Read Ge'ez NT – ሐዲስ ኪዳን በልሳነ ግእዝ ወንጌል ዘዮሐንስ 9 Bible Online

ወንጌል ዘዮሐንስ 9 - Ge'ez NT – ሐዲስ ኪዳን በልሳነ ግእዝ bible

ወንጌል ዘዮሐንስ 9

¹ወእንዘ የኀልፍ እምህየ ርእየ ብእሴ ዘዕዉሩ ተወልደ።

² ወተስእልዎ አርዳኢሁ ወይቤልዎ ረቢ በኀጢአተ መኑ ተወልደ ዝንቱ ዕዉር በዘርእሱኑ ወሚመ በዘአዝማዲሁ።

³ ወይቤሎሙ እግዚእ ኢየሱስ ኢ ውእቱ አበሰ ወኢ አዝማዲሁ ዳእሙ ከመ ያስተርኢ ግብረ እግዚአብሔር በላዕሌሁ።

⁴ ወባሕቱ ርቱዕ ሊተ እግበር ግብሮ ለዘፈነወኒ እንዘ መዓልት ውእቱ እስመ ትመጽእ ሌሊት ዘኢይክል ቦቱ አሐዱሂ ገቢረ።

⁵ እንዘ ሀሎኩ ውስተ ዓለም አነ ውእቱ ብርሃኑ ለዓለም።

⁶ወዘንተ ብሂሎ ወረቀ ውስተ ምድር ወገብረ ጽቡረ በምራቁ ወቀብዖ አዕይንቲሁ ለውእቱ ዕዉር።

⁷ ወይቤሎ ሑር ተኀፀብ በምጥማቃተ ሰሊሆም ዘበትርጓሜሁ ሐዋርያ ወሖረ ወተኀፅበ ወገብአ እንዘ ይሬኢ።

⁸ወአግዋሪሁሰ ወእለሂ የአምርዎ ትካት ወይሬእይዎ እንዘ ይስእል ይቤሉ አኮኑ ዝንቱ ውእቱ ዘይነብር ውስተ ፍኖት ወይስእል።

⁹ወቦ እለ ይቤሉ ውእቱ ዝንቱ ወካልኣን ይቤሉ አልቦ አላ ይመስሎ ወለሊሁሰ ይቤ አነ ውእቱ።

¹⁰ወይቤልዎ እፎ ተከሥታ አዕይንቲከ።

¹¹ወአውሥአ ወይቤሎሙ ብእሲ ዘስሙ ኢየሱስ ጽቡረ ገብረ በምራቁ ወቀብዐኒ አዕይንትየ ወይቤለኒ ሑር ተኀፀብ በምጥማቃተ ሰሊሆም ወሖርኩ ወተኀፀብኩ ወርኢኩ።

¹²ወይቤልዎ አይሁድ አይቴ ውእቱ ብእሲሁ ወይቤሎሙ ኢየአምር።

¹³ወወሰድዎ ኀበ ፈሪሳውያን ለውእቱ ዘዕዉሩ ተወልደ።

¹⁴ እስመ ሰንበት አሜሁ አመ ገብረ እግዚእ ኢየሱስ ጽቡረ በምራቁ ወከሠቶ አዕይንቲሁ።

¹⁵ወተስእልዎ ካዕበ ፈሪሳውያን ዘከመ እፎ ርእየ ወይቤሎሙ ጽቡረ ገብረ በምራቁ ወወደየ ውስተ አዕይንትየ ወሖርኩ ወተኀፀብኩ ወርኢኩ።

¹⁶ ወቦ እለ ይቤሉ እምፈሪሳውያን ዝንቱ ብእሲ ኢኮነ እምእግዚአብሔር ዘኢየዐቅብ ሰንበተ ወቦ እለ ይቤሉ በአይቴ ይክል ብእሲ ኃጥእ ገቢረ ዘከመዝ ተኣምረ ወተናፈቁ በበይናቲሆሙ በእንተ ዝንቱ ነገር።

¹⁷ ወይቤልዎ ካዕበ ለውእቱ ዕዉር ምንተ ትብል አንተ በእንቲኣሁ እስመ ከሠተከ አዕይንቲከ ወይቤሎሙ ነቢይ ውእቱ።

¹⁸ወኢአምንዎ አይሁድ ከመ ዕዉሩ ተወልደ ወርእየ እስከ ጸውዑ አዝማዲሁ ለዘርእየ።

¹⁹ወተስእልዎሙ ወይቤልዎሙ ዝኑ ውእቱ ወልድክሙ ዘትብሉ ዕዉሩ ተወልደ ወበእፎ እንከ ይእዜ ይሬኢ።

²⁰ወአውሥኡ አዝማዲሁ ወይቤሉ ነአምር ከመ ዝንቱ ውእቱ ወልድነ ወከመሂ ዕዉሩ ተወልደ።

²¹ወይእዜሰ ዘከመ እፎ ይሬኢ አው መኑ ከሠቶ አዕይንቲሁ ኢነአምር ኪያሁ ተሰአልዎ እስመ ልሂቅ ውእቱ ወይክል ተናግሮ ለርእሱ።

²² ወዘንተ ይቤሉ አዝማዲሁ እስመ ይፈርህዎሙ ለአይሁድ እስመ አዘዙ አይሁድ ለእመቦ ዘአምነ ቦቱ ከመ ውእቱ ክርስቶስ ይሰደድ እምኵራብ።

²³ወበእንተ ዝንቱ ይቤሉ አዝማዲሁ ልሂቅ ውእቱ ሎቱ ተሰአልዎ።

²⁴ ወጸውዕዎ ዳግመ ለውእቱ ብእሲ ዕዉር ወይቤልዎ ሑር ሀብ ስብሐተ ለእግዚአብሔር ንሕነሰ ነአምር ከመ ኃጥእ ውእቱ ዝ ብእሲ።

²⁵ወአውሥአ ውእቱ ብእሲ ወይቤሎሙ ኢየአምር ለእመ ኃጥእ ውእቱ ወአሐተ ባሕቱ አአምር ከመ ዕዉር አነ ወይእዜ እሬኢ።

²⁶ወይቤልዎ ካዕበ ምንተ ገብረ ለከ ወእፎ ከሠተከ አዕይንቲከ።

²⁷ወአውሥአ ወይቤሎሙ ነገርኩክሙ ወኢትሰምዑ ምንተ እንከ ካዕበ ትፈቅዱ ትስምዑ አንትሙሂ አርዳኢሁኑ ትኩኑ ትፈቅዱ።

²⁸ወጸአልዎ ወይቤልዎ አንተ ኩን ረድኦ ሎቱ ወንሕነሰ አርዳኢሁ ለሙሴ ንሕነ።

²⁹ወንሕነ ነአምር ከመ ለሙሴ ተናገሮ እግዚአብሔር ገጸ በገጽ ወለዝንቱሰ ኢነአምሮ ከመ እምአይቴ ውእቱ።

³⁰ወአውሥአ ውእቱ ብእሲ ወይቤሎሙ ዓዲ በዝንቱ ጥቀ መንክር ውእቱ ዘኢተአምርዎ እምአይቴ ውእቱ ወከሠተኒ አዕይንትየ።

³¹ ወንሕነሰ ነአምር ባሕቱ ከመ ለኃጥኣን ኢይሰምዖሙ እግዚአብሔር ዘእንበለ ለዘይፈርሆ ለእግዚአብሔር ወለዘይገብር ፈቃዶ ሎቱ ይሰምዖ።

³²እምአመ ተፈጥረ ዓለም ኢተሰምዐ ግሙራ ከመ ቦ ዘዕዉሩ ተወልደ ወተከሥታ አዕይንቲሁ።[19]

³³ሶበሰ ኢኮነ እምኀበ እግዚአብሔር ዝንቱ ብእሲ እምኢክህለ ገቢረ ወኢምንተኒ።

³⁴ወአውሥኡ ወይቤልዎ ዘለሊከ በኀጢአት ተወለድከ አንተሁ ትሜህረነ ለነ ወሰደድዎ ወአውፅእዎ አፍኣ።

³⁵ ወሰምዐ እግዚእ ኢየሱስ ከመ አውፅእዎ አፍኣ ወረከቦ ወይቤሎ ተአምንሁ አንተ በወልደ እግዚአብሔር።

³⁶ወአውሥአ ውእቱ ብእሲ ወይቤ መኑ ውእቱ ወልደ እግዚአብሔር እግዚኦ ከመ እእመን ቦቱ።

³⁷ወይቤሎ እግዚእ ኢየሱስ ዘትሬእዮ ወዘይትናገር ምስሌከ ውእቱ ዝንቱ።

³⁸ወይቤ አአምን እግዚኦ ወሰገደ ሎቱ።

³⁹ ወይቤሎ እግዚእ ኢየሱስ አንሰኬ መጻእኩ ለኵነኔ ዝንቱ ዓለም ከመ እለ ኢይሬእዩ ይርአዩ ወእለኒ ይሬእዩ ይዑሩ።

⁴⁰ወቦ እምፈሪሳውያን እለ ሀለዉ ምስሌሁ እለ ሰምዑ ዘንተ ወይቤልዎ ንሕነኒኬ ዕዉራንኑ ንሕነ።

⁴¹ወይቤሎሙ እግዚእ ኢየሱስ ሶበሰ ዕዉራን አንትሙ እምኢኮነክሙ ጌጋየ ወይእዜሰ ባሕቱ ንቡር ጌጋይክሙ እስመ ትብሉ ንሬኢ ወኢትሬእዩ ወበእንተዝ ኢይትኀደግ ለክሙ ጌጋይክሙ።