Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 12 Bible Online

ግብረ ሐዋርያት 12 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 12

¹ ወውእተ አሚረ አኀዞሙ ሄሮድስ ለሥዩማነ ቤተ እግዚአብሔር ወአሕመሞሙ።

²ወቀተሎ ለያዕቆብ እኁሁ ለዮሐንስ በሰይፍ።

³ወርእዮ ከመ ተፈሥሑ አይሁድ አኀዞ ካዕበ ለጴጥሮስ ወበዓለ ፋሲካ ውእተ አሚረ።

⁴ ወእኂዞ ሞቅሖ ወወሀቦሙ ለዐሠርቱ ወስድስቱ ሠገራት እለ የዐቅብዎ ወፈቀደ እምድኅረ ፋሲካ ያቅርቦ ኀበ ሕዝብ።

⁵ወየዐቅብዎ ለጴጥሮስ በቤተ ሞቅሕ ወይጼልዩ ወትረ ኀበ እግዚአብሔር በእንቲኣሁ በቤተ ክርስቲያን።

⁶ወበይእቲ ሌሊት እንተ ጸቢሖ ፈቀደ ሄሮድስ ከመ ይመጥዎ ለአይሁድ ወእንዘ ይነውም ጴጥሮስ ማእከለ ክልኤቱ ሠገራት ወሙቁሓት ክልኤሆን እደዊሁ በሰናስል ወዐቀብት የዐቅቡ አናቅጸ ቤተ ሞቅሕ።

⁷ ወወረደ መልአከ እግዚአብሔር ወቆመ ኀቤሁ ወአብርሀ ውስተ ውእቱ ቤት ወጐድኦ መልአክ ገቦሁ ለጴጥሮስ ወአንቅሖ ወይቤሎ ተንሥእ ፍጡነ ወወድቃ መዋቅሕት እምእደዊሁ።

⁸ወይቤሎ ውእቱ መልአክ ቅንት ሐቌከ ወተሠአን አሣእኒከ ወገብረ ከማሁ ወይቤሎ ተዐጸፍኬ ልብሰከ ወነዓ ትልወኒ።

⁹ወወፅአ ወተለዎ ወኢያእመረ ጴጥሮስ ከመ እሙነ አስተርአዮ መልአክ አላ ሕልመ ዘየሐልም ይመስሎ።

¹⁰ወወፂኦሙ ቀዳማዌ ዐጸደ ወካልአ በጽሑ ኀበ ኆኅተ ኀጺን ወተርኅወት ሶቤሃ ለሊሃ ወወፂኦሙ ሖሩ አሐተ ሰኰተ ወኀደጎ ዝኩ መልአክ ለጴጥሮስ።

¹¹ ወገብአ ልቡ ለጴጥሮስ ሶቤሃ ወይቤ ይእዜ አእመርኩ ከመ በአማን ፈነወ እግዚአብሔር መልአኮ ወአድኀነኒ እምእዴሁ ለሄሮድስ ወእምኵሉ ተስፋሆሙ ለሕዝበ አይሁድ።

¹² ወእምዝ ሖረ ቤተ ማርያም እሙ ለዮሐንስ ዘተሰምየ ማርቆስ ኀበ ሀለዉ ብዙኃን አኀው ጉቡኣን ወይጼልዩ።

¹³ወጐድጐደ ጴጥሮስ ኆኅተ ወመጽአት ታርኅዎ ወለት እንተ ስማ ሮዴ።

¹⁴ወአእሚራ ቃለ ጴጥሮስ እምትፍሕሥት ኢያርኅወት ወሮጸት ወነገረቶሙ እንዘ ይቀውም ጴጥሮስ ኀበ ኆኅት።

¹⁵ ወይቤልዋ ተአብዲኑ ተዐገሢ ምዕረ ወይእቲሰ አጽደቀት ቃላ ወጐድጐደ በሕቁ ወይቤሉ መልአክኑ እንጋ ውእቱ።

¹⁶ወጐንደየ ጴጥሮስ እንዘ ይጐድጕድ ወሶበ አርኀውዎ ወርእይዎ ደንገፁ።

¹⁷ወይቤሎሙ አርምሙ ወነገሮሙ ዘከመ አውፅኦ እግዚአብሔር እምነ ሞቅሕ ወይቤሎሙ ንግርዎሙ ለያዕቆብ ወለኵሎሙ አኀዊነ ዘንተ ወወፅአ ወሖረ ካልአ ቤተ።

¹⁸ወጸቢሖ ተሀውኩ ሠገራት ፈድፋደ ወይቤሉ ምንተ ኮነ እንከ ጴጥሮስ።

¹⁹ ወኀሠሦ ሄሮድስ ወኀጢኦ ኰነኖሙ ለሠገራት ወአዘዘ ይቅትልዎሙ።

²⁰ ወእምዝ ወረደ እምይሁዳ ለቂሳርያ እስመ ተምዐ ላዕለ ሰብአ ጢሮስ ወሲዶና ወመጽኡ ኅቡረ ኀቤሁ ወአስተብቍዕዎ ለበላስጦን መጋቤ ንጉሥ ከመ ይዕርቆሙ እስመ ሲሳየ ብሔሮሙ ኮነ እምሄሮድስ ንጉሥ።

²¹ወእምዝ አሐተ ዕለተ ለብሰ ሄሮድስ ልብሰ መንግሥቱ ወነበረ ዐውደ ወአኀዘ ይኰንኖሙ።

²² ወአውየዉ ሕዝብ በቃለ እግዚአብሔር ወአኮ በቃለ ሰብእ።

²³ ወቀሠፎ መልአከ እግዚአብሔር ሶቤሃ እስመ ኢያእኰቶ ለእግዚአብሔር ወዐፂዮ ሞተ።

²⁴ ወቃለ እግዚአብሔር ዐብየ ወበዝኀ።

²⁵ወገብኡ በርናባስ ወሳውል እምኢየሩሳሌም ፈጺሞሙ መልእክቶሙ ወነሥእዎ ለዮሐንስ ዘተሰምየ ማርቆስ።