Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 14 Bible Online

ግብረ ሐዋርያት 14 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 14

¹ወበሀገረ ኢቆንዮን ቦኡ ምኵራበ አይሁድ ወአረሚ[19] ወነገሩ ዘከመ ይነግሩ ዘልፈ እስከ አምኑ ብዙኃን ጥቀ እምአይሁድ ወእምአረሚኒ።

² ወቢጸ አይሁድ እለ አበዩ ተበአሱ ምስለ አሕዛብ ወምስለ ሐዋርያት ወአጽዐርዋ ለነፍሶሙ።

³ ወነበሩ ጕንዱየ መዋዕለ እንዘ ይነግሩ በስሙ ለእግዚእነ እንዘ ውእቱ ያርኢ ሰማዕተ ቃለ ጸጋሁ ወይገብር ተኣምረ ወመንክረ በእደዊሆሙ።

⁴ወተናፈቁ ኵሉ ሀገር መንፈቆሙ መንገለ አይሁድ ወቦ እለሂ ኀበ ሐዋርያት።

⁵ወተበአሱ አይሁድ ወአረሚ ምስለ መላእክቲሆሙ ወአኀዙ ይጻዐሉ ወይትዋገሩ።

⁶ወርእዮሙ ሐዋርያት ጐዩ ውስተ አህጉረ ሊቃኦንያ ወልስጥራን ወደርቤን ወውስተ አድያም።

⁷ ወመሀሩ በህየ።

⁸ ወሀሎ አሐዱ ብእሲ በሀገረ ልስጥራን ዘፅዉስ እገሪሁ እምከርሠ እሙ ወዳእሙ ይነብር ግሙራ ወእምአመ ኮነ ኢሖረ።

⁹ወሰምዖ ለጳውሎስ እንዘ ይነግር ወነጸሮ ጳውሎስ ወርእዮ ከመ ቦ ሃይማኖት ወየሐዩ።

¹⁰ወይቤሎ በዐቢይ ቃል ለከ እብለከ በስሙ ለእግዚእ ኢየሱስ ክርስቶስ ተንሥእ[20] ወቁም በእገሪከ ርቱዐ ወሶቤሃ ተንሥአ ወሖረ።

¹¹ ወርእዮሙ አሕዛብ ዘገብረ ጳውሎስ ከልሑ በነገረ ሊቃኦንያ ወይቤሉ አማልክት ተመሰሉ ሰብአ ወወረዱ ኀቤነ።

¹²ወሰመይዎ ለበርናባስ ድያ ወለጳውሎስ ሄርሜን እስመ ውእቱ ሊቀ ትምህርቱ።

¹³ወአምጽኡ ማሬ ዘድዮስ ዘሀሎ ቅድመ ሀገር ምስለ አልሕምት ወመሣውዕ ኀበ አንቀጸ ዐጸደ ማኅደሮሙ ምስለ ሕዘቢሆሙ ወፈቀዱ ከመ ይሡዑ ሎሙ።

¹⁴ወሰሚዖሙ ሐዋርያት በርናባስ፥ ወጳውሎስ ሰጠጡ አልባሲሆሙ ወሖሩ ኀበ አሕዛብ ወከልሑ ሎሙ።

¹⁵ ወይቤልዎሙ አንትሙ ሰብእ ምንትኑ ዝ ነገር አኮኑ ከማክሙ ሰብእ ንሕነ ዘንመውት ወንሜህረክሙ ከመ ትኅድጉ ዘንተ ከንቶ ወትትመየጡ ኀበ እግዚአብሔር ሕያው ዘገብረ ሰማየ ወምድረ ወባሕረ ወኵሎ ዘውስቴቶሙ።

¹⁶ ወኀደጎሙ ለኵሎሙ አሕዛብ ይሑሩ በግዕዞሙ በዘቀዲሙ መዋዕል።

¹⁷ እንዘ ኢየኀድግ ርእሶ ዘእንበለ ሰማዕት ወይገብር ሠናይቶ ወይሁብ እምሰማይ ዝናመ ወያከርም በበዓመት ወያፈሪ ወያሠምር ከመ ያጽግበነ ወያስተፍሥሕ ልበነ።

¹⁸ወዘንተ ብሂሎሙ በዕፁብ አኅደግዎሙ ለአሕዛብ ኢይሡዑ ሎሙ።

¹⁹ ወእንዘ እሙንቱ ይሜህሩ በህየ መጽኡ አይሁድ እምአንጾኪያ ወኢቆንያ ወየውህዎሙ ለአሕዛብ ከመ ያሕሥሙ ልቦሙ ላዕሌሆሙ ወወገርዎ ለጳውሎስ ወሰሐብዎ ወአውፅእዎ አፍኣ እምሀገር ወመሰሎሙ ዘሞተ።

²⁰ወዖድዎ አርዳኢሁ ወተንሥአ ወቦአ ምስሌሆሙ ሀገረ ወበሳኒታ ሖረ ምስለ በርናባስ ሀገረ ደርቤን።

²¹ወመሀሩ በይእቲ ሀገር ወአብኡ ብዙኃነ ወገብኡ ሀገረ ልስጥራን ወኢቆንዮን ወአንጾኪያ።

²² ወአጽንዕዎሙ ነፍሶሙ ለሕዝብ ወመሀርዎሙ ያጥብዑ በሃይማኖት እስመ በብዙኅ ሕማም ሀለወነ ንባኣ ለመንግሥተ እግዚአብሔር።

²³ ወሤሙ ቀሲሳነ ላዕለ ቤተ ክርስቲያን ወጸለዩ ወጾሙ ወአማሕፀንዎሙ ለእግዚአብሔር ዘኪያሁ ተአመኑ።

²⁴ወኀሊፎሙ እምጲስድያ በጽሑ ጵንፍልያ።

²⁵ወነገሩ ቃሎሙ በሀገረ ጴርጌን ወወረዱ ኢጣልያ።

²⁶ ወእምህየ ነገዱ አንጾኪያ በኀበ ተውህበ ሎሙ ጸጋ እግዚአብሔር በእንተ ግብር ዘይገብሩ።

²⁷ ወበጺሖሙ አስተጋብኡ ኵሎ ሕዝበ ወነገሩ ኵሎ ዘገብረ ሎሙ እግዚአብሔር ወዘከመ አርኀወ ሎሙ እግዚአብሔር አናቅጸ ሃይማኖት ለአሕዛብ።

²⁸ወነበሩ ጕንዱየ መዋዕለ ምስለ አርድእት።