Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 10 Bible Online

ግብረ ሐዋርያት 10 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 10

¹ወሀሎ አሐዱ ብእሲ በሀገረ ቂሳርያ ዘስሙ ቆርኔሌዎስ ሐቤ ምእት ውእቱ ለሕዝበ ሰጲራ እንተ ይብልዋ ኢጣሊቄ።

² ጻድቅ ወፈራሄ እግዚአብሔር ምስለ ኵሉ ሰብአ ቤቱ ወይገብር ብዙኀ ምጽዋተ ለሕዝብ ወይጼሊ ወትረ ኀበ እግዚአብሔር።

³ወአስተርአዮ መልአከ እግዚአብሔር ክሡተ ጊዜ ተሱዓት ሰዓት ዘመዓልት ቦአ ኀቤሁ ወይቤሎ ቆርኔሌዎስ።

⁴ወነጸረ ኀቤሁ ወፈርሀ ወይቤ ምንተ ትብል እግዚኦ ወይቤሎ ጸሎትከ ወምጽዋትከ ዐርገ ቅድመ እግዚአብሔር ተዝካረ ሠናየ።

⁵ወይእዜኒ ፈኑ ዕደወ ሀገረ ኢዮጴ ይጸውዕዎ ለከ ለስምዖን ጴጥሮስ ዘየኀድር ቤተ ስምዖን ሰፋዪ ዘመንገለ ባሕር።

⁶ ወውእቱ ይነግረከ በዘተሐዩ አንተ ወኵሉ ቤትከ።

⁷ወኀሊፎ መልአክ ዘተናገሮ ጸውዐ ክልኤተ እምወዓልያኒሁ ወአሐደ ሐራ ኄረ እምፀማዱ።

⁸ወነገሮሙ ኵሎ ወለአኮሙ ሀገረ ኢዮጴ።

⁹ወበሳኒታ እንዘ የሐውሩ በጽሑ ኢዮጴ ኀበ አንቀጸ ሀገር ወጴጥሮስኒ ዐርገ ናሕሰ ይጸሊ ጊዜ ቀትር።

¹⁰እስመ ርኅበ ወፈቀደ ይምሳሕ ወእንዘ ያስተዳልዉ እሙንቱ መጽአ ድንጋፄ ላዕሌሁ።

¹¹ ወርእየ ሰማየ ርኅወ ወይወርድ ከመ ዘሞጣሕት ዐቢይ ዲበ ምድር እኁዝ በአርባዕቱ ጽነፊሁ።

¹²ወቦ ውስቴቱ ኵሉ እንስሳ ወአራዊተ ገዳም ወአዕዋፈ ሰማይ።

¹³ወነበቦ ቃል ወይቤሎ ተንሥእ ጴጥሮስ ኅርድ ወብላዕ።

¹⁴ ወይቤሎ ጴጥሮስ ሐሰ ሊተ እግዚኦ ግሙራ ኢቦአ ርኩስ ውስተ አፉየ ወኢበላዕኩ ዘኢኮነ ንጹሐ።

¹⁵ ወነበቦ ዳግመ ወይቤሎ ዘእግዚአብሔር አንጽሐ አንተ ኢታስተራኵስ።

¹⁶ወከመዝ ይቤሎ ሥልሰ ወኵሉ ተመይጠ ውስተ ሰማይ።

¹⁷ወእንዘ ይኄሊ ጴጥሮስ ምንት ውእቱ ዘአስተርአዮ በጽሑ ዕደው እለ ተፈነዉ እምኀበ ቆርኔሌዎስ እንዘ የኀሥሡ ቤቶ ለስምዖን ወቆሙ ኀበ ዴዴ።

¹⁸ወጸርሑ ወሐተቱ ለእመሁ ስምዖን ዘተሰምየ ጴጥሮስ በህየ የኀድር።

¹⁹ወእንዘ ይኄሊ ጴጥሮስ በእንተ ዘአስተርአዮ ይቤሎ መንፈስ ቅዱስ ናሁ ሠለስቱ ዕደው የኀሥሡከ።

²⁰ተንሥእ ወረድ ወሑር ምስሌሆሙ እንዘ ኢትናፍቅ ወኢምንተኒ እስመ አነ ፈነውክዎሙ።

²¹ወወረደ ጴጥሮስ ኀበ እሙንቱ ዕደው ወይቤሎሙ ነየ አነ ዘተኀሥሡኒ በእንተ ምንት መጻእክሙ።

²²ወይቤልዎ እሙንቱ ቆርኔሌዎስ ሐቤ ምእት ብእሲ ጻድቅ ወፈራሄ እግዚአብሔር ወየአምርዎ ኵሉ ሕዝበ አይሁድ አስተርአዮ መልአክ ቅዱስ ወይቤሎ ከመ ይጸውዕከ ውስተ ቤቱ ወይስማዕከ ዘትነግሮ ወውእቱ ፈነወነ ኀቤከ።[14]

²³ወውእቱ ጸውዖሙ ወአኅደሮሙ ወበሳኒታ ተንሥአ ወሖረ ምስሌሆሙ ወቦ እምቢጾሙ እምሀገረ ኢዮጴ እለ ሖሩ ምስሌሁ።

²⁴ወበሳኒታ ቦአ ሀገረ ቂሳርያ ወሀሎ ቆርኔሌዎስ ይጸንሖሙ ወጸውዐ አዝማዲሁ ወማኅፈሮ።

²⁵ወበዊኦ ጴጥሮስ ተቀበሎ ቆርኔሌዎስ ወሰገደ ሎቱ ታሕተ እገሪሁ።

²⁶ ወአንሥኦ ጴጥሮስ ወይቤሎ ተንሥእ አነሂ ከማከ ሰብእ።

²⁷ወቦአ እንዘ ይትናገር ምስሌሁ ወረከበ ብዙኃነ ሰብአ እለ መጽኡ።

²⁸ወይቤሎሙ ጴጥሮስ ተአምሩ ለሊክሙ ከመ ኢይከውኖ ለብእሲ አይሁዳዊ ከመ ይሑር ወይባእ ኀበ ካልእ ሕዝብ ወሊተሰ አርአየኒ እግዚአብሔር ከመ ኢያስተራኵሶ ለሰብእ ወኢለመኑሂ።

²⁹ወይእዜኒ ኢናፊቅየ መጻእኩ ኀቤክሙ በዘለአክሙ እስኩ አይድዑኒ ምንትኑ በዘጸዋዕክሙኒ።

³⁰ወይቤሎ ቆርኔሌዎስ ረቡዕ ዮም እንዘ እጼሊ በጊዜ ተሱዓት ሰዓት በቤትየ አስተርአየኒ ብእሲ ይቀውም ቅድሜየ ወይለብስ ብርሃነ።

³¹ወይቤለኒ ቆርኔሌዎስ ተሰምዐ ጸሎትከ ወምጽዋትከ በቅድመ እግዚአብሔር ተዘከረከ።

³²ወይእዜኒ ለአክ ሀገረ ኢዮጴ ይጸውዕዎ ለከ ለስምዖን ዘተሰምየ ጴጥሮስ ዘየኀድር ቤተ ስምዖን ሰፋዪ ዘመንገለ ባሕር ወውእቱ ይነግረከ በዘተሐዩ አንተ ወኵሉ ቤትከ።

³³ወሶቤሃ በእንቲኣሁ ለአኩ ኀቤከ ወሠናየ ገበርከ ዘመጻእከ ወይእዜኒ ናሁ ሀሎነ ኵልነ ቅድሜከ ከመ ንስማዕ ኵሎ ዘአዘዘከ እግዚአብሔር።

³⁴ ወከሠተ አፉሁ ጴጥሮስ ወይቤ አማነ ርኢኩ ከመ ኢያደሉ እግዚአብሔር ለገጽ።

³⁵ አላ በኵሉ አሕዛብ ዘይፈርሆ ወይገብር ጽድቀ ኅሩይ ውእቱ በኀቤሁ።

³⁶ ወፈነወ ቃሎ ለደቂቀ እስራኤል ወዜነዎሙ ሰላመ በኢየሱስ ክርስቶስ ዘውእቱ እግዚእ ለኵሉ።

³⁷ ተአምሩ ለሊክሙ ኵሎ ነገረ ዘኮነ በይሁዳ እኂዞ እምገሊላ እምድኅረ ጥምቀት ዘሰበከ ዮሐንስ።

³⁸ በኢየሱስ ዘእምናዝሬት ዘቀብዖ እግዚአብሔር መንፈሰ ቅዱሰ ወኀይለ ወውእቱ መጽአ ወረድኦሙ ለእለ ይትዔገሎሙ ሰይጣን እስመ እግዚአብሔር ምስሌሁ።

³⁹ወንሕነ ኵልነ ሰማዕቱ በዘገብረ በይሁዳ ወበኢየሩሳሌም ወቀተልዎ ሰቂሎሙ ዲበ ዕፅ።

⁴⁰ወእግዚአብሔር አንሥኦ እሙታን በሣልስት ዕለት ወወሀቦ ከመ ያስተርኢ ገሃደ።

⁴¹ ወአኮሰ ለኵሉ ሕዝብ አላ ዳእሙ ለእለ ይከውኑ ስምዐ እለ ኀረዮሙ እምትካት ወንሕነ እሙንቱ እለ በላዕነ ወሰተይነ ምስሌሁ እምድኅረ ተንሥአ እሙታን አርብዓ ዕለተ።

⁴² ወአዘዘነ ከመ ንስብክ ወንንግር ለሕዝብ ከመ ውእቱ ዘተሠይመ በኀበ እግዚአብሔር መኰንነ ሕያዋን ወምዉታን።

⁴³ ወኵሎሙ ነቢያት ሰማዕቱ ከመ በስመ ዚኣሁ ይትኀደግ ሎሙ ኀጢአቶሙ ለኵሎሙ እለ የአምኑ ቦቱ።

⁴⁴ወእንዘ ይነግሮሙ ጴጥሮስ ዘንተ ነገረ ወረደ መንፈስ ቅዱስ ዲበ ኵሎሙ እለ ሰምዑ ዘንተ ነገረ።

⁴⁵ወደንገፁ ኵሎሙ ምእመናን እለ እምውስተ አይሁድ እለ መጽኡ ምስለ ጴጥሮስ እስመ ዲበ አሕዛብኒ ወረደ ጸጋሁ ለመንፈስ ቅዱስ።

⁴⁶ ወሰምዕዎሙ ይነብቡ በነገረ በሐውርት ወይሴብሕዎ ለእግዚአብሔር።

⁴⁷ወይቤ ጴጥሮስ መኑ እንከ ይክል ይክልኦሙ ማየ ከመ ኢይጠመቁ ቦቱ እምድኅረ ነሥኡ መንፈሰ ቅዱሰ ከማነ።

⁴⁸ ወአዘዞሙ ይጠመቁ በስሙ ለኢየሱስ ክርስቶስ ወእምዝ አስተብቍዕዎ ለጴጥሮስ ከመ ይንበር ኀቤሆሙ ኅዳጠ መዋዕለ።