ወበእንተ ዝንቱሰ ኢታንክሩ እስመ ትመጽእ ሰዓት በዘይሰምዕዎ ቃሎ ኵሎሙ እለ ውስተ መቃብር።

²⁹ ወይወፅኡ እለ ሠናየ ገብሩ ውስተ ትንሣኤ ዘለሕይወት ወእለሰ እኩየ ገብሩ ውስተ ትንሣኤ ዘለደይን።

³⁰ ኢይክል አንሰ ገቢረ ለልየ ዘእምኀቤየ ወኢምንተኒ አላ በከመ ሰማዕኩ እኴንን ወኵነኔየኒ ጽድቅ ውእቱ እስመ ኢየኀሥሥ ፈቃደ ዚኣየ ዘእንበለ ፈቃዱ ለዘፈነወኒ።

³¹ ወእመሰ ለልየ ስምዐ ኮንኩ ለርእስየ ኢኮነ ጽድቀ ስምዕየ።

³² ወባሕቱ ካልእ ውእቱ ሰማዕትየ ወአአምር ከመ ጽድቅ ውእቱ ስምዑ ዘስምዐ ኮነ በእንቲኣየ።

³³ አኮኑ አንትሙ ለአክሙ ኀበ ዮሐንስ ወነገረክሙ ስምዖ በጽድቅ በእንቲኣየ።

³⁴ወአንሰ አኮ ስምዐ ሰብእ ዘእፈቅድ ወባሕቱ ዘንተ እብል ከመ አንትሙ ትእመኑ ወትድኀኑ።

³⁵ዝንቱ ውእቱ ማኅቶት ዘያኀቱ ወያበርህ ወአንትሙ ፈቀድክሙ ትትፈሥሑ በብርሃኑ አሐተ ሰዓተ።

³⁶ ወአንሰ ብየ ሰማዕት ዘየዐቢ እምስምዐ ዮሐንስ እስመ ግብር ዘወሀበኒ አቡየ ከመ እግበር ወእፈጽም ውእቱ ግብር ዘእገብር ሰማዕትየ ከመ አብ ፈነወኒ።

³⁷ ወአቡየ ዘፈነወኒ ውእቱ ሰማዕትየ ወእምአመ ኮንክሙ ቃሎ ኢሰማእክሙ ወራእዮሂ ኢርኢክሙ።

³⁸ወቃሉሂ አልብክሙ ወኢይነብር ኀቤክሙ እስመ ዘውእቱ ፈነወ ኪያሁ ኢአመንክሙ።

³⁹ ኅሡ ትርአዩ ውስተ መጻሕፍት እስመ ቦቶን ይመስለክሙ ዘትረክቡ ሕይወተ ዘለዓለም ወእማንቱ ሰማዕትየ።

⁴⁰ ወኢትፈቅዱ ትምጽኡ ኀቤየ ከመ ትርከቡ ሕይወተ ዘለዓለም።

⁴¹አንሰ ኢይፈቅድ ያድሉ ሊተ ሰብእ።

⁴²ወባሕቱ አእመርኩክሙ ከመ አልብክሙ ፍቅረ እግዚአብሔር ላዕሌክሙ።

⁴³ አነ መጻእኩ በስመ አቡየ ወኢተወከፍክሙኒ ወአመ መጽአ ካልእ በስምዐ ነፍሱ ኪያሁ ትትዌከፉ።

⁴⁴ እፎ ትክሉ አንትሙ አሚነ ዘተኀሥሡ ክብረ እምቢጽክሙ ወኢተኀሥሡ ክብረ እምእግዚአብሔር ዋሕድ።

⁴⁵ ኢይምሰልክሙ ዘአነ አስተዋድየክሙ ኀበ አብ አላ ሀሎ ሙሴ ዘያስተዋድየክሙ ዘኪያሁ ትሴፈዉ ወትትዌከሉ።

⁴⁶ ሶበሰ አመንክምዎ ለሙሴ ኪያየኒ እምአመንክሙኒ እስመ በእንቲኣየ ጸሐፈ ውእቱ።

⁴⁷ወእመሰ ዘጸሐፈ ሙሴ ኢተአምኑ እፎ ቃልየ ተአምኑ።