Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 17 Bible Online

ግብረ ሐዋርያት 17 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 17

¹ ወሖሩ አንፊጶል ወአጶሎንያ አህጉረ ወበጽሑ ተሰሎንቄ ኀበ ሀሎ ምኵራበ አይሁድ።

²ወቦአ ጳውሎስ ኀቤሆሙ በከመ ያለምድ ወነበረ ይትዋቀሦሙ ሠለስተ ሰናብተ እመጻሕፍት።

³ ወይፌክር ሎሙ ወያበጽሕ ከመሂ ይትቀተል ክርስቶስ ወከመሂ ይትነሣእ እምዉታን እንዘ ይብል ውእቱ ክርስቶስ ኢየሱስ ዘአነ ነገርኩክሙ።

⁴ወቦ እምውስቴቶሙ እለ አምኑ ወተለውዎሙ ለጳውሎስ ወለሲላስ ወኄራቶሙ ለአረማውያን ብዙኃን ወአንስትኒ ወዐበይቶሙ ብዙኃን።

⁵ወቀንኡ አይሁድ ላዕሌሆሙ ወአስተጋብኡ ሰብአ ምሥያጥ ቢጸ እኩያነ ወበጽሑ ወሆክዋ ለሀገር ወኀሠሥዎሙ ወደበዩ ቤተ ኢያሶን ወፈቀዱ ያውፅእዎሙ ኀበ ሕዝብ።

⁶ ወኀጢኦሙ ሰሐብዎ ለኢያሶን ወለቢጹሂ እለ ሀለዉ ህየ ወወሰድዎሙ ኀበ መኳንንት እንዘ የዐወይዉ ወይብሉ እሉ እሙንቱ እለ የሀውክዋ ለዓለም ወመጽኡ ዝየኒ።

⁷ ወተወክፎሙ ዝ ኢያሶን ወእሙንቱ ይገብሩ ማዕሌተ በላዕለ ቄሣር ወይሜህሩ ካልአ ሕገ ወይቤሉ ኢየሱስ ካልእ ንጉሥ።

⁸ወተሀውኩ ሕዝብ ወመኳንንት ዘንተ ሰሚዖሙ።

⁹ወብዙኀ ተሐልዮሙ እም ኀበ ኢያሶን ወእምኀበ ቢጹ ኀደግዎሙ።

¹⁰ወቢጾሙሰ ፈነውዎሙ በሌሊት ለጳውሎስ ወለሲላስ ውስተ ቤርያ ወቦኡ ምኵራበ አይሁድ።

¹¹ ወእሙንቱ ይኄይሱ እምእለ በተሰሎንቄ ወተወክፉ ቃሎሙ በኵሉ ትፍሥሕት ወኵሎ አሚረ የኀሥሡ በውስተ መጻሕፍት ለእመ ከማሁ ውእቱ።

¹²ወብዙኃን እምውስቴቶሙ እለ አምኑ ወአንስትኒ ብዙኃት አረማውያት ኄራት ወዕደውኒ ብዙኃን።

¹³ ወአእሚሮሙ አይሁድ እለ በተሰሎንቄ ከመ መሀረ ጳውሎስ ቃለ እግዚአብሔር በቤርያ ወመጽኡ ህየኒ ወሆክዎሙ ለሕዝብ።

¹⁴ወፈነውዎ ቢጹ ለጳውሎስ ሶቤሃ ወአብጽሕዎ መንገለ ባሕር ወነበሩ ሲላስ ወጢሞቴዎስ ህየ።

¹⁵ወእለሰ አስተፋነውዎ ለጳውሎስ መጽኡ ምስሌሁ እስከ ሀገረ አቴና ወለአኮሙ ኀበ ሲላስ ወጢሞቴዎስ ፍጡነ ይትልውዎ ወሖሩ።

¹⁶ወእንዘ ይጸንሖሙ ጳውሎስ በአቴና ተምዕዐ መንፈሱ ሶበ ርእየ ያጣዕዉ ኵሉ ሀገር።

¹⁷ወይትዋቀሦሙ ለአይሁድ በምኵራብ ወበምሥያጥ ኵሎ አሚረ ለዘተራከቦሙ።

¹⁸ወቦ እምውስተ ጠቢባን እለ እምትምህርተ ኤፊቆሮስ ወካልኣን ይሰመዩ ረቃይያነ እለ ተኣኀዝዎ ወመንፈቆሙ ይብሉ ምንተ ይፈቅድ ዝ ዘራዔ ነቢብ ወካልኣን ይቤሉ ትምህርተ አምላክ ሐዲስ ይሜህር እስመ ሰበከ ሎሙ በእንተ ኢየሱስ ወትንሣኤሁ እሙታን።

¹⁹ወወሰድዎ ቤተ ምኵናን ዘይሰመይ አርዮስፋጎስ ወይቤልዎ እስኩ ንግረነ ምንትኑ ዝ ነገር ዘትሜህር ትምህርተ ሐዲሰ።

²⁰ንፈቅድ ንጠይቅ ምንት ውእቱ።

²¹ወሰብአ አቴናሰ ወእለ ይነግዱ ኵሎሙ ህየ ባዕድ ትካዝ አልቦሙ ዘእንበለ ዳእሙ ለአጽምዖ ባሕቲቱ ወየኀሥሡ ዘይብሉ ወዘይነብቡ።

²²ወቆመ ጳውሎስ ውስተ አርዮስፋጎስ ወይቤሎሙ አንትሙ ሰብአ አቴና እሬእየክሙ ተአብዱ በኵሉ።

²³ወበጺሕየ ዝየ ርኢኩ ጣዖተክሙ ወምሥዋዒክሙ ኀበ ታመልኩ ወጽሑፍ ውስቴቱ ዘይብል አንጽሑ ርእሰክሙ ለእግዚአብሔር[21] ናሁኬ ርእዩ ከመ ኢተአምሩ ዘታመልኩ።

²⁴ወአንሰ እሜህረክሙ ታምልክዎ ለእግዚአብሔር ዘገብረ ዓለመ፥ ወምድረ ወኵሎ ዘውስቴቶሙ ዘውእቱ እግዚአ ሰማይ ወምድር ወኢይነብር ውስተ ቤት ዘገብሮ እደ ሰብእ ወኢይትለአኮ እደ ሰብእ ወኢይጽሕቅ ምንተኒ።

²⁵ ወውእቱ ይሁብ ለኵሉ ሰብእ ነፍሰ ወሕይወተ።

²⁶ ወገብረ ኵሎ ኅቡረ ወኵሎ አሕዛበ እምአሐዱ ዕጓለ እመሕያው ከመ ይንበሩ ዲበ ኵሉ ገጸ ምድር ወሠርዐ ዕድሜሁ ወዓመታቲሁ መጠነ ይነብሩ።

²⁷በዘየኀሥሥዎ ለእግዚአብሔር እመ ይረክብዎ ወያደምዕዎ ወኢኮነ ርኁቀ እምኵልነ።

²⁸እስመ ቦቱ ነሐዩሂ ወንትሐወስሂ ወንሄሉሂ ወሀለዉ ጠቢባን ሰብእ እምውስቴትክሙ እለ ይብሉ ከመ ፍጥረትነ እምኔሁ።

²⁹ ወእንዘ ዘመዱ እንከ እምኔሁ ንሕነ ለእግዚአብሔር ኢርቱዕ ናስተማስሎ በወርቅ ወበብሩር ወበእብን ዘግሉፍ በኪነ ዕጓለ እመሕያው ወበአእምሮቱ ኢይደሉኬ ናስተማስል መለኮቶ።

³⁰ወዘቀዲሙሰ መዋዕለ ኢያእምሮ አሰሰለ እግዚአብሔር ወይእዜ ባሕቱ አዘዘ ለኵሉ ሰብእ ይነስሑ በኵለሄ።

³¹ እስመ አቀመ ዕለተ እንተ ባቲ ይኴንን ዓለመ በጽድቅ ላዕለ እደዊሁ ለብእሲ ዘሠርዖ ወሜጦሙ ኀበ ሃይማኖት ለኵሉ ሰብእ ኪያሁ በአንሥኦ እሙታን።

³² ወሰሚዖሙ ሕይወተ እሙታን መንፈቆሙሰ ሰሐቅዎ ወካልኣን ይቤልዎ ናጸምዐከ በእንተዝ ካልአ ጊዜ።

³³ወወፅአ ጳውሎስ እማእከሎሙ።

³⁴ወቦ ዕደው እለ አምኑ ወተለውዎ ወአሐዱ እምኔሆሙ ዲዮናስዮስ እመኳንንት ዘአርዮስፋጎስ ወብእሲት እንተ ስማ ደማሪስ ወቦ ባዕዳንሂ እለ ምስሌሆሙ።