Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 8 Bible Online

ወንጌል ዘዮሐንስ 8 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 8

¹ወእግዚእ ኢየሱስኒ ሖረ ውስተ ደብረ ዘይት።

²ወአንግሀ በጽባሕ ወቦአ ካዕበ ምኵራበ ወተጋብኡ ኵሉ ሕዝብ ኀቤሁ ወነበረ ወአኀዘ ይምሀሮሙ።

³ ወአምጽኡ ኀቤሁ ጸሐፍት ወፈሪሳውያን ብእሲተ እስርተ እንተ ተረክበት በዝሙት ወአብእዋ ውስጠ ወአቀምዋ ቅድመ እግዚእ ኢየሱስ።

⁴ወይቤልዎ ኦ ሊቅ ረከብናሃ ለዛቲ ብእሲት እንዘ ትኤብስ በዝሙት።

⁵ ወበሕግነሰ ሠርዐ ሙሴ ከመ ትትወገር በእብን ወአንተሰ እንከ ምንተ ትብል በእንቲኣሃ።[17]

⁶ወዘንተ ይቤሉ እንዘ ያሜክርዎ ከመ ይርከቡ ምክንያተ ላዕሌሁ በዘያስተዋድይዎ ወአትሐተ እግዚእ ኢየሱስ አዕይንቲሁ ውስተ ምድር ወጸሐፈ በአጽባዕቱ።

⁷ወሶበ ቆሙ ብዙኀ ወአጐንደዩ ተስእሎቶ አንሥአ አዕይንቲሁ ወነጸረ ኀቤሆሙ ወይቤሎሙ ዘአልቦ ኀጢአት እምኔክሙ ቀዲሙ ለይገራ በእብን።

⁸ወካዕበ ደነነ ኀበ ምድር ወጸሐፈ በአጽባዕቱ።

⁹ ወሰሚዖሙ እሙንቱ ዘንተ ዘለፋ በለብዎ አኀዙ ይሑሩ በበአሐዱ እስከ ወፅኡ ሊቃውንቲሆሙ እምቀዳሚ እስከ ደኃሪ ወተርፈ እግዚእ ኢየሱስ ባሕቲቶ ወይእቲኒ ብእሲት ትቀውም ማእከለ።

¹⁰ወአንሥአ እግዚእ ኢየሱስ አዕይንቲሁ ወነጸረ ኀቤሃ ወይቤላ ኦ ብእሲቶ አይቴ ሀለዉ እለ ይኴንኑኪ።

¹¹ ወአውሥአት ወትቤሎ አልቦ ዘእሬኢ እግዚእየ ወይቤላ እግዚእ ኢየሱስ አነሂ አልቦ ዘእኴንነኪ ሑሪ እትዊ በሰላም ወእምዝ ዳግመ ኢተአብሲ።

¹² ወካዕበ ነበቦሙ እግዚእ ኢየሱስ ወይቤ አነ ውእቱ ብርሃኑ ለዓለም ዘተለወኒ ኢየሐውር ውስተ ጽልመት አላ ይረክብ ብርሃነ ሕይወት።

¹³ ወይቤልዎ ፈሪሳውያን ለሊከኑ ትንእድ ርእሰከ ኢኮነ ጽድቀ ስምዕከ።

¹⁴ወአውሥአ እግዚእ ኢየሱስ ወይቤሎሙ እመኒ ለልየ ስምዐ ኮንኩ ለርእስየ ጽድቅ ውእቱ ስምዕየ እስመ አአምር እምኀበ መጻእኩ ወኀበሂ አሐውር ወአንትሙሰ ኢተምሩ እምኀበ መጻእኩ ወኀበሂ አሐውር።

¹⁵አንትሙሰ ሕገ ዘሥጋ ትኴንኑ ወአንሰ ኢይኴንኑ ወኢመነሂ።

¹⁶ወእመሂ ኰነንኩ አነ ጽድቀ እኴንን እስመ ኢኮንኩ አነ ባሕቲትየ አላ አነ ወአብ ዘፈነወኒ።

¹⁷ አኮኑ ጽሑፍ ውስተ ኦሪትክሙ «ስምዐ ክልኤቱ ሰብእ እሙን ውእቱ።»

¹⁸ወአነሂ ሰማዕት ለርእስየ ወአብ ዘፈነወኒ ሰማዕትየ።

¹⁹ ወይቤልዎ አይቴ ውእቱ አቡከ ወአውሥአ እግዚእ ኢየሱስ ወይቤሎሙ ኢኪያየ ተአምሩ ወኢአቡየ ሶበሰ ኪያየ አእመርክሙ እምአእመርክምዎ ለአቡየኒ።

