Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 6 Bible Online

ወንጌል ዘዮሐንስ 6 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 6

¹ ወእምድኅረ ዝንቱ ሖረ እግዚእ ኢየሱስ ማዕዶተ ባሕረ ገሊላ ኀበ ጥብርያዶስ።

²ወተለውዎ ብዙኃን አሕዛብ እስመ ርእዩ ተአምረ ዘገብረ በላዕለ ድዉያን።

³ወዐርገ እግዚእ ኢየሱስ ውስተ ደብር ወህየ ነበረ ምስለ አርዳኢሁ።

⁴ ወቀርበ በዓለ ፋሲካሆሙ ለአይሁድ።

⁵ ወአንሥአ አዕይንቲሁ እግዚእ ኢየሱስ ወርእየ ብዙኃነ ሰብአ እንዘ ይመጽኡ ኀቤሁ ወይቤሎ ለፊልጶስ እምአይቴ ንሣየጥ ኅብስተ ዘናበልዖሙ ለእሉ።

⁶ወዘንተ ይቤ እንዘ ያሜክሮ ወውእቱሰ የአምር ዘሀለዎ ይግበር።

⁷ወአውሥአ ፊልጶስ ወይቤሎ ዘክልኤቱ ምእት ዲናር ኅብስት ኢየአክሎሙ ከመ ይንሥኡ በበሕቅ ለለአሐዱ እምኔሆሙ።

⁸ወይቤሎ አሐዱ እምአርዳኢሁ ዘውእቱ እንድርያስ እኁሁ ለስምዖን ጴጥሮስ።

⁹ሀሎ ዝየ ወልድ ዘቦቱ ኀምስ ኅብስተ ሰገም ወክልኤቲ ዓሣት ወባሕቱ ምንተ ይበቍዓ እማንቱ ለዘመጠነዝ ሰብእ።

¹⁰ወይቤሎሙ እግዚእ ኢየሱስ ግበሩ ምርፋቃተ ለሰብእ ወብዙኅ ሣዕሩ ለውእቱ መካን ወረፈቁ ዲበ ሣዕር ዕደዊሆሙ ወየአክል ኍልቆሙ መጠነ ኀምሳ ምእት ብእሲ።

¹¹ወነሥአ እግዚእ ኢየሱስ ውእተ ኅብስተ ወአእኰተ ባረከ ወፈተተ ወወሀቦሙ ለአርዳኢሁ ወአርዳኢሁኒ አቅረቡ ለሰብእ ወእምዓሣሁኒ ከማሁ መጠነ ፈቀዱ።

¹²ወእምድኅረ በልዑ ወጸግቡ ይቤሎሙ እግዚእ ኢየሱስ ለአርዳኢሁ አስተጋብኡ ዘተርፈ ፍተታተ ከመ አልቦ ዘይትገደፍ ወኢምንትኒ እምኔሆን፤

¹³ወአስተጋብኡ ወመልአ ዐሠርተ ወክልኤተ መሣይምተ እምኀምስቱ ኅብስተ ሰገም ዘተርፈ ፍተታት እምዘ በልዑ ወጸግቡ።

¹⁴ ወርእዮሙ ሕዝብ ዘገብረ ተአምረ እግዚእ ኢየሱስ ይቤሉ አማን ነቢይ ውእቱ ዝንቱ ዘመጽአ ውስተ ዓለም።

¹⁵ወአእመሮሙ እግዚእ ኢየሱስ ከመ ይፈቅዱ ይምጽኡ ይምሥጥዎ ወያንግሥዎ ወተግኅሠ ውስተ ደብር ባሕቲቶ።

¹⁶ ወመስዮ ወረዱ አርዳኢሁ ውስተ ባሕር።

¹⁷ወዐርጉ ሐመረ ወሖሩ ማዕዶተ ባሕር ኀበ ቅፍርናሆም ወናሁ ወድአ ኮነ ጽልመት ወዓዲሁ ኢመጽአ እግዚእ ኢየሱስ ኀቤሆሙ።

¹⁸ወባሕርሰ ይትሀወክ እስመ ዐቢይ ነፋስ ይነፍኅ።

¹⁹ወኀሊፎሙ መጠነ ዕሥራ ወኀምስቱ ምዕራፍ አው ሠላሳ ርእይዎ ለእግዚእ ኢየሱስ እንዘ የሐውር ዲበ ባሕር ወቀርበ ኀበ ሐመር ወፈርሁ።

²⁰ ወይቤሎሙ አነ ውእቱ ኢትፍርሁ።

²¹ወእንዘ ይፈቅዱ ያዕርግዎ ውስተ ሐመር በጽሐት ሐመር ሶቤሃ ውስተ ምድር ኀበ ዘፈቀዱ ይሑሩ።

²²ወበሳኒታ ሰብእ እለ ይቀውሙ ማዕዶተ ባሕር ርእዮሙ ከመ አልቦ ህየ ካልእ ሐመር ዘእንበለ አሐቲ ሐመር ወከመሂ ኢዐርገ እግዚእ ኢየሱስ ምስለ አርዳኢሁ ውስተ ሐመር አላ አርዳኢሁ ባሕቲቶሙ ሖሩ።

²³ወመጽኣ ካልኣትኒ አሕማር እምጥብርያዶስ ቅሩበ ብሔር ኀበ በልዑ ኅብስተ ዘባረከ እግዚእነ።

²⁴ወሶበ ርእዩ እሙንቱ ሰብእ ከመ ኢሀሎ እግዚእ ኢየሱስ ህየ ወኢአርዳኢሁ ዐርጉ ውስተ ውእቶን አሕማር ወበጽሑ ቅፍርናሆም ይኅሥሥዎ ለእግዚእ ኢየሱስ።

²⁵ወሶበ ረከብዎ በማዕዶተ ባሕር ይቤልዎ ረቢ ማእዜ መጻእከ ወበጻሕከ ዝየ።

²⁶ወአውሥአ እግዚእ ኢየሱስ ወይቤሎሙ አማን አማን እብለክሙ ከመ አኮ አንትሙ ዘተኀሥሡኒ በእንተ ዘርኢክሙ ተአምራተ አላ በእንተ ዘበላዕክሙ ኅብስተ ወጸገብክሙ።

²⁷ ተገብሩ እንከሰ አኮ ለመብልዕ ኀላፊ አላ ለመብልዕ ዘይነብር ለሕይወት ዘለዓለም ዘይሁበክሙ ወልደ ዕጓለ እመሕያው እስመ ለዝሰ እግዚአብሔር አብ ኀተሞ።

²⁸ወይቤልዎ ምንተ ንረሲ ከመ ንግበር ግብረ እግዚአብሔር።

²⁹ ወአውሥአ እግዚእ ኢየሱስ ወይቤሎሙ ዝንቱ ውእቱ ግብረ እግዚአብሔር ከመ ትእመኑ በዘፈነወ ውእቱ።

³⁰ወይቤልዎ ምንተ ተአምረ ትገብር ከመ ንርአይ ወንእመን ብከ በዘገበርከ።

³¹ አበዊነሰ መና በልዑ በገዳም በከመ ጽሑፍ «ኅብስተ እምሰማይ ወሀቦሙ ይብልዑ።»

³²ወይቤሎሙ እግዚእ ኢየሱስ አማን አማን እብለክሙ አኮ ሙሴ ዘወሀበክሙ ውእተ ኅብስተ እምሰማይ አላ አቡየ ወሀበክሙ ኅብስተ ጽድቅ እምሰማይ።

³³ እስመ ኅብስቱ ለእግዚአብሔር ውእቱ ዘወረደ እምሰማይ ወይሁብ ሕይወተ ዘለዓለም።

³⁴ወይቤልዎ እግዚኦ ሀበነ በኵሉ ጊዜ እምውእቱ ኅብስት።

³⁵ ወይቤሎሙ እግዚእ ኢየሱስ አነ ውእቱ ኅብስተ ሕይወት ወዘይመጽእ ኀቤየ ኢይርኅብ ወዘሂ የአምን ብየ ኢይጸምእ ለዝሉፉ።

³⁶ወእቤለክሙ ባሕቱ ርኢክሙኒሂ ወኢአመንክሙኒ።

³⁷ ወኵሉ ዘወሀበኒ አቡየ ይመጽእ ኀቤየ ወለዘሂ መጽአ ኀቤየ ኢይሰድዶ ወኢያውፅኦ አፍኣ።

³⁸ እስመ አኮ ዘወረድኩ እምሰማይ ከመ እግበር ፈቃድየ ዘእንበለ ፈቃዱ ለዘፈነወኒ።

³⁹ ወዝንቱ ውእቱ ፈቃዱ ለዘፈነወኒ አብ ከመ ኵሉ ዘወሀበኒ ኢይትኀጐል እምኔሆሙ ወኢአሐዱሂ አላ አነ አነሥኦ በደኃሪት ዕለት።

⁴⁰ወዝንቱ ውእቱ ፈቃዱ ለአቡየ ከመ ኵሉ ዘርእዮ ለወልድ ወአምነ ቦቱ ይረክብ ሕይወተ ዘለዓለም ወአነ አነሥኦ በደኃሪት ዕለት።

⁴¹ወአንጐርጐሩ አይሁድ በእንቲኣሁ እስመ ይቤሎሙ አነ ውእቱ ኅብስተ ሕይወት ዘወረደ እምሰማይ።

⁴² ወይቤሉ አኮኑ ዝንቱ ውእቱ ኢየሱስ ወልደ ዮሴፍ ዘለሊነ ነአምር አባሁ ወእሞ ወእፎ እንከ ይብለነ እምሰማይ ወረድኩ።

⁴³ወአውሥአ እግዚእ ኢየሱስ ወይቤሎሙ ኢታንጐርጕሩ በበይናቲክሙ።

⁴⁴አልቦ ዘይክል መጺአ ኀቤየ እመ ኢሰሐቦ አብ ዘፈነወኒ ወአነ አነሥኦ በደኃሪት ዕለት።

⁴⁵ ወሀሎ ጽሑፍ ውስተ መጽሐፈ ነቢያት «ከመ ይከውኑ ኵሎሙ ምሁራነ እምኀበ እግዚአብሔር» ወኵሉ እንከ ዘሰምዐ በኀበ አቡየ ተምሂሮ ይመጽእ ኀቤየ።

⁴⁶ ወአልቦ ዘርእዮ ለአብ ዘእንበለ ዘእምኀቤሁ ለእግዚአብሔር ውእቱ ወውእቱ ርእዮ ለአብ።

⁴⁷ አማን አማን እብለክሙ ዘየአምን ብየ ቦ ሕይወት ዘለዓለም።

⁴⁸አነ ውእቱ ኅብስተ ሕይወት።

⁴⁹ አበዊክሙሰ መና በልዑ በገዳም ወሞቱ።

⁵⁰ዝንቱ ውእቱ ኅብስት ዘእምሰማይ ወረደ ወኵሉ ዘበልዐ እምኔሁ ኢይመውት።

⁵¹ አነ ውእቱ ኅብስተ ሕይወት ዘወረደ እምሰማይ ወዘበልዐ እምዝንቱ ኅብስት የሐዩ ለዓለም ወዝኒ ኅብስት ዘአነ እሁቦ ሥጋየ ውእቱ በእንተ ሕይወት ዘለዓለም።

⁵²ወተጋዐዙ አይሁድ በበይናቲሆሙ እንዘ ይብሉ እፎ ይክል ዝንቱ የሀበነ ሥጋሁ ንብላዕ።

⁵³ወይቤሎሙ እግዚእ ኢየሱስ አማን አማን እብለክሙ እመ ኢበላዕክሙ ሥጋሁ ለወልደ ዕጓለ እመሕያው ወኢሰተይክሙ ደሞ አልብክሙ ሕይወት ላዕሌክሙ።

⁵⁴ዘበልዐ ሥጋየ ወሰትየ ደምየ ቦ ሕይወት ዘለዓለም ወአነ አነሥኦ በደኃሪት ዕለት።

⁵⁵እስመ ሥጋየኒ መብልዐ ጽድቅ ዘበአማን ውእቱ ወደምየኒ ስቴ ሕይወት ዘበአማን ውእቱ።

⁵⁶ ዘበልዐ ሥጋየ ወሰትየ ደምየ ይሄሉ ምስሌየ ወአነሂ እሄሉ ምስሌሁ።

⁵⁷ወበከመ ዘፈነወኒ አብ ሕያው ወአነሂ ሕያው በእንተ አብ ወዘበልዐ ሥጋየ የሐዩ በእንቲኣየ።

⁵⁸ዝኬ ውእቱ ኅብስት ዘእምሰማይ ወረደ ወአኮ በከመ በልዑ አበዊክሙ መና ወሞቱ ወዘበልዖሰ ለዝንቱ ኅብስት የሐዩ ለዓለም።

⁵⁹ወከመዝ ይቤሎሙ በምኵራብ ዘቅፍርናሆም እንዘ ይሜህሮሙ።

⁶⁰ወብዙኃን እምአርዳኢሁ እለ ሰምዑ ዘንተ ወይቤሉ ዕፁብ ዝንቱ ነገር ወመኑ ይክል ሰሚዖቶ።

⁶¹ወአእመሮሙ እግዚእ ኢየሱስ በመንፈሱ ከመ አንጐርጐሩ አርዳኢሁ በእንተ ዝንቱ ወይቤሎሙ ዝኑ ያዐቅፈክሙ።

⁶²እፎ እንከ እመ ርኢክምዎ ለወልደ ዕጓለ እመሕያው እንዘ የዐርግ ኀበ ሀሎ ቀዲሙ።

⁶³ መንፈስ ውእቱ ዘያሐዩ ወሥጋሰ አልቦ ዘይበቍዕ ወኢምንተኒ ወዝኒ ቃል ዘአነ ነገርኩክሙ መንፈስ ውእቱ ወሕይወት ውእቱ።

⁶⁴ ወባሕቱ ቦ እምውስቴትክሙ እለ ኢየአምኑ እስመ የአምር እግዚእ ኢየሱስ እምትካት እለ መኑ እሙንቱ እለ ኢየአምኑ ቦቱ ወመኑ ውእቱ ዘያገብኦ።

⁶⁵ወይቤሎሙ በእንተ ዝንቱ እብለክሙ አልቦ ዘይክል መጺአ ኀቤየ ለእመ ኢተውህበ ሎቱ እምኀበ አብ።

⁶⁶ወበእንተ ዝንቱ ብዙኃን እምአርዳኢሁ እለ ገብኡ ድኅሬሆሙ ወኢሖሩ እንከ ምስሌሁ።

⁶⁷ወይቤሎሙ እግዚእ ኢየሱስ ለዐሠርቱ ወክልኤቱ አንትሙኒ ትፈቅዱኑ ትሑሩ።

⁶⁸ ወአውሥአ ስምዖን ጴጥሮስ ወይቤሎ እግዚኦ ኀበ መኑ ነሐውር እንዘ ቃለ ሕይወት ዘለዓለም ብከ።

⁶⁹ወንሕንሰ አመነ ወአእመርነ ከመ አንተ ውእቱ ክርስቶስ ወልዱ ለእግዚአብሔር ሕያው።

⁷⁰ ወአውሥአ እግዚእ ኢየሱስ ወይቤሎሙ አኮኑ አነ ኀረይኩክሙ ለዐሠርቱ ወክልኤቱ ወባሕቱ አሐዱ እምኔክሙ ሰይጣን ውእቱ።

⁷¹ወዘንተሰ ይቤ እንበይነ ይሁዳ ወልደ ስምዖን አስቆሮታዊ እስመ ውእቱ ሀለዎ ያግብኦ ወውእቱ አሐዱ እምዐሠርቱ ወክልኤቱ።