Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 1 Bible Online

ግብረ ሐዋርያት 1 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 1

¹ቀዳሚ ጸሐፍኩ ለከ መጽሐፈ ኦ! ታኦፊላ በኵሉ ግብር ዘአኀዘ እግዚእነ ኢየሱስ ክርስቶስ ይግበር ወይምሀር።

²እስከ ዕለት እንተ ባቲ ዐርገ አዚዞ ለሐዋርያቲሁ ለእለ ኀረዮሙ በመንፈስ ቅዱስ።

³ እሉ እሙንቱ እለ አርአዮሙ ወከሠተ ሎሙ ርእሶ ሕያወ እምድኅረ ሞተ በተኣምር ብዙኅ በአርብዓ ዕለት እንዘ ያስተርእዮሙ ወይዜንዎሙ ወይነግሮሙ በእንተ መንግሥተ እግዚአብሔር።

⁴ ወእንዘ ይመስሕ[1] ምስሌሆሙ አዘዞሙ ኢይፃኡ እምኢየሩሳሌም አላ ይጽንሑ ተስፋሁ ለአብ።

⁵ወይቤሎሙ ዮሐንስ አጥመቀ በማይ አንትሙሰ ታጠምቁ በመንፈስ ቅዱስ እስከ መዋዕል ዘኢኮነ ርኁቀ።

⁶ ወእንዘ ጉቡኣን እሙንቱ ተስእልዎ ወይቤልዎ እግዚኦ በዝኑ መዋዕል ታገብእ መንግሥተ ለደቂቀ እስራኤል።

⁷ወአውሥኦሙ ወይቤሎሙ ኢኮነ ለክሙ ታእምሩ መዋዕለ ወአዝማነ ዘሠርዐ አብ በምኵናኑ ባሕቲቱ።

⁸አላ ሶበ ይወርድ ላዕሌክሙ መንፈስ ቅዱስ ትነሥኡ ኀይለ ወትከውኑኒ ሰማዕትየ በኢየሩሳሌም ወበኵሉ ይሁዳ ወሰማርያ ወእስከ አጽናፈ ምድር።

⁹ ወዘንተ እንዘ ይብሎሙ ተለዐለ ወነሥአቶ ደመና ወዐርገ ሰማየ እንዘ እሙንቱ ይኔጽሩ ኀቤሁ ወተሰወረ እምአዕይንቲሆሙ።

¹⁰ ወአስተርአይዎሙ ክልኤቱ ዕደው ወቆሙ ኀቤሆሙ ወይለብሱ ጸዐዳ።

¹¹ ወይቤልዎሙ አንትሙ ሰብአ ገሊላ ምንትኑ ቆምክሙ ትርአዩ ሰማየ ዝ ውእቱ ኢየሱስ ዘዐርገ እምኀቤክሙ ውስተ ሰማይ ወከማሁ ካዕበ ይመጽእ በከመ ርኢክምዎ የዐርግ ሰማየ።

¹²ወእምዝ ተሠውጡ ኢየሩሳሌም እምደብረ ዘይት ዘእቱት እምኢየሩሳሌም መጠነ ምርዋጸ ብእሲ እንተ ይእቲ መንገደ ቀዳም።

¹³ ወበጺሖሙ ማኅደሮሙ ኀበ ይነብሩ ጽርሐ ዐርጉ ጴጥሮስ ወዮሐንስ ወያዕቆብ ወእንድርያስ ወፊልጶስ ወቶማስ ወማቴዎስ ወበርተሎሜዎስ ወያዕቆብ ወልደ እልፍዮስ ወስምዖን ቀናኢ ወይሁዳ ወልደ ዮሴፍ።

¹⁴እሉ ኵሎሙ ይፀመዱ ጸሎተ ኅቡረ ምስለ አንስት ወማርያም እሙ ለኢየሱስ ወአኀዊሁኒ።

¹⁵ወውእተ አሚረ ተንሥአ ጴጥሮስ ወቆመ ማእከለ አኀዊሁ ወይቤሎሙ እንዘ ሀለዉ ህየ ሰብእ ወየአክሉ ምእተ ወዕሥራ።

¹⁶ ስምዑ ኦ አኀዊነ አማን ሀለዎ ይብጻሕ ቃለ መጽሐፍ ዘይቤ መንፈስ ቅዱስ በአፈ ዳዊት በእንተ ይሁዳ ዘውእቱ ኮኖሙ መርሐ ለእለ አኀዝዎ ለእግዚእ ኢየሱስ።

¹⁷እንዘ ኊሉቍ ውእቱ ምስሌነ ወከፈሎ ዘንተ መልእክተ።

¹⁸ ወእምዝ ተሣየጠ ዐጸደ በዐስበ ዐመፃሁ ወተነጽሐ ላዕለ ምድር በገጹ ወተሠጥቀ ገቦሁ ወተክዕወ ኵሉ አማዑቲሁ።

¹⁹ወተሰምዐ ነገሩ በኀበ ኵሎሙ እለ ይነብሩ በኢየሩሳሌም ወተሰምየ ዐጸዱ ዘተሣየጠ በዐስቡ ሰመይዎ በነገሮሙ አኬልዳማ ገራህተ ደም[2] ብሂል።

²⁰ በከመ ይቤ መጽሐፈ መዝሙር «ለትኩን ሀገሩ በድወ ወአልቦ ዘይነብር ውስቴታ ወሢመቶሂ ይንሣእ ባዕድ።»

²¹ ወይደሉ ለአሐዱ እምእሉ ዕደው እለ ነበሩ ምስሌነ ዘንተ ኵሎ መዋዕለ በዘቦአ ወወፅአ በኀቤነ እግዚእነ ኢየሱስ ክርስቶስ።

²²እኂዞ እምጥምቀተ ዮሐንስ እስከ አመ ዐርገ እምኀቤነ ከመ ይኩን ውእቱ ምስሌነ ስምዐ ተንሥኦቱ።

²³ወአቀሙ ክልኤተ ዮሴፍሃ ዘተሰምየ በርናባስ ዘይብልዎ ኢዮስጦስ ወማትያስሃ።

²⁴ ወጸለዩ ወይቤሉ አንተ እግዚኦ ማእምረ ኵሉ ልብ አርኢ አሐደ እምእሉ ክልኤቱ ዘኀረይከ።

²⁵ዘይነሥኣ ለመልእክተ ዛቲ ሢመተ ሐዋርያት ዘኀደጋ ይሁዳ ይሑር ብሔሮ።

²⁶ ወአስተዓፀውዎሙ ወበጽሐ ዕፃ ዲበ ማትያስ ወተኈለቈ ምስለ ዐሠርቱ ወአሐዱ ሐዋርያት።