²⁰ ወዘንተ ነገረ ተናገሮሙ እግዚእ ኢየሱስ በኀበ ሙዳየ ምጽዋት እንዘ ይሜህሮሙ በምኵራብ ወኢአኀዝዎ እስመ ዓዲ ኢበጽሐ ጊዜሁ።

²¹ ወካዕበ ይቤሎሙ እግዚእ ኢየሱስ አንሰ አሐውር ተኀሥሡኒ ወኢትረክቡኒ ወትመውቱ በኀጢአትክሙ ወኀበ አነ አሐውር አንትሙ ኢትክሉ መጺአ።

²² ወይቤሉ አይሁድ ይቀትልኑ እንጋ ርእሶ ለሊሁ ዘይብለነ ኀበ አነ አሐውር አንትሙ ኢትክሉ መጺአ።

²³ወይቤሎሙ አንትሙሰ እምታሕቱ አንትሙ ወአንሰ እምላዕሉ አነ አንትሙሰ እምዝንቱ ዓለም አንትሙ ወአንሰ ኢኮንኩ እምዝንቱ ዓለም።

²⁴ወናሁ እቤለክሙ ከመ ትመውቱ በኀጢአትክሙ ለእመ ኢአመንክሙ ከመ አነ ውእቱ ትመውቱ በኀጢአትክሙ።

²⁵ወይቤልዎ አንተ መኑ አንተ ወይቤሎሙ እግዚእ ኢየሱስ ቀዳሚኒ ነገርኩክሙ።

²⁶ወብዙኅ ብየ ዘእብል በእንቲኣክሙ ወእኴንን ቦቱ ወባሕቱ ዘፈነወኒ ጻድቅ ውእቱ ወአንሰ ዘሰማዕኩ በኀቤሁ እነግር ለዓለም።

²⁷ወኢያእመሩ ከመ በእንተ አብ ይቤሎሙ።

²⁸ ወይቤሎሙ እግዚእ ኢየሱስ አመ ተለዐለ[18] ወልደ ዕጓለ እመሕያው ይእተ አሚረ ተአምሩ ከመ አነ ውእቱ ወአኮ ዘእምኀቤየ ዘእነግር አላ በከመ መሀረኒ አቡየ ከማሁ እነግር።

²⁹ወዘፈነወኒ ሀሎ ምስሌየ ወኢየኀድገኒ አብ ባሕቲትየ እስመ አነ ሥምረቶ እገብር ዘልፈ።

³⁰ ወዘንተ ብሂሎ ብዙኃን እለ አምኑ ቦቱ።

³¹ ወይቤሎሙ እግዚእ ኢየሱስ ለእለ አምኑ ቦቱ አይሁድ አንትሙሂ ለእመ ነበርክሙ በቃልየ አማን አርዳእየ አንትሙ።

³²ወተአምርዋ ለጽድቅ ወጽድቅኒ ታግዕዘክሙ።

³³ ወአውሥኡ ወይቤልዎ ዘርዐ አብርሃም ንሕነ ወእምአመ ኮነ ግሙራ ኢተቀይነ ወኢለመኑሂ እፎ እንከ ትብለነ ግዑዛነ ትከውኑ።

³⁴ ወአውሥአ እግዚእ ኢየሱስ ወይቤሎሙ አማን አማን እብለክሙ ኵሉ ዘይገብራ ለኀጢአት ገብራ ውእቱ ለኀጢአት።

³⁵ወገብርሰ ኢይነብር ውስተ ቤት ለዝሉፉ ወወልድሰ ይነብር ለዓለም።

³⁶ወእምከመሰ ወልድ አግዐዘክሙ አማን ግዑዛን አንትሙ።

³⁷ወአአምር ከመ ዘርዐ አብርሃም አንትሙ ወባሕቱ ተኀሥሡ ትቅትሉኒ እስመ ኢይነብር ቃልየ ኀቤክሙ።

³⁸ወአንሰ ዘርኢኩ በኀበ አቡየ እነግር ወአንትሙሂ ዘርኢክሙ በኀበ አቡክሙ ትገብሩ።

³⁹ወአውሥኡ ወይቤልዎ ለነሰ አብርሃም አቡነ ወይቤሎሙ እግዚእ ኢየሱስ ሶበሰ ውሉደ አብርሃም አንትሙ ግብረ አብርሃም እምገበርክሙ።

⁴⁰ ወይእዜሰ ተኀሥሡ ትቅትሉኒ ብእሴ ጻድቀ ዘጽድቀ እነግረክሙ ዘሰማዕኩ በኀበ እግዚአብሔር ወአብርሃምሰ ኢገብረ ከመዝ።

⁴¹ አንትሙሰ ትገብሩ ግብረ አቡክሙ ወይቤልዎ ንሕነሰ ኢተወለድነ እምዝሙት አላ አሐዱ አብ ብነ ወውእቱ እግዚአብሔር።

⁴²ወይቤሎሙ እግዚእ ኢየሱስ ሶበሰ እግዚአብሔር አቡክሙ እምአፍቀርክሙኒ ኪያየ ወቃልየኒ እምዐቀብክሙ እስመ አነ እምኀበ እግዚአብሔር ወፃእኩ ወመጻእኩ ወአኮ ለልየ ዘመጻእኩ አላ ውእቱ ፈነወኒ።

⁴³እፎ እንከ ኢተአምኑ ቃልየ እስመ ኢትክሉ ሰሚዐ ነገረ ዚኣየ።

⁴⁴ አንትሙሰ እምአቡክሙ ሰይጣን አንትሙ ወፍትወቶ ለአቡክሙ ትፈቅዱ ትግበሩ ወውእቱሰ ቀታሌ ነፍሰ ሰብእ ውእቱ እምትካት ወኢይቀውም በጽድቅ እስመ አልቦ ጽድቅ በኀቤሁ ወሶበሂ ይነብብ ሐሰተ እምዚኣሁ ይነብብ እስመ ሐሳዊ ውእቱ ወአቡሃ ለሐሰት።

⁴⁵ወአንሰ እስመ ጽድቀ እነግር ኢተአምኑኒ።

⁴⁶ መኑ እምኔክሙ ዘይዛለፈኒ በእንተ ኀጢአት ወእመሰ አነ ጽድቀ እነግር ለምንት ኢተአምኑኒ።

⁴⁷ ዘሰ እምእግዚአብሔር ውእቱ ቃለ እግዚአብሔር ይሰምዕ ወበእንተ ዝንቱ አንትሙሰ ኢትሰምዑኒ እስመ ኢኮንክሙ እምእግዚአብሔር።

⁴⁸ ወተሰጥውዎ አይሁድ ወይቤልዎ አኮኑ ሠናየ ንቤለከ ከመ ሳምራዊ አንተ ወጋኔንከ ብከ።

⁴⁹ወአውሥአ እግዚእ ኢየሱስ ወይቤሎሙ አንሰ ጋኔን አልብየ ወባሕቱ አከብር አባየ ወአንትሙሰ ታስተሐቅሩኒ።

⁵⁰ አንሰ ኢየኀሥሥ ተድላ ለርእስየ ሀሎ ዘየኀሥሥ ወዘሂ ይኴንን።

⁵¹ አማን አማን እብለክሙ ዘዐቀበ ቃልየ ኢይጥዕሞ ለሞት ለዓለም።

⁵² ወይቤልዎ አይሁድ ይእዜኬ አእመርናከ ከመ ጋኔን ብከ አብርሃም ጥቀ ሞተ ወነቢያትኒ ሞቱ ወአንተሰ ትብል ዘዐቀበ ቃልየ ኢይጥዕሞ ለሞት ለዓለም።

⁵³አንተኑ ተዐቢ እምአብርሃም አቡነ ዘሞተ ወእምነቢያትኒ እለ ሞቱ መነ ትሬሲ ርእሰከ።

⁵⁴ወአውሥአ እግዚእ ኢየሱስ ወይቤሎሙ እመሰ ለልየ ሰባሕኩ ርእስየ ኢይበቍዐኒ ስብሐትየ ወኢምንተኒ አላ ሀሎ አቡየ ዘይሴብሐኒ ዘአንትሙ ትብልዎ አምላክነ ውእቱ ወኢተአምርዎ።

⁵⁵ ወአንሰ አአምሮ ወእመሰ እቤ ኢየአምሮ እከውን ከማክሙ ሐሳዌ ወአንሰ አአምሮ ወቃሎሂ አዐቅብ።

⁵⁶ አብርሃም አቡክሙ ተመነየ ከመ ይርአይ ዕለትየ ወርእየሂ ወተፈሥሐ።

⁵⁷ ወይቤልዎ አይሁድ ኀምሳ ዓመት አልብከ ወአብርሃምሃ ርኢከ።

⁵⁸ ወይቤሎሙ እግዚእ ኢየሱስ አማን አማን እብለክሙ እምቅድመ ይትወለድ አብርሃም ሀሎኩ አነ።

⁵⁹ወነሥኡ እብነ ከመ ይውግርዎ ወተኀብኦሙ እግዚእ ኢየሱስ ወወፅአ እምኵራብ ወኀለፈ እንተ ማእከሎሙ ወሖረ።