Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 7 Bible Online

ወንጌል ዘዮሐንስ 7 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 7

¹ወእምድኅረ ዝንቱ ሖረ እግዚእ ኢየሱስ ውስተ ገሊላ ወኢፈቀደ ይሑር ምድረ ይሁዳ እስመ የኀሥሡ አይሁድ ይቅትልዎ።

² ወቀርበ በዓለ መጸለቶሙ ለአይሁድ።

³ ወይቤልዎ አኀዊሁ ለእግዚእ ኢየሱስ ፍልስ እምዝየ ወሑር ብሔረ ይሁዳ ከመ አርዳኢከኒ ይርአዩ ግብረከ ዘትገብር ወይእመኑ።

⁴እስመ አልቦ ዘይገብር ምንተኒ ጽሚተ ወይፈቅድ ክሡተ ይኩኖ ወእመሰ ዘንተ ትገብር አርኢ ርእሰከ ለዓለም።

⁵ እስመ አኀዊሁኒ ኢአምኑ ቦቱ።

⁶ ወይቤሎሙ እግዚእ ኢየሱስ ጊዜየሰ ዓዲ እስከ ይእዜ ኢበጽሐ ወጊዜ ዚኣክሙሰ ዘልፈ ድልው ውእቱ።

⁷ ለክሙሰ ኢይክል ዓለም ጸሊኦተክሙ ወሊተሰ ይጸልአኒ እስመ አነ ስምዕ ላዕሌሁ ወእዛለፎ በከመ እከየ ምግባሩ።

⁸ አንትሙሰ ዕርጉ ውስተ ዝንቱ በዓል ወአንሰ ኢየዐርግ ይእዜ ውስተ ዝንቱ በዓል እስመ ዓዲ ኢበጽሐ ጊዜየ።

⁹ወከመዝ ይቤሎሙ ወነበረ ውስተ ገሊላ።

¹⁰ወዐሪጎሙ አኀዊሁ ለበዓል ውእተ አሚረ ዐርገ ውእቱኒ ጽሚተ ወአኮ ገሃደ።

¹¹ወአኀዙ አይሁድ ይኅሥሥዎ በበዓል ወይቤሉ አይቴ ውእቱ ዝክቱ።

¹² ወብዙኀ አንጐርጐሩ ሕዝብ በእንቲኣሁ ወቦ እለ ይቤሉ ኄር ውእቱ ወካልኣን ይቤሉ አልቦ አላ ያስሕቶሙ ለሕዝብ።

¹³ ወባሕቱ ክሡተሰ አልቦ ዘተናገረ በእንቲኣሁ በእንተ ፍርሀቶሙ ለአይሁድ።

¹⁴ወበማእከለ መዋዕለ በዓል ዐርገ እግዚእ ኢየሱስ ምኵራበ ወአኀዘ ይምሀር።

¹⁵ወአንከሩ አይሁድ ምህሮቶ እንዘ ይብሉ እፎ የአምር ዝንቱ መጽሐፈ ዘኢመሀሮ መኑሂ።

¹⁶ ወአውሥአ እግዚእ ኢየሱስ ወይቤሎሙ ትምህርትየሰ ኢኮነት እንቲኣየ አላ እንቲኣሁ ለዘፈነወኒ።

¹⁷ ወዘሰ ይፈቅድ ይግበር ሥምረቶ ውእቱ የአምር ከመ እምኀበ እዚአብሔር ውእቱ ትምህርትየ ወአኮ ዘእምኀቤየ ዘእነግር።

¹⁸ ወዘሰ ለርእሱ ይነግር ተድላ ርእሱ የኀሥሥ ወዘሰ ይፈቅድ ያድሉ ለዘፈነዎ ጻድቅ ውእቱ ወአልቦ ዐመፃ በኀቤሁ።

¹⁹ አኮኑ ሙሴ ወሀበክሙ ኦሪተ ወአልቦ አሐዱሂ እምኔክሙ ዘይገብራ ለኦሪት ለምንት እንከ ተኀሥሡ ትቅትሉኒ።

²⁰ ወአውሥኡ ሕዝብ ወይቤልዎ ጋኔንኑ ብከ መኑ የኀሥሥ ይቅትልከ።

²¹ ወአውሥአ እግዚእ ኢየሱስ ወይቤሎሙ አሐደ ግብረ ገበርኩ ወኵልክሙ አንከርክሙ።

²² ወበእንተ ዝንቱ ወሀበክሙ ሙሴ ግዝረተ ወኢኮነት እምኀበ ሙሴ አላ እምአበው ይእቲ ወበሰንበት ትገዝርዎ ለሰብእ።

²³ ወእመሰ በሰንበት ግዝረተ ይነሥእ ብእሲ ከመ ኢይሰዐር ሕጉ ለሙሴ ለምንት እንከ ትግእዙኒ ለእመ አሕየውክዎ ለብእሲ ኵለንታሁ በሰንበት።

²⁴ኢትፍትሑ በአድልዎ ለገጽ አላ ፍትሐ ጽድቅ ፍትሑ።

²⁵ወቦ እለ ይቤሉ እምሰብአ ኢየሩሳሌም አኮኑ ዝንቱ ውእቱ ዘየኀሥሡ አይሁድ ይቅትልዎ።

²⁶ወናሁ ገሃደ ይትናገሮሙ ወአልቦ ዘይቤልዎ ምንተኒ አእመሩኑ እንጋ መላእክት ወሊቃውንት ከመ ዝንቱ ውእቱ ክርስቶስ በአማን።

²⁷ወባሕቱ ለዝንቱሰ ነአምሮ እምአይቴ ውእቱ ወክርስቶስሰ አመ ይመጽእ አልቦ ዘየአምሮ እምኀበ ይመጽእ።

²⁸ወአልዐለ ቃሎ እግዚእ ኢየሱስ በምኵራብ እንዘ ይሜህር ወይቤ ኪያየኑ ተአምሩኒ ወተአምሩኑ እምኀበ አይቴ አነ ወአኮ ለልየ ዘመጻእኩ አላ ሀሎ ጻድቅ ዘፈነወኒ ዘኢተአምርዎ አንትሙ።

²⁹ ወአንሰ አአምሮ እስመ እምኀቤሁ አነ ወውእቱ ፈነወኒ።

³⁰ ወፈቀዱ የአኀዝዎ ወባሕቱ አልቦ ዘአንሥአ እዴሁ ላዕሌሁ እስመ ዓዲ ኢበጽሐ ጊዜሁ ወእምውእቶሙ ሰብእ ብዙኃን እለ አምኑ ቦቱ።

³¹ ወይቤሉ አመ ይመጽእ ክርስቶስ ቦኑ ፈድፋደ ተኣምረ ዘይገብር እምዘገብረ ዝንቱ።

³²ወሰምዑ ፈሪሳውያን ከመ አንጐርጐሩ ሕዝብ በእንቲኣሁ ወፈነዉ ሊቃነ ካህናት ወፈሪሳውያን ወዓልያኒሆሙ ከመ የአኀዝዎ።

³³ ወይቤሎሙ እግዚእ ኢየሱስ ዓዲ ኅዳጠ መዋዕለ ሀሎኩ ምስሌክሙ ወእምዝ አሐውር ኀበ አብ ዘፈነወኒ።

³⁴ ተኀሥሡኒ ወኢትረክቡኒ ወኀበ አነ አሐውር አንትሙ ኢትክሉ መጺአ።

³⁵ ወይቤሉ አይሁድ በበይናቲሆሙ አይቴኑ ሀለዎ ለዝንቱ ይሑር ዘኢንክል ረኪቦቶ ንሕነ ውስተ ብሔረ አረሚኑ የሐውር እንጋ ወይሜህሮሙ ለአረሚ።[16]

³⁶ምንትኑ ዝንቱ ነገር ዘይብለነ ተኀሥሡኒ ወኢትረክቡኒ ወኀበ አነ አሐውር አንትሙ ኢትክሉ መጺአ።

³⁷ ወበደኃሪት ዕለት ዘበዓል ዐባይ ቆመ እግዚእ ኢየሱስ ወከልሐ ወይቤ ዘጸምአ ይምጻእ ኀቤየ ወይስተይ።

³⁸ ወዘሂ የአምን ብየ በከመ ይቤ መጽሐፍ «አፍላገ ማየ ሕይወት ይውኅዝ እምከርሡ።»

³⁹ ወዘንተ ይቤ በእንተ መንፈስ ቅዱስ ዘሀለዎሙ ይንሥኡ እለ የአምኑ ቦቱ እስመ ዓዲ ኢመጽአ መንፈስ ቅዱስ በእንተ ዘኢተሰብሐ ዓዲሁ እግዚእ ኢየሱስ ክርስቶስ።

⁴⁰ ወብዙኃን እምሕዝብ ሰሚዖሙ ዘንተ ነገረ ይቤሉ አማን ነቢይ ውእቱ ዝንቱ።

⁴¹ ወቦ እለ ይቤሉ ክርስቶስ ውእቱ ወመንፈቆሙ ይቤሉ ቦኑ እምገሊላ ይመጽእ ክርስቶስ።

⁴² አኮኑ ይብል መጽሐፍ «ከመ እምነ ዘርዐ ዳዊት ወእምነ ቤተ ልሔም ሀገሩ ለዳዊት ይመጽእ ክርስቶስ።»

⁴³ወተናፈቁ ሕዝብ በበይናቲሆሙ በእንቲኣሁ።

⁴⁴ወቦ እለ ፈቀዱ የአኀዝዎ ወባሕቱ አልቦ ዘአንሥአ እዴሁ ላዕሌሁ።

⁴⁵ወተሠውጡ ወዓልያኒሆሙ ኀበ ሊቃነ ካህናት ወፈሪሳውያን ወይቤልዎሙ እሙንቱ እፎኑመ ዘኢያምጻእክምዎ።

⁴⁶ ወአውሥኡ ወዓልያኒሆሙ ወይቤልዎሙ ግሙራ ኢተናገረ ሰብእ ዘከመ ተናገረ ውእቱ ብእሲ።

⁴⁷ወአውሥኡ ፈሪሳውያን ወይቤልዎሙ ትጌግዩኑ አንትሙኒ።

⁴⁸ቦኑ እመላእክት ወእምፈሪሳውያን እለ አምኑ ቦቱ።

⁴⁹ዘእንበለ እሉ ጊጉያን ሕዝብ እለ ኢየአምሩ ኦሪተ ወእሙንቱሰ ርጉማን።

⁵⁰ ወይቤሎሙ ኒቆዲሞስ ዘሖረ ኀቤሁ ለእግዚእ ኢየሱስ ቀዲሙ ሌሊተ አሐዱ እምኔሆሙ።

⁵¹ ኦሪትክሙኑ ትኴንኖ ለሰብእ ዘእንበለ ይሕትትዎ ቅድመ ወያእምሩ ግብሮ ዘገብረ።

⁵²ወአውሥእዎ ወይቤልዎ አንተሂ እምገሊላኑ ትብል አንተ ኅሥሥ መጽሐፈ ትርአይ ከመ እምገሊላ ኢይትነሣእ ነቢይ።

⁵³ወገብኡ ኵሉ ለለአሐዱ ውስተ ቤቶሙ